ए मउका म प्रधानमंत्री ह विकसित भारत योजना के घलो सुरूआत करीन। एखर लक्ष्य साढ़े तीन करोड़ युवा मन ल रोजगार देना हे। श्री मेदी ह किहीन कि युवा मन ल सशक्त बनाना भाजपा-एनडीए सरकार के प्राथमिकता हरय। श्री मोदी ह ए बात उपर जोर दीन कि स्किल इंडिया मिशन जइसे अभियान युवा मन ल कौशल प्रसिक्षण प्रदान करथे।
रोजगार सृजन अभियान के तहत आज राजधानी रईपुर म घलो रोजगार मेला के आयोजन करे गीस, जेमा केंद्रीय राज्यमंत्री तोखन साहू ह पंचानवे चुने गे युवा मन ल नियुक्ति पत्र प्रदान करीन।
मुख्यमंत्री-निरीक्षण
प्रधानमंत्री नरेंद्र मोदी के छत्तीसगढ़ प्रवास ल देखत मुख्यमंत्री विष्णुदेव साय ह आज नवा रईपुर म आने-आने कारीकरम स्थल के निरीक्षण करके तियारी के समीक्षा करीन। मुख्यमंत्री ह श्री सत्य सांई अस्पताल, प्रजापिता ब्रम्हकुमारी ध्यान केंद्र अउ सहीद वीर नारायण सिंह स्मारक सह जनजातीय स्वतंत्रता संग्राम सेनानी संग्रहालय के निरीक्षण करीन। उहें, राज्योत्सव स्थल के घलो दउरा करके तियारी के जानकारी लीन। ओमन अधिकारी मन ल जम्मो तियारी समय-सीमा म पूरा करे के निरदेस दीन।
बाद म पत्रकार मनले चर्चा करत मुख्यमंत्री ह किहीन कि प्रधानमंत्री के छत्तीसगढ़ आगमन राज्य बर गौरव के मउका हे। श्री साय ह बतइन कि इकतीस अक्टूबर के रतिहा प्रधानमंत्री रईपुर पहुंचही। ओमन एक नवंबर के जनजातीय संग्रहालय अउ विधानसभा के नवा भवन के लोकार्पण करे के संघरा पांच दिन के राज्योत्सव के सुभारंभ करहीं।
अरूण साव-प्रेसवार्ता
बस्तर ओलंपिक के तहत काली पच्चीस अक्टूबर ले विकासखंड स्तर म प्रतियोगिता सुरू होही जउन पांच नवंबर तक चलही। उहें, जिला स्तरीय प्रतियोगिता छै नवंबर ले सुरू होके पंद्रह नवंबर तक खेले जाही, जेमा ब्लाक स्तर के विजेता खिलाड़ी भाग लिही। संभाग स्तरीय प्रतियोगिता के आयोजन चौबीस ले तीस नवंबर तक संभावित हे, जेमा बस्तर संभाग के जम्मो सात जिला के विजेता खिलाड़ी हिस्सा लिही।
उपमुख्यमंत्री अरूण साव ह आज रईपुर म एक पत्रकार वार्ता म बतइन कि ए साल रिकार्ड तीन लाख इंक्यानवे हजार ले जादा के खिलाड़ी मन बस्तर ओलंपिक बर अपन पंजीयन कराय हे।
उपमुख्यमंत्री ह बतइन कि ए साल बस्तर ओलंपिक म तीरंदाजी, एथलेटिक्स, कबड्डी, हॉकी, कराते, वेट लिफ्टिंग अउ रस्सा कसी जइसे पारंपरिक अउ आधुनिक खेल सामिल करे गेहे।
उपमुख्यमंत्री श्री साव ह बतइन कि बस्तर ओलंपिक के आने-आने चरण के प्रतियोगिता म जाने-माने खिलाड़ी अउ छत्तीसगढ़ के अंतर्राष्ट्रीय खिलाड़ी मन ल आमंत्रित करे जाही, ताकि बस्तर के स्थानीय खिलाड़ी मनल प्रोत्साहित करे जा सकय। ए साल घलो ए आयोजन म नक्सली हिंसा के सिकार अउ दिव्यांग खिलाड़ी घलो पैरा खेल प्रतियोगिता म अपन दमखम दिखाही।
बातों बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ म ए दारी छठ महापरब उपर केंद्रित रइही। एखर तहत छठ महापरब आयोजन समिति रईपुर के अध्यक्ष राजेश कुमार िंसंह, उपाध्यक्ष कन्हैया सिंह अउ प्रचार सचिव बृजेश िंसंह ले लेगे भेंटवार्ता के प्रसारण करे जाही। ए कारीकरम के प्रसारण काली पच्चीस अक्टूबर के एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करही।
फूड प्वॉइजनिंग-मौत
नारायणपुर जिला म कथित रूप ले दूषित भोजन खाय ले पांच झिन ग्रामीण मन के मउत हो गेहे, जबकि पच्चीस ले जादा ग्रामीण बीमार हे। जम्मो ग्रामीण पाछू चौदह अक्टूबर के नारायणपुर अउ बीजापुर जिला के सीमा म स्थित डूंगा गांव म तेरहवीं भोज बर गे रिहीन। ए भोज म सामिल होय ग्रामीण मन म कई दिन के बाद फूड प्वॉइजनिंग के लक्षण दिखई दे लगिस अउ बीस अक्टूबर तक पांच मनखे मनके मउत होगे।
कलेक्टर प्रतिष्ठा ममगाई के निरदेस म स्वास्थ्य विभाग के एक टीम गांव पहुंचिस। मुख्य चिकित्सा अउ स्वास्थ्य अधिकारी तुकाराम कंवर ह बतइन कि गांव म स्थिति अभी नियंत्रण म हे। जांच बर भोजन अउ पानी के नमूना सकेले गेहे। स्वास्थ्य विभाग ह किहीस कि भोज के दउरान परोसे गे भोजन संभवतः दूषित रिहीस, जेखर सेति पांच मनखे के मउत होय हे। ए मामला के जांच करे जात हे।
छठ पर्व
चार दिन के छठ महापरब काली पच्चीस अक्टूबर ले नहाय खाय के संग सुरू होही। रईपुर म महादेवघाट के अलावा पचास ले जादा तलाब मन म छठ पूजा के आयोजन करे जाही। नगर निगम डहार ले बिसेस अभियान चलाके तलाब मनके साफ-सफई करे जात हे। आज नगर निगम के अधिकारी मन सफई अभियान के निरीक्षण करीन अउ जरूरी निरदेस दीन। घाट म लाईटिंग अउ टेन्ट जइसे बेवस्था करे जात हे।
रईपुर के छठ महापर्व आयोजन समिति के अध्यक्ष राजेश कुमार सिंह ह बतइन कि ए साल छठ परब पच्चीस तारीख ले सुरू होके अट्ठाईस अक्टूबर तक मनाय जाही। छब्बीस अक्टूबर के खरना के रसम होही। उहें, सत्ताईस अक्टूबर के डूबत सूरज ल पहिली अर्ध्य दे जाही। अट्ठाईस अक्टूबर के उगत सूरज ल अर्ध्य दे के संग ए परब सिराही।
उहें, संस्कृति मंत्री राजेश अग्रवाल ह अंबिकापुर के आने-आने छठ घाट के निरीक्षण करीन। ए दउरान ओमन अधिकारी मनले घाट के साफ-सफई, प्रकाश बेवस्था, सुरक्षा, पेयजल जइसन दूसर सुविधा के जानकारी लीन। ओमन निरदेस दीन कि श्रध्दालू मन ल कोनो भी प्रकार के असुविधा झन होवय एखर बर जम्मो बेवस्था बेरा रहत पूरा कर ले जाय।
छठ/दीपावली-स्पेशल ट्रेन
दीपावली परब के बाद घर लहुटे अउ छठ पूजा जइसे प्रमुख तिहार के दउरान यात्री मनके सुविधा बर रईपुर रेलमंडल डहार ले व्यापक प्रबंध करे गे हे। रईपुर, दुरूग, भिलाई, पावर हाउस, भाटापारा समेत दूसर भीड़-भाड़ वाला स्टेसन म बिसेस होल्डिंग एरिया बनाय गेहे, जिंहा कर्मचारी मन ल तैनात करे गेहे। इंहा यात्री मन बर खान-पान, पेयजल, बइठे के बेवस्था अउ दूसर जरूरी सुविधा उपलब्ध कराय गेहे। संघरा यात्री मन ल मोबाइल टिकटिंग सुविधा घलो उपलब्ध कराय गेहे। रईपुर रेलमंडल के महाप्रबंधक तरूण प्रकाश ह होल्डिंग एरिया म यात्री मन ले गोठबात करके बेवस्था के जायजा लीन अउ अधिकारी मन ल निरदेस दीन।
इही बीच, रेलवे प्रशासन डहार ले आज ले हावड़ा अउ नागपुर के बीच एक फेरा बर अन रिजर्व्ड स्पेशल ट्रेन के सुविधा सुरू करे गेहे। ए ट्रेन म दू ठिन एसएलआर, सोलह, सामान्य समेत कुल अट्ठारह कोच हे।
उहें, दुरूग-पटना अउ गोंदिया-पटना के बीच एक फेरा बर घलो छठ स्पेशल ट्रेन चलाय जात हे।
एखर अलावा चर्लपल्ली अउ बरौनी के बीच एक फेरा बर छठ पूजा स्पेसल ट्रेन के सुविधा काली ले सुरू होही। ए ट्रेन के फायदा गांदिया, दुरूग, रईपुर अउ बिलासपुर के यात्री उठा सकही।
अंबिकापुर-किसान मेला
अंबिकापुर के कृषि विज्ञान केंद्र म जिला स्तरीय किसान मेला आयोजित करे गीस, जेमा किसान मन ल फसल विविधीकरण अउ जैविक खेती के मार्गदर्सन दे गीस। कारीकरम म पर्यटन अउ संस्कृति मंत्री राजेश अग्रवाल ह किसान मनले जैविक खेती ल बढ़ावा दे, रासायनिक खाद के जादा परयोग ले बांचे अउ मिट्टी के पोषकता बनाय रखे के आग्रह करीन। मेला म कृषि, उद्यानिकी, पशुधन विकास अउ मत्स्य पालन विभाग डहार ले स्टाल लगाय गे रिहीस, जेमा किसान मन ल आने-आने योजना अउ नवा तकनीक के जानकारी दे गीस।