संसद के शीतकालीन सत्र एक दिसंबर ले सुरू होही, जउन ह उन्नीस दिसंबर तक चलही। राष्ट्रपति द्रौपदी मुर्मु ह शीतकालीन सत्र बुलाय के सरकार के प्रस्ताव ल मंजूरी दे देहे। संसदीय कार्य मंत्री किरेन रिजिजू ह बतइन कि केंद्र सरकार एक रचनात्मक अउ सार्थक सत्र के आसा करत हे, जउन ह लोकतंत्र ल मजबूत करे अउ देसवासी मन के आकांक्षा ल पूरा करही।
राष्ट्रपति-छत्तीसगढ़ प्रवास
राष्ट्रपति द्रौपदी मुर्मु के आगामी बीस नवंबर के छत्तीसगढ़ आय के कारीकरम प्रस्तावित हे। अपन प्रवास के दउरान राष्ट्रपति सरगुजा संभाग म आयोजित अलग-अलग कारीकरम म सामिल होही।
राष्ट्रपति के प्रवास के तियारी ल लेके आगामी ग्यारा नवंबर के मुख्य सचिव के अध्यक्षता म बइठका के आयोजन करे जाही। बइठका म सबो प्रमुख मंत्रालय अउ विभाग मनके वरिष्ठ अधिकारी मन के अलावा संबंधित जिला के अधिकारी वीडियो कान्फ्रेंसिंग के माध्यम ले सामिल होही।
राष्ट्रीय हैकथॉन कोड उत्सव
राष्ट्रीय प्रौद्योगिकी संस्थान-एनआईटी रायपुर म नवाचार, अनुसंधान अउ तकनीकी उत्कृष्टता ल प्रोत्साहित करे के उद्देस्य ले कोड उत्सव राष्ट्रीय स्तर के कोडिंग हैकथॉन के आयोजन करे गीस। ए आयोजन म देसभर के तकनीकी संस्थान मन ले आय एक सौ पचास ले जादा विद्यार्थी मन ह भाग लीन। कारीकरम म मुख्य अतिथि के रूप म सामिल रायपुर कलेक्टर डॉक्टर गौरव सिंह ह किहीन कि तकनीकी उत्कृष्टता के संग मानवीय मूल्य मन के समावेस ही भविष्य के असली सक्ति हरय। ओमन प्रतिभागी मनके रचनात्मकता अउ धैर्य के सराहना करत हुए किहीन कि भारत आज तकनीकी क्षेत्र म वैश्विक स्तर म अपन पहिचान बनावत हे।
समारोह ल एनआईटी रायपुर के निदेसक डॉक्टर एन.वी.रमना राव अउ जिला पंचायत रायपुर के कार्यपालन अधिकारी कुमार विश्वरंजन ह घलो संबोधित कारीन। प्रतियोगिता म भिलाई स्थित रूंगटा कालेज ह पहलइया, एनआईटी रायपुर के वाइब कोडर्स टीम ह दूसरइया अउ एनआईटी के ही साइफर ओएक्स टीम ह तीसरइया स्थान हासिल करे हे।
एनआईए-छापा
राष्ट्रीय जांच एजेंसी-एनआईए ह काली संझा बस्तर क्षेत्र के दंतेवाड़ा अउ सुकमा जिला म एक संघरा बारह ठन जघा म छापा मारिन। ए कार्रवाई बछर दू हजार तेईस म दंतेवाड़ा जिला के अरनपुर क्षेत्र के एक ठन गांव म होय आईईडी बिस्फोट अउ माओवादी हमला ल लेके करे गेहे। ए हमला म ग्यारा झन सहीद होगे रिहीन, जेमा दस झन पुलिस के जवान रिहीन।
मिले जानकारी के अनुसार छापामार के कार्रवाई उन संदिग्ध आरोपी मनके परिसर म करे गीस, जउन मन प्रतिबंधित संगठन-सीपीआई माओवादी के सशस्त्र कैडर मन के संपर्क म रिहीन। तलासी के दउरान एजेंसी ह नगदी, हस्त लिखित पत्र, माओवादी मनके लेवी वसूली के रसीद बुक अउ डिजीटल उपकरण बरामद करे हे।
एनटीपीसी-स्थापना दिवस
राष्ट्रीय ताप विद्युत निगम-एनटीपीसी के इंक्यावनवां स्थापना दिवस सीपत म हर्षोल्लास के संग मनाय गीस। ए मउका म एनटीपीसी सीपत के कार्यकारी निदेसक अउ परियोजना प्रमुख विजय कृष्ण पांडेय ह किहीन कि एनटीपीसी आज देसभर म लगभग एक सौ आठ विद्युत स्टेसन मनके माध्यम ले करीब पचासी हजार मेगावाट बिजली के उत्पादन करत हे। ओमन किहीन कि छत्तीसगढ़ के सबले बड़े दू हजार नौ सौ अस्सी मेगावार्ट के सीपत थर्मल पावर परियोजना न केवल विद्युत उत्पादन म बल्कि सामाजिक उत्तर दायित्व, पर्यावरण संरक्षण अउ नवाचार के क्षेत्र म सराहनीय योगदान देवत हे।
जिले की चिट्ठी
प्रादेशिक समाचार एकांश, आकाशवाणी रईपुर कोति ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ स्थित आकाशवाणी के सबो केंद्र रिले करही। ए बखत के अंक म ‘‘महासमुंद‘‘ जिला के गतिविधि के संबंध म जानकारी दे जाही।
बैगा/गुनिया-सम्मान
प्रदेस म ‘‘मुख्यमंत्री बैगा-गुनिया-हड़जोड़ सम्मान‘‘ योजना के तहत अनुसूचित जनजाति वर्ग के बैगा, गुनिया अउ हड़जोड़ के चिन्हित मनखे मन ल हर बछर पांच हजार रूपिया के सम्मान सह प्रोत्साहन रासि दे जाही। ए संबंध म आदिम जाति विकास विभाग डहार ले अधिसूचना जारी करे दे गेहे।
बतादन कि राज्य के जनजाति बहुल ग्रामीण क्षेत्र मन म परंपरागत रूप ले वनौषधि चिकित्सा संबंधी काम म संलग्न बैगा, गुगिया अउ हड़जोड़ लोगन मन ल प्रोत्साहित करे अउ उंखर सेवा अउ योगदान ल मान्यता दे के उद्देस्य ले ए योजना सुरू करे गेहे।
जशपुर जम्बूरी
जशपुर जिला म आयोजित चार दिवसीय ‘जशपुर जम्बूरी‘ म जिला के युवा मनके संगेसंग प्रदेस के आने-आने जिला अउ दूसर राज्य ले आय पर्यटक मन घलो सामिल होवत हे। ए आयोजन म देसभर ले आय एक सौ बीस ले जादा प्रतिभागी मन ह नीमगांव म पक्षी दर्सन ले अपन यात्रा के सुरूआत करीन।
दू ठन समूह म बंटे पर्यटक मन मयाली म कयाकिंग, एटीवी राइड, एक्सा साइकिलिंग अउ पेंटबॉल जइसे साहसिक खेल मनके आनंद लीन। फेर दूसर समूह ह देसदेखा म बोल्डरिंग, रॉक क्लाइंबिंग, जुमारिंग अउ जिपलाइनिंग जइसे चुनौतीपूर्ण गतिविधि म भाग लीन। ‘जशपुर जम्बूरी‘ के काली नौ नवंबर के समापन होही।
अबूझमाड़ पीस हाफ मैराथन
नारायणपुर म अवइया बछर पच्चीस जनवरी के अबूझमाड़ पीस हाफ मैराथन के आयोजन करे जाही। एखर पहिली, काली वनमंत्री केदार कश्यप ह नारायणपुर जिला के ग्राम पंचायत खोड़गांव म अबूझमाड़ पीस हाफ मैराथन के पांचवां संस्करण के पोस्टर के विमोचन करीन। ए मउका म श्री कश्यप ह किहीन कि अबूझमाड़ के संस्कृति अउ प्राकृतिक धरोहर अनमोल हे। ओमन सबो नागरिक मन ले ए आयोजन म भाग लेके अपील करीन। ए मैराथन म इक्कीस किलोमीटर के मुख्य दउड़ आयोजित होही। प्रतियोगिता के विजेता मन ल नगद पुरस्कार दे जाही।
बतादन कि ए मैराथन अबूझमाड़ क्षेत्र के प्राकृतिक सुंदरता, झरना-झील, स्थानीय जनजाति मनके जीवनसैली अउ समृध्द लोक संस्कृति ल राष्ट्रीय अउ अंतर्राष्ट्रीय स्तर म पहिचान दिलाय के माध्यम होही।
मेडिकल नर्सिंग-फिजियोथैरेपी
राज्य सरकार ह प्रदेस म मेडिकल नर्सिंग अउ फिजियोथैरेपी शिक्षा ल अउ सुदृढ़ बनाय के उद्देस्य ले एक हजार नौ सौ पद के सृजन अउ स्वीकृति ल मंजूरी दे देहे। मुख्यमंत्री विष्णुदेव साय ह किहीन कि नवा पद के स्वीकृति ले चिकित्सा क्षेत्र ल नवा ऊंचाई म ले जाय म मदद मिलही। ओमन किहीन कि ए निर्णय युवा मन बर रोजगार के नवा अवसर लानही अउ हर जिला म गुणवत्तापूर्ण स्वास्थ्य सेवा उपलब्ध कराय के दिसा म निर्णायक कदम साबित होही।
उहें, स्वास्थ्य मंत्री श्याम बिहारी जायसवाल ह किहीन कि शासकीय नर्सिंग अउ फिजियोथैरेपी प्रसिक्षण संस्थान मनके विस्तार ले क्षेत्रीय स्वास्थ्य कर्मी मनके उपलब्धता बेहतर होही, जेखर ले प्राथमिक अउ द्वितीयक स्वास्थ्य सेवा मन ल मजबूती मिलही।
नगरीय निकाय-यूपीआई
राज्य सरकार ह ई-गवर्नेंस परियोजना के तहत प्रदेस के सबो एक सौ बियानवे नगरीय निकाय मन म नागरिक सेवा ल पूरी तरह ऑनलाइन उपलब्ध कराय के निर्णय लेहे। ए पहल ‘‘एक राज्य एक प्लेटफॉर्म‘‘ अउ ‘डिजीटल छत्तीसगढ़‘ के लक्ष्य ल साकार करही। एखर तहत लोगन मन अपन मोबाइल या कम्प्यूटर ले हर सेवा के लाभ ले सकही। संपत्ति कर, जल कर, व्यापार कर अउ ठोस अपसिष्ट सुल्क जइसे सबो देनदारी ल ऑनलाइन जमा करे जा सकही। नागरिक मन ल बैंक, यूपीआई, वॉलेट या नेट बैंकिंग जइसे माध्यम ले तुरंत भुगतान के सुविधा मिलही।
उपमुख्यमंत्री अरूण साव ह किहीन कि ई-गवर्नेंस परियोजना सुशासन के नवा युग के सुरूआत होही। एखर ले नागरिक मन ल सबो सहरी सेवा घर बइठे समय म अउ पारदर्सी रूप ले मिलही।
ट्रेन परिचालन
दक्षिण पूर्व रेलवे के खड़गपुर रेलवे मंडल म आगामी तेरह ले तेईस नवंबर तक शालीमार यार्ड के आधुनिकीकरण के काम करे जाही। एखर सेति दक्षिण पूर्व मध्य रेलवे ले होके चलइया शालीमार एक्सप्रेस रद्द रइही। संगेसंग कुछेक गाड़ी मनके परिचालन घलो प्रभावित रइही।
अउ अब पेस हे मौसम के हाल…
मौसम विभाग ह उत्तर छत्तीसगढ़ म काली ले शीतलहर चले के संभावना जताय हे। मौसम विज्ञानी डॉक्टर गायत्री वाणी ह आकाशवाणी समाचार ल बतइन कि प्रदेस म अवइया एक हफ्ता तक मौसम सुष्क रइही। ए दउरान तापमान म दू ले तीन डिग्री सेल्सियस तक गिरावट आय के संभावना हे। ओमन बतइन कि सरगुजा संभाग के छै ठन जिला म काली अउ परनदिन शीतलहर चले के संभावना हे।
अउ अब थोरकुन समाचार सार म –
– प्रधानमंत्री उच्चतर शिक्षा प्रोत्साहन योजना के तहत महाविद्यालय अउ विश्वविद्यालयीन छात्र-छात्रा मन बर छात्रवृत्ति के आखिरी तारीख इकतीस अक्टूबर ले बढ़ाके पंद्रह नवंबर कर दे गेहे। विद्यार्थी अपन आवेदन राष्ट्रीय छात्रवृत्ति पोर्टल के माध्यम ले कर सकत हे।
– छत्तीसगढ़ फिल्म एंड विजुअल आर्ट सोसायटी के तत्वावधान म राजधानी रायपुर म आगामी बारह नवंबर ले पांच दिवसीय मुक्तिबोध राष्ट्रीय नाट्य समारोह के आयोजन करे जाही।
– जिला रोजगार अउ स्व-रोजगार मार्गदर्सन केंद्र रायपुर म बारह नवंबर के बिहनिया ग्यारा बजे ले मंझनिया दू बजे तक प्लेसमेंट कैंप के आयोजन करे जाही। ए कैंप म निजी क्षेत्र के प्रतिष्ठित कंपनी मन डहार ले अलग-अलग पद बर भर्ती करे जाही।
अउ
– कोरबा जिला के करतला वन क्षेत्र के ग्राम पंचायत बोतली म हाथी के हमला ले एक झन युवक के मउत होगे। मृतक ग्राम घिनारा के रहइया रिहीन।