आज दूसरइया दिन मुंबई के प्रसिध्द पार्श्व गायक आदित्य नारायण के संगेसंग छत्तीसगढ़ के कलाकार सुनील तिवारी, जयश्री नायर अउ पद्मश्री डोमार सिंह कंवर कारीकरम प्रस्तुत करहीं।
उहें, प्रदेस के जिला मुख्यालय मन म घलो आज ले तीन दिन के राज्योत्सव सुरू हो गेहे। उपमुख्यमंत्री अरूण साव ह आज जगदलपुर के सीटी ग्राउंड म आयोजित जिला स्तरीय राज्योत्सव के सुभारंभ करीन। ए बेरा ओमन ह इंहा लगाय गे सरकारी विभाग के आने-आने प्रदर्सनी म जाके अवलोकन करीन। संगेसंग हितग्राही मन ले गोठबात घलो करीन। ए मउका म श्री साव ह बस्तर हाट कियोस्क के उद्घाटन करके कलागुड़ी कैटलॉक के विमोचन करीन। कारीकरम ल संबोधित करत श्री साव ह छत्तीसगढ़ राज्य म सिरजाय म भारत रत्न पूर्व प्रधानमंत्री अटल बिहारी बाजपेयी के योगदान ल सोरियात किहीन कि पचीस बछर म शिक्षा, स्वास्थ्य, मूलभूत सुविधा संगे जम्मो क्षेत्र म विकास होय हे। ओमन यहू किहीन कि दूरिहा इलाका म सुरक्षाबल अउ पुलिस जवान मन अभियान चलाके नक्सल मुक्त करत हे। बस्तर के चिन्हारी अब देस अउ दुनिया म अपन कला, संस्कृति अउ पर्यटन ले होवत हे।
प्रधानमंत्री-रामनामी समाज
प्रधानमंत्री नरेंद्र मोदी ले काली मंत्रालय म रामनामी समाज के प्रतिनिधि मन मुलाकात करीन। ए बेरा रामनामी समाज के लोगन प्रधानमंत्री ल अपन पारंपरिक मोर मुकुट ले अलंकृत करे के इच्छा जतइन। एमा प्रधानमंत्री ह उंखर अनुरोध स्वीकार कर लीन।
मुख्यमंत्री विष्णुदेव साय ह एखर वीडियो अपन सोसल मीडिया अकाउंट म साझा करत एला बड़ सुघ्घर बतइन। ओमन किहीन कि ए समाज अपन तन-मन जीवन ल भगवान श्रीराम के चरन म अर्पित कर देथे, इही उंखर जीवन के साधना हे। मुख्यमंत्री ह किहीन कि प्रधानमंत्री के अंतस म भक्ति अउ कर्म के संगम झलकथे। ए दृश्य ए गोठ के पुष्टि करथे कि रामभक्ति सिरिफ पूजा नइ हे, भलूक जिनगी जिये के सुघ्घर साधना घलो हे।
माओवादी सामग्री-बरामद
गरियाबंद जिला म शोभा अउ जुगाड़ थाना क्षेत्र के जंगल ले पुलिस ह भारी मात्रा म माओवादी जिनिस बरामद करे हे। एमा चार ठन कुकर बम, इलेक्ट्रिक वायर, फटाका अउ रासन सामिल हे। पुलिस ह माओवादी जिनिस सायबिन कछार, कोदोमाली अउ भूतबेड़ा के जंगल म जांच अभियान के बेरा बरामद करीस।
जिला के पुलिस अधीक्षक निखिल राखेचा ह बतइन कि माओवादी मन ले ए जिनिस ल सुरक्षाबल मन ल नुकसान पहुंचाय बर लुकाय रिहीन। ओमन बतइन हे कि पुलिस डहार ले माओवादी मनके गतिविधि उपर सरलग निगरानी राखे जावत हे, अउ सर्चिंग अभियान आगू घलो जारी रइही।
लेखनी साहू-राज्यपाल मुलाकात
राष्ट्रपति पुरस्कार ले सम्मानित कोरबा जिला के लेखनी साहू आज राजभवन म राज्यपाल रमेन डेका ले भेंट करीन। ए बेरा राज्यपाल ह लेखनी साहू ले उंखर अनुभव उपर गोठबात करत किहीन कि अइसन युवा समाज बर प्रेरणा स्त्रोत हें। राज्यपाल ह लेखनी साहू ल समाज सेवा ले जुड़े रेहे बर घलो किहीन हें।
बतादन कि लेखनी साहू राष्ट्रीय सेवा योजना (एनएसएस) के छात्रा हें, अउ ओमन ल बीते छै अक्टूबर के राष्ट्रपति ह समाज सेवा, पर्यावरण संरक्षण, शिक्षा जागरूकता अउ सरकार के योजना मन ल लोगन तक पहुंचाय बर सम्मानित करे रिहीन।
डिजिटल क्रॉप सर्वे-तिथि
खाद्य विभाग ह डिजिटल क्रॉप सर्वे अउ गिरदावरी के मोबाइल पीवी ऐप सत्यापन के तिथि ल बढ़ाके तीस नवंबर कर देहे। पहिली एखर आखिरी तिथि इकतीस अक्टूबर रिहीस हे।
राजस्व मंत्री टंकराम वर्मा ह एला किसान मनके हित म उठाय गे जरूरी कदम बतइन हें। ओमन किहीन कि राज्य सरकार ह किसान मन ल डिजिटल प्रणाली ले पारदर्सी अउ जादा सुविधा देय बर सरलग कारज करत हे। श्री वर्मा ह अधिकारी मन ल निरदेस देइन कि सबो जिला म गिरदावरी अउ डिजिटल क्रॉप सर्वे के कारज ल बेरा राहत पूरा करे जाय, जेखर ले किसान मन ल योजना मनके फायदा मिल सकय।
अग्निवीर भर्ती-शारीरिक प्रशिक्षण
भारतीय थल सेना डहार ले अग्निवीर भर्ती बर शारीरिक दक्षता परीक्षा जनवरी महिना म राजनांदगांव म आयोजित करे जाही। एखर तहत गौरेला-पेण्ड्रा-मरवाही म जिला रोजगार अउ स्वरोजगार मागदर्शन केंद्र डहार ले आज ले स्थानीय युवा मन बर निसुल्क प्रसिक्षण कारीकरम के सुरूआत होइस। पेण्ड्रा के सरकारी शारीरिक शिक्षा प्रसिक्षण महाविद्यालय मैदान म इकतीस दिसंबर तक आयोजन होही। ए बेरा भारतीय सेना के भूतपूर्व सैनिक युवा मन ल हर दिन बिहनिया छै बजे ले आठ बजे तक प्रसिक्षण दिही। प्रसिक्षण म ओ सबो अभ्यर्थी मन सामिल होवत हें, जेमन एसो जुलाई महिना म अग्निवीर भती परीक्षा के लिखित परीक्षा पास करिन हें। बतादन कि ए प्रसिक्षण निसुल्क दे जावत हे।
माशिमं-हेल्पलाइन नंबर
देस म पढ़इया लइका मनके बीच आत्महत्या के बाढ़त घटना अउ मानसिक स्वास्थ्य के चुनौती ल चेत म राखत छत्तीसगढ़ माध्यमिक शिक्षा मंडल ह हेल्पलाइन सुविधा सुरू करे हे। मंडल डहार ले ए सुविधा इकतीस अक्टूबर ले जम्मो स्कूल, कोचिंग सेंटर, कालेज अउ प्रसिक्षण केंद्र के पढ़इया लइका मन बर सुरू करे गेय हे। एखर बर माध्यमिक शिक्षा मंडल के टोल फ्री नंबर-एक आठ सून्य-सून्य- दू तीन-तीन चार-तीन छै तीन (1800-233-4363) म परामर्स प्रदान करे जावत हे। मनोवैज्ञानिक अउ मनोचिकित्सक हर सुकरार दिन पढ़इया लइका मन ल मानसिक तनाव ले मुक्ति अउ संतुलित जीवन सैली अपनाय के उपाय बताहीं।
खेलो इंडिया यूनिवर्सिटी गेम्स
पांचवां खेल इंडिया यूनिवर्सिटी गेम्स के आयोजन राजस्थान के सात सहर म चौबीस नंवबर ले पांच दिसंबर तक करे जाही। एमा तेईस मेडल स्पोर्ट्स अउ एक प्रदर्सन प्रतियोगिता होही। मेडल स्पोर्ट्स म तीरंदाजी, एथलेटिक्स, बैडमिंटन, बास्केटबॉल, बॉक्सिंग, फेंसिंग, फुटबॉल, हॉकी, जूडो, कबड्डी, मलखंब, रग्बी, टेनिस, शूटिंग, तैराकी, टेबल टेनिस, वॉलीबॉल, वेटलिफि्ंटग, कुश्ती, योगासन, साइक्लिंग, बीच वॉलीबॉल कैनोइंग अउ कयाकिंग सामिल हे।
उहें, खो-खो प्रदर्सन इवेंट होही। भारतीय विश्वविद्यालय संघ के सहयोग ले आयोजित बारह दिन के प्रतियोगिता म पांच हजार ले जादा खिलाड़ी भाग लिहीं।
केंद्रीय युवा कल्याण अउ खेल मंत्री मनसुख मांडविया ह किहीन कि ‘‘खेलो इंडिया यूनिवर्सिटी गेम्स‘‘ भारत के खेल मार्ग म एक महत्वपूर्ण कड़ी हे। ए प्रतियोगिता युवा खिलाड़ी मन ल राष्ट्रीय स्तर म अपन क्षमता दिखाय के मंच प्रदान करथे।