नई दिल्ली म लालकिला के तीर काली संझा होय कार विस्फोट मामला म आठ लोगन के मउत होगे हे अउ कई झिन मनखे मन घायल होगे हे। भूटान के थिम्पू म एक ठिन कार्यक्रम ल संबोधित करत प्रधानमंत्री नरेन्द्र मोदी ह किहीन कि ए भयानक घटना के षड़यंत्रकारी मन ल बख्शे नइ जाय अउ एखर जिम्मेदार लोगन मन ल न्याय के कटघरा म लाय जाही। ओमन किहीन कि आज ओमन बहुत भारी मन ले भूटान आय हवय अउ काली संझा दिल्ली म होय घटना ले जम्मों झन व्यथित हे।
ए घटना म मुख्यमंत्री विष्णुदेव साय ह घलो दुख जताय हे। ओमन किहीन कि ए घटना पूरा देस ल व्याकुल कर देहे। ओमन किहीन कि केन्द्र सरकार अउ केन्द्रीय एजेंसी मन ह स्थिति के सरलग समीक्षा करत हे अउ प्रभावित मन ल हरसंभव मदद करत हे। श्री साय ह सांति अउ संयम के अपील करत किहीन कि ए कठिन घड़ी म देस के जम्मों झन पीड़ित परिवार वाले मनके संग हवय।
ए घटना के बाद रायपुर अउ दुरूग समेत जम्मों जिला म प्रसासन ह सुरक्षा ल देखत हाई अलर्ट जारी करे हे। दुरूग के वरिष्ठ पुलिस अधीक्षक विजय अग्रवाल ह बतईन कि रेलवे स्टेसन, बस स्टैंड ले लेके प्रमुख बाजार अउ सार्वजनिक जघा मन म पुलिस अउ सुरक्षा बल के तैनाती बढ़ा दे गेहे।
इन्वेस्टर कनेक्ट
अहमदाबाद म आज इन्वेस्टर कनेक्ट कार्यक्रम के आयोजन करे गीस। एमा छत्तीसगढ़ ल करीबन तैंतीस हजार करोड़ रूपिया के निवेस के प्रस्ताव मिले हे। एखर ले राज्य म दस हजार पांच सौ ले जादा लोगन मन ल रोजगार के मउका मिलही। मुख्यमंत्री विष्णुदेव साय ह थर्मल पावर प्लांट, ग्रीन स्टील मैन्युफैक्चरिंग, सोलर सेल, फार्मास्युटिकल उत्पाद अउ मेडिकल फूड सप्लीमेंट जइसन क्षेत्र के कंपनी मन ल निवेस प्रस्ताव पत्र सौंपीन।
ए मउका म मुख्यमंत्री ह देस के बड़का उद्योगपति अउ बिजनेस लीडर्स ले राज्य म निवेस के संभावना उपर चर्चा करीन। ओमन किहीन कि गुजरात अउ छत्तीसगढ़ मिलके विकसित भारत के निर्माण म महत्वपूर्ण भमिका निभाही।
माओवादी मुठभेड़
बीजापुर जिला म आज सुरक्षा बल के संग होय मुठभेड़ में छह माओवादी मारे गेहे। ए मुठभेड़ बीजापुर के नेशनल पार्क इलाका म आज बिहनिया ले चलत हे।
बीजापुर के पुलिस अधीक्षक डॉक्टर जितेन्द्र यादव ह बतईन कि ए इलाका म माओवादी मनके मौजूदगी के खुफिया सूचना मिले के बाद दंतेवाड़ा अउ बीजापुर के डिस्ट्रिक्ट रिजर्व गार्ड-डीआरजी तथा स्पेशल टॉस्क फोर्स-एसटीएफ के सामलात टीम ल सर्च ऑपरेसन बर रवाना करे गीस। आज बिहनिया ले नेशनल पार्क क्षेत्र म सुरक्षा बल अउ माओवादी मनके बीच रूक-रूक के फायरिंग होवत हे। अब तक घटनास्थल ले छह माओवादी मनके सव बरामद करे जा चुके हे। एखर संगेसंग मउका ले माओवादी मनके ऑटोमेटिक हथियार, स्टेनगन, इंसास रायफल समेत आने-आने हथियार समेत विस्फोटक सामान घलो बरामद करे गेहे।
बस्तर रेंज के पुलिस महानिरीक्षक सुंदरराज पी. ह बतईन कि घटना स्थल के तीर-तखार क्षेत्र म आने-आने सुरक्षा बल अउ पुलिस के उपराह टीम भेजे गेहे, जेखर ले मउका ले फरार माओवादी मनके घेराबंदी करे जा सकय। ए ऑपरेशन अभी चलत हे।
ओति, गरियाबंद जिला म मैनपुर थाना क्षेत्र के तीर दर्रीपारा के जंगल म घलो पुलिस अउ माओवादी मनके बीच मुठभेड़ होइस। जानकारी के मुताबिक सेम्हरा के पहाड़ म पहिलीच ले मौजूद माओवादी मन ह पुलिस पार्टी उपर गोलीबारी सुरू कर दीन। जवान मन डहार ले करे गे जवाबी कार्रवाई के बाद माओवादी मन जंगल कोति भगा गे। तलासी के दउरान जवान मन ह माओवादी मनके सामान ल बरामद करे हे।
विजय शर्मा-पूवर्ती गांव
उपमुख्यमंत्री विजय शर्मा काली सुकमा जिला के पूवर्ती गांव पहुंचीन, जिहां ओमन जनचौपाल लगईन। ए चौपाल म गांव वाले अउ पूवर्ती गांव ले जुड़े नक्सल लीडर माड़वी हिड़मा अउ बारसे देवा के परिवार वाले मन घलो सामिल होइन। जनचौपाल के दउरान उपमुख्यमंत्री ह माओवादी मन ले समाज के मुख्यधारा म वापिस लहुटे के अपील करीन। उहें, नक्सली लीडर के मां घलो अपन लइका मन ले हथियार छोड़के समाज के बीच रहिके विकास म भागीदार बने बर कहिन।
उपमुख्यमंत्री श्री शर्मा ह पूवर्ती गांव म स्थापित एक सौ पचासवां बटालियन के कैंप म जाके नक्सल मोर्चा म काम करत केन्द्रीय सशस्त्र बल अउ पुलिस मनके जवान मन ले भेंट करके उंखर हौसला बढ़ईन। ओमन कैंप परिसर के निरीक्षण करके जवान मन ले सुरक्षा व्यवस्था, क्षेत्र के परिस्थिति अउ उहां चलत विकास काम के जानकारी लीन।
हाईकोर्ट-खराब सड़क
बिलासपुर सहर के खराब सड़क के मामला म सुनवाई करत छत्तीसगढ़ उच्च न्यायालय ह राज्य सासन डहार ले सपथ पत्र पेस नइ करे म नाराजगी जताय हे। संगेसंग एक हजार रूपिया के जुर्माना लगाय हे। कोर्ट ह सासन ले सड़क ले जुड़े चलत काम के स्थिति अउ प्रगति म एक बार फेर जवाब पेस करे बर केहे हे।
बिलासपुर-यूनिटी मार्च
लौह पुरूष सरदार वल्लभभाई पटेल के एक सौ पचासवां जयंती के मउका म बिलासपुर सहर म ‘‘यूनिटी मार्च‘‘ के आयोजन करे गीस। एमा बड़ संख्या म युवा मन ह भाग लेके देस के एकता, अखंडता अउ राष्ट्रीय एकजुटता के संदेस दीन।
कार्यक्रम के सुरूआत तिफरा स्थित मां काली मंदिर परिसर ले होइस, जिहां केन्द्रीय राज्यमंत्री तोखन साहू, पूर्व विधानसभा अध्यक्ष धरमलाल कौशिक अउ विधयक अमर अग्रवाल ह माता काली के दर्सन करके पूजापाठ करीन। एखर बाद केन्द्रीय मंत्री ह हरा झंडी दिखाके यूनिटी मार्च के सुभारंभ करीन। यूनिटी मार्च हस्ताक्षर अभियान म माईपहुना अउ सैकड़ों लोगन मन ल दस्तखत करीन अउ लौह पुरूष ल सुरता करीन।
गुजरात-भारत वर्ष
लौह पुरूष सरदार वल्लभभाई पटेल के एक सौ पचासवां जयंती के मउका म काली गुजरात के केवड़िया म भारत पर्व के आयोजन करे गीस। एमा मुख्यमंत्री विष्णुदेव साय घलो सामिल होइन। ए मउका म श्री साय ह किहीन कि भारत पर्व हमर देस के विविधता म एकता के प्रतीक हरय।
बस्तर ओलंपिक-जिला स्तरीय प्रतियोगिता
बस्तर ओलंपिक के तहत काली ले जिला स्तरीय खेल प्रतियोगिता सुरू होही, जउन ह पन्द्रह नवंबर तक चलही। ए दउरान तीरंदाजी, एथलेटिक्स, कराटे, वेटलिफ्टिंग, खो-खो, रस्साकसी, वॉलीबॉल, कबड्डी, बैडमिंटन अउ फुटबॉल जइसन खेल के प्रतियोगिता आयोजित करे जाही। काली पहिली दिन कोंडागांव जिला म चौदह ले सत्रह बछर आयु के बालिका वर्ग म प्रतियोगिता आयोजित करे जाही। उहें, दूसर दिन तेरह नवंबर के सत्रह बछर ले जादा आयु वर्ग के माईलोगिन अउ चौदह नवंबर के सत्रह बछर ले जादा उमर वर्ग के पुरूष के बीच खेल प्रतियोगिता होही। अइसने, पन्द्रह नवंबर के चौदह ले सत्रह बछर उमर वर्ग के बालक वर्ग के प्रतियोगिता आयोजित करे जाही।
नार्थ अमेरिका-नाचा
उत्तरी अमेरिका म राहत प्रवासी छत्तीसगढ़ी के संगठन नार्थ अमेरिका छत्तीसगढ़ एसोसिएशन-नाचा ह अमेरिका के सैन फ्रांसिस्को स्थित भारतीय दूतावास म छत्तीसगढ़ राज्य के स्थापना दिवस मनईस। ए मउका म छत्तीसगढ़ के समृद्ध संस्कृति, परंपरा अउ लोककला के झलक देखे बर मिलीस। ए मउका म लगाय गे स्टॉल म छत्तीसगढ़ के उत्पाद, हस्तशिल्प लोककला अउ पारंपरिक आभूषण के सुघ्घर प्रदर्सन करे गीस।
मुख्यमंत्री विष्णुदेव साय ह नाचा बे एरिया चैप्टर के जम्मों सदस्य मन ल बधाई देवत किहीन कि उंखर ए प्रयास छत्तीसगढ़ के गौरवशाली पंरपरा मन ल वैश्विक मंच म स्थापित करे के दिसा म एक प्रेरणादायक कदम हवय।
अउ अब थोरकुन समाचार सार म –
– मुख्यमंत्री विष्णुदेव साय के पगरइति म चौदह नवंबर के मंत्रालय म राज्य मंत्रिपरिषद के बइठका राखे जाही।
– केन्द्रीय सहकारिता विभाग के संयुक्त संचालक रेणु शेखावत ह आज नवा रायपुर स्थित छत्तीसगढ़ राज्य सहाकरी बैंक के प्रदेस म संचालित ‘‘सहकार ले समृद्धि‘‘ कार्यक्रम के प्रगति के समीक्षा करीन।
अउ
– महासमुंद जिला के बसना थाना क्षेत्र म पुलिस ह दू झिन अंतर्राज्यीय गांजा तस्कर ल गिरफ्तार करके उंखर तीर ले साठ किलो गांजा बरामद करे हे। जब्त गांजा के कीमत करीबन बारह लाख रूपिया बताय जावत हे।