केन्द्र सरकार के उद्योग अउ आतंरिक व्यापार संवर्धन विभाग कोति ले राखे गे ‘उद्योग संगम‘ म राज्य ल बिजनेस रिफॉर्म एक्शन प्लॉन के चारों प्रमुख श्रेणी म ‘टॉप अचिवर‘ घोषित करे गेहे। गुजरात के अहमदाबाद म राखे गे इन्वेटर्स कनेक्ट कार्यक्रम म केन्द्रीय वाणिज्य अउ उद्योग मंत्री पीयूष गोयल ह छत्तीसगढ़ के उद्योग मंत्री लखनलाल देवांगन अउ निवेस आयुक्त रीतू सेन ल सम्मानित करीन। ए उपलब्धि के संगेसंग छत्तीसगढ़ अब गुजरात, महाराष्ट्र अउ तमिलनाडु जइसन औद्योगिक राज्य के श्रेणी म आ गेहे।
मुख्यमंत्री विष्णुदेव साय ह छत्तीसगढ़ के ए उपलब्धि म खुसी जतईन हे। ओमन किहीन कि छत्तीसगढ़ ह आखिरी पायदान ले उठके देस के औद्योगिक राज्य के लाइन म अपन जगह बनाय हे। छत्तीसगढ़ अब ‘ईज ऑफ डूइंग‘ बिजनेस ले आगू बाढ़के ‘ईज ऑफ लिविंग‘ के प्रतीक बन गेहे।
कलिंगा विश्वविद्यालय-दीक्षांत समारोह
नवा रायपुर के कलिंगा विश्वविद्यालय म आज पांचवां दीक्षांत समारोह राखे गीस। समारोह म राज्यपाल रमेन डेका ह बछर दू हजार तेईस-चौबीस अउ पच्चीस के विद्यार्थी मन उपाधि अउ पदक दीन। ए मउका म डेढ़ सौ सोधार्थी मन ल पीएचडी, पन्द्रह सौ विद्यार्थी मन ल स्नातकोत्तर अउ ढाई हजार पढ़ईया लइका मन ल स्नातक के उपाधि दीन।
समारोह म बोलत राज्यपाल ह विद्यार्थी मन ले किहीन कि अनुसासित अउ समय के पाबंद होही, त सफलता जरूर मिलही। राज्यपाल ह किहीन कि राष्ट्रीय शिक्षा नीति म शिक्षक मनके बड़ भूमिका हे। एखर बर सिक्षक अउ विद्यार्थी मनके बीच गोठबात होना चाही। ए मउका म राज्यपाल ह विश्वविद्यालय परिसर म ‘एक पेड़ मां के नाम अभियान‘ म पौधा लगईन।
समारोह म उच्च सिक्षा मंत्री टंकराम वर्मा समेत राज्य निजी विश्वविद्यालय विनियामक आयोग के अध्यक्ष वी.के. गोयल, कलिंगा विश्वविद्यालय के अध्यक्ष राजीव कुमार, कुलाधिपति संदीप अरोरा अउ कुलपति आर. श्रीधर समेत विश्वविद्यालय के सिक्षक, विद्यार्थी अउ उंखर अभिभावक मौजूद रिहीन।
राष्ट्रीय राजमार्ग-मरम्मत कार्य
लोक निर्माण विभाग के सचिव डॉक्टर कमलप्रीत सिंह ह आज प्रदेसभर म चलत राष्ट्रीय राजमार्ग के मरम्मत काम के समीक्षा करीन। डॉक्टर सिंह ह राष्ट्रीय राजमार्ग परिक्षेत्र के अधिकारी मनके बइठका लेके सबो रद्दा के मरम्मत के काम दिसंबर तक पूरा करे के निरदेस दीन। ओमन राष्ट्रीय राजमार्ग के मरम्मत के दउरान ठेकेदार मन ले अल्पकालिक रखरखाव अनुबंध के काम कराय बर किहीन। ओमन किहीन कि जउन रद्दा के मरम्मत के काम सुरू होगे हे, ओ रूकना नइ चाही। ओमन रद्दा दुर्घटना ल रोके, चिन्हारी करे गे जघा ल सुधारे बर काम करे के निरदेस दीन। संगेसंग लोगन के सुभीता बर मार्ग संकेतक लगाय बर किहीन।
डूमरपानी-सर्वश्रेष्ठ ग्राम पंचायत
कांकेर जिला के डूमरपानी ग्राम पंचायत ल जल संरक्षण के क्षेत्र म सर्वश्रेष्ठ ग्राम पंचायत श्रेणी म तीसर स्थान मिले हे। केन्द्रीय जलशक्ति मंत्रालय कोति ले अट्ठारह नवंबर के नई दिल्ली म होवइया छठवां राष्ट्रीय जल पुरस्कार समारोह म राष्ट्रपति द्रौपदी मुर्मु डूमरपानी ग्राम पंचायत ल सम्मानित करही। ग्राम पंचायत डूमरपानी ह मनरेगा अउ आने विभागीय योजना ले जल स्त्रोत के पुनर्जीवन, वर्षा जल संचयन अउ निस्तारी तरिया के संरक्षण जइसन काम करे हे।
कांकेर जिला कलेक्टर नीलेश कुमार महादेव क्षीरसागर ह ए उपलब्धि बर ग्राम पंचायत डूमरपानी के सरपंच, पंचायत प्रतिनिधि, जिला पंचायत के टीम अउ गांव के लोगन ल बधाई दीन हे।
खबर के मुताबिक जल संसाधन नदी विकास अउ गंगा पुनर्जीवन विभाग कोति ले मिलइया ए पुरस्कार के उद्देश्य जल संरक्षण म स्थानीय निकाय के नवाचार ल बढ़ावा देना हे।
साइबर ठगी-आरोपी गिरफ्तार
दंतेवाड़ा पुलिस ह साइबर ठगी के मामला म मध्यप्रदेश ले चार झिन आरोपी ल गिरफ्तार करे हे। ए आरोपी फेसबुक अउ आने सोशल मीडिया म विज्ञापन करके लोगन ल जादा मुनाफा के लालच देके ठगी करत रिहीन। पुलिस सौ ले जादा खाता म करे गे लेनदेन के जांच करके आरोपी तक पहुंचीन अउ ओमन ल गिरफ्तार करीन। दंतेवाड़ा पुलिस ह साइबर ठगी होय म लोगन मन बर हेल्पलाइन नंबर एक-नौ-तीन-शून्य म सूचित करे बर किहीन हे।
एआईआर-गणना प्रपत्र
प्रदेस म मतदाता सूची के विशेष गहन पुनरीक्षण-एसआईआर के काम चलत हे। बूथ लेवल अधिकारी-बीएलओ कोति ले अब तक प्रदेश के एक करोड़ तेरह लाख ले जादा मतदाता मन ल गणना प्रपत्र बांटे गेहे। मतदाता खुदे वोटर्स डॉट ईसीआई डॉट जीओवी डॉट इन ले अपन गणना प्रपत्र ऑनलाइन भर सकत हे। संगेसंग हेल्पलाइन नंबर एक-नौ-पांच-शून्य म फोन करके मतदाता कोनों भी किसम के जानकारी या मदद ले सकत हे। ईसीआईएनईटी मोबाइल ऐप ले ‘‘बुक ए कॉल विथ बीएलओ‘‘ सुभिता हवय, जेमा मतदाता अपन बूथ लेवल अधिकारी ले सोझे गोठबात कर सकथे। गणना प्रपत्र भरे म मदद बर हरेक विधानसभा क्षेत्र स्तर म जिला प्रशासन कोति ले वॉलिंटियर्स के भर्ती करे गेहे। संगेसंग सबो राजनीतिक दल कोति ले बूथ लेवल एजेंट के भर्ती घलो होय हे, जउन मतदाता मन ल गणना प्रपत्र भरे म मदद देवत हे।
मुख्य निर्वाचन पदाधिकारी ह सबो मतदाता मन ले अपील करे हे कि ओमन मतदाता सूची के विशेष गहन पुनरीक्षण कार्यक्रम म मदद देवय।
दवा कंपनी-ब्लैक लिस्ट
छत्तीसगढ़ मेडिकल सर्विसेज कारपोर्रेशन लिमिटेड-सीजीएमएससी ह तीन ठिन दवई के अमानक पाय जाय म दवा कंपनी ल अवइया तीन बछर बर ब्लैक लिस्ट कर देहे। कारपोर्रेशन के मुताबिक संबंधित आपूर्तिकर्ता अब ब्लैक लिस्टिंग के बेरा सिराय तक कोनों भी किसम के नवा निविदा म भाग नइ ले सकय। संगेसंग कंपनी ल ब्लैक लिस्ट करे बर कार्रवाई करे जात हे। जउन दवा कंपनी ल ब्लैक लिस्ट करे गेहे, ओमा हिमाचल प्रदेस के दवा कंपनी मेसर्स एजी पैरेंटेरल्स अउ गुजरात के मेसर्स डिवाइन लेबोरेट्रीज प्राईवेट लिमिटेड सामिल हे।
स्वास्थ्य मंत्री श्यामबिहारी जायसवाल ह किहीन कि मरीज मनके सुरक्षा राज्य सरकार के प्राथमिकता हरय। एमा कोनों किसम के समझौता नइ करे जाही। ओमन किहीन कि आगू घलो दवा गुणवत्ता ले जुड़े कोनों भी किसम के कोताही म कार्रवाई करे जाही।
भिलाई आईआईटी-छात्र मौत
भिलाई म भारतीय प्रौद्योगिकी संस्थान-आईआईटी म काली बिहनिया एक छात्र के तबीयत बिगड़े के बाद ओला सुपेला के एक अस्पताल ले जाय गीस, जिहां डॉक्टर मन ह ओला मृत घोषित कर दीन। छात्र के मउत के बाद आईआईटी कैंपस म विद्यार्थी मन ह सुरक्षा व्यवस्था म खामी ल लेके हंगामा करीन। ए मामला म आईआईटी भिलाई के डायरेक्टर राजीव प्रकाश ह चिकित्सा अधिकारी डॉक्टर अतुल श्रीवास्तव ल कोताही करे के आरोप म निलंबित कर देहे। मउत होय छात्र मध्यप्रदेश के नर्मदापुरम के रहवइया रिहीस अउ भिलई म इलेक्ट्रिकल इंजीनियरिंग के बीटेक पहिली सेमेस्टर के पढ़ई करत रिहीस हे।
मुक्तिबोध राष्ट्रीय नाट्य समारोह
छत्तीसगढ़ फिल्म एंड विजुअल आर्ट सोसायटी कोति ले रायपुर के रंग मंदिर म आज ले मुक्तिबोध राष्ट्रीय नाट्य समारोह के आयोजन करे जाही। पांच दिवसीय ए समारोह के पहिली दिन आज संझा सात बजे रचना मिश्रा कोति ले निरदेसित नाटक ‘वापसी‘ अउ प्रिया माथुर ठाकुर कोति ले निर्देसित नाटक ‘आपस की बात‘ के प्रदर्सन करे जाही। उहें, काली डॉक्टर सुयोग्य पाठक अउ रचना मिश्रा कोति मुक्तिबोध के कविता के प्रस्तुति दे जाही। एखर संगेसंग रामधारी सिंह दिनकर के रचे कविता ‘रश्मिरथी‘ के मंचन करे जाही।
पुलिस हिरासत-मौत
बलरामपुर जिला म चोरी के आरोप म गिरफ्तार युवक के पुलिस हिरासत म मउत के बाद परिवार वाले मन नाराजगी जताय हे। उहें, पुलिस के कहना हे कि युवक के मउत इलाज के दउरान होय हे। पुलिस के मुताबिक आरोपी ल सिकलसेल के बीमारी रिहीस। पूछताछ के दउरान तबीयत बिगड़े म ओला अस्पताल ले जाय गीस, जिहां इलाज के दउरान ओखर मउत होगे। अतिरिक्त पुलिस अधीक्षक ह किहीन कि मामला के न्यायिक जांच के आदेस दे गेहे। रिपोर्ट के आधार म आगू के कार्रवाई करे जाही।
खबर के मुताबिक पाछु तीस अक्टूबर के बलरामपुर के एक ज्वेलर्स म जेवर अउ नगदी के चोरी होय रिहीस। पुलिस ह एमा पांच झिन आरोपी अउ चोरी के माल बिसाय के आरोप म चार झिन आने लोगन ल गिरफ्तार करे रिहीस।