मुख्य निर्वाचन पदाधिकारी ह बतइन कि गणना प्रपत्र म देय गे पाछू एसआईआर निर्वाचन नामावली के विवरण नइ हे, या फेर डेटा बेस ले मेल नइ खात हे, त निर्वाचक पंजीकरण अधिकारी ह अइसन मतदाता मन ल नोटिस जारी करही। नोटिस के बाद मतदाता मन ल तेरह ठिन दस्तावेज जइसे पासपोर्ट, जन्म प्रमाण पत्र, अस्थाई निवास प्रमाण पत्र, जाति प्रमाण पत्र, जइसन कोनो भी एक ठिन दस्तावेज जमा कर सकथे।
वायुसेना-एयर शो
भारतीय वायुसेना के सूर्यकिरण एरौबैटिक टीम नवा रईपुर म पांच नवंबर के बिहनिया दस बजे ले बारह बजे तक एयर सो करही। नौ ठिन फाईटर विमान के संग सूर्यकिरण टीम बॉम्ब बर्स्ट‘‘ ‘हार्ट-इन-द-स्काई‘ अउ ‘एरोहेड‘ जइसन हवाई करतब दिखाही। ए बार एरौबैटिक सो खास हवय, काबर कि ए टीम म पायलट गौरव पटेल ह छत्तीसगढ़ के रहइया हरय। ए सो के बारे म अउ जादा जानबा देबर सूर्यकिरण के टीम ह आज रईपुर म मीडिया ले गोठबात करीन।
पायलट गौरव पटेल ह बतइन कि ओमन महासमुंद जिला के पिथौरा के रहइया हरय अउ अब तक सूर्यकिरण के टीम ह देस अउ दुनिया म सात सौ ले जादा सो कर लेहे।
उहें, सूर्यकिरण के टीम म सामिल महिला पायलट अउ कमेंटेटर कंवल संधु ह बतइन कि ए सो के माध्यम ले भारतीय सेना के शौर्य अउ साहस दिखाय जाही, जउन ए संदेस देथे कि अनुशासन अउ टीम वर्क ले हर कठिन लक्ष्य ल पाय जा सकथे।
टीम कोति ले काली चार नवंबर के शो के पूर्वाभ्यास करे जाही। ऐति आयोजन के तियारी के जायजा लेबर महादेव कावरे, आईजी अमरेश मिश्रा, जिला कलेक्टर डॉ. गौरव सिंह अउ एसएसपी डॉ. लाल उमेद सिंह ह नवा रईपुर म जघा के निरीक्षण करीन अउ आयोजन के बारे म जरूरी दिसा निरदेस दीन।
जिला स्तरीय-राज्योत्सव
ऐति, दुरूग म चलत जिला स्तरीय राज्योत्सव म स्कूल शिक्षा मंत्री गजेन्द्र यादव ह किहीन कि छत्तीसगढ़ म किसान अउ गरीब मनके हित म देस के पहिली खाद्यन्न सुरक्षा अधिनियम लागू करे गीस, जउन ह आगू चलके पूरा देस बर एक ठिन माडल बनिस।
अइसने, मोहला-मानपुर-अंबागढ़ चौकी जिला के मोहला म चलत जिला स्तरीय राज्योत्सव म कौशल विकास मंत्री गुरू खुशवंत साहेब ह लोगन मनले अपील करीन कि दू हजार सैंतालीस तक विकसित भारत के संग विकसित छत्तीसगढ़ बनाय के घलो संकलप लेवय।
ऐति, बलौदाबाजार म जिला स्तरीय राज्योत्सव के सुभारंभ समारोह म राजस्व मंत्री टंकराम वर्मा अउ स्वास्थ्य मंत्री श्याम बिहारी जायसवाल सामिल होइन। ए मउका म महिला अउ बालविकास विभाग डहार ले बाल विवाह मुक्त दू सौ पच्चीस अउ स्वास्थ्य विभाग डहार ले टीबी मुक्त साठ ठिन ग्राम पंचायत मन ल सम्मानित करे गीस।
उहें, महिला अउ बाल विकास मंत्री लक्ष्मी राजवाड़े ह सूरजपुर म जिला स्तरीय राज्योत्सव कारीकरम के सुभारंभ करीन। ए दउरान ओमन महिला उद्यमिता, पोषण कारीकरम, हस्तसिल्प, कृषि अउ स्थानीय उत्पाद के प्रदर्सनी ल गांव के अर्थव्यवस्था ल सशक्त बनाय के दिसा म कारगर बतइन।
राज्यपाल-राज्योत्सव
छत्तीसगढ़ राज्य स्थापना दिवस के मउका म चलत राज्योत्सव के आज तीसर दिन हरय। रईपुर म होवत राज्योत्व के कारीकरम म दूसर दिन काली राज्यपाल रमेन डेका ह मुख्य अतिथि के रूप म सामिल होइन। ए मउका म ओमन किहीन कि ए रजत जयंती वर्ष पाछू होय कामकाज के सुरता करे अउ आगू के नवा संकलप लेके मउका हे। राज्यपाल ह किहीन कि पाछू बछर म राज्य ह शिक्षा, स्वास्थ्य, कृषि, उद्योग, बिजली, सड़क अउ संस्कृति के संगेसंग हर क्षेत्र म सफलता पाय हे। ओमन किहीन कि प्रधानमंत्री नरेंद्र मोदी के अगुवई म केंद्र अउ राज्य सरकार दूनो के परयास ले प्रदेस ह अब नक्सल मुक्त होय के दिसा म आगू बाढ़त हे, जउन जघा म कभू डर अउ हिंसा रिहीस उंहा आज रद्दा बनाय के काम चलत हे, स्कूल खुलत हे अउ लइका मनके चेहरा म खुसी दिखत हे।
रेरा-परियोजना स्पष्टीकरण
छत्तीसगढ़ भू-संपदा विनियामक प्राधिकरण-रेरा ह घर खरीदे के हित म बड़का जानबा देवत स्पष्ट करे हे कि कोनो परियोजना के विस्तार अवधि अउ आधिपत्य तारीख दूनो म अंतर होथे। रेरा ह किहीन हे कि परियोजना के बेरा बढ़ाय के मतलब ए नइ होवय खरीददार के संपत्ति देके राखे गे तारीख ह बढ़ गेहे। रेरा के मुताबिक रेरा अधिनियम के मुख्य उद्देस्य पंजीकृत परियोजना, तय समय-सीमा के भीतर पूरा होवय अउ खरीददार मन ल बेरा म उंखर मकान मिलय। प्राधिकरा कोति ले बताय गेहे कि परियोजना के वैधता अवधि प्रमोटर पंजीयन के बेरा घोसित करथे अउ जेमा चलत काम के पूरा वादा करथे। रेरा ह बतइन कि यदि प्रमोटर ह बेरा म निर्माण काम पूरा नइ कर पाय, त रेरा ले परियोजना के वैधता अवधि बढ़ाय के अनुमति ले सकथे। उहें, यदि प्रमोटर ह तय तारीख तक काम पूरा नइ करय, त खरीददार ह रेरा म सिकइत दर्ज करा सकथे।
तीजन बाई-एम्स
अंतर्राष्ट्रीय पंडवानी गायिका अउ पद्म विभूषण तीजन बाई ल रूटीन चेकअप बर रईपुर एम्स म भर्ती कराय गेहे। जानबा के मुताबिक पाछू दिन प्रधानमंत्री के रईपुर आगमन के मउका म प्रधानमंत्री ह फोन म तीजन बाई ले स्वास्थ्य ल लेके गोठबात करे रिहीन, जेखर बाद राज्य सरकार कोति ले ओमन ल बढ़िया इलाज बर एम्स म एडमिट कराय गेहे।
महिला विश्व कप-विजेता
देस के नोनी मन ह क्रिकेट म काली इतिहास रचे हे। नवी मुंबई म होय आईसीसी महिला विश्व कप के फाइनल म भारत ह दक्षिण अफ्रीका ल बावन रन ले हराके पहिली बार विश्व कप जितिन। पहिली बल्लेबाजी करत भारत ह दक्षिण अफ्रीका के आगू दू सौ निनान्यवे रन बनाय के लक्ष्य राखिन, फेर दक्षिण अफ्रीका के टीम ह अतेक रन नइ बना सकिस अउ मैच हार गे।
मुख्यमंत्री विष्णुदेव साय ह भारतीय महिला क्रिकेट टीम ल विश्व विजेता बने उपर सुभकामना देहे। मुख्यमंत्री ह ए जीत ल पूरा भारत बर गौरव के क्षण बतावत किहीन कि ए उपलब्धि म छत्तीसगढ़ घलो सहभागी रेहे हे। ओमन बतइन कि कवर्धा जिला के बेटी आकांक्षा सत्यवंशी ह बतौर फिजियौथैरेपिस्ट अउ स्पोर्ट्स साइंस एक्सपर्ट, रहिके, भारतीय टीम के हिस्सा बनिन अउ अपन बड़का भूमिका निभाइन।