इही कड़ी म बूथ लेवल अधिकारी, मुख्य सचिव विकास शील अउ मुख्य निर्वाचन पदाधिकारी यशवंत कुमार के घर पहुंचिन अउ गणना प्रपत्र देके जरूरी दस्तावेज झोकिन।
एनआईटी/आईआईटी-दीक्षांत समारोह
राष्ट्रीय प्रौद्योगिकी संस्थान-एनआईटी रईपुर के सोलहवां दीक्षांत समारोह आज राजधानी रईपुर के दीनदयाल उपाध्याय आडिटोरियम म राखे गीस। ए समारोह म माई पहुना जम्मूकश्मीर के उप राज्यपाल मनोज सिन्हा ह एक हजार तीन सौ बियासी झिन पढ़इया लइका मन ल डिग्री दीन। उहें, सुघ्घर पढ़ई-लिखई के उपलब्धि बर सत्ताईस ठिन गोल्ड अउ सत्ताईस ठिन सिल्वर मेडल दे गीस। समारोह म बोलत माई पहुना उपराज्यपाल श्री सिन्हा ह उपाधि झोकइया सबो विद्यार्थी मन ल सुभकामना दीन। ओमन किहीन कि भारत आज रिसर्च के क्षेत्र म एक ठिन नवा क्रांति के अनुभव करत हे।
समारोह म केंद्र सरकार के वैज्ञानिक सलाहकार डॉक्टर जी.सतीश रेड्डी विशिष्ट पहुना के रूप म मौजूद रिहीन।
इही बीच, भारतीय प्रौद्योगिकीय संस्थान-आईआईटी भिलाई के पांचवां दीक्षांत समारोह काली दस नवंबर के राखे जाही। समारोह के माई पहुना जम्मू कश्मीर के उप राज्यपाल मनोज सिन्हाच होही। ए समारोह म दू हजार पचीस के स्नातक बैच के दू सौ उनहत्तर झिन पढ़इया लइका मन ल उपाधि दे जाही। समारोह के पगरइती आईआईटी भिलाई के बोर्ड ऑफ गवरनर्स के पगरइत करही।
उपमुख्यमंत्री-बस्तर दौरा
उपमुख्यमंत्री विजय शर्मा ह बस्तर दउरा बेरा स्वर्गीय बलिराम स्मृति मेडिकल कालेज म पढ़त डॉक्टर मनले गोठबात करीन। ए दउरान श्री शर्मा ह किहीन कि सुरक्षा कैम्प तीर के संवेदनसील गवई मन म मेडिकल कालेज के डॉक्टर मन डहार ले स्वास्थ्य सिविर राखना एक ठिन नवा पहल हे, जेहा डॉक्टर मन ल बस्तर क्षेत्र के जनता ले जुड़े के संगे एक ठिन अनोखा अनुभव लेके मउका घलो हरय।
उहें, उपमुख्यमंत्री श्री शर्मा ह आज कांकेर जिला के भानुप्रतापपुर स्थित मुल्ला गांव के पुनर्वास केंद्र के अकस्मात दउरा करीन, जिंहा ओमन हथियार छोड़के मुख्यधारा म लहुटे जवान लइका मन ल दे जावत कौशल विकास प्रसिक्षण के जायजा लीन। ए मउका म उपमुख्यमंत्री ह ए जवान लइका मन ले गोठियाइन। संगे अधिकारी मन ल रोजिना कम से कम दू ठिन व्यवसायकि पाठ्यक्रम के ट्रेनिंग ए जवान लइका मन ल देके निरदेस दीन।
जवान घायल/माओवादी गिरफ्तार
सुकमा जिला म आज माओवादी मन डहार लगाय गे आईईडी के चपेट म आय ले एक झिन जवान घायल हो गेहे। मिले जानकारी मुताबिक जिला के फूलबगड़ी थाना क्षेत्र ले जवान मन के टीम ह सर्चिंग बर निकले रिहीस, तभे गोगुंडा के जंगल में केंद्रीय रिजर्व पुलिस बल-सीआरपीएफ के जवान मन आईईडी के चपेट म आय ले घायल होगे। घायल जवान मन ल प्राथमिक उपचार के बाद बने इलाज खातिर हेलीकॉप्टर ले एयर लिफ्ट कर रईपुर लाय गीस।
इही बीच, सुकमा जिला के गांव भीमापुरम जंगल तीर डिस्ट्रिक्ट रिजर्व गार्ड-डीआरजी अउ कोबरा बटालियन के जवान मन ह दू झिन माओवादी ल बिस्फोटक पदार्थ संग गिरफ्तार करे हे। एमा ले एक झिन माओवादी उपर तीन लाख अउ दूसर माओवादी उपर पांच लाख रूपिया के इनाम घोसित रिहीस। पुलिस के बताय मुताबिक पकड़े गे दूनो माओवादी नक्सली केंद्र गोमगुंडा क्षेत्र म सुरक्षा बल मन ल नकसान पहुंचाय के नियत ले आईईडी लगाय के योजना के तियारी म आय रिहीस।
राज्यपाल लखपति दीदी-सम्मान
राज्यपाल रमेन डेका ह आज राजभवन म खैरागढ़-छुईखदान, गंडई जिला के सोनपुरी गांव के सुघ्घर काम करइया पढ़इया लइका अउ लखपति दीदी मन ल सम्मानित करीन। ए मउका म राज्यपाल ह मुख्यमंत्री कौशल विकास योजना के चलत कौशल क्षेत्र म ट्रेनिंग लेवत पढ़इया लइका मन ले गोठबात करीन। ओमन लखपति दीदी मन ले चर्चा करत उंखर डहार ले करे जावत काम बारे म जानबा लीन। ड्रोन के माध्यम ले करे जावत काम के बारे म राज्यपाल ल लखपति दीदी ह जानबा दीन।
इंहा ए बतादन कि राज्यपाल ह खैरागढ़-छुईखदान-गंडई जिला के सोनपुरी गांव ल गोद लेहे।
तलवारबाजी प्रतियोगिता-पदक
मणिपुर के इंफाल म तीन ले आठ नवंबर तक राखे गे सत्ताईसवां सब जूनियर राष्ट्रीय तलवारबाजी प्रतियोगिता म छत्तीसगढ़ के खिलाड़ी मन तीन ठिक पदक जीते हे। प्रतियोगिता म बाबू वरग के व्यक्तिगत मुकाबला म वीर कुमार गुप्ता ह रजत पदक नोनी वरग के व्यक्तिगत मुकाबला के स्नेहा यादव ह कांस्य पदक अउ बाबू वरग के टीम ह कांस्य पदक अपन नांव करीन।
ए उपलब्धि उपर छत्तीसगढ़ प्रदेस फेंसिंग एसोसिएसन के पगरइत एस. प्रकाश समेत आने पदाधिकारी मन पदक जीतइया खिलाड़ी मन ल सुभकामना दीन हे।
मुख्यमंत्री-आकांक्षा सत्यवंशी मुलाकात
मुख्यमंत्री विष्णुदेव साय ले आज विश्वकप जीतइया भारतीय महिला क्रिकेट टीम के फिजियोथेरेपिस्ट अउ छत्तीसगढ़ के रहवइया आकांक्षा सत्यवंशी ह मुलाकात करीन। ए दउरान मुख्यमंत्री ह आकांक्षा ल मेडल पहिराके स्मृति चिन्ह भेंट करीन। मुख्यमंत्री आकांक्षा सत्यवंशी के उपलब्धि ल संहरावत किहीन कि आपमन ए साबित कर दे हव कि छत्तीसगढ़ के नोनी मन कोनो भी क्षेत्र म पाछू नइ हे, अउ तुंहर ए सफलता ह अवइया पीढ़ी के बेटी मन ल घलो प्रेरित करही। आकांक्षा सत्यवंशी ह मुख्यमंत्री संग अपन विश्वकप के अनुभव बतावत किहीन कि वर्ल्डकप जीतइ ह भारतीय महिल टीम के सफलता के संगे छत्तीसगढ़ के घलो सम्मान हे। ओमन बतइन कि मैदान म ओहा सक्रिय खिलाड़ी के रूप म नइ रिहीस, फेर उंखर जिम्मेदारी टीम के खिलाड़ी मन मानसिक अउ शारीरिक स्वास्थ्य, फिटनेस अउ रिकवरी ल बनाय राखे के रिहीस।
इंहा ए बतादन कि दुरूग म जनमे आकांक्षा सत्यवंशी के परिवार रईपुर म रथे, फेर उंखर पैतृक गांव कवर्धा हरय। ओमन अपन स्कूली शिक्षा अउ फिजियोथैरेपी म बैचलर डिग्री के पढ़ई छत्तीसगढ़ म पूरा करीन। ओखर बाद मास्टर्स डिग्री ल कटक ले पाय हवय। बछर दू हजार उन्नीस म आकांक्षा ह छत्तीसगढ़ स्टैट क्रिकेट टीम के संग बतौर फिजियोथेरेपिस्ट अपन पेसेवर कैरियर सुरू करीन उंखर बाद बछर दू हजार बाईस म ओमन भारतीय अन्डर नाइंनटीन महिला क्रिकेट टीम के संग वर्ल्डकप अभियान म सामिल करे गीस।
अउ अब सुनव मौसम के हाल…
राजधानी रईपुर समेत प्रदेस भर म अब जाड़ के असर जनाय ल धर लेहे। मौसम विभाग के मुताबिक प्रदेस म उत्तर ले ठंडा अउ सुष्क हवा के अवई सरलग जारी हे। एखर सेति प्रदेस म न्यूनतम तापमान म थोरबहुत गिर सकत हे। उहें, सरगुजा संभाग के कोनो-कोनो जिला म एक-दू जघा सीतलहर चल सकत हे।
अउ अब थोरकुन समाचार सार म –
– गुरू तेग बहादुर के तीन सौ पचासवां बलिदानी बछर म राजनांदगांव के दिग्विजय स्टेडियम म सात हजार ले जादा मन सामूहिक गुरूबाणी पाठ करके विश्व रिकार्ड बनाइन। ए कारीकरम म विधानसभा अध्यक्ष डॉक्टर रमन सिंह घलो सामिल होइन।
– गरियाबंद जिला के देवभोग पुलिस ह हीरा के बाईस नग संग दू झिन तस्कर मन ल गिरफ्तार करे हे। जब्त हीरा के कीमत दू लाख तीस हजार रूपिया ले जादा के बताय जात हे।
अउ
– बलौदाबाजार-भाटापारा जिला म हम होंगे कामयाब अभियान के चलत जवान लइका मन ल प्रतियोगी परीक्षा के तियारी बर निसुल्क कोचिंग सहूलियत दे जाही।