प्रधानमंत्री दीपावली-पत्र
प्रधानमंत्री नरेन्द्र मोदी ह किहीन हे कि भारत अइसन बेरा म स्थिरता अउ संवेदनशीलता के प्रतीक बनके उभरे हे, जब दुनिया कई ठिन मुसीबत ले गुजरत हे। श्री मोदी ह देवारी तिहार म देसवासी मन ल लिखे चिट्ठी म किहीन कि भारत दुनिया के तीसर सबले बड़े अर्थव्यवस्था बने के रद्दा म हवय। ए यात्रा म राष्ट्र बर अपन कर्तव्य के पालन करना, हम सबो के पहिली जिम्मेवारी हरय। प्रधानमंत्री ह किहीन कि एसो के देवारी एखर सेती बिसेस हरय, काबर कि पहिली घांव देस के ओ दूर-दराज क्षेत्र समेत कतकोन जिला म घलो तिहार के उछाह के हवय, जिहां कभू माओवादी आतंक रिहीस। प्रधानमंत्री ह किहीन कि ऑपरेशन सिंदूर के दउरान भारत ह अपन धरम के पालन करीस। उहें, अन्याय के बदला घलो लीस।
पुलिस स्मृति दिवस
आज पुलिस स्मृति दिवस हरय। बछर उन्नीस सौ उनसठ म आजे के दिन लद्दाख के हॉट स्प्रिंग्स म भारी हथियार ले लदे चीनी सैनिक मन कोति ले घात लगाके करे गे हमला म दस झिन बहादुर पुलिस कर्मचारी मन ह अपन प्राण के आहुति दे रिहीन।
उपराष्ट्रपति सी.पी. राधाकृष्णन, प्रधानमंत्री नरेन्द्र मोदी अउ केन्द्रीय गृहमंत्री अमित शाह समेत कतकोन गणमान्य लोगन मन ह पुलिस कर्मचारी मनके बलिदान ल सुरता करीन।
पुलिस स्मृति दिवस म रक्षामंत्री राजनाथ सिंह ह नई दिल्ली के राष्ट्रीय समर स्मारक म कर्मचारी मन ल श्रद्धांजलि दीन। समारोह म बोलत रक्षामंत्री ह किहीन कि देस बछर दू हजार सैंतालीस तक विकसित भारत के लक्ष्य कोति बाढ़त हे। अइसन स्थिति म देस के बाहिरी अउ आतंरिक सुरक्षा म संतुलन पहिली ले अउ जादा महत्ता के होगे हे। ओमन सशस्त्र बल अउ पुलिस बल ल राष्ट्रीय सुरक्षा के स्तंभ बतईन। रक्षामंत्री ह किहीन कि जउन क्षेत्र कभू लाल गलियारा के रूप म जाने जात रिहीस, ओ ह अब विकास गलियारा म बदल गेहे। रक्षामंत्री ह भरोसा जतईन कि अवइया बछर मार्च महीना तक देसभर ले वामपंथी उग्रवाद के समस्या खतम हो जही। ओमन किहीन कि एसो कतकोन बड़े नक्सली मनके सफाया करे गेहे अउ वामपंथी उग्रवाद ले प्रभावित जिला के संख्या म कमी आय हे।
पुलिस स्मृति दिवस छत्तीसगढ़
पुलिस स्मृति दिवस म आज प्रदेश के आने-आने जिला म कार्यक्रम राखके सहीद पुलिस कर्मचारी मन ल श्रद्धांजलि दे गीस। राज्यपाल रमेन डेका अउ मुख्यमंत्री विष्णुदेव साय रायपुर के माना म छत्तीसगढ़ सशस्त्र बल के चौथीं वाहनी म राखे गे परेड कार्यक्रम म संघरीन। ए मउका म ओमन सहीद स्मारक म जवान मन ल पुष्पचक्र चढ़ाके श्रद्धांजलि दीन। उहें, सहीद पुलिस अधिकारी अउ जवान मनके परिवार वाले मन ले भेंट करके शॉल, नरियर अउ स्मृति चिन्ह भेंट करीन।
कार्यक्रम म बोलत राज्यपाल ह किहीन कि पुलिस के जिम्मेवारी चुनौतीपूर्ण होथे, जिहां एक कोति कानून व्यवस्था बनाय रखना उंखर जवाबदारी हवय। उहें, दूसर कोति नागरिक मन ल भय मुक्त वातावरण देना उंखर कर्तव्य हे। ओमन किहीन कि आम जनता ल पुलिस बर सहयोग करना चाही। नक्सल प्रभावित क्षेत्र के संबंध म बोलत राज्यपाल ह किहीन कि छत्तीसगढ़ पुलिस ह संकलप, साहस अउ निष्ठा संग नक्सलवाद के चुनौती के मुकाबला करे हे, जेखर सेती आज ए क्षेत्र मन म सांति अउ विश्वास के वातावरण मजबूत होय हे। ओमन भरोसा जतईन कि अवइया बेरा म राज्य नक्सल समस्या ले पूरा मुक्त होही।
उहें, मुख्यमंत्री ह किहीन कि पुलिस अउ सुरक्षा बल के जवान कठिन परिस्थिति अउ चुनौती के बीच चौबीस घंटा समाज के सुरक्षा म जुटे रहिथे। पुलिस स्मृति दिवस ओ जवान मनके पराक्रम के सुरता कराय के मउका हे। उहें, उंखर परिवार वाले मनके त्याग ल घलो नमन करे के अवसर हवय।
कार्यक्रम म उपमुख्यमंत्री विजय शर्मा घलो विचार राखीन।
एखर पहिली, राज्यपाल अउ मुख्यमंत्री रईपुर के सहीद वाटिका पहुंचीन अउ अमर जवान स्तंभ म फूल चढ़ाके सहीद वीर जवान मन ल सुरता करीन।
पुलिस स्मृति दिवस म सूरजपुर जिला के गांव सिलफिली के दसवीं बटालियन परिसर म राखे गे कार्यक्रम म महिला अउ बाल विकास मंत्री लक्ष्मी राजवाड़े ह सहीद जवान मन ल श्रद्धांजलि दीन।
ऐति, धमतरी जिला के रूद्री के रक्षित केन्द्र म राखे गे कार्यक्रम म शहीद पुलिस जवान मन ल सुरता करत उंखर साहस अउ त्याग ल नमन करे गीस।
जांजगीर के पुलिस लाइन म घलो पुष्पांजलि कार्यक्रम रखे गीस अउ पुलिस अधिकारी मन ह पुष्पचक्र चढ़ाके सहीद जवान मन ल सुरता करीन।
ओति, नारायणपुर जिला के रक्षित केन्द्र के सहीद स्मारक परिसर म राखे गे कार्यक्रम म जनप्रतिनिधि अउ अधिकारी मन ह श्रद्धांजलि दीन। ए बेरा म सहीद जवान मनके नाव के वाचन करे गीस।
मन की बात
प्रधानमंत्री नरेन्द्र मोदी ए महीना के छब्बीस तारीख के आकाशवाणी ले ‘‘मन की बात‘‘ कार्यक्रम म देस-बिदेस के लोगन संग अपन विचार साझा करही। ए मासिक रेडियो कार्यक्रम के एक सौ सत्ताईसवां कड़ी हवय। लोगन अपन सुझाव टोल फ्री नंबर – एक आठ शून्य-शून्य एक-एक सात आठ शून्य-शून्य म साझा कर सकत हे। नरेन्द्र मोदी ऐप अउ माई जीओवी ओपन फोरम ले ऑनलाइन सुझाव दे जा सकत हे। ए महीना के चौबीस तारीख तक सुझाव मंजूर करे जाही।
रायपुर रेलमंडल-ड्रोन प्रणाली
दक्षिण-पूर्व मध्य रेलवे के रायपुर मंडल के उरकुरा ट्रैक्शन सब स्टेशन म ड्रोन आधारित ओएचई मॉनिटरिंग अउ थर्मल इमेजिंग प्रणाली सुरू होगे हे। एखर सुभारंभ प्रधान मुख्य विद्युत इंजीनियर राजीव कुमार बरनवाल अउ मंडल रेल प्रबंधक दयानंद ह करीन। ए आधुनिक तकनीक ले ओएचई म संभावित, ढिल्ला कनेक्शन, जादा तापमान वाले बिन्दु अउ आने विद्युत संबंधी खराबी के जल्दी पहिचान करे जा सकही। ए पहल भारतीय रेल म पहिली घांव म करे गेहे, जेमा ड्रोन तकनीक ले निरीक्षण करे जात हे। ड्रोन आधारित मॉनिटरिंग ले रेल प्रणाली के सुरक्षा विश्वसनीयता अउ रखरखाव म सुधार होही।
रायगढ़-पीएम आवास योजना
प्रधानमंत्री आवास योजना-ग्रामीण के तहत रायगढ़ जिला ह तीस हजार ले जादा घर के निर्माण काम पूरा कर लेहे। कलेक्टर मयंक चतुर्वेदी ह बतईन कि प्रधानमंत्री आवास योजना-ग्रामीण म रायगढ़ जिला प्रदेस म अव्वल हवय। ओमन किहीन कि प्रधानमंत्री अवास योजना ह सिरिफ घर नइ देत हे, भलूक जीवन म उछाह अउ आत्मविश्वास देहे। अब ए घर मन म हर तिहार म खुसी के गूंज सुनई दीहीं।
दीपावली/मुख्यमंत्री/स्वास्थ्य मंत्री
मुख्यमंत्री विष्णुदेव साय ह काली जशपुर जिला के अपन गृह ग्राम बगिया म परिवार संग पारंपरिक उछाह के संग देवारी तिहार मनईन। ए बेरा म मुख्यमंत्री ह प्रदेस के जनता के सुख-समृद्धि के मानता करत किहीन कि देवारी के परब सिरिफ घर म दीया जलाय के नो हे, भलूक अपन विचार अउ जीवन म सही सोच के अंजोर बगराय के संदेस देथे।
उहें, उपमुख्यमंत्री विजय शर्मा ह देवारी तिहार म कवर्धा स्थित अपन निवास म करीबन दू सौ स्वच्छता दीदी अउ स्वच्छता कमांडों मन ल उपहार, मिठई अउ पटाखा भेंट करीन। ओमन किहीन कि स्वच्छता कर्मचारी मन ह समाज के ‘‘स्वच्छता के प्रकाश दीप‘‘ हरय।
देवारी के मउका म स्वास्थ्य मंत्री श्यामबिहारी जायसवाल ह काली मनेन्द्रगढ़-चिरमिरी-भरतपुर जिला के खंडगांव सामुदायिक स्वास्थ्य केन्द्र मरीज अउ उंखर परिवार वाले मन ले भेंट करीन अउ फल-मिठई बांटीन।
उहें, दुरूग के सक्ती नगर शासकीय स्कूल म ‘‘विष्णु के दीया‘‘ कार्यक्रम राखे गीस, जेमा शिक्षा मंत्री गजेन्द्र यादव संघरीन अउ लइका मन संग दीया जलाके पटाखा फोड़के देवारी तिहार मनईन।
अउ अब थोरकुन समाचार सार म –
– भिलाई के छावनी थाना क्षेत्र म पटाखा फोड़े ल लेके होय विवाद म दू झिन मनखे मन ह एक सियान के हत्या कर दीन। पुलिस ह दूनां आरोपी ल गिरफ्तार कर लेहे।
– बस्तर जिला के पंडरीपानी गांव के तीर आज होय सड़क हादसा म एक झिन माईलोगिन के मउत होगे।
– कोरबा जिला म मड़वारानी मंदिर माता दर्सर बर जावत श्रद्धालु मनके गाड़ी पलट गे। ए हादसा म कई झिन लोगन मन ल चोट आय हे। उहें, एक झिन लइका के हालत गंभीर बने हवय। गाड़ी म करीब तीस ले पैंतीस झिन सवार रिहीस।
– उहें, जांजगीर-चांपा जिला के कोटनी सोनारी चौकी क्षेत्र म घलो पटाखा ुफोड़े ल लेके होय विवाद म अज्ञात लोगन मन एक मनखे के हत्या कर दीन।
– दुरूग रेलवे स्टेसन म आज बिहनिया एक मनखे के सव मिले हे। पुलिस ह हत्या के आसंका जताय हे।
अउ
– रायगढ़ जिला के तमनार वन परिक्षेत्र के केराखोल गांव म करेंट लगे ले एक हाथी के मउत होगे हे। ए मामला ल वन विभाग के टीम ह तीन झिन ल गिरफ्तार करे हे।