उपराष्ट्रपति सी.पी.राधाकृष्णन आप अपन छत्तीसगढ़ दउरा बेरा राजनांदगांव म राखे गे लखपति दीदी सम्मेलन म माई पहुना के रूप म सामिल होइन। ए सम्मेलन म बोलत उपराष्ट्रपति ह किहीन कि छत्तीसगढ़ के रजत महोत्सव के मउका म लखपति दीदी के ए सम्मेलन ह माईलोगिन मनके स्वावलंबन आत्मनिर्भता अउ उत्कृष्टता के प्रमाण हे। ओमन किहीन कि लखपति दीदी के ए पहल ह हमर देस के माईलोगिन मनके शक्ति अउ संकल्प के चिन्हारी हे, जउन ह चुनौती ल औसर म बदलत हे। श्री राधाकृष्णन ह किहीन कि लखपति दीदी सब्द न केवल इनकम के संकेत हे, भलूक ए हर नारी परानी मनके स्वतंत्रता सम्मान अउ आत्मविश्वास के चिन्हारी घलो हे।
समारोह म बोलत राज्यपाल रमेन डेका ह किहीन कि हरेक लखपति दीदी ए बात के मिसाल हे कि जब संकल्प अउ सामूहिक परयास जुरथे त, आत्मनिर्भरता ह सपना नही भलूक हकीकत बन जथे।
ए मउका म मुख्यमंत्री विष्णुदेव साय ह किहीनकि छत्तीसगढ़ म सात लाख बयासी हजार लखपति दीदी बनाय के लक्ष्य राखे गे रिहीस। ए लक्ष्य के मुकाबला अब तक चार लाख तिरानवे हजार लखपति दीदी बनाय जा चुके हे। ओमन बतइन कि अवइया बेरा म चौदह लाख ससत्तर हजार लखपति दीदी बनाय बर माईलोगिन मनके चिन्हारी हो गे हवय।
कारीकरम बोलत विधानसभा अध्यक्ष डॉक्टर रमन सिंह ह किहीन कि ए सम्मेलन ह न सिरिफ नारी सक्ति के ताकत के चिन्हारी हे, भलूक छत्तीसगढ़ के आर्थिक स्थिति ल आगू बढ़ाय सोज एक ठिन बड़का कदम हे।
राजनांदगांव प्रवास के दउरान उपराष्ट्रपति ह उदयाचल मल्टीस्पेस्पेलिटी आई केयर इंस्टीट्यट के उदघाटन करीन।
उपराष्ट्रपति ए बेरा नवा रईपुर म राखे गे छत्तीसगढ़ रजत महोत्सव के समापन समारोह म सामिल होवत हे।
एयर शो
छत्तीसगढ़ राज्य स्थापना के पच्चीसवां वर्षगांठ के मउका म आज नवा रईपुर के सेंंध जलाशय तीर भारतीय वायुसेना के नामी एरोबेटिक ‘‘सूर्यकिरण‘‘ के टीम ह रोमांचक एयर सो याने उपर हवा म हवाई जहाज ले करतब देखाइन। उपराष्ट्रपति सी.पी.राधाकृष्णन, राज्यपाल रमेन डेका, मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह के संग हजारों मनखे ए अदभुत अउ रोमांचक एयर शो के आनंद लीन। सेंध जलाशय के उपर वायुसेना के नौ ठिन लड़ाकू विमान मन एक के बाद एक आनी बानी के हवई करतब दिखइन।
बिलासपुर-ट्रेन हादसा
बिलासपुर टेसन के तीर काली संझा बेरा होय ट्रेन एक्सीडेंट म मउत होय यात्री मनके संख्या बाढ़के ग्यारा हो गेहे। उहें, बीस झिन आने मनखे घायल होय हे। जिखर इलाज बिलासपुर के सिम्स, अपोलो, रेलवे अउ अरपा मेडिसिटी अस्पताल म चलत हे। हरेक घायल यात्री ल तुरते राहत दे खातिर पचास हजार रूपिया के अनुग्रह सहायता रासि दे गेहे। रतिहा बेरा तक राहत अउ बचाव काम चलत रिहीस। बड़का अधिकारी मउका म मौजूद हे अउ हालत उपर सरलग नजर राखे हुए हे।
उहें, रेल मंत्री अश्विनी वैष्णव ह नई दिल्ली ले ए घटना बारे म जानबा लीन अउ तुरते राहत अउ बचाव काम सुरू करे बर अधिकारी मन ल जरूरी निरदेस दीन।
उपमुख्यमंत्री अरूण साव ह घलो बिलासपुर के कई ठिन अस्पताल मन के दउरा कर घायल मरीज मनके स्वास्थ्य के हालचाल पूछिन अउ डॉक्टर मन ले गोठबात करत उंखर मनके बने इलाज खातिर निरदेस दीन। बाद म पत्रकार मनले गोठबात करत श्री साव ह किहीन कि एहा दुखद हादसा हरय अउ उंखर संवेदना ह प्रभावित परिवार वाले मन संग हे। ओमन किहीन कि ए दुर्घटना के जांच के आदेस दे गेहे।
इही बीच, रेल हादसा बाद रेलवे ट्रैक मन म आज बिहनिया तक ट्रेन मनके अवई-जवई चालू हो गेहे, फेर सबो ट्रेन मनके स्पीड ल कंट्रोल म राखे गेहे, जेखर ले सुरक्षा तय करे जा सकय।
राज्य अलंकरण-घोषणा-01
राज्योत्सव के समापन मउका म दे जाने वाला राज्य अलंकरण अउ सम्मान मनके घोसना कर दे गेहे। जेमा कई ठिन क्षेत्र म सुघ्घर काम करइया संस्था अउ मनखे मन के सम्मान करे जाही। अब ले थोरिक देर बाद राज्य के समापन कारीकरम उपराष्ट्रपति सी.पी.राधाकृष्णन ह ए पुरस्कार अउ सम्मान ल देही।
एखर पहिली, मीडिया ले गोठबात करत संस्कृति मंत्री राजेश अग्रवाल ह राज्य अलंकरण ले सम्मानित होवइया नाम मनके सूची जारी करीन। ए बछर सहीद वीर नारायण िंसंह सम्मान हिरेश सिन्हा ल अउ यति यतनलाल सम्मान भारतीय कुष्ठ निवारक संघ ल दे जाही। खेल के क्षेत्र म गुंडाधूर सम्मान ज्ञानेश्वरी यादव ल अउ मिनीमाता सम्मान ललेश्वरी साहू ल मिलही। उहें, गुरू घासीदास सम्मान भुवनदास जांगड़े अउ शशि गायकवाड़ ल दे जाही। अइसने, ठाकुर प्यारेलाल सिंह पुरस्कार प्राथमिक कृषि साख सहकारी समिति मर्यादित डोमा ल अउ हबीब तनवीर सम्मान डॉक्टर कुंज बिहारी शर्मा ल दे जाही। महाराजा प्रवीरचंद्र भंजदेव सम्मान बर चांदनी साहू, पंडित रविशंकर शुक्ल सम्मान बर राजेश अग्रवाल अउ पंडित सुंदरलाल शर्मा सम्मान बर डॉक्टर चित्तरंजन कर ल चुने गेहे। उहें, चक्रधर सम्मान पंडित कीर्ति माधव लाल व्यास ल अउ दाऊ मंदराजी सम्मान रिखी क्षत्रिय ल दे जाही। डॉक्टर खूबचंद बघेल कृषक रत्न पुरस्कार, थनेन्द्र कुमार साहू अउ वामन कुमार टिकारिहा ल उहें, महाराजा अग्रसेन सम्मान राजेन्द्र अग्रवाल ल दे जाही।
राज्य अलंकरण-घोषणा-02
उहें, पत्रकारिता के क्षेत्र म हिंदी प्रिंट मीडिया म चंदूलाल चंद्राकर स्मृति पत्रकारिता पुरस्कार डॉक्टर संदीप कुमार तिवारी ल दे जाही। इलेक्ट्रानिक मीडिया बर ए पुरस्कार डॉक्टर सोमेश कुमार पटेल अउ अभिषेक शुक्ला ल मिलही।
मुधकर खेर स्मृति पत्रकारिता पुरस्कार भावना पांडेय ल दानवीर भामाशाह सम्मान नीरज कुमार बाजपेयी ल, धनवंतरि सम्मान, डॉक्टर अजय कृष्ण कुलश्रेष्ठ ल अउ बिलासादेवी केंटव मत्सय विकास पुरस्कार सुखदेव दास ल दे जाही। डॉक्टर भंवर सिंह पोर्ते आदिवासी सेवा सम्मान जंगो रायतार विद्या केतुल शिक्षण संस्था ल, रामानुज प्रताप सिंहदेव स्मृति श्रम यशस्वी पुरस्कार मिथलेश कुमार आदिल अउ दुरूग के अग्रसर टीम अउ एनटीपीसी लिमिटेड लारा, सुपर थर्मल पावर प्रोजेक्ट पुसौर ल दे जाही। उहें, पंडित लखनलाल मिश्र सम्मान योगेश कुमार साहू ल, छत्तीसगढ़ अप्रवासी भारतीय सम्मान मनीष तिवारी ल देवदास बंजारे स्मृति पंथी नृत्य पुरस्कार, रोहित कुमार कोसरिया ल, किशोर साहू सम्मान सुनील सोनी ल, लक्ष्मण मस्तुरिया सम्मान राकेश तिवारी ल, लाला जगदलपुरी साहित्य पुरस्कार डॉक्टर विनोद कुमार वर्मा ल अउ किशोर साहू राष्ट्रीय अलंकरण अनुराग बसु ल दे जाही।
बैरिस्टर ठाकुर छेदीलाल सम्मान खेमचंद जैन, डॉक्टर सुरेश मणि त्रिपाठी, डॉक्टर भूपेंद्र करवन्दे अउ भरतलाल सोनी ल दे जाही। उहें, वीरांगना रानी अवंति बाई लोधी स्मृति पुरस्कार प्रेमशीला बघेल ल, माता बहादुर कलारिन सम्मान शिल्पा पांडेय सृष्टि ल, पंडित माधवराव सप्रे राष्ट्रीय रचनात्मक सम्मान अवधेश कुमार ल अउ संस्कृति भाषा सम्मान डॉक्टर दादू भाई त्रिपाठी ल दे जाही।
गुरूनानक जयंती/कार्तिक पूर्णिमा
सिख मनक पहलइया गुरू अउ सिख पंथ ल रचइया गुरूनानक देवजी के जयंती आज छत्तीसगढ़ समेत देसभर म हर्ष उल्लास के संग मनाय जात हे। गुरूनानक जी के जनम नानक शाही कैलेंडर मुताबिक कार्तिक महिना के पुन्नी के दिन होय रिहीस। ए मउका म राजधानी रईपुर समेत प्रदेस के कतकोन जिला म नगर किर्तन निकाले गीस। मुख्य कारीकरम रईपुर के पंडरी रोड स्थित खालसा स्कूल म होइस, जिंहा सबद कीर्तन अउ संगत करे गीस। ए मउका म दिन भर गुरूद्वारा म श्रध्दालू मनके रेम लगे रिहीस।
उहें, आज कातिक पुन्नी घलो हरय। ए मउका म श्रध्दालू मन नदिया नहाके अपन ईस्ट देवता ल बिनती बिनोइन। राजधानी रईपुर समेत प्रदेस के कई ठिन जघा म मेला मड़ई घलो होइस। रईपुर के महादेवघाट स्थित खारून नदिया के तीर म पुन्नी मेला राखे गे हवय। बिहनियच ले श्रध्दालू मन इंहा पहुंचिन अउ नदिया नहाके दीया बारिन। संगे हटकेश्वर नाथ शंकर मंदिर म अभिषेक बर श्रध्दालू मनके रेम लगे रिहीस।