प्रधानमंत्री नरेंद्र मोदी ह काली बिहनिया ग्यारा बजे आकाशवाणी ले ‘‘मन की बात‘‘ कारीकरम म देस‘-विदेस के लोगन मनके संग अपन बिचार साझा करही। मासिक रेडियो कारीकरम के एहा एक सौ सत्ताइसवां कड़ी होही। ए कारीकरम ल पूरा आकाशवाणी अउ दूरदर्सन नेटवर्क, आकाशवाणी समाचार वेबसाइट अउ न्यूज ऑन एआईआर मोबाइल ऐप म प्रसारित करे जाही। एखर सोज्झे प्रसारण आकाशवाणी समाचार, डी.डी.न्यूज, प्रधानमंत्री कार्यालय अउ सूचना प्रसारण मंत्रालय के यू-ट्यूब चैनल म घलो करे जाही। आकाशवाणी ह हिन्दी प्रसारण के तुरते बाद क्षेत्रीय भाषा मन म घलो ए कारीकरम के प्रसारण करही।
शिक्षक भर्ती-स्वीकृति
प्रदेस म पांच हजार शिक्षक मनके भर्ती करे जाही। एखर बर वित्त विभाग ह मंजूरी दे देहे। शिक्षा विभाग जल्दीच भर्ती प्रक्रिया सुरू करही। मुख्यमंत्री विष्णुदेव साय ह किहीन हे कि शिक्षक मनके नवा भर्ती न सिरिफ शिक्षण बेवस्था ल गति दिही भलूक युवा मन बर रोजगार के नवा मउका खोलही। एखर ले गांव अउ आदिवासी अंचल म शिक्षक मनके कमी दूर हो जही।
त उहें, शिक्षा मंत्री गजेन्द्र यादव ह ए फइसला के सुवागत करत किहीन कि एखर ले प्रदेस के शिक्षा बेवस्था ल नवा दिसा मिलही। ओमन किहीन कि भर्ती प्रक्रिया ल पारदर्सिता के संग चलाय जाही।
जनजातीय संग्रहालय
नवा रईपुर के आदिवासी अनुसंधान अउ प्रसिक्षण संस्थान परिसर म छत्तीसगढ़ के जनजातीय स्वतंत्रता संग्राम सेनानी के विद्रोह उपर बनत स्मारक सह-संग्रहालय ल जल्दीच लोगन मन बर खोल दे जाही। प्रधानमंत्री नरेंद्र मोदी ह एक नवंबर के राज्योत्सव के मउका म देस के पहिली डिजीटल संग्रहालय के लोकार्पण करही। मुख्यमंत्री विष्णुदेव साय ह बनत संग्रहालय के निरीक्षण करके लोकार्पण के तियारी करके जायजा लीन अउ अधिकारी मन ल जरूरी निरदेस दीन। ए दउरान मुख्यमंत्री ह किहीन कि इंहा पर्यटक मन बर ऑडियो-वीडियो विजुअल के बेवस्था करे जाय, जेखर ले स्वतंत्रता संग्राम सेनानी के ऐतिहासिक पृष्ठभूमि ले परिचित हो सकय।
मुख्यमंत्री-पंडवानी सम्मेलन
अंतर्राष्ट्रीय कलाकार दिवस के मउका म दुरूग जिला के गांव मेड़ेसरा म चलत पंडवानी महासम्मेलन आज सिरागे। समापन समारोह म मुख्यमंत्री ह घलो सामिल होइन। ए मउका म मुख्यमंत्री ह नंदिनी के नागरिक कल्याण महाविद्यालय म स्नात्तकोत्तर कक्षा खोले, अछोटी म बीएड महाविद्यालय अउ मेड़ेसरा ल आदर्स गांव बनाय के संगेसंग सामुदायिक भवन बर बीस लाख रूपिया के घोसना करीन।
सिकलसेल बीमारी-स्क्रीनिंग
धरती आबा जनजातीय ग्राम उत्कर्ष अभियान के तहत प्रदेस के अनुसूचित क्षेत्र मन म सिकल सेल बीमारी के स्क्रीनिंग करके ओखर इलाज कराय बर जरूरी उपाय करे जाही। अखिल भारतीय आयुर्विज्ञान संस्थान एम्स रईपुर अउ स्वास्थ्य विभाग मिलके ए अभियान चलाही। ए बारे म आदिम जाति विकास विभाग के प्रमुख सचिव सोनमणि बोरा के अध्यक्षता म मंत्रालय म राज्य स्तरीय समिति के बइठका होइस। बइठका म मितानिन मन के मदद ले डोर-टू-डोर स्क्रीनिंग करे उपर सहमति बनिस।
अरूण साव-राज्योत्सव तैयारी
छत्तीसगढ़ राज्य स्थापना के रजत जयंती वर्ष के मउका म नवा रईपुर म एक ले पांच नवंबर तक राज्योत्सव के आयोजन करे जाही। उपमुख्यमंत्री अरूण साव ह आज रईपुर म पत्रकार मनले गोठबात करत बतइन कि राज्योत्सव के दउरान जम्मो जिला मन म तीन दिन के कारीकरम होही। ए बार के राज्य स्थापना के आयोजन ल ऐतिहासिक बनाय के तियारी करे गेहे। श्री साव ह बइतन कि रजत जयंती वर्ष के मउका म प्रधानमंत्री नरेंद्र मोदी के आगमन के तियारी घलो जोरदरहा चलत हे। उंखर सुवागत म नवा रईपुर म रोड-सो होही। ए रद्दा मन म बारह ठिन बिसेस सुवागत द्वार बनाय जात हे, जेमा छत्तीसगढ़ के कला, संस्कृति, लोक परंपरा अउ विकास योजना के झलक देखे बर मिलही।
स्वास्थ्य मंत्री-खड़गवां प्रमाण पत्र
मनेंद्रगढ़-चिरमिरी-भरतपुर जिला के सामुदायिक स्वास्थ्य केंद्र खड़गवां ल आईएसओ प्रमाण पत्र दे गेहे। ए उपलब्धि हासिल करइया खड़गवां ह सरगुजा संभाग के पहिली सामुदायिक स्वास्थ्य केंद्र हरय।
छठ पर्व
प्रदेस के संगेसंग पूरा देस म लोक आस्था के महापरब छठ आज नहाय-खाय के संग सुरू होगे। ए परब के दूसर दिन काली खरना प्रसाद लेके बाद उपास रहइया मन छत्तीस घंटा तक निर्जला उपास सुरू करही। व्रत के तीसर दिन सम्मार के कतकोन नदिया अउ जलासय के तीर स्थित छठ घाट म डूबत सूर्य ल अर्ध्य दे जाही। अट्ठाईस अक्टूबर के उगत सूरज ल अर्ध्य दे के संग चार दिन तक चलइया छठ परब सिरा जाही। छठ परब बर राजधानी रईपुर के महादेवघाट के संगेसंग पचास ले जादा तरिया मन म बिसेस इंतेजाम करे गेहे।
प्रधानमंत्री नरेंद्र मोदी ह लोगन मनले छठ पूजा ले जुड़े गीत ल साझा करे के विनती करे हे।
बस्तर ओलंपिक-शुभारंभ
बस्तर ओलंपिक के तहत आज नारायणपुर जिला के कच्चापाल गांव म प्रतियोगिता सुरू होइस। ए स्पर्धा के उद्घाटन उपमुख्यमंत्री विजय शर्मा ह करीन। ए मउका म ईरकभट्टी अउ कच्चापाल के गांव के माईलोगिन मनके बीच रस्सा कसी प्रतियोगिता होइस, जेमा ईरकभट्टी गांव के माईलोगिन मन ह जितिन। उपमुख्यमंत्री ह खिलाड़ी मन ल बस्तर ओलंपिक के टी-सर्ट बांटिन। ए प्रतियोगिता विकासखंड, जिला, अउ संभाग स्तर के तीन चरण म होही। बस्तर ओलंपिक म बस्तर संभाग म तीन लाख अस्सी हजार ले जादा प्रतिभागी मन भाग लेवत हे, जेमा ले नारायणपुर जिला के सैंतालीस हजार ले जादा प्रतिभागी मन सामिल हे।
राज्पपाल-ई रिक्शा
राज्यपाल रमेन डेका ह अपन स्वेच्छानुदान मद ले रईपुर के सरस्वती शिक्षा संस्थान ल चार ठिन ई-रिक्सा दे हे। ओमन राजभवन परिसर म होय एक ठिन कारीकरम म ए गाड़ी मनके चाबी चालक मन ल दीन अउ हरा झंडी दिखाके रवाना करीन। गाड़ी मनके परयोग आने-आने सरस्वती शिक्षा संस्थान मन म करे जाही।
ई-ड्राइविंग टेस्ट ट्रैक
प्रदेस म गाड़ी चलइया मन के योग्यता अउ सड़क सुरक्षा ल बढ़िया बनाय बर परिवहन विभाग ह एक ठिन नवा पहल करे हे। जेमा प्रदेस के आठ जिला मुख्यालय रईपुर, दुरूग, बिलासपुर, जांजगीर-चांपा, जगदलपुर, अंबिकापुर, रायगढ़ अउ कोरबा म ई-ड्राइविंग टेस्ट ट्रैक के स्थापना करे जात हे। परिवहन मंत्री केदार कश्यप ह बतइन कि ए आधुनिक ई-ट्रैक के माध्यम ले ड्राइविंग टेस्ट ल डिजीटल अउ पारदर्सी ढंग ले जही। ए पहल ह न सिरिफ सड़क सुरक्षा ल बढ़ाही भलूक छत्तीसगढ़ ल स्मार्ट परिवहन बेवस्था के दिसा म आगू ले जाही।
नर्सिंग कालेज-भवन निर्माण
प्रदेस के नौ ठिन नवा नर्सिंग महाविद्यालय भवन बनाय बर राज्य सरकार ह अठहत्तर करोड़ पंद्रह लाख रूपिया के मंजूरी दे देहे। ए नवा कालेज दंतेवाड़ा, बैकुंठपुर, बीजापुर, बलरामपुर, जशपुर, रायगढ़, धमतरी, जांजगीर-चांपा अउ नवा रईपुर म बनाय जाही।
मुख्यमंत्री विष्णुदेव साय ह किहीन हे कि ए नवा नर्सिंग कालेज के भवन बने के मंजूरी मिले ले प्रदेस के स्वास्थ्य शिक्षा क्षेत्र म नवा अध्याय जुड़ही।
उहें, स्वास्थ्य मंत्री श्याम बिहारी जायसवाल ह किहीन कि ए फइसला प्रदेस म नर्सिंग शिक्षा ल नवा दिसा दिही।
माशिमं-हेल्पलाइन सेवा
छत्तीसगढ़ माध्यमिक शिक्षा मंडल डहार ले छात्र मनके मानसिक तनाव ल दूरिहा भगाय बर इकतीस अक्टूबर ले बिसेस हेल्पलाइन सेवा सुरू करे जाही। ए हेल्पलाइन ले छात्र मन अपन मानसिक तनाव, घबराहट या याने मनोवैज्ञानिक समस्या के समाधान बिसेसज्ञ मनले ले सकही। एखर बर एक ठिन टोल फ्री नंबर- एक आठ सून्य-सून्य- दू तीन-तीन-चार तीन छै तीन जारी करे गेहे। छात्र मन हरेक सुक्रवार के मंझनिया दू बजे ले संझा पांच बजे तक ए हेल्पलाइन नंबर म फोन करके बिसेसज्ञ ले समस्या के समाधान ले सकथे। जानबा के मुताबिक देस म आत्म हत्या के बाढ़त घटना अउ स्कूल मन म छात्र मन उपर बाढ़त मानसिक दबाव ल देखत मंडल ह एक जरूरी कदम उठाय हे।
विजय शर्मा/बीजापुर-सुकमा
उपमुख्यमंत्री विजय शर्मा ह अपन बीजापुर प्रवास के दउरान अधिकारी मनके बइठका लेके आत्मसमर्पित नक्सली मन ल पुनर्वास केंद्र म दे जात सुविधा के समीक्षा करीन। ओमन किहीन कि ए केंद्र मन म रहइया लोगन मनके कौशल विकास उपर बिसेस धियान दे जाय। जेखर ले मुख्यधारा म ओमन ल सम्मान जनक जिनगी मिल सकय। पुनर्वास केंद्र के हरेक सदस्य मन ल मुफत म मोबाइल देके परिवार ले गोठबात कराय म मदद करे बर घलो किहीन।
त उहें, सुकमा प्रवास के दउरान उपमुख्यमंत्री ह गांव दुलेड म केंद्रीय रिजर्व पुलिस बल-सीआरपीएफ कैम्प के निरीक्षण करीन अउ जवान मनके हालचाल जानिन। ओमन जन चौपाल लगाके गांव के लोगन मन ले गोठबात करीन।