प्रधानमंत्री ह बंकिमचंद्र के आनंद मठ ल स्वतंत्र भारत के सपना बतइन। ओमन महात्मा गांधी समेत कई स्वतंत्रता सेनानी मनके घलो जिकर करीन।
‘वंदे मातरम्‘-छत्तीसगढ़
‘वंदे मातरम्‘ राष्ट्रगीत के एक सौ पचासवां वर्षगांठ के मउका म आज देसभर म बहुत अकन कारीकरम के आयोजन करे गीस। ए ऐतिहासिक दिन ल छत्तीसगढ़ म घलो उछाह अउ गरब के संग मनाय गीस। मुख्यमंत्री विष्णुदेव साय ह नवा रईपुर स्थित मंत्रालय म अधिकारी अउ कर्मचारी मन संग सामूहिक रूप ले ‘वंदे मातरम्‘ के गायन करीन। ए मउका म ‘वंदे मातरम्‘ के उद्घोष के संग आजादी के राष्ट्रीय चेतना के सुमिरन करत अमर बलिदानी मन ल नमन करे गीस।
मुख्यमंत्री श्री साय ‘वंदे मातरम्‘ के एक सौ पचासवां वर्षगांठ म नई दिल्ली म राखे गे स्मरणोत्सव म घलो वर्चुअली सामिल होइन अउ प्रधानमंत्री नरेंद्र मोदी के उद्बोधन सुनिन। ए मउका म मुख्यमंत्री ह किहीन कि ‘वंदे मातरम्‘ राष्ट्रीय गीत मातृभूमि बर प्रेम, कृतज्ञता अउ राष्ट्रधर्म के भावना के प्रतीक हरय। ओमन किहीन कि आज प्रधानमंत्री के अगुवई म पूरा देस ह एक स्वर म ‘वंदे मातरम्‘ के सामूहिक गायन करके मातृभूमि के वंदना करत हे। मुख्यमंत्री ह जम्मो नागरिक मन ले आह्वान करीन कि ओमन विकसित भारत अउ विकसित छत्तीसगढ़ के निर्माण के संकल्प लेवय अउ एला भारतमाता अउ छत्तीसगढ़ महतारी ल समर्पित करय।
ए दउरान मुख्यमंत्री ह मंत्रालय म ‘वंदे मातरम्‘ के एक सौ पचासवां वर्षगांठ के उपलक्ष्य म आयोजित छायाचित्र प्रदर्सनी के सुभारंभ घलो करीन।
उहें, राजभवन म राज्यपाल रमेन डेका के मौजूदगी म राष्ट्रीय गीत ‘वंदे मातरम्‘ के सामूहिक गायन करे गीस। ए मउका म अधिकारी अउ कर्मचारी मन नई दिल्ली म राखे गे कारीकरम के सीधा प्रसारण देखिन अउ प्रधानमंत्री के उद्बोधन घलो सुनिन।
अइसेन प्रदेस के दूसर जिला म घलो आज ‘वंदे मातरम्‘ के एक सौ पचासवां वर्षगांठ के उपलक्ष्य म राष्ट्रीय गीत ‘वंदे मातरम्‘ के सामूहिक गायन करे गीस।
‘मेक इन सिलिकॉन‘-संगोष्ठी
मुख्यमंत्री विष्णुदेव साय ह आज नवा रईपुर स्थित डॉक्टर श्यामा प्रसाद मुखर्जी अंतरराष्ट्रीय सूचना प्रौद्योगिकीय संस्थान-ट्रिपल आईटी के दसवां स्थापना दिवस के मउका म आयोजित दू दिन के ‘मेक इन सिलिकॉन‘ संगोष्ठी के सुभारंभ करीन। ए संगोष्ठी म देसभर ल आय बिसेसज्ञ, शिक्षाविद अउ प्रतिनिधि मन सामिल होवत हे।
कारीकरम म संबोधित करत मुख्यमंत्री ह किहीन कि ए आयोजन भारत के सेमीकंडक्टर निर्माण अउ तकनीकी आत्मनिर्भरता के दिसा म अग्रसर करे वाला एक महत्वपूर्ण कदम हरय। ओमन किहीन कि भारत आज तकनीकी आत्मनिर्भरता के दिसा म तेजी ले आगू बाढ़त हे। मुख्यमंत्री ह किहीन कि ए संगोष्ठी ले न केवल छत्तीसगढ़, बल्कि पूरा देस ल फायदा मिलही। ओमन आह्वान करीन कि ‘‘हम सब मिलके छत्तीसगढ़ ल मध्य भारत के ज्ञान, प्रौद्योगिकी अउ नवाचार के केंद्र बनावय अउ भारत के सेमीकंडक्टर मिसन म सक्रिय योगदान देवय।
कारकीरम ल उच्च शिक्षा मंत्री टंकराम वर्मा अउ वित्त मंत्री ओपी चौधरी ह घलो संबोधित करीन।
माओवादी-आत्मसमर्पण
गरियाबंद जिला म आज सात माओवादी मन ह पुलिस के आगू आत्मसमर्पण करे हे। हमर संवाददाता ह बतइन कि ए माओवादी मन ह हथियार के संग पुलिस अधीक्षक के आगू आत्मसमर्पण करे हे। ए सबो माओवादी मन उपर कुल सैंतीस लाख रूपिया के इनाम घोसित रिहीस।
जीएसटी रिटर्न-ऑनलाइन भुगतान
प्रदेस म राज्य जीएसटी अउ कोष लेखा विभाग डहार ले जीएसटी रिटर्न के भुगतान बर क्रेडिट कार्ड, डेबिट कार्ड अउ यूपीआई के सुविधा लागू कर दे गेहे। ए सुविधा के मांग व्यापारी मन डहार ले बहुत समय ले करे जात रिहीस। अब तक कर दाता मन बर केवल नेट बैंकिंग अउ ओटीसी भुगतान के विकल्प ही मौजूद रिहीस। एखर ले कई घांव छोटे व्यापारी अउ नवा कर दाता मन ल बहुत कठिनाई के सामना करे बर पड़त रिहीस। कई बैंक मनके जीएसटी पोर्टल ले जुड़े नइ हो के सेति भुगतान करना संभव नइ होत रिहीस।
मुख्यमंत्री विष्णुदेव साय ह किहीन कि जीएसटी भुगतान बर क्रेडिट कार्ड, डेबिट कार्ड अउ यूपीआई जइसे डिजीटल सुविधा व्यापारी मन ल न केवल सुविधा अउ गति दिही बल्कि राज्य के अर्थव्यवस्था म पारदर्सिता अउ बिस्वास ल घलो मजबूत करही।
उहें, वित्त मंत्री ओपी चौधरी ह किहीन कि जीएसटी भुगतान के नवा सुविधा कर दाता मन बर बड़का राहत लेके आय हे। एखर ले भुगतान प्रक्रिया अउ जादा सरल, तेज अउ पारदर्सी बनही। संघरा छोटे व्यापारी मन ल घलो बिसेस रूप ले फायदा मिलही।
नेशनल अर्बन कॉन्क्लेव
केंद्रीय आवास अउ सहरी कार्य मंत्रालय डहार ले नई दिल्ली म काली आठ नवंबर ले दू दिन के नेशनल अर्बन कॉन्क्लेव के आयोजन करे जाही। ए कॉन्क्लेव म सहरी विकास के आने-आने आयाम उपर राज्य अउ केंद्र शासित प्रदेस मन संग मंथन करे जाही। कॉन्क्लेव म छत्तीसगढ़ के उपमुख्यमंत्री अउ नगरीय प्रशासन मंत्री अरूण साव घलो सामिल होही।
स्काउट्स और गाइड्स भवन-भूमिपूजन
स्कूल शिक्षा मंत्री गजेंद्र यादव ह आज रईपुर स्थित माध्यमिक शिक्षा मंडल कार्यालय परिसर म भारत स्काउट्स अउ गाइड्स के राज्य मुख्यालय भवन के भूमिपूजन करीन। ए मउका म श्री यादव ह किहीन कि जउन भाव ले स्काउट्स एंड गाइड्स के स्थापना करे गे रिहीस, ओ भाव हमेसा बने रहना चाही। स्काउट्स गाइड्स हमन ल आनंद के साथ जिये बर सिखाथे। ओमन किहीन कि राज्य के जम्मो प्रसिक्षण संस्थान ल अउ जादा सुदृढ़ अउ उत्कृष्ट बनाय जाही।
कारीकरम म स्काउट्स अउ गाइड्स के राज्य मुख्य आयुक्त इंदरजीत सिंह खालसा ह स्काउट्स अउ गाइड्स आंदोलन के उद्देस्य अउ युवा सशक्तिकरण म एखर भूमिका उपर प्रकाश डालिन।
सुलक्षणा पंडित-निधन
भारतीय सिनेमा के प्रसिध्द अभिनेत्री अउ पार्श्व गायिका सुलक्षणा पंडित के काली मुंबई म निधन होगे। मुख्यमंत्री विष्णुदेव साय अउ भारतीय जनता पार्टी के प्रदेस अध्यक्ष किरण सिंह देव ह सुलक्षणा पंडित के निधन म शोक जतइन हे। मुख्यमंत्री ह किहीन कि संगीत अउ अभिनय के उंखर यात्रा के जड़ छत्तीसगढ़ के रायगढ़ के ओ सांस्कृतिक माटी ले जुड़े रिहीन, जिंहा संगीत एक परंपरा नइ, बल्कि एक जीवनधारा हे। रायगढ़ म जनमे सुलक्षणा अपन प्रारंभिक शिक्षा रायगढ़ म पाय रिहीन, ओखर पिता प्रताप नारायण पंडित राजा चक्रधर सिंह के दरबार के प्रसिध्द तबला वादक रिहीन।
बातों बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ म ए दारी बस्तर ओलंपिक उपर केंद्रित रइही। एखर तहत राज्य के उपमुख्यमंत्री अरूण साव ले लेगे भेंटवार्ता के प्रसारण करे जाही। ए कारीकरम के प्रसारण काली आठ नवंबर के एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करही।
अउ अब जानन मौसम के हाल…
प्रदेस म अवइया दू-तीन दिन म जाड़ बाढ़े के आसार हे। मौसम विभाग के मुताबिक उत्तर ले ठंडा अउ शुष्क हवा आय के संभावना हे। एखर प्रभाव ले प्रदेस के न्यूनतम तापमान म तीन डिग्री सेल्सियस के आसपास गिरावट हो सकत हे। उहें, अवइया चौबीस घंटा के दउरान प्रदेस के मौसम सुष्क रइही।