प्रधानमंत्री नरेंद्र मोदी ह किहीन हे कि छठ महापरब संस्कृति, प्रकृति अउ समाज के बीच गहरा एकता के प्रतीक हे। आकाशवाणी ले मन की बात कारीकरम म आज प्रधानमंत्री ह किहीन कि समाज के हरेक वर्ग के लोगन छठ के घाट मन म एक साथ आके भारत के सामाजिक एकता के सबले सुंदर उदाहरण देथे।
प्रधानमंत्री ह वस्तु अउ सेवाकर-जीएसटी बचत उत्सव बर लोगन के उछाह ल देख के अपन खुसी जतइन।
प्रधानमंत्री ह स्वच्छता बर करे गे परयास ले जुड़े देस के कतकोन सहर के प्रेरक कहानी के बारे म बतइन। ओमन ह छत्तीसगढ़ के अंबिकापुर म कचरा के सफाई बर सुरू करे गे पहल के उदाहरण दीन। श्री मोदी ह किहीन कि अंबिकापुर म कचरा कैफे चलाय जावत हे, एमा लोगन ल प्लास्टिक कचरा के बदला भर पेट भोजन दे जाथे।
मुख्यमंत्री विष्णुदेव साय ह आज राजधानी रईपुर के सांति नगर म मन की बात कारीकरम ल सुनिन। ए मउका म मुख्यमंत्री ह प्रधानमंत्री डहार ले अंबिकापुर के ‘‘गार्बेज कैफे‘‘ अउ भारतीय नस्ल के श्वान मनके उपलब्धि के बिसेस उल्लेख करे जाय म एला पूरा प्रदेस के सम्मान बतइन।
मन की बात-गार्बेज कैफे
प्रधानमंत्री के मन की बात कारीकरम म अंबिकापुर के ‘गार्बेज कैफे‘ के बिसेस रूप म चर्चा होय ले अंबिकापुर संघरा प्रदेस के लोगन ल गर्व अउ खुसी मिले हे। ए कैफे ह अपन अनूठा पहल के सेति पूरा देस म एक ठन नवा पहिचान बना डरे हे।
‘‘गार्बेज कैफे‘‘ के प्रभारी ज्ञानलता कुजूर ह बतइन कि एखर उद्देस्य जरूरतमंद लोगन ल भरपेट भोजन खवाना अउ सहर ल साफ-सुथरा बनाना हे।
माओवादी-आत्मसमर्पण
कांकेर जिला म आज इक्कीस झन माओवादी मन ह आत्मसमर्पण करीन हे। एमा तेरह झन महिला माओवादी घलो सामिल हे। उपमुख्यमंत्री विजय शर्मा ह बतइन कि ए सबो माओवादी मन ह केसकाल डिवीजन के कुएमारी अउ किसकोडो एरिया कमेटी म सक्रिय रिहीन। एमा डिवीजन कमेटी सेकेटरी मुकेश संघरा चार डिवीजन वाइस कमेटी मेंबर, नौ एरिया कमेटी मेंबर अउ आठ पार्टी सदस्य हे। ए माओवादी मन ह अट्ठारा ठन हथियार घलो जमा करीन हे, जेमा तीन ठन एके-फोर्टी-सेवन, चार ठन एसएलआर, दू ठन इंसास, छै ठन थ्री नॉट थ्री अउ दू ठन सिंगल सॉट रायफल अउ एक ठन बीजीएल हथियार हे।
‘तिलहन कृषक मेला सह सम्मेलन‘
छत्तीसगढ़ राज्य स्थापना के पचीस बछर पूरा होय के मउका म सारंगढ़-बिलाईगढ़ जिला के सारंगढ़ कृषि उपज मंडी परिसर म ‘‘तिलहन कृषक मेला सह सम्मेलन‘‘ के आयोजन करे गीस। कारीकरम म राजस्व मंत्री टंकराम वर्मा सामिल होइन। ए मउका म राजस्व मंत्री ह किहीन कि प्रधानमंत्री नरेंद्र मोदी बछर दू हजार सैंतालीस तक भारत ल विकसित राष्ट्र बनाय के लक्ष्य म आगू बढ़त हे। ए दिसा म दलहन-तिलहन के जादा उत्पादन देस ल खाद्य तेल के आयात ले मुक्ति देवाही अउ आर्थिक आत्मनिर्भरता ल मजबूती देही। समारोह म बने काम करइया किसान अउ हितग्राही मन ल सम्मानित करे गीस।
जुआरी गिरफ्तार
जांजगीर-चांपा जिला के सिटी कोतवाली पुलिस ह छापामार के छै झन पटवारी संघरा आठ झन जुंवारी मन ल गिरफ्तार करे हे। आरोपी मन म पटवारी संघ के कार्यकारी प्रदेस अध्यक्ष ज्योतिष सर्वे घलो सामिल हे। पुलिस ह आरोपी मन तीर ले चालीस हजार रूपिया नगद संघरा छै ठन मोबाइल, दू कार अउ दू ठन फटफटी ल जब्त करे हे। आरोपी मन के खिलाफ जुंआ प्रतिसेध अधिनियम म कार्रवाई करे गेहे।
वाहन चालक हड़ताल
प्रदेस के वाहन चालक मन ह अनिश्चितकालीन हड़ताल म हवय। छत्तीसगढ़ ड्राइवर महासंगठन के बैनर म अपन दस सूत्रीय मांग ल लेके वाहन चालक मन ह आने-आने जिला म प्रदर्सन करत हे, जेखर ले प्रदेस म परिवहन बेवस्था प्रभावित होय हे। वाहन चालक मनके प्रमुख मांग हे हिट-एंड-रन कानून म बदलाव, काम के घंटा ल कमती करना, दुर्घटना बीमा रासि ल बढ़ाना, अवैध वसूली ल रोकना, ईंधन म सब्सिडी, लाइसेंस नवीनीकरण ल आसान करना, रोड टैक्स म छूट अउ माईलोगिन मन ल अउ लइका मन ल सुरक्षा देना सामिल हे।
छठ पर्व
छठ महापर्व के आज दूसर दिन हे। ए खरना के नांव ले घलो जाने जाथे। व्रत के तीसर दिन काली सम्मार के कतकोन नदी अउ तलाब के किनारे के छठ घाट म सूर्य ल पहला अर्ध्य दे जाही। अट्ठाईस अक्टूबर के निकलत सूरज ल अर्ध्य देके संगेच चार दिन के छठ पर्व के समापन होही। छठ पर्व बर राजधानी रईपुर के महादेवघाट के संगेच कतकोन तलाब मन म बिसेस बेवस्था करे गेहे।
प्रधानमंत्री नरेंद्र मोदी ह ए मउका म लोगन ल सुभकामना दीन हे अउ छठ के व्रत रखइया माईलोगिन मनके भक्ति ल प्रेरणादायक बतइन हे।
अउ अब थोरकुन समाचार सार म –
– राज्य सरकार ह बस्तर जिला के ग्राम फरसागुडा के रूपसिंह मंडावी ल छत्तीसगढ़ राज्य अनुसूचित जनजाति आयोग के अध्यक्ष नियुक्त करे हे।
– छत्तीसगढ़ राज्य स्थापना दिवस के मउका म एक नवंबर के राज्य शासन ह शैक्षणिक संस्थान मन म अवकाश घोसित करे हे। सामान्य प्रशासन विभाग ह ए संबंध म आदेस जारी कर देहे।
अउ
– कोरबा जिला के एसईसीएल गेवरा परियोजना म आज ट्रेन ले लोडर के टकरा जाय ले एक लोडर चालक के मउत हो गेहे।