बिलासपुर के तीर आज संझा होय एक ट्रेन हादसा म कम ले कम पांच झिन लोगन के मउत होय के खबर हे। उहें, करीबन बीस झिन ए दुर्घटना म घायल होय हे। ए हादसा तब होइस जब गेवरा रोड ले बिलासपुर कोति आवत एक मेमू ट्रेन आउटर सिग्नल म लालखदान के तीर खड़े मालगाड़ी ले जा टकरईस।
ए मेमू ट्रेन के नंबर – छह आठ सात तीन तीन बताय जावत हे।
टक्कर अतका जोरदरहा रिहीस कि लोकल ट्रेन के आगू के डिब्बा बनेच क्षतिग्रस्त होगे हे। घटना के खबर मिलतेच रेलवे, जीआरपी, जिला प्रशासन अउ पुलिस के अधिकारी घटनास्थल म पहुंचीन। तुरते राहत अउ बचाव के काम चालू करे गेहे। मउका ले अब तक चार झिन लोगन के सव बरामद करे गेहे। घायल मन ल अस्पताल पहुंचाय गेहे। अधिकारी मनके मुताबिक दू झिन मनखे अभी घलो क्षतिग्रस्त डब्बा म फंसे हे, जउन मन ल निकाले के कोसिस करे जावत हे। ए घटना म हताहत अउ घायल मनके संख्या बाढ़े के आसंका हे।
रेलवे ह यात्री अउ उंखर परिवार वाले मनके के सुविधा बर हेल्पलाइन नंबर जारी करे हे। बिलासपुर बर हेल्पलाइन नंबर हे – सात सात सात सात आठ पांच सात तीन तीन पांच। चांपा बर – आठ शून्य आठ पांच नौ पांच छह पांच दू आठ। रायगढ़ बर नौ सात पांच दू चार आठ पांच छह शून्य शून्य। पेण्ड्रा रोड बर आठ दू नौ चार सात तीन शून्य एक छह दू अउ कोरबा बर हेल्पलाइन नंबर हवय – सात आठ छह नौ नौ पांच तीन तीन तीन शून्य।
यात्री अउ उंखर परिवार वाले मन ए नंबर म संपर्क करके जरूरी जानकारी प्राप्त कर सकत हे।
एसआईआर-बीएलओ गणना
प्रदेस म मतदाता सूची के विशेष गहन पुनरीक्षण यानी एसआईआर के तहत पहिली चरण के गणना के काम आज ले सुरू होगे हे। एखर तहत बीएलओ घर-घार जाके मतदाता परिचय पत्र के सत्यापन करत हे। प्रदेस म सत्ताईस हजार एक सौ निन्यानवे बीएलओ मतदाता मनके पहिचान करके उंखर दस्तावेज के सत्यापन करही। हर दिन कतका लोगन मनके सत्यापन होवत हे, एखर जानकारी चुनाव आयोग के सर्वर म अपडेट करे जाही।
मुख्य निर्वाचन पदाधिकारी यशवंत कुमार ह बतईन कि राज्य म जेखर नाम साल दू हजार तीन के एसआईआर म हे, ओमन ल दस्तावेज देके जरूरत नइ हे। सिरिफ पांच ले छह प्रतिशत मतदाता मन ल ही दस्तावेज देके जरूरत होही। ओमन बतईन कि चुनाव आयोग डहार ले तय करे गे तेरह दस्तावेज मन ले कोनों भी एक दस्तावेज मतदाता मन ल प्रस्तुत करना होही। मुख्य निर्वाचन पदाधिकारी ह बतईन कि असुविधा होय म बीएलओ मतदाता हेल्पलाइन नंबर एक-नौ पांच शून्य म कॉल रिक्वेस्ट के माध्यम ले मदद ले जा सकत हे।
एसआईआर के तहत गणना के काम चार दिसंबर तक चलही। उहें, मतदाता सूची के प्रकाशन नौ दिसंबर के करे जाही। दावा-आपत्ति नौ दिसंबर ले आठ जनवरी तक ले जाही। सुनवाई अउ सत्यापन नौ दिसंबर ले इकतीस जनवरी तक करे जाही। उहें, अंतिम मतदाता सूची के प्रकासन सात फरवरी के करे जाही।
उपराष्ट्रपति-छत्तीसगढ़
उपराष्ट्रपति काली राजनांदगांव पहुंच के उदयाचल मल्टी स्पेशिएलिटी नेत्र चिकित्सा संस्थान के उद्घाटन करही। ओमन राजनादगांव के स्टेट स्कूल मैदान म राखे गे लखपति दीदी सम्मेलन म माईपहुना के रूप म सामिल होही।
एखर बाद काली संझा उपराष्ट्रपति छत्तीसगढ़ राज्य गठन के पच्चीस बछर पूरा होय के मउका म नवा रायपुर म राखे गे छत्तीसगढ़ रजत महोत्सव के समापन समारोह म माईपहुना के रूप म सामिल होही। ए मउका म आने-आने क्षेत्र म सुघ्घर काम करइया विभूति मन ल राज्य अलंकरण ले सम्मानित करही।
उपराष्ट्रपति काली संझा रायपुर ले नई दिल्ली बर रवाना हो जही।
छत्तीसगढ़-फोर्टिफाइड चावल कर्नेल
कृषि अउ प्रसंस्कृत खाद्य उत्पाद निर्यात विकास प्राधिकरण ह छत्तीसगढ़ ले कोस्टा रिका बर विटामिन अउ खनिज ले युक्त फोर्टिफाइड चाउर कर्नेल के पहिली खेप भेजे हे। ए प्राधिकरण वाणिज्य अउ उद्योग मंत्रालय के तहत काम करत संगठन आय। मंत्रालय ह केहे हे कि निर्यात के ए पहल पोषण अभियान के तहत सरकार के कुपोषण मुक्त भारत अभियान के अनुरूप हवय।
एपीडा के अध्यक्ष अभिषेक देव ह किहीन कि भारत ले फोर्टिफाइड चाउर के निर्यात न सिरिफ देस के कृषि-निर्यात ल मजबूत करही, बल्कि विज्ञान-आधारित अउ विश्व स्तर म मान्यता मिले खाद्य समाधान के माध्यम ले कुपोषण ल दूरिहा करे म घलो बिसेस भूमिका निभाही।
उहें, छत्तीसगढ़ चावल निर्यातक संघ के अध्यक्ष मुकेश जैन ह एपीडा डहार ले दे गे मदद के बड़ई करत कहिन कि अवइया दिन म नवा गंतव्य ल एफआरके निर्यात के योजना बनाय जावत हे।
खबर के मुताबिक फोर्टिफाइड चाउर कर्नेल चाउर के पिसान ल आयरन, फोलिक एसिड अउ विटामिन बी-ट्वैल्व जइसन सूक्ष्म पोषक तत्व के संग मिलाके बनाय जाथे। ए पोषक तत्व मन ल निकालके चाउर के दाना जइसे आकार दे जाथे अउ फेर एला एक निर्धारित अनुपात म नियमित चाउर के संग मिलाके चाउर के पोषण मूल्य ल बढ़ाय जाथे।
राज्यपाल-आकांक्षी विकासखंड समीक्षा
राज्यपाल रमेन डेका ह आज राजभवन म वीडियो कॉन्फ्रेंसिंग के माध्यम ले बस्तर संभाग के आकांक्षी विकासखंड म चलत काम के समीक्षा करीन। ओमन अधिकारी मन ल सिक्षा, स्वास्थ्य अउ आजीविका के दिसा म विशेष पहल करे बर कहिन। राज्यपाल ह टीबी उन्मूलन के काम ल गति दे, स्कूल ले ड्रॉप आउट लइका मन उपर बिसेस ध्यान दे, आजीविका बर स्व-सहायता समूह मन ल मजबूत करे अउ ओमन ल रोजगारमूलक काम ले जोड़े के घलो बात कहिन।
घुमंतू पशु-विशेष अभियान
घुमंतू पशु मनके सेती होवइया दुर्घटना ल रोके बर प्रदेस म एक महीना तक विशेष अभियान चलाय जाही। ए बारे म नगरीय प्रसासन विभाग ह जिला कलेक्टर, नगर निगम के आयुक्त, नगर पालिका अउ नगर पंचायत के मुख्य नगर पालिका अधिकारी मन ल परिपत्र जारी करे हे। पत्र म केहे गेहे कि परिवहन विभाग के मानक संचालक प्रक्रिया-एसओपी के मुताबिक खुला म पुश मन ल नइ छोड़े बर पशु मालिक मन ल जागरूक करयं।
डिजिटल जीवन प्रमाण पत्र-शिविर
कार्मिक, लोक शिकायत अउ पेंशन मंत्रालय के अधीन पेंशन अउ पेंशनभोगी कल्याण विभाग डहार ले एक ले तीस नवंबर तक राष्ट्रव्यापी डिजिटल जीवन प्रमाणपत्र अभियान चलाय जावत हे। एखर तहत वरिष्ठ सलाहकार मनोज कुमार तिवारी डीएलसी सुविधा के लाभ उठावत पेंशनभोगी मनके संग गोठबात करे बर छत्तीसगढ़ के दउरा करही। अभियान के तहत बिलासपुर म छह नवंबर अउ दुरूग म सात नवंबर के डीएलसी शिविर लगाय जाही। सिविर म अधिकारी मन बैंक, इंडिया पोस्ट पेमेंट्स बैंक, यूआईडीएआई, एनआईसी अउ स्थानीय पेंशनभोगी कल्याण संघ के बीच समीक्षा करही। ए अभियान के लक्ष्य दू हजार से जादा सहर अउ कस्बा म दू करोड़ पेंशनभोगी मन तक पहुंचना हवय। ए अभियान आधार-आधारित फेस आईडी के माध्यम ले तकनीकी के उपयोग म जोर देथे, जेखर ले पेंशनभोगी मन बिना बायोमेट्रिक उपकरण के आसानी ले अपन जीवन प्रमाण पत्र जमा कर सकत हे।
माओवादी ऑर्डिनेंस फैक्ट्री-ध्वस्त
सुकमा जिला म गोमगुड़ा के जंगल म सुरक्षा बल मन ह माओवादी मनके ऑर्डिनेंस फैक्ट्री ल ध्वस्त कर देहे। मउका ले सत्रह नगर रायफल, हथियार बनाय के उपकरण, मसीन, गन पार्ट्स अउ हथियार बनाय म उपयोग करइया सामान बरामद करे गेहे। सुकमा के पुलिस अधीक्षक किरण चव्हाण ह बतईन कि ए फैक्ट्री माओवादी मन डहार ले क्षेत्र म सशस्त्र गतिविधि ल बढ़ाय के उद्देश्य ले चलाय जावत रिहीस।
उहें, बस्तर रेंज के पुलिस महानिरीक्षक सुंदरराज पी. ह बतईन कि पाछु दस महीना के दउरान बस्तर संभाग म सुरक्षा बल मन ह माओवादी मनके तीर ले पांच सौ तिरसठ ले जादा हथियार बरामद करे हे। एमा एलएमजी, एके-फोर्टी सेवन, इंसास रायफल अउ एसएलआर सामिल हवय।