राष्ट्रीय खेल दिवस
आज राष्ट्रीय खेल दिवस हे। ए मउका म राष्ट्रपति रामनाथ कोविंद ह वीडियो कान्फ्रेंसिंग के माध्यम ले बछर दू हजार बीस के राष्ट्रीय खेल अउ साहसिक कार्य पुरस्कार प्रदान करीन। ओमन ह राजीव गांधी खेल रत्न पुरस्कार, अर्जुन पुरस्कार, द्रोणाचार्य पुरस्कार, ध्यानचंद पुरस्कार, तेनजिंग नोरगे राष्ट्रीय साहसिक कार्य पुरस्कार अउ राष्ट्रीय खेल प्रोत्साहन पुरस्कार दीन।
श्री कोविंद ह ए मउका म किहीन कि खेल म उपलब्धि हासिल करना सिरिफ सरकार के जिम्मेदारी नइ हे, हरेक वर्ग अउ क्षेत्र के लोगन भागीदारी ले खेल संस्कृति ल बढ़ावा दे जा सकत हे। राष्ट्रपति ह ए बाम खुसी जताईन कि अब खेल अउ फिटनेस युवा मनके सोच अउ दिनचर्या के हिस्सा बन गे हवय। ओमन किहीन कि खेल के प्रति माता-पिता, अभिभावक अउ सिक्षक मनके रवैया घलो बदलत हे। श्री कोविंद ह विश्वास जताईन कि सबके सामुहिक प्रयास ले भारत खेल के क्षेत्र म महासक्ति के रूप म उभरही।
ए कारीकरम के आयोजन पहिली घांव वर्चुअल रूप ले करे गीस।
खेल दिवस-प्रधानमंत्री
प्रधानमंत्री नरेन्द्र मोदी ह किहीन हे कि राष्ट्रीय खेल दिवस ओ सबो खिलाड़ी मनके महत्वपूर्ण उपलब्धि के जश्न मनाय के मउका हे, जउन मन ह आने-आने खेल म भारत के अगुवई करीन अउ राष्ट्र ल गौरव देवाईन। श्री मोदी ह ए खिलाड़ी मनके मेहनत ल असाधारण बतईन हे। ओमन ह टवीटर म किहीन कि राष्ट्रीय खेल दिवस मेजर ध्यानचंद ल श्रद्धांजलि देके दीन घलो हे, जिखर हाॅकी के जादू ल कभी भुलाय नइ जा सकय। ओमन किहीन कि ए देस के प्रतिभावान खिलाड़ी मनके सफलता के दिसा म उंखर परिवार, कोच अउ सहायक कर्मचारी मनके असाधारण मदद के तारीफ करे के दिन घलोक हे।
फिट इंडिया-रेलवे
रेलवे ह खेल मंत्रालय डहार ले सुरू करे गे ‘‘फिट इंडिया फ्रीडम रन‘‘ पहल ल पूरा भारतीय रेलवे उपर लागू करे के फइसला करे हे। ए पहल फीट इंडिया अभियान म करे जावत हे। एखर बर दक्षिण पूर्व मध्य रेलवे के सबो दू हजार ले जादा अधिकारी-करमचारी अउ उंखर परिवार के सदस्य मन ल प्रोत्साहित करे जावत हे। एमा बिलासपुर, रईपुर, अउ नागपुर रेलमंडल के करमचारी मन ह बड़-चढ़के हिस्सा लेवत हे।
बारिश-01
प्रदेस म पाछु तीन दिन ले होवत बरसा के थमे के बाद लोगन ल थोरकुन राहत मिले हे। फेर, कतकोन नदी-नाला मन ह अभी घलो उफान म हवय अउ बांध मन ले पानी छोड़े जावत हे। जादा बरसा अउ बाढ़ ले परभावित लोगन ल राहत सिविर म पहुंचाय जावत हे।
जांजगीर-चांपा जिला म महानदी निसान ले उपर बोहात हे। जिला म अतिवृष्टि अउ बाढ़ के सेती चार हजार मकान क्षतिग्रस्त होय हे। कलेक्टर अउ पुलिस अधीक्षक ह आज शिवरीनारायण पहुंच के बाढ़ ले होय नकसान अउ राहत सिविर के जायजा लीन।
उहें, राजनांदगांव जिला म कुसरीबोड़ गांव के कतकोन घर म बरसा के पानी भर गे हवय। सूचना मिले के बाद पुलिस चैकी सुरगी के टीम ह मउका म पहुंच के नाला साफ करा के पानी ल बाहिर निकलवाईस।
अइसने, दुरूग जिला म शिवनाथ नदी खतरा के निशान ले तीन फीट उपर बोहावत हे। दुरूग-राजनांदगांव रद्दा म बने जुन्ना पुल ह डूब गे हवय। महमरा एनीकट के पहुंच मार्ग घलो बंद होगे हवय। जिला के मोंगरा, घुमरिया, अउ सूखा नाला बांध ले चवालीस हजार क्यूसेक पानी छोड़े जावत हे। भेड़सर के ईट भट्टा म काम करत तीन झिन लोगन ल बाढ़ म फंसे के सेती रेस्क्यू करके सुरक्षित बाहिर निकाले गीस।
ऐति, महासमुंद जिला के सराईपाल विकासखंड म मकान मनके टूटे ले सोलह झिन प्रभावित मन ल दू लाख रूपिया के मुआवजा रासि दे गे हवय। उहें, बसना के पन्द्रह झिन प्रभावित मन ल करीबन एक लाख उनचालीस हजार रूपिया के राहत रासि दे गे हवय।
बारिश-02
रायगढ़ जिला के बरमकेला अउ पुसौर इलाका के सत्ताईस ठिन गांव बाढ़ ले परभावित होय हे। उहें, जिला म करीबन तेईस सौ लोगन ल राहत सिविर म सुरक्षित राखे गे हवय। महानदी अउ मांड नदी अभी घलो उफान म हवय। चन्द्रपुर अउ ओखर तीर-तखार के क्षेत्र म बाढ़ के स्थिति बन गे हवय। सरिया-सूरजपुर पुल अउ कलमा बैराज के तीर-तखार के क्षेत्र बाढ़ के चपेट म हवय। तटीय इलाका ल खाली कराय जावत हे। इही बीच, जिला के कलेक्टर अउ पुलिस अधीक्षक ह आज बाढ़ प्रभावित इलाका के दउरा करीन।
ऐति, बिलासपुर जिला के मस्तुरी, बिल्हा अउ तखतपुर क्षेत्र म बाढ़ के स्थिति बने ले आठ सौ तिरसठ झन मनखे ल रेस्क्यू करे गेहे।
उहें, बलौदाबाजार जिला म अति बरसा ले छब्बीस ठिन गांव परभावित होय हे। बाढ़ म फंसे पैंतीस झिन लोगन ल सुरक्षित निकाल के राहत सिविर म पहुंचाय गे हवय।
इही बीच, मौसम विभाग ह अवइया चैबीस घंटा के दउरान प्रदेस के कुछेक जघा म हल्का ले मध्यम बरसा होय के संभावना जताईन हे।
बारिश-मुख्यमंत्री निर्देश
मुख्यमंत्री भूपेश बघेल ह सबो जिला कलेक्टर मन ल अतिवृष्टि अउ बाढ़ के सेती लोगन के जान के सुरक्षा के काम ल प्राथमिकता दे जाय के निरदेस दीन हे। ओमन ह बारिस ले परभावित लोगन ल राहत पहुंचाय बर घलो किहीन हे।
श्री बघेल ह रईपुर के अपन निवास कार्यालय ले काली वीडियो कान्फ्रेंसिंग के माध्यम ले सबो जिला म अतिवृष्टि अउ बाढ़ के स्थिति के समीक्षा करीन। ए दउरान मुख्यमंत्री ह किहीन कि जादा बरसा होय के सेती जिला मन म जनजीवन प्रभावित होय हे। नदी-नाला मन उफान म हवय। सहरी क्षेत्र के निचला बस्ती मन म घलो पानी भर गे हवय। मुख्यमंत्री ह अधिकारी मन ले किहीन कि बाढ़ म फंसे लोगन ल सुरक्षित निकालना अउ ओमन ल राहत सिविर म ठहराय के संग उंखर भोजन अउ स्वास्थ्य के बने बेवस्था करे जाना चाही। ओमन यहू किहीन कि कोरोना संक्रमण ल देखत राहत सिविर म फिजिकल डिस्टेंसिंग, सैनिटाईजेसन संघरा दूसर जोखा करे जाना चाही। कोरोना संक्रमण के साथ बरसा अउ बाढ़ के स्थिति ले निपटना दोहरा चुनौती हवय।
विधानसभा भवन-भूमिपूजन
छत्तीसगढ़ के नया विधानसभा भवन के आज भूमिपूजन करे गीस। मुख्यमंत्री भूपेश बघेल अउ विधानसभा डाॅक्टर चरणदास महंत ह नवा रईपुर म नवा विधानसभा भवन के निर्माण काम के भूमिपूजन करीन। ए भवन नवा रईपुर अटल नगर के सेक्टर उन्नीस म महानदी अउ इंद्रावती भवन के पीछु इंक्यावन एकड़ म बनही। मुख्य भवन के निर्माण बावन हजार चार सौ संतानवे वर्गमीटर म करे जाही। एखर लागत करीबन दू सौ सत्तर करोड़ रूपिया होही। भूमिपूजन कारीकरम म कांग्रेस के राष्ट्रीय अध्यक्ष सोनिया गांधी, वरिष्ठ नेता मोतीलाल वोरा अउ सांसद राहुल गांधी वर्चुअल रूप ले सामिल होईन।
भूमिपूजन के मउका म मुख्यमंत्री ह किहीन कि नवा रईपुर ल आबाद करे बर राज्य सरकार हरसंभव उपाय करत हे। मंत्री अउ अधिकारी-करमचारी मन बर आवास बनाय के सुरूवात होगे हवय। कोरोना संक्रमण के सेती काम म थोरकुन देरी होय हे। ओमन उम्मीद जताईन कि अवइया बछर म नवा रईपुर म राज्यपाल, मंत्री अउ सासन-प्रशासन ले जुड़े लोगन रेहे बर लगही अउ सुविधा घलो बाढ़ही।
छत्तीसगढ़ी-आठवीं अनुसूची
छत्तीसगढ़ विधानसभा म काली छत्तीसगढ़ी भाखा ल संविधान के आठवां अनुसूची म सामिल करे के सासकीय संकल्प सर्व-सम्मति ले पारित कर दे गीस। मुख्यमंत्री भूपेश बघेल ह एला प्रस्तुत करत किहीन कि छत्तीसगढ़ी ल राजभाषा के दर्जा मिल गे हवय। फेर छत्तीसगढ़ी भाखा अभी तक संविधान के आठवां अनुसूची म सामिल नइ हो पाय हे। छत्तीसगढ़ी भाखा के विकास अउ मान्यता बर छत्तीसगढ़ी भाखा के संविधान के आठवां अनुसूची म सामिल होना जरूरी हे।
मुख्यमंत्री ह किहीन कि राज्य सरकार ह छत्तीसगढ़ी तिहार खान-पान अउ रहन-सहन ल बढ़ावा देवत हे। अब मंत्रालय म घलो अधिकारी-कर्मचारी मन ह छत्तीसगढ़ी सीखत हे।
मन की बात
प्रधानमंत्री नरेन्द्र मोदी काली इतवार के बिहनिया ग्यारह बजे आकाशवाणी म ‘‘मन की बात‘‘ कारीकरम म देस-विदेस म रहईया लोगन ले अपन विचार साझा करही। ए ‘‘मन की बात‘‘ कारीकरम के अड़सठवां कड़ी होही।
ए कारीकरम आकशवाणी अउ दूरदर्शन के जम्मों नेटवर्क म प्रसारित करे जाही। एखरे संग ए कारीकरम आकशवाणी के समाचार वेबसाइट डब्ल्यू.डब्ल्यू.डब्ल्यू. डाॅट न्यूज आॅन एआईआर अउ न्यूज आॅन ए.आई.आर. मोबाइल ऐप म घलो मिल सकही। आकाशवाणी, दूरदर्शन समाचार, प्रधानमंत्री कार्यालय अउ सूचना तथा प्रसारण मंत्रालय के यू-ट्यूब चैनल मन म घलो एखर सीधा प्रसारण करे जाही।
हिन्दी म प्रसारण के तुरते बाद ‘‘मन की बात‘‘ कारीकरम आकाशवाणी ले क्षेत्रीय भाखा मन म घलो प्रसारित करे जाही, जेला संझा आठ बजे एक घांव फेर सुने जा सकत हे।
विधानसभा सत्र-समापन
छत्तीसगढ़ विधानसभा के मानसून सत्र के काली समापन होही। ए मउका म विधानसभा अध्यक्ष डाॅक्टर चरणदास महंत ह किहीन कि कोरोना संक्रमण के विषम परिस्थिति म विधानसभा के सत्र बला के ओला सफल बनाय म विधानसभा के सबो सदस्य मन ह अपन जिम्मेदारी के परिचय दीन हे। ओमन किहीन कि विधानसभा के सीतकालीन सत्र अवइया दिसंबर महीना के तीसरा हफ्ता कराय के संभावना हे।
ए मउका म मुख्यमंत्री भूपेश बघेल ह किहीन कि कोरोना काल म विधानसभा के सबो सदस्य मन ह सदन के कार्यवाही म हिस्सा लीन अउ अपन जिम्मेदारी के पालन करत मतदाता मनके अउ क्षेत्र के समस्या ल उठाईन।
रायपुर-कोरोना जांच
राजधानी रईपुर म कोरोना संक्रमित के पहिचान बर अब हर घर तक स्वास्थ्य विभाग के टीम ह पहुंचही। नगर निगम क्षेत्र के सबो दस जोन ल आठ सौ तिरानवे सबग्रिड म बांट के जोन कमिश्नर अउ इंसीडेंट कमांडर के देखरेख म नगर निगम अउ स्वास्थ्य विभाग के अमला ल मरीज मनके पहिचान बर लगाय गे हवय। जांच दल ह घर-घर म पहुंच के लोगन के सेहत के जानकारी लेवत हे। संगेसंग लोगन के सरीर म आॅक्सीजन के जांच घलो करे जावत हे। कोनों मनखे के सरीर म आॅक्सीजन के मात्रा पंचानवे प्रतिशत ले कम पाय जाय म उंखर सघन जांच निःसुल्क करे जाही।