केन्द्रीय माध्यमिक शिक्षा बोर्ड-सीबीएसई ह कक्षा दसवीं अउ बारहवीं के परीक्षा के समय-सारिणी घोषित कर देहे। दूनों कक्षा के परीक्षा सत्रह फरवरी ले सुरू होही। दसवीं के परीक्षा नौ अप्रैल तक चलही। उहें, बारहवीं के परीक्षा दस मार्च के खतम होही। परीक्षा बिहनिया साढ़े दस बजे ले सुरू होही। परीक्षा ले जुड़े समय-सारिणी सीबीएसई के आधिकारिक वेबसाइट डब्ल्यू डब्ल्यू डब्ल्यू डॉट सीबीएसई डॉट जीओवी इन पर देखे जा सकत हे।
मुख्यमंत्री-कार्यशाला
पन्द्रह नवंबर के भगवान बिरसा मुंडा के जयंती ल जनजातीय गौरव दिवस के रूप म मनाय जाही। जनजातीय गौरव दिवस के तैयारी ल लेके आज रायपुर म एक ठिन कार्यशाला के आयोजन करे गीस, जेमा मुख्यमंत्री विष्णुदेव साय सामिल होइन। ओमन बतईन कि जनजातीय गौरव दिवस कार्यक्रम म सामिल होय बर राष्ट्रपति द्रौपदी मुर्मू ल घलो नेवता दे गेहे।
कार्यशाला म राष्ट्रीय अनुसूचित जनजाति मोर्चा के अध्यक्ष समीर उरांव अउ प्रदेस के जनजातीय समाज के सांसद, विधायक अउ अनुसूचित जनजाति मोर्चा के पदाधिकारी अउ कार्यकर्ता मौजूद रिहीन।
बालोद-जल संचयन
‘जल संचयन-जन भागीदारी‘ अभियान के तहत सुघ्घर प्रदर्शन करे बर बालोद जिला ल देसभर म पहिली स्थान मिले हे। केन्द्र सरकार डहार ले जिला ल दू करोड़ रूपिया के प्रोत्साहन रासि दे जाही। एमा राष्ट्रीय जल मिशन के अतिरिक्त सचिव अउ मिशन निदेशक अर्चना वर्मा ह बालोद जिला के कलेक्टर दिव्या उमेश मिश्रा ल सुभकामना दीन हे।
श्रीमती वर्मा ल चिट्ठी लिखके जल सुरक्षित भविष्य निर्माण बर जिला म सुघ्घर अगुवई, दृष्टिकोण अउ सकारात्मक बदलाव लाय के संग जल संरक्षण म व्यवहार परिवर्तन ल बढ़ावा देके पहल के सराहना करीन। ओमन उम्मीद जतईन कि केन्द्र सरकार अब जल संचयन, जन भागीदारी अभियान टू प्वॉइंट ओ के तहत एक करोड़ कृत्रिम पुनर्भरण अउ जल संरक्षण संरचना बनाय के लक्ष्य के संग आगू बाढ़त हे।
मतदाता सूची-एसआईआर
छत्तीसगढ़ म मतदाता सूची के विशेष गहन पुनरीक्षण कार्यक्रम के तहत बीजापुर जिला म चार नवंबर ले चार दिसंबर तक घर-घर सत्यापन अभियान चलाय जाही। जिला कलेक्टर संबित मिश्रा ह ए बारे म आज राजनीतिक दल अउ मीडिया प्रतिनिधि मनके संग बइठका करीन।
बाद म पत्रकार मन ले गोठबात करत श्री मिश्रा ह किहीन कि नौ दिसंबर के मसौदा मतदाता सूची के प्रकाशन करे जाही। एखर बर आठ जनवरी तक दावा आपत्ति ले जाही। उहें, सात फरवरी के मतदाता सूची के आखिरी प्रकाशन होही। कलेक्टर ह बतईन कि बीएलओ मन ह घर-घर जाके नवा मतदाता मनके नाम जोड़े अउ मउत होय या फेर तबादला होय मतदाता मनके पहिचान करे के संग आधार नंबर ल जोड़े के काम करही। ओमन राजनीतिक दल ले मदद अउ मीडिया ले मतदाता जागरूकता अभियान ल बड़का रूप देके के अपील करीन हे।
सत्य सांई अस्पताल-विशेष कार्यक्रम
नवा रायपुर स्थित श्री सत्य सांई संजीवनी अस्पताल के तेरह बछर पूरा होय म काली इकतीस अक्टूबर के एक विशेष कार्यक्रम आयोजित करे जाही। ए कार्यक्रम बिहनिया दस बजे ले सुरू होही। कार्यक्रम म मुख्य रूप ले पद्मभूषण ले सम्मानित पूर्व क्रिकेटर सुनील गावस्कर सामिल होही।
श्री सत्य सांई संजीवनी अस्पताल के मीडिया समन्वयक अजय श्रॉफ ह आकाशवाणी समाचार ल बतईन कि ह्दय रोग ले पीड़ित पच्चीस सौ ले जादा ओ लइका मन जिखर सफलतापूर्वक इलाज श्री सत्य सांई संजीवनी अस्पताल म करे गेहे, ओमन ए कार्यक्रम म सामिल होही। ए कार्यक्रम म भारत समेत कई ठिन देस के मरीज मन घलो सामिल होही।
माओवादी आत्मसमर्पण
बीजापुर जिला के उसूर अउ ईलमिड़ी थाना क्षेत्र ले आज सुरक्षा बल मन ह सात झिन माओवादी मन ल गिरफ्तार करे हे। उसूर थाना क्षेत्र ले गिरफ्तार पांच झिन माओवादी उपर पुजारी कांकेर निवासी एक गांव वाले के हत्या करे के आरोप हे। उहें, ईलमिड़ी थाना क्षेत्र ले गिरफ्तार दू झिन माओवादी मन ह मुजाल कांकेर निवासी एक झिन गांव वाले के हत्या करे रिहीस।
इही बीच, बीजापुर जिला म तर्रेम थाना क्षेत्र के गोटुमपल्ली गांव म सुरक्षा बल मन ह माओवादी मन डहार ले बनाए गे पन्द्रह फीट ऊंचा स्मारक ल धवस्त कर देहे।
ओति, कोंडागांव जिला म आज एक महिला समेत तीन माओवादी मन ह आत्मसमर्पण करे हे। एमा ले महिला माओवादी उपर एक लाख रूपिया के इनाम घोसित रिहीस। आत्मसमर्पित महिला माओवादी पूर्वी बस्तर डिवीजन अंतर्गत सप्लाई टीम के सदस्य बताय जात हे। उहें, दूनों पुरूष माओवादी मातला अउ किसकोड़ो क्षेत्र म डी.ए.के.एम.एस. सदस्य के रूप म सक्रिय रिहीस। आत्मसमर्पण करइया माओवादी मन ल ‘‘छत्तीसगढ़ नक्सलवाद उन्मूलन नीति‘‘ के तहत पचास-पचास हजार रूपिया के प्रोत्साहन रासि दे गीस।
फिल्म सिटी
राजधानी रायपुर म अत्याधुनिक सुविधा के संग फिल्म सिटी के निर्माण करे जाही। ए बारे म छत्तीसगढ़ फिल्म विकास निगम के अध्यक्ष मोना सेन ह छत्तीसगढ़ टूरिज्म बोर्ड कार्यालय के दउरा करीन। ए मउका म पर्यटन बोर्ड के प्रबंध संचालक विवेक आचार्य ह फिल्म सिटी परियोजना अउ फिल्म नीति ले जुड़े जानकारी दीन। ओमन बतईन कि ए परियोजना के उद्देश्य छत्तीसगढ़ ल फिल्म निर्माण के क्षेत्र म नवा पहिचान देवाना हे, जेखर ले पर्यटन, रोजगार अउ संस्कृति ल मजबूती मिलही। श्री आचार्य ह किहीन कि ए परियोजना ले स्थानीय युवा मन ल रोजगार के संगेसंग प्रशिक्षण अउ तकनीकी दक्षता के मउका मिलही।
मुख्यमंत्री-विनोद कुमार शुक्ल
मुख्यमंत्री विष्णुदेव साय ह वरिष्ठ साहित्यकार अउ ज्ञानपीठ पुरस्कार ले सम्मानित विनोद कुमार शुक्ल के जल्दीच ठीक होय के कामना करे हे। मुख्यमंत्री ह आज उंखर बेटा शास्वत शुक्ल ले फोन म गोठबात करके विनोद जी के स्वास्थ्य के जानकारी लीन। श्री शुक्ल पाछु कुछेक दिन ले बीमार हे अउ उंखर इलाज रायपुर के एक ठिन निजी अस्पताल म चलत हे।
प्रधानमंत्री प्रवास-यातायात व्यवस्था
एक नवंबर के प्रधानमंत्री नरेन्द्र मोदी के छत्तीसगढ़ प्रवास ल लेके यातायात पुलिस ह विशेष इंतजाम करे हे। नवा रायपुर म राखे गे कार्यक्रम म सामिल होवइया वीआईपी, आम लोगन मनके अवई-जवई अउ गाड़ी मनके पार्किंग बर मार्ग अउ पार्किंग जघा निर्धारित करे गेहे। राज्योत्सव स्थल तक पहुंचइया रद्दा ल छह रूट म बांटे गेहे। एक नवंबर के नवा रायपुर क्षेत्र के जम्मों रद्दा म मध्यम बउ भारी माल गाड़ी मनके प्रवेस पूरा तरह ले पाबंद रइही।
यातायात विभाग ह राज्योत्सव मेला जवइया लोगन मन ले अपील करे हे कि निर्धारित रद्दा ले अवई-जवई करयं अउ तय करे गे पार्किंग जघा म ही गाड़ी मनके पार्किंग करके रेंगत राज्योत्सव स्थल तक जावय।
दुर्घटना
रायगढ़ जिला के कापू थाना क्षेत्र म होय सड़क हादसा म एक महिला समेत तीन झिन लोगन के मउत होगे हे। मिले खबर के मुताबिक फटफटी सवार दू झिन युवक कापू कोति जावत हे। इही दउरान धरमजयगढ़-कापू रद्दा म चाल्हा मोड़ के तीर एक तेज गाड़ी ह उंखर मोटर साइकिल ल टक्कर मार दीस। उहें, रेंगत जावत एक झिन माईलोगिन ल घलो अपन चपेट म ले लीस। ए हादसा म मोटरसाइकिल सवार दूनों युवक अउ माईलोगिन के मउका म ही मउत होगे। घटना के बाद कार चालक गाड़ी छोड़के मउका ले फरार होगे। कापू पुलिस घटना के जांच करत हे।
कोंडागांव-हेलमेट बैंक
कोंडागांव जिला प्रशासन डहार ले ‘जिंदगी का सफर सुरक्षित रखें, हेलमेट जरूर पहने‘‘ के थीम म ‘हेलमेट बैंक‘ के सुरूआत करे गेहे। कलेक्टर नुपूर राशि पन्ना ह काली मसौरा ग्राम पंचायत म हेलमेट बैंक के सुभारंभ करीन। ए दउरान कलेक्टर ह लोगन मन ले दुपहिया गाड़ी चलात बेरा हेलमेट पहिने के अपील करीन।
पहिली चरण के तहत हेलमेट बैंक के स्थापना राष्ट्रीय राजमार्ग क्रमांक-तीस म स्थित केशकाल, मस्सुकोकोड़ा, मांझी आठगांव, लंजोड़ा अउ बनियागांव ग्राम पंचातय म करे जाही। फेर कोनों भी मनखे तीर हेलमेट नइ होही त ओ ह ए ग्राम पंचायत ले हेलमेट लेके यात्रा कर सकही। ओखर बाद ओला वापिस ग्राम पंचायत म जमा करना होही, जेखर ले आने-आने लोगन मन घलो एखर उपयोग कर सकयं।