बीजापुर जिला म आज इंक्यावन झिन माओवादी मन ह आत्मसमर्पण करीन हे। एमा नौ महिला माओवादी घलो सामिल हे। ए सबो माओवादी मन ह सीआरपीएफ के डीआईजी डी.के. नेगी अउ पुलिस अधीक्षक जितेन्द्र यादव के आगू आत्मसमर्पण करीन हे। ओमन बतईन कि ए सबो माओवादी मन उपर कुल छियासठ लाख रूपिया के इनाम घोषित रिहीस।
उहें, कांकेर जिला म घलो इक्कीस झिन माओवादी मन ह अट्ठारह ठिन हथियार संग आत्मसमर्पण करीन। इंखर मन उपर पच्यासी लाख रूपिया के इनाम घोसित रिहीस। एमा चार डिवीजन वाईस कमेटी सदस्य, नौ एरिया कमेटी सदस्य अउ आठ पार्टी सदस्य सामिल हे। ए सबो माओवादी केशकाल डिवीजन के कुएमारी अउ किसकोड़ों क्षेत्र म सक्रिय रिहीन।
आत्मसमर्पण करइया करइया सबो माओवादी मन ल राज्य सरकार के पुनर्वास नीति म सहायता रासि दे गीस।
जन्म-मृत्यु प्रमाण पत्र
केन्द्र सरकार के महारजिस्ट्रार कार्यालय ह जन्म-मृत्यु पंजीकरण अधिनियम म संसोधन करे हे। एमा अक्टूबर दू हजार तेईस के बाद जन्मे लइका मनके जन्म तिथि प्रमाणित करे बर जन्म प्रमाण पत्र ही जरूरी दस्तावेज होही। ए तिथि के पहिली जन्मे लइका मनके के मामला म आने दस्तावेज जन्म प्रमाण पत्र के रूप म मान्य रइही। छत्तीसगढ़ म अप्रैल दू हजार तेईस के बाद जन्मे हरेक लइका बर ऑनलाइन जारी जन्म प्रमाण पत्र मान्य करे गेहे। पहिली जउन लइका के जन्म प्रमाण पत्र हाथ ले बनाके जारी करे गे रिहीस। उंखर मन बर घलो अब पोर्टल म ऑनलाइन प्रमाण पत्र बनाय के प्रावधान हवय। एखर ले जुन्ना प्रमाण पत्र डिजिटल रूप म सुरक्षित करे जा सकही।
अरूण साव-युवा उत्सव
उपमुख्यमंत्री अरूण साव ह आज रईपुर के पंडित रविशंकर शुक्ल विश्वविद्यालय म अंतर-महाविद्यालयीन युवा उत्सव के सुभारंभ करीन। इकतीस अक्टूबर तक चलइया ए महोत्सव म विश्वविद्यालय अउ एखर ले जुड़े कालेज के नौ सौ तिरपन छात्र-छात्रा भाग लेवत हे। ओमन तीन दिन तक नृत्य, संगीत, साहित्य, थियेटर अउ फाइन आर्टस म अपन हुनर देखाही।
कार्यक्रम म बोलत श्री साव ह किहीन कि युवा अपन बर सही दिसा तय करय। बुलंद हौसला संग आगू बढ़ईया मन ल सफलता मिलथे। ओमन किहीन कि पंडित रविशंकर शुक्ल विश्वविद्यालय मध्यप्रदेश अउ छत्तीसगढ़ के शिक्षा के बड़े केन्द्र रेहे हे।
उहें, पंडित रविशंकर शुक्ल विश्वविद्यालय के कुलपति प्रोफेसर सच्चिदानंद शुक्ला ह बतईन कि अंतर-महाविद्यालयीन युवा उत्सव के विजेता प्रतिभागी एसोसिएशन ऑफ इंडियन यूनिवर्सिटिज कोति ले राखे गे अखिल भारतीय प्रतियोगिता म भाग लीहीं।
एसीबी/ईओडब्ल्यू-छापा
डीएमएफ घोटाला के जांच करत एंटी करप्शन ब्यूरो-एसीबी अउ आर्थिक अपराध अन्वेषण ब्यूरो-ईओडब्ल्यू के टीम ह प्रदेस म बारह ठिन जघा म छापेमारी करीन हे। एमा रईपुर, राजनांदगांव, दुरूग अउ धमतरी-कुरूद घलो सामिल हे।
एसीबी के टीम ह दुरूग म इमेज डायग्नोसिस सेंटर के संचालक मनीष पारख के घर म छापा मारीन। उहें, रईपुर म पांच, राजनांदगांव म चार अउ कुरूद म एक ठिन ठिकाना म चलत हे। एमा ले अधिकतर शासकीय सप्लायर अउ कारोबारी बताय जात हे।
राजस्व मंत्री-लोकार्पण/भूमिपूजन
राजस्व मंत्री टंकराम वर्मा ह काली सिमगा विकासखंड के सुहेला, रावन अउ झीपन गांव म करोड़ों रूपिया के निर्माण काम के लोकार्पण अउ भूमिपूजन करीन। एमा सुहेला गांव म इकहत्तर लाख रूपिया ले जादा के लागत ले बने नवा तहसील भवन के लोकार्पण घलो सामिल हे। नवा तहसील भवन म क्षेत्र के किसान अउ लोगन ल राजस्व ले जुड़े सेवा जल्दी मिलही।
ए मउका म राजस्व मंत्री अधिकारी मन ले किहीन कि गरीब किसान मनके समस्या के समाधान म कोनों किसम के कोताही बर्दास्त नइ करे जाही।
उहें, जिला कलेक्टर दीपक सोनी ह किहीन कि नवा तहसील भवन ले राजस्व प्रकरण के निराकरण म तेजी आही।
सरदार पटेल-परेड समारोह
लौह पुरूष सरादार वल्लभ भाई पटेल के एक सौ पचासवीं जयंती के मउका म छत्तीसगढ़ पुलिस कोति ले इकतीस अक्टूबर के माना के छत्तीसगढ़ सशस्त्र बल के चौथी वाहिनी म राष्ट्रीय एकता दिवस परेड समारोह राखे जाही। समारोह म उपमुख्यमंत्री विजय शर्मा माईपहुना के रूप म संघरही। ए बेरा म श्री शर्मा मार्चपास्ट देखही अउ परेड के सलामी लीहीं। संगेसंग एकता दिवस के सपथ देवाही।
उहें, कवर्धा म इकतीस अक्टूबर ले सरदार एट द रेट यूनिटी मार्च के सुरूवात होही। ए जानकारी जिला के कलेक्टर गोपाल वर्मा ह आज पत्रकार मन ल दीन। ओमन बतईन कि पच्चीस नवंबर तक जिला स्तर म पदयात्रा निकाले जाही। ए दउरान योग अउ स्वास्थ्य सिविर लगाय जाही। संगेसंग व्याख्यान अउ वाद-विवाद प्रतियोगिता होही। कलेक्टर ह बतईन कि स्कूल-कॉलेज के युवा सरदार पटेल के सपना अउ संकलप के भारत बनाय बर पदयात्रा करके आठ ले दस किलोमीटर के दूरी तय करही।
बस्तर ओलंपिक विकासखंड प्रतियोगिता
उपमुख्यमंत्री अरूण साव ह काली बस्तर ओलंपिक म कांकेर जिला म विकासखंड स्तर खेल प्रतियोगिता के सुभारंभ करीन। ओमन तीरंदाजी, वॉलीबॉल अउ रिले रेस म सांकेतिक तौर म भाग लेवइया खिलाड़ी मन ल सुभकामना दीन। ए मउका श्री साव ह गोंविदपुर के खेल मैदान म शेड बनाय बर पच्चीस लाख रूपिया देके घोषणा करीन।
कार्यक्रम म बोलत श्री साव ह किहीन कि बस्तर के प्रतिभाशाली युवक-युवती मन ल प्लेटफार्म देवाय के उद्देश्य ले राज्य सरकार ह पाछु बछर ले बस्तर ओलंपिक के सुरूआत करे हे। बस्तर ओलंपिक म भाग ले बर एसो तीन लाख इंक्यानवे हजार खिलाड़ी मन ल ह पंजीयन कराय हे।
तीरंदाजी प्रतियोगिता
पन्द्रहवां अखिल भारतीय रेलवे तीरंदाजी प्रतियोगिता के आयोजन काली ले रईपुर के डब्ल्यूआरएस कॉलोनी के सेकरसा स्टेडियम म करे जाही। दक्षिण पूर्व मध्य रेलवे खेल संघ कोति ले राखे गे ए तीन दिवसीय प्रतियोगिता म देसभर के बारह रेलवे जोन के टीम के सीर्ष तीरंदाज सामिल होही। एमा रिकर्व अउ कपाउंड तीरंदाजी के प्रतियोगिता होही।
दक्षिण पूर्व मध्य रेलवे खेल संघ के वरिष्ठ क्रीडा अधिकारी अउ वरिष्ठ मंडल कार्मिक अधिकारी राहुल गर्ग ह बतईन कि ए प्रतियोगिता रईपुर, छत्तीसगढ़ अउ तीर-तखार के क्षेत्र म तीरंदाजी खेल ल बढ़ावा दे म कारगर साबित होही।
खेलो इंडिया यूनिवर्सिटी
पांचवां खेलो इंडिया यूनिवर्सिटी गेम्स के राजस्थान के सात ठिन सहर म चौबीस नवंबर ले पांच दिसंबर तक करे जाही। एमा तेईस मेडल स्पोर्ट्स अउ एक डेमोस्ट्रेशन स्पोर्ट्स प्रतियोगिता होही। मेडल स्पोर्ट्स म तीरंदाजी, एथलेटिक्स, बैडमिंडन, बॉस्केटबॉल, बॉक्सिंग, फेंसिंग, फुटबॉल, हॉकी, जूडो, कबड्डी, मलखंभ, रकबी, शूटिंग, तैराकी, टेबल टेनिस, वॉलीबॉल, वेटलिफ्टिंग, योगासन, साइकिलिंग, कैनोइंग अउ कयाकिंग सामिल हे। उहें, खो-खो एक डेमोस्ट्रेशन इवेंट होही। भारतीय विश्वविद्यालय संघ के मदद ले राखे गे बारह दिवसीय ए प्रतियोगिता म पांच हजार ले जादा एथलीट भाग लीही।
केन्द्रीय युवा मामला अउ खेल मंत्री डॉक्टर मनसुख मांडविया ह किहीन कि खेलो इंडिया यूनिवर्सिटी गेम्स भारत के खेल मार्ग म महत्ता के कड़ी हवय। ए प्रतियोगिता युवा एथलीट मन ल राष्ट्रीय स्तर म अपन योग्यता देखाय के मंच देवत हे।
अउ अब मौसम के हाल…
चक्रवाती तूफान मोन्था तटीय आंध्रप्रदेश अउ ओखर ले लगे तेलंगाना के उपर कमजोर होके गहरा दबाव के क्षेत्र म बदल गेहे। रईपुर के मौसम विज्ञान केन्द्र के मौसम विज्ञानी डॉक्टर गायत्री वाणी ह आकाशवाणी समाचार ल बतईन कि चक्रवात के कमजोर पड़े ले सुकमा अउ बीजापुर जिला म हल्का ले मध्यम बरसा होय हे। एक-दू जघा भारी बरसा हो सकत हे। नारायणपुर के छोटेडोंगर म पाछु चौबीस घंटा म भारी बरसा दरज करे गेहे। ओमन बतईन कि अवइया चौबीस घंटा मध्य अउ दक्षिण छत्तीसगढ़ म मौसम खुल जही। उहें, उत्तरी छत्तीसगढ़ म गरज-चमक संग छींटा बौछार होय के संभावना हे।