राष्ट्रीय गीत ‘‘वंदे मातरम‘‘ के एक सौ पचास बछर पूरा होवइया हे। ए मउका म केंद्रीय संस्कृति मंत्रालय काली नई दिल्ली म कारीकरम करही। प्रधानमंत्री नरेंद्र मोदी बछर भर चलइया ए राष्ट्रव्यापी उत्सव के सुरूआत करही।
सबो राज्य केंद्रीय मंत्रालय अउ ओखर ले जुड़े कार्यालय मन म काली बिहनिया दस बजे वंदे मातरम के सामूहिक गान होही। ए मउका म देसभर के सबो कार्यालय अउ संस्था मन म सामूहिक रूप ले प्रधानमंत्री नरेंद्र मोदी के संबोधन के सीधा प्रसारण देखे के व्यवस्था करे जाही। एखर बर संस्कृति मंत्रालय डहार ले एक ठन बिसेस वेबसाइट घलो सुरू करे गेहे।
ए कारीकरम ले छत्तीसगढ़ राज्य घलो जुड़ही। ए दउरान राज्य म संस्कृति विभाग डहार ले बछर भर कतकोन कारीकरम कराय जाही। आयोजन के उद्देस्य राष्ट्रीय गीत वंदे मातरम के माध्यम ले देसभक्ति एकता अउ सांस्कृतिक गौरव के भावना ले लोगन तक पहुंचाना हे। संस्कृति विभाग ले जारी निरदेस के अनुसार ए आयोजन चार चरण म होही। पहिली चरण सात ले चौदह नवंबर, दूसर चरण अवइया बछर उन्नीस ले छब्बीस जनवरी, तीसर चरण आठ ले पंद्रह अगस्त अउ चौथा चरण एक ले सात नवंबर तक होही। ए आयोजन म सैक्षणिक संस्थान म देसभक्ति गीत, नृत्य, निबंध, वाद-विवाद, चित्रकला, पोस्टर निर्माण, कवि सम्मेलन अउ लघु फिल्म प्रदर्सन जइसे बहुत अकन कारीकरम होही। प्रमुख गायक अउ स्थानीय कलाकार मन डहार ले वंदे मातरम के प्रस्तुति दे जाही। नागरिक अउ विद्यार्थी मन ल ए आयोजन म भाग लेबर ‘वंदे मातरम‘ एक सौ पचास डाट इन पोर्टल म ऑनलाइन पंजीकरण के सुविधा देगे हवय।
भाजपा-वंदे मातरम
राष्ट्रीय गीत वंदे मातरम के एक सौ पचासवां वर्षगांठ म भारतीय जनता पार्टी डहार ले काली देसभर म एक सौ पचास अउ छत्तीसगढ़ म पांच जघा म वंदे मातरम के सामूहिक गायन आयोजित करे जाही। भाजपा प्रदेस उपाध्यक्ष अउ वंदे मातरम के प्रदेस प्रभारी नंदन जैन ह बतइन कि काली रईपुर के इंडोर स्टेडियम म मुख्यमंत्री विष्णुदेव साय के मुख्य आतिथ्य म बड़े कारीकरम होही। उहें, बिलासपुर स्टेडियम म केंद्रीय राज्य मंत्री तोखन साहू मुख्य अतिथि होही। अंबिकापुर म कैबिनेट मंत्री राजेश अग्रवाल, जगदलपुर म भाजपा प्रदेस अध्यक्ष किरण सिंह देव अउ दुरूग म मंत्री रामविचार नेताम के मौजूदगी म ए कारीकरम होही। ए कारीकरम बर भाजपा ह संबंधित जिला म कारीकरम प्रभारी नियुक्त कर दे गेहे।
श्री जैन ह बतइन कि ए मउका म वंदे मातरम के गायन के कारीकरम सबो जिला अउ सैक्षणिक संस्था मन म होही। ए दउरान एक ठन स्वदेसी संकल्प पत्र ल सामूहिक रूप ले दोहराय जाही। अवइया छब्बीस नवंबर तक होवइया ए आयोजन म सेमिनार प्रदर्सन जइसन कतकोन कारीकरम कराय जाही।
धान खरीदी
प्रदेस म अवइया पंद्रह नवंबर ले किसान मन ले न्यूनतम समर्थन मूल्य धान खरीदी करे जाही। किसान मन ल धान बेचे बर ए बखत एग्रीस्टैक पोर्टल म पंजीयन कराना जरूरी करे गे रिहीस। मुख्यमंत्री विष्णुदेव साय ह बतइन कि ए बछर एक लाख ले जादा किसान मनके पंजीयन होय हे।
उहें, उपमुख्यमंत्री अरूण साव ह बतइन कि प्रदेस म धान खरीदी के तियारी पूरा कर ले गेहे।
खबर के मुताबिक ए खरीफ बछर म किसान मन ले तीन हजार एक सौ रूपिया प्रतिकुंटल के दर ले अवइया इकतीस जनवरी तक धान खरीदी करे जाही।
राज्यपाल-दीक्षांत समारोह
राज्यपाल रमेन डेका ह विद्यार्थी मन ले किहीन हे कि छत्तीसगढ़ म हर क्षेत्र म आगू बाढ़े के बहुत अकन संभावना हे, जेखर उपयोग सोज-समझ के करना चाही। अपन लक्ष्य ल पाय बर मजबूत इरादा होना जरूरी हे। राज्यपाल आज रईपुर म ऑफ्ट विश्व विद्यालय के दीक्षांत समारोह म बोलत रिहीन। ए मउका म ओमन ह विश्व विद्यालय के प्रावीण्य सूची म अवइया पैंसठ झन विद्यार्थी मन ल स्वर्ण पदक संघरा तीन सौ चौबीस विद्यार्थी मन ल उपाधी दीन।
रेलवे-स्पष्टीकरण
बिलासपुर अउ गतौरा के बीच चार नवंबर के होय रेल हादसा के जांच रेलवे सुरक्षा आयुक्त डहार ले आज ले सुरू कर दे गेहे। ए जांच दू दिन तक चलही। जांच के बाद रेलवे सुरक्षा आयुक्त अपन रिपोर्ट दिही। खबर के मुताबिक बिलासपुर तीर पाछू चार नवंबर के एक ठन पैसेंजर ट्रेन के खड़े मालगाड़ी ले टकराय के सेति ग्यारा झन यात्री मनके मउत हो गे रिहीस। उहें, करीब बीस झिन यात्री मन घायल होय रिहीन।
इही बीच, दक्षिण पूर्व मध्य रेलमंडल ह स्पष्ट करे हे कि बिलासपुर म ऑटोमेटिक सिग्नलिंग प्रणाली एक ठन सुरक्षित कार्यप्रणाली हे। बिलासपुर तीर होय रेल हादसा के बाद आटोमेटिक सिग्नलिंग प्रणाली उपर सवाल उठे के सेति रेल मंडल डहार ले ए स्पष्टीकरण आगू आय हे। जनसंपर्क अधिकारी डॉक्टर सुस्कर विपुल विलासराव ह बतइन कि पाछू दू बछर ले बिलासपुर रेलमंडल म एखर परिचालन होवत हे। ए प्रणाली म हर किलोमीटर म सिग्नल लगाय जाथे, जेमा हर सिग्नल के बाद दूसर ट्रेन चल सकथे। मालगाड़ी अउ यात्री गाड़ी बर आने-आने ट्रैक नइ होवय दूनो गाड़ी एकेच ट्रैक म चलथे अउ एक दूसर के पाछू चलाय जाथे। रेलवे ह लोगन ले अपील करे हे कि अइसन भ्रामक समाचार उपर धियान झन देवय अउ अइसन खबर ल चलाय ले अउ फॉरवर्ड करे ले घलो बांचय।
महिला विश्व कप टीम
महिला विश्व कप क्रिकेट के खिताब जीते के बाद आज भारतीय टीम ह नई दिल्ली म राष्ट्रपति द्रौपदी मुर्मु ले भेंट करीस। राष्ट्रपति ह टीम इंडिया ल जीत बर बधई दीस। ए दउरान भारतीय कप्तान हरमनप्रीत कौर ह राष्ट्रपति ल खिलाड़ी मनके हस्ताक्षर वाले जर्सी भेंट करीन। एखर पहिली, काली भारतीय टीम ह प्रधानमंत्री नरेंद्र मोदी ले घलो भेंट करीन। प्रधानमंत्री ह टीम ल ऐतिहासिक जीत बर बधई देवत खिलाड़ी मन संग लंबा गोठबात घलो करीन।
इही बीच, मुख्यमंत्री विष्णुदेव साय ह छत्तीसगढ़ के बेटी अउ भारतीय महिला क्रिकेट टीम के फिजियोथैरेपिस्ट आकांक्षा सत्यवंशी ल राज्य सरकार कोति ले दस लाख रूपिया के सम्मान रासि दे जाय के घोसना करे हे। मुख्यमंत्री ह किहीन कि आकांक्षा सत्यवंशी ह विश्व स्तर म प्रदेस के गौरव बढ़ाइन हे।
राष्ट्रपति-दौरा
जनजातीय गौरव दिवस के मउका म राष्ट्रपति द्रौपदी मुर्मु के संभावित अंबिकापुर दउरा के सेति अंबिकापुर म प्रशासनिक तियारी जोर-सोर ले चलत हे। इही कड़ी म आज आदिम जाति अउ अनुसूचित जाति विकास विभाग के प्रमुख सचिव सोनमणि बोरा ह कारीकरम स्थल के निरीक्षण करीन अउ तियारी ल लेके अधिकारी मन ल जरूरी दिसा निरदेस दीन।
श्री बोरा ह गांधी स्टेडियम पहुंच के राष्ट्रपति के आगमन बर तियार करे जावत हेलीपैड जघा के निरीक्षण करीन। श्री बोरा ह पी.जी.कालेज ऑडिटोरियम म राखे गे संगोष्ठी कारीकरम तियारी के घलो निरीक्षण करीन।
एसआईआर-बैठक
प्रदेस म ए बखत मतदाता सूची के बिसेस पुनरीक्षण-एसआईआर चलत हे। ए संबंध म रईपुर के जिला निर्वाचन अधिकारी, डॉक्टर गौरव सिंह ह राजनैतिक दल के बइठका लीन। बइठका म निर्वाचन आयोग डहार ले तय करे गे कारीकरम, कार्ययोजना अउ सबो स्तर के जिम्मेदारी म बिस्तार ले चर्चा करे गीस। कलेक्टर ह बइतन कि बूथ लेवल के अधिकारी मन ह अवइया चार दिसंबर तक घर-घर जाके गणना पत्र बांटही अउ जानकारी सकेलही। ओमन किहीन सबो राजनैतिक दल अपन बूथ लेवल के एजेंट के नियुक्ति जल्दी ले जल्दी करय, जेखर ले ओमन ह बीएलओ संग मिलके ए निश्चित कर सकय कि कोनो भी पात्र मतदाता सूची ले वंचित झन राहय।
मतदाता मन ह अपन नांव अउ विवरण के जांच, वोटर्स डाट ईसीआई डाट जीओवी म कर सकत हे। संगेसंग कोनो भी मदद बर जिला स्तरीय हेल्पलाइन एक नौ पांच सून्य म संपर्क कर सकत हे।
माओवादी-आत्मसमर्पण
खैरागढ़ छुईखदान-गंडई जिला म आज एक झन इनामी हार्डकोर महिला माओवादी कमला सोढ़ी ह आत्मसमर्पण करे हे, जेखर उपर मध्यप्रदेस, महाराष्ट्र अउ छत्तीसगढ़ पुलिस डहार ले सत्रह लाख रूपिया के इनाम रिहीस। महिला माओवादी ह पुलिस अधीक्षक लक्ष्य शर्मा के आगू समर्पण करीन हे। कमला सोढ़ी प्रतिबंधित माओवादी संगठन के माड़ डिजीवन के सक्रिय सदस्य रिहीस। राज्य शासन डहार ले ए आत्मसमर्पित महिला माओवादी ल पचास हजार रूपिया के प्रोत्साहन रासि तुरते दे गीस।