इही बीच, मुख्यमंत्री विष्णुदेव साय ह आज गुजरात के गांधी नगर म ‘‘न्यू अ मेकर्स इंस्टीट्यूट ऑफ टेक्नालॉजी-नेमटेक‘‘ के भ्रमण करीन। ए संस्थान ह उत्पादन, इंजीनियरिंग अउ टेक्नालॉजी के पढ़ाई ल नवा अउ आधुनिक तरीका ले सिखाय बर जाने जाथे।
अंतर्राष्ट्रीय सम्मेलन-सहकारी कुंभ
केंद्रीय गृह अउ सहकारिता मंत्री अमित शाह ह किहीन हे कि सहरी सहकारी बैंक ल महत्वाकांक्षी युवा अउ समाज के वंचित वर्ग ल सशक्त बनाय बर आगू आना चाही। आज नई दिल्ली म सहरी सहकारी ऋण क्षेत्र म एक अंतर्राष्ट्रीय सम्मेलन-सहकारी कुंभ-दू हजार पच्चीस के उद्घाटन करत हुए श्री शाह ह ए बात ल किहीन। ओमन ए घलो किहीन कि पांच बछर के भीतरी म दू लाख ले जादा आबादी वाले हरेक कस्बा म एक सहरी सहकारी बैंक बनाय के लक्ष्य होना चाही।
आईआईटी भिलाई-दीक्षांत समारोह
भारतीय प्रौद्योगिकीय संस्थान-आईआईटी भिलाई के पांचवां दीक्षांत समारोह ह आज आयोजित होइस, जेमा जम्मू कश्मीर के उपराज्यपाल मनोज सिन्हा ह मुख्य अतिथि के रूप म सामिल होइन। ए बेरा म दू हजार पच्चीस के स्नातक बैच के दू सौ उनहत्तर पढ़इया लइका मन ल उपाधि दे गीस। जेमा पच्चीस डॉक्टर ऑफ फिलॉसफी, चौबीस मास्टर ऑफ साइंस, अंठावन मास्टर ऑफ टेक्नालॉजी, दस बैचलर ऑफ टेक्नालॉजी-बीटेक ऑनर्स अउ एक सौ बावन बैचलर ऑफ टेक्नालॉजी-बीटेक के छात्र मन सामिल हरय।
ए कारीकरम के अध्यक्षता आईआईटी भिलाई के बोर्ड ऑफ गवर्नर्स के अध्यक्ष ह करीन।
मुख्यमंत्री-कल्चुरी कलार समाज
मुख्यमंत्री विष्णुदेव साय ह बिलासपुर जिला के रतनपुर म होय कल्चुरी कलार समाज के महासम्मेलन म सामिल होइन। संगेसंग ओमन ह रतनपुर म सौ बिस्तर वाले अस्पताल के स्थापना अउ कल्चुरी समाज के सामुदायिक भवन ल बनाय बर एक करोड़ रूपिया के रासि ल स्वीकृत करे के घोसना करीन।
एसआईआर-गणना प्रपत्र
प्रदेस म मतदाता सूची के बिसेस गहन पुनरीक्षण-एसआईआर के चलत अब तक करीबन तिरालीस लाख मतदाता मन ल गणना प्रपत्र बांटे जा चुके हे, जउन कि मतदाता मनके कुल संख्या के लगभग इक्कीस प्रतिसत हरय। प्रदेस म पंजीकृत मतदाता मनके कुल संख्या दू करोड़ बारह लाख तीस हजार सात सौ सैंतीस हे। चार नवंबर ले एसआईआर के सुरूआत के बाद ले बीएलओ मन ह घर-घर पहंच के मतदाता मन ल गणना प्रपत्र बांटत हे।
इही बीच, रईपुर-पश्चिम विधानसभा क्षेत्र म भारतीय जनता पार्टी कोति ले मतदाता गहन पुनरीक्षण कार्यसाला के आयोजन करे गीस। ए कार्यसाला ह गुढ़ियारी मंडल अउ तात्यापारा मंडल म संपन्न होइस, जेमा बूथ स्तर के पदाधिकारी, कार्यकर्ता अउ बीएलओ मन ह बड़का संख्या म रिहीन। गुढ़ियारी मंडल के कार्यसाला म भाजपा के प्रदेस महामंत्री यशवंत जैन ह मुख्य वक्ता के रूप म उपस्थित रिहीन। उहें, तात्यापारा मंडल रईपुर-पश्चिम के विधायक राजेश मूणत ह कार्यकर्ता मन ल संबोधित करत होय प्रसिक्षण दीन।
राज्यपाल सड़क-दुर्घटना
राज्यपाल रमेन डेका ह रईपुर म सरलग बिगड़त यातायात बेवस्था अउ बाढ़त रद्दा दुर्घटना बर चिंता करीन हे। ओमन ह आज राजभवन म कलेक्टर अउ पुलिस अधीक्षक के बइठका लेके एखर बारे म गोठ करके जरूरी कदम उठाय के निरदेस दीन हे। बइठका म राज्यपाल ह किहीन हे कि रद्दा दुर्घटना ल रोके बर जिला प्रशासन अउ पुलिस विभाग ह कड़ाई ले कार्रवाई करय।
राष्ट्रपति दौरा-तैयारी
राष्ट्रपति द्रौपदी मुर्मु के बीस नवंबर के अंबिकापुर दउरा ल लेके तियारी सुरू कर दे गेहे। ओमन ह भगवान बिरसामुंडा के सुरता म होवइया राज्य स्तरीय जनजातीय गौरव दिवस के कारीकरम म मुख्य अतिथि के रूप म सामिल होही। ए कारीकरम ह अंबिकापुर के पीजी कालेज मैदान म होही, जिंहा छत्तीसगढ़ अउ सरगुजा संभाग के जनजातीय समुदाय के लोगन मन रही।
अंबिकापुर कलेक्टर विलास भोसकर अउ वरिष्ठ पुलिस अधीक्षक राजेश अग्रवाल समेत प्रशासन अउ पुलिस के वरिष्ठ अधिकारी मन ह आज कारीकरम स्थल के निरीक्षण करीन। अधिकारी मन ह सबो संबंधित विभाग ले काम ल निर्धारित बेरा म पूरा करे के निरदेस दीन हे।
उपमुख्यमंत्री समीक्षा-बैठक
उपमुख्यमंत्री विजय शर्मा ह आज सुकमा जिला के पूवर्ती गांव पहुंचिन। इंहा ओमन नक्सली नेता हिड़मा अउ बारसे देवा के घरवाला मन ले भेंट करीन। ए बेरा म ओमन ह दूनो नक्सली नेता मन ले आत्मसमर्पण करे के अपील करीन।
एखर पहिली, उपमुख्यमंत्री विजय शर्मा ह अपन बस्तर प्रवास के बेरा काली बीजापुर म नक्सल उन्मूलन अउ अंदरूनी क्षेत्र म विकास काम के समीक्षा बइठका लीन। बइठका म ओमन ह नक्सल उन्मूलन के गतिविधि, हालेच म बनाय गे सुरक्षा कैम्प के स्थिति अउ ए क्षेत्र म स्वास्थ्य, शिक्षा, आंगनबाड़ी, रद्दा, बिजली, पानी अउ संचार सुविधा ले जुड़े विकास काम के बारे म जानकारी लीन।
सुपरक्रॉस बाईक रेसिंग चैंपियनशिप
रईपुर के बूढ़ापारा के आउटडोर स्टेडियम म राष्ट्रीय सुपरक्रॉस बाईक रेसिंग चैंपियनशिप के आयोजन करे गीस। ए बेरा म मुख्यमंत्री विष्णुदेव साय समेत कतकोन लोगन ह ए चैंपियनशिप ल देखे बर पहुंचे रिहीन। ए कारीकरम ल संबोधित करत हुए मुख्यमंत्री ह किहीन कि जीवन ह अनमोल हवय। एखरे सेति हमेसा हेलमेट पहिनव, टै्रफिक नियम के पालन करव अउ जिम्मेदार लोगन बनव। मुख्यमंत्री ह किहीन कि राज्य सरकार ह खेल अधोसंरचना, स्पोर्ट्स टूरिज्म अउ मोटर स्पोर्ट्स जइसे नवा क्षेत्र ल बढ़ावा देबर बड़का कोसिस करत हे। जानबा के अनुसार दू दिन के राष्ट्रय सपुरक्रॉस बाईक रेसिंग चैंपियनशिप म देसभर ले आय दू सौ ले जादा प्रोफेसनल राइडर मन सामिल होइन।
राजेन्द्र देशमुख-अंतर्राष्ट्रीय क्रिकेट मैच
बालोद जिला के छोटकुन गांव बूढ़ानपुर के राजेन्द्र देशमुख के चयन भारतीय दिव्यांग क्रिकेट टीम म होय हे। तेरह नवंबर के श्रीलंका म सुरू होवइया पांचवां टी-ट्वेंटी सीरीज म राजेन्द्र देशमुख ह घलो भारत देस कोति ले क्रिकेट मैच म हिस्सा लिही।
राजेन्द्र ह बतइन कि ओखर जनम बालोद जिला करा बूढ़ानपुर गांव म होय रिहीस। स्कूल जीवन ले ही क्रिकेट खेले जात रिहीस। ओमन ह बछर दू हजार अट्ठारा म दिव्यांग क्रिकेट ट्रायल दीन अउ बढ़िया बालिंग अउ बैटिंग के दम म छत्तीसगढ़ टीम म चयनित होइन। अभी तक ओमन ह छत्तीसगढ़ कोति ले डेढ़ सौ ले जादा मैच खेजे जा चुके हे। बछर दू हजार तेईस म राजेन्द्र ह भारतीय दिव्यांग के टीम म अपन जघा बनाइन। ओमन ह बतइन कि बचपन लेही एक हाथ दिव्यांग होय के बाद घलो ओला भूलके पढ़ाई अउ क्रिकेट म पूरा धियान ल केंद्रित करीन। ओखर लक्ष्य श्रीलंका म होवइया टी-ट्वेंटी सीरीज म अच्छा प्रदर्सन करना हे।
अउ अब थोरकुन समाचार सार म –
– मुख्यमंत्री विष्णुदेव साय ह आज गांधी नगर म गुजरात के मुख्यमंत्री भूपेन्द्र पटेल ले भेंट करीन। ए बेरा म दूनो मुख्यमंत्री मन ह आपसी सहयोग अउ विकास के अनुभव ल साझा करीन।
– राज्यपाल रमेन डेका ह इंदिरागांधी कृषि विश्वविद्यालय रईपुर के प्रोफेसर डॉक्टर राजेन्द्र लकपाले ल अंबिकापुर के संत गहिरा गुरू विश्व विद्यालय के नवा कुलपति नियुक्त करीन हे।
– मुख्यमंत्री विष्णुदेव साय ह आज रईपुर के स्वामी विवेकानंद विमानतल परिसर माना कैम्प तीर स्टेट हैंगर के नियमित परिचालन के सुभारंभ करीन।
अउ
– राज्यपाल रमेन डेका ह राज्य म सिकलसेल अउ टीबी जइसे गंभीर बीमारी ल रोके बर ठोस कदम उठाय के निरदेस दीन हे। ओमन ह आज राजभवन म लोकस्वास्थ्य अउ परिवार कल्याण अउ चिकित्सा शिक्षा विभाग के सचिव अमित कटारिया के संग बइठका करके ए बिसय म गोठ करीन।