चुनाव आयोग ह आज दूसरइया चरण के तहत छत्तीसगढ़ समेत बारह राज्य अउ केंद्र शासित प्रदेस म मतदाता सूची के बिसेस गहन पुनरीक्षण-एसआईआर करे जाय के घोसना करे हे। आज नई दिल्ली म मीडिया ल जानकारी देवत मुख्य चुनाव आयुक्त ज्ञानेश कुमार ह किहीन कि ए पुनरीक्षण के उद्देस्य मतदाता सूची ल अउ जादा पारदर्सी अउ त्रुटि मुक्त बनाना हे। ओमन किहीन कि दूसरइया चरण के तहत एसआईआर चरण बध्द तरीका ले करे जाही। मुख्य चुनाव आयुक्त ह यहू बतइन कि एसआईआर के पहिली चरण म चुनाव आयोग ल कोनो अपील नइ मिले हे।
प्रधानमंत्री-छत्तीसगढ़
प्रधानमंत्री नरेंद्र मोदी एक नवंबर के छत्तीसगढ़ के एक दिन के दउरा म रईपुर आही। प्रधानमंत्री बिहनिया करीबन दस बजे बिसेस विमान ले रईपुर स्थित स्वामी विवेकानंद विमानतल पहुंचही। एखर बाद प्रधानमंत्री नवा रईपुर म सत्यसांई संजीवनी अस्पताल पहुंच के करीबन पच्चीस सौ लइका मनले दिल की बात कारीकरम म गोठबात करही। हृदय रोग ले पीड़ित ए लइका मनके उपचार सत्यसांई संजीवनी अस्पताल बिना कोनो सुल्क के मुफत म करे गेहे। एखर बाद प्रधानमंत्री नवा रईपुर म प्रजापिता ब्रम्हकुमारी भवन सांति शिखर के उद्घाटन करही। प्रधानमंत्री श्री मोदी नवा रईपुर स्थित नवा विधानसभा भवन के लोकार्पण करही। संघरा ओमन भारत रत्न अउ पूर्व प्रधानमंत्री स्वर्गीय अटल बिहारी वाजपेयी के मूर्ति के अनावरण घलो करही।
उपमुख्यमंत्री अरूण साव ह पत्रकार मनले चर्चा करत बतइन कि एक नवंबर के प्रधानमंत्री नरेंद्र मोदी पांच ठिन अलग-अलग कारीकरम म सामिल होही।
मंझनिया बाद प्रधानमंत्री नवा रईपुर स्थित आदिवासी स्वतंत्रता संग्राम सेनानी स्मारक सह-संग्रहालय के उद्घाटन करके ओखर भ्रमण करही। संझा कून प्रधानमंत्री छत्तीसगढ़ स्थापना दिवस म नवा रईपुर म आयोजित राज्योत्सव के उद्घाटन करही। बतादन कि ए राज्य स्थापना के पच्चीस साल पूरा होय म ए बछर ल रजत जयंती बछर के रूप म मनाय जात हे। एखर बाद प्रधानमंत्री संझा करीबन चार बजे रईपुर विमानतल ले बिसेस विमान ले नई दिल्ली बर रवाना हो जाही।
राज्यपाल-दौरा
राज्यपाल रमेन डेका ह आज नवा रईपुर म आदिवासी अनुसंधान अउ प्रशिक्षण संस्थान परिसर म सहीद वीर नारायण सिंह जनजातीय स्वतंत्रता सेनानी स्मारक सह-संग्रहालय के जायजा लीन। प्रधानमंत्री नरेंद्र मोदी राज्योत्सव के मउका म देस के ए पहिली डिजीटल संग्रहालय के लोकार्पण करही। राज्यपाल ह लोकर्पण के तियारी के संबंध म अधिकारी मन ल जरूरी दिसा-निरदेस दीन। राज्यपाल ह परिसर म स्थापित आदिवासी संग्रहालय के अवलोकन घलो करीन।
कृषि मंत्री-भर्ती
केंद्रीय कृषि मंत्री शिवराज सिंह चौहान ह भारतीय कृषि अनुसंधान परिषद -आईसीएआर ले कृषि शिक्षा म सुधार बर जम्मो रिक्त पद ल तत्काल भरे के अनुरोध करीन हे। श्री चौहान ह आज नई दिल्ली म राष्ट्रीय कृषि छात्र सम्मेलन म ए बात किहीन। ओमन किहीन कि नवा शिक्षानीति के अनुरूप गुणवत्ता पूर्ण कृषि शिक्षा म राष्ट्र ल बदले के सक्ति हे। ए सम्मेलन म देसभर के कृषि छात्र मन भाग लीन अउ हजारों छात्र वर्चुअल माध्यम ले जुड़िन।
स्पेशल एजुकेटर-दावा आपत्ति
लोक शिक्षण संचालनालय ह स्पेशल एजुकेटर के सौ ठिन पद म सीधा भर्ती बर पात्र अभ्यर्थी मनके अंतरिम सूची तियार कर लेहे। ए सूची ल संचालनालय के वेबसाइट म प्रकासित कर दे गेहे। पात्र अभ्यर्थी मन ले अंतरिम सूची के संबंध म दावा आपत्ति प्रस्तुत करे बर काली अट्ठाईस अक्टूबर के संझा पांच बजे तक के समय निर्धारित करे गेहे। अभ्यर्थी मन ल खुदे उपस्थित होके लोक शिक्षण संचालनालय नवा रईपुर म अपन दावा आपत्ति आवेदन प्रस्तुत करना होही। एखरे संग अपन दावा के समर्थन म जरूरी दस्तावेज संलग्न करना अनिवार्य होही।
लोक शिक्षण संचालनालय के अधिकारी मन स्पष्ट करीन हे कि पहिली अमान्य करे गे अभ्यर्थी मन ले दावा आपत्ति पहिली ही स्वीकार करे जा चुके हे। एखरे सेति वर्तमान अंतरिम सूची उपर केवल पात्र अभ्यर्थी मन ले ही दावा आपत्ति स्वीकार करे जाही।
साइबर ठगी-आरोपी गिरफ्तार
खैरागढ़ जिला के पुलिस ह ऑनलाइन साइबर ठगी करे के मामला म मुंबई ले आठ झिन आरोपी ल गिरफ्तार करे हे। आरोपी मनके कब्जा ले सौ ले जादा खाता म पचास करोड़ रूपिया के लेनदेन के खुलासा होय हे। पुलिस ह मउका ले लैपटाप, फोन, बैंक पासबुक, एटीएम अउ सिमकार्ड जब्ती करे हे।
पुलिस के अनुसार खैरागढ़ संगीत विश्वविद्यालय के एक छात्रा ह रिपोर्ट दर्ज कराय रिहीस कि, ओहा पाछू बाईस अगस्त के इंस्टाग्राम म विज्ञापन देख के ऑनलाइन साड़ी आर्डर करे रिहीस। एखर बाद पीड़िता ल साड़ी के ऑनलाइन पेमेंट करे बर क्यूआर कोड भेजिस फेर आर्डर कन्फर्म करे के नाम म अलग-अलग किस्त म करीबन चौसठ हजार रूपिया के ठगी करीस। पीड़िता के रिपोर्ट म आईजी राजनांदगांव अउ एसपी खैरागढ़ के निरदेस म साइबर सेल खैरागढ़ अउ थाना खैरागढ़ के संयुक्त टीम गठित करे गीस। टीम ह मुंबई के डोम्बिविली ले आठ झिन आरोपी ल गिरफ्तार करे हे।
निलंबन
राज्य सरकार ह श्रम पदाधिकारी कार्यालय बलौदाबाजार म कार्यरत श्रम निरीक्षक रामचरण कौशिक ल भ्रष्टाचार के गंभीर आरोप के चलत तुरते प्रभाव ले निलंबित कर देहे। बतादन कि श्रम निरीक्षक उपर व्यवसायिक प्रतिष्ठान ले अवैध उगाही के आरोप लगे रिहीस। उहें, बलौदाबाजार वन मंडल के अर्जुनी परिक्षेत्र के अंतर्गत वन्य प्राणी गौर-बायसन के करंट लगाके सिकार करे के घटना म लापरवाही बरते के सेति वन रक्षक ल निलंबित कर दे गेहे।
माओवादी-स्मारक ध्वस्त
बीजापुर जिला के नेशनल पार्क क्षेत्र के पील्लूर के जंगल म माओवादी मन कोति ले बने माओवादी स्मारक ल आज सुरक्षा बल के जवान मन ध्वस्त कर देहे। डिस्ट्रिक्ट रिजर्व गार्ड-डीआरजी अउ केंद्रीय रिजर्व पुलिस बल-सीआरपीएफ के संयुक्त कार्रवाई म माओवादी मन कोति ले बनाय गे बीस फीट ऊंचा स्मारक ल ढहाय गीस।
इही बीच, इही जिला के ग्राम कांडलापर्ती म सुरक्षा बल ह नवा सुरक्षा अउ जन सुविधा कैम्प के स्थापना करीन। ए पहल राज्य सरकार के नियद नेल्लानार योजना के अंतर्गत ग्रामीण मन ल मूलभुत सुविधा अउ सुरक्षा उपलब्ध कराय बर करे गेहे।
छठ पर्व
लोक आस्था के महापरब छठ के आज तीसरइया दिन हे। खरना के बाद काली संझा ले सुरू निर्जला उपवास करइया श्रध्दालु मन आज संझा डूबत सूरज ल अर्ध्य अर्पित करीन। काली बिहनिया उगत सूरज ल अर्ध्य अर्पण के संग ए चार दिन के अनुष्ठान सिराही।
प्रधानमंत्री नरेंद्र मोदी छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह देसवासी मन ल सूर्य उपासना के परब छठ पूजा के सुभकामना दीन हे। सोसल मीडिया पोस्ट म श्री मोदी ह डूबत सूरज ल अर्ध्य दे के परंपरा ल अद्वितीय बतइन।
उहें, मुख्यमंत्री विष्णुदेव साय ह किहीन हे कि छठ पूजा आस्था, पवित्रता अउ प्रकृति के प्रति कृतज्ञता के परब हरय, जउन सूर्य देव अउ छठ मइया के उपासना के माध्यम ले मानव अउ प्रकृति के मधुर संबंध के संदेस देथे। ए परब समाज म सामूहिकता, पवित्रता अउ पारिवारिक एकता के भावना ल सशक्त बनाथे।
अउ अब जानन मौसम के हाल…
दक्षिण-पश्चिम बंगाल के खाड़ी म बने चक्रवात मोन्था के प्रभाव के सेति काली अट्ठाईस अक्टूबर के दक्षिण छत्तीसगढ़ के कुछेक जिला म भारी ले अतिभारी बरसा होय के संभावना जताय गेहे। मौसम विभाग ह दक्षिण छत्तीसगढ़ के बीजापुर, दंतेवाड़ा, सुकमा अउ बस्तर जिला के कुछेक जघा बर रेड अउ आरेंज अलर्ट जारी करे हे। मौसम विज्ञानी गायत्रीवाणी ह बतइन कि अवइया चौबीस घंटा के दउरान दक्षिण छत्तीसगढ़ म भारी बरसा के संग पचास ले साठ किलोमीटर प्रतिघंटा के गति ले तेज हवा चलही।