छत्तीसगढ़ म मतदाता सूची के विशेष गहन पुनरीक्षण-एसआईआर टू के तहत करे जाही। आज रायपुर म एक ठिन पत्रकारवार्ता ल संबोधित करत छत्तीसगढ़ के मुख्य निर्वाचन पदाधिकारी यशवंत कुमार ह बतईन कि मुद्रण अउ प्रशिक्षण अट्ठाईस अक्टूबर ले तीन नवंबर तक आयोजित करे जावत हे। बीएलओ मन डहार ले चार नवंबर ले चार दिसंबर तक घर-घर जाके गणना करे जाही। संगेसंग हरेक मतदाता ले गणना प्रपत्र भरवाय जाही। मतदाता सूची के प्रकासन नौ दिसंबर के करे जाही। दावा अउ आपत्ति नौ दिसंबर ले आठ जनवरी तक ले जाही। सुनवाई अउ सत्यापन नौ दिसंबर ले इकतीस जनवरी तक करे जाही। अंतिम मतदाता सूची के प्रकासन सात फरवरी के करे जाही।
मुख्य निर्वाचन पदाधिकारी ह बतईन कि यदि गणना प्रपत्र म दे गे पाछु एसआईआर निर्वाचन नामावली के विवरण उपलब्ध नइ हे या डेटा बेस ले मेल नइ खाही त निर्वाचक पंजीकरण अधिकारी अइसन मतदाता मन ल नोटिस जारी करही। नोटिस मिले के बाद मतदाता मन ल तेरह दस्तावेज जइसन – पासपोर्ट, जन्म प्रमाण पत्र, अस्थायी निवास प्रमाण पत्र, जाति प्रमाण पत्र मन ले कोनों एक दस्तावेज जमा करना होही। फेर, कहूं पाछु एसआईआर म मतदाता के निर्वाचक नामावली के विवरण उपलब्ध हे त कोनों भी प्रकार के दस्तावेज के जरूरत नइ होही।
मुख्य निर्वाचन पदाधिकारी ह मतदाता मन ले विशेष गहन पुनरीक्षण-एसआईआर म बढ़-चढ़के भाग लेके के अपील करे हे।
कैबिनेट-निर्णय
केन्द्रीय मंत्रिमंडल ह आठवां केन्द्रीय वेतन आयोग के कार्यक्षेत्र ल मंजूरी दे देहे। आज नई दिल्ली म सूचना अउ प्रसारण मंत्री अश्विनी वैष्णव ह मंत्रिमंडल के बइठका के बाद संवाददाता मन ल बतईन कि आयोग ह अपन गठन के तारीख ले अट्ठारह महीना के भीतर अपन सिफारिश दीहीं। ओमन बतईन कि आयोग म एक अध्यक्ष, एक अंशकालिक सदस्य अउ एक सदस्य-सचिव होही।
मंत्रिमंडल ह चालू रबी सीजन बर फॉस्फेटिक अउ पोटाशिक उर्वरक म पोषक तत्व आधारित सब्सिडी दर ल घलो मंजूरी दे देहे। श्री वैष्णव ह बतईन कि मंत्रिमंडल ह रबी सीजन बर करीबन सैंतीस हजार नौ सौ बावन करोड़ रूपिया के सब्सिडी ल मंजूरी देहे। ए दर एक अक्टूबर ले लागू माने जाही। ओमन किहीन कि एखर ले किसान मन ल सब्सिडी वाले किफायती अउ उचित मूल्य म उर्वरक मिलही।
राज्योत्सव-कार्यक्रम
छत्तीसगढ़ राज्य स्थापना दिवस के मउका म प्रदेस के जम्मों जिला मुख्यालय मन म राज्योत्सव कार्यक्रम के आयोजन करे जाही। ए कार्यक्रम म राज्य के मंत्री, सांसद अउ विधायक मन ह माईपहुना के रूप म सामिल होही।
राजनांदगांव जिला मुख्यालय म राखे गे कार्यक्रम म विधानसभा अध्यक्ष डॉक्टर रमन सिंह, बिलासपुर म केन्द्रीय राज्यमंत्री तोखन साहू, बस्तर म उपमुख्यमंत्री अरूण साव अउ दुरूग म विजय शर्मा सामिल होही। उहें, सरगुजा म मंत्री रामविचार नेताम, गरियाबंद म दयालदास बघेल, दंतेवाड़ा म केदार कश्यप, कोरबा म लखनलाल देवांगन, जशपुर म श्याम बिहारी जायसवाल, रायगढ़ म ओपी चौधरी, सूरजपुर म लक्ष्मी राजवाड़े, जांजगीर-चांपा म टंकराम वर्मा, बालोद म गजेन्द्र यादव, कोरिया म राजेश अग्रवाल अउ मोहला-मानपुर-अंबागढ़ चौकी जिला म गुरू खुशवंत साहेब राज्योत्सव कार्यक्रम म सामिल होही।
राज्य स्थापना दिवस के मउका म जम्मों जिला मन म सांस्कृतिक कार्यक्रम, लोकनृत्य, हस्तशिल्प प्रदर्शनी, स्थानीय उत्पाद के झांकी अउ विकासपरक योजना ले जुड़े स्टॉल लगाय जाही।
प्रधानमंत्री-विकसित भारत क्विज
प्रधानमंत्री नरेन्द्र मोदी ह देस के युवा मन ले विकसित भारत प्रश्नोत्तरी प्रतियोगिता म भाग लेके आग्रह करे हे। एक सोशल मीडिया पोस्ट म श्री मोदी ह किहीन कि दूसर विकसित भारत युवा मनके अगुवई म संवाद करके राष्ट्र निर्माण म योगदान दे बर एक सुघ्घर मउका हवय। लोगन मन ए महीना के इकतीस तारीख तक प्रश्नोत्तरी म भाग ले सकत हे। विकसित भारत क्विज प्रतियोगिता अवइया बछर दस ले बारह जनवरी तक राखे जाही।
विजय शर्मा-स्मार्ट क्लास रूम
उपमुख्यमंत्री विजय शर्मा ह आज कबीरधाम जिला के ग्राम बिरकोना स्थित सासकीय स्कूल ले स्मार्ट क्लास रूम सुविधा के सुभारंभ करीन। ए कार्यक्रम म कवर्धा विकासखंड के जम्मों सत्रह स्कूल घलो वर्चुअल रूप ले जुड़ीन, जिहां स्मार्ट कक्षा के सुरूआत होय हे। ए मउका म उपमुख्यमंत्री ह स्मार्ट क्लास के लइका अउ सिक्षक मन संग डिजिटल कक्षा के संचालन, उपयोग अउ कार्यप्रणाली के बारे म गोठबात करीन।
चक्रवाती तूफान मोन्था
चक्रवाती तूफान मोन्था पाछु छह घंटा म उत्तर-पश्चिम दिसा म आगू बढ़ गेहे। मौसम विभाग के वरिष्ठ वैज्ञानिक डॉक्टर आर.क.े जेनामणि ह बतईन कि चक्रवाती तूफान मोन्था आंध्रप्रदेश के तट कोति तेजी ले बढ़त हे। अउ आज साम तक आंध्रप्रदेश के काकीनाडा के तीर एखर पहुंचे के उम्मीद हवय।
ए तूफान के असर ले दक्षिण छत्तीसगढ़ के सुकमा, बीजापुर अउ बस्तर जिला म भारी ले अति भारी बरसा होय के चेतावनी दे गेहे। उहें, सुकमा अउ बीजापुर जिला म भारी बारिश के आरेंज अलर्ट घलो घोषित करे गेहे। बारिस के संगेसंग हवा के गति घलो तेज रइही। मौसम विज्ञानी डॉक्टर गायत्री वाणी ह आकाशवाणी समाचार ल बतईन कि छत्तीसगढ़ म घलो ए तूफान के असर पड़ही।
अंबेडकर अस्पताल-ओपीडी
रायपुर स्थित डॉक्टर भीमराव अंबेडकर स्मृति चिकित्सालय म आयुष्मान भारत योजना के तहत ओपीडी म अवइया मरीज मन ल सीटी स्कैन अउ एमआरआई जांच म आवत परेसानी ल देखत स्वास्थ्य मंत्री श्यामबिहारी जायसवाल ह मामला ल खुदे संज्ञान म लेहे। ओमन अवइया सामान्य परिषद के बइठका तक अस्पताल म अवइया बी.पी.एल. राशन कार्डधारी ओपीडी मरीज मन ल निःशुल्क सीटी स्कैन अउ एमआरआई जांच सुविधा देवाय के निरदेस दीन हे। संगेसंग अइसन ओपीडी मरीज जउन बी.पी.एल. श्रेणी म नइ आवत हे, ओमन ल विभाग डहार ले निर्धारित न्यूनतम दर म जांच के सुविधा देवाय बर केहे हे।
सतर्कता जागरूकता सप्ताह
छत्तीसगढ़ समेत देसभर म काली ले सतर्कता जागरूकता सप्ताह मनाय जावत हे। इही कड़ी म आज राजभवन के अधिकारी अउ कर्मचारी मन ह ईमानदारी अउ पारदर्सिता के सपथ लीन। कार्यक्रम म राज्यपाल के विधिक सलाहकार भीष्म प्रसाद पांडेय ह जम्मों अधिकारी अउ कर्मचारी मन ल ‘‘सतर्कता हमारी साझा जिम्मेदारी‘‘ बर सपथ देवईन।
उहें, दक्षिण पूर्व मध्य रेलवे के रायपुर रेलमंडल म सतर्कता जागरूकता सप्ताह के पहिली दिन काली मंडल रेल प्रबंधक दयानंद ह रेलवे के अधिकारी अउ कर्मचारी मन ल सत्यनिष्ठा के सपथ देवईन।
खबर के मुताबिक सतर्कता जागरूकता सप्ताह दू नंवबर तक मनाय जाही।
दुर्घटना
सक्ती जिला के मालखरौदा थाना क्षेत्र के पोता गांव म पाछु रतिहा एक सड़क हादसा म दू झिन लोगन के मउत होगे। उहें, चार झिन आने मनखे गंभीर रूप ले घायल होगे हे।
पुलिस के मुताबिक कुसमुल गांव के छह झिन मनखे मन एक पारिवारिक कार्यक्रम म सामिल होय बर कोरबा गे रिहीन। लहुटत बेरा पोता गांव के तीर उंखर चारपहिया गाड़ी ह अनत-तनते होके नहर म जा गिरीस। गांव वाले मन ह मउका पहुंच के जम्मों लोगन मन ल बाहिर निकालीन। फेर, ड्राईवर अउ एक लइका के बुढ़े ले मउत होगे। उहें, चार झिन आने घायल मनखे मन ल अस्पताल म भर्ती कराय गेहे।
छठ पर्व-संपन्न
छत्तीसगढ़ समेत देसभर म उगत सूरज ल अरग देके संगेसंग आज चार दिन के लोक आस्था के महापर्व छठ सिरा गे। आज बिहनिया श्रद्धा अउ भक्तिभाव के संग बड़ संख्या म श्रद्धालु मन ह उगत सूरज ल अरग दीन।
मुख्यमंत्री विष्णुदेव साय अउ उंखर पत्नी कौशल्या साय ह जशपुर जिला के कुनकुरी के छठ घाट म उगत सूरज ल अरग दीन। ए मउका म मुख्यमंत्री ह प्रदेस के सुख, समृद्धि अउ खुशहाली के कामना करत प्रदेसवासी मन ल छठ पूजा के सुभकामना दीन। ओमन किहीन कि छठ पूजा सूर्य के उपासना अउ सामाजिक समरसता के प्रतीक हरय। ए मउका म मुख्यमंत्री ह किहीन कि कुनकुरी के छठ घाट के सौंदर्यीकरण बर करीबन पांच करोड़ सत्रह लाख रूपिया के रासि मंजूर करे गेहे।