आज दिनभर के खबर ल अपन गुरतुर छत्तीसगढ़ी भाखा म पढ़व

दीपावली
कार्तिक अमावस्या के दिन मनाय जाने वाला दीया के तिहार देवारी आज छत्तीसगढ़ समेत जम्मों देसभर म बड़ उछाह के संग मनाय जावत हे। ए तिहार अंधकार अउ निरासा ल दूरिहा भगा के लोगन मनके जिनगी म सुख, सांति अउ समृद्धि लाय के तिहार हरय। देवारी के मउका म आज लोगन मन के घर-बार म दीया अउ बिजली के रंग-बिरंगा झालर मनके रोसनी ह जगमगावत हवय। अइसन मान्यता हवय कि लंका म जीत हासिल करे के बाद भगराम राम के    अयोध्या पहुंचे के खुसी म लोगन मन ह दीया बार के उंखर सुवागत करे रिहीन। एखरे सेती ए खुसी म आज के दिन देवारी तिहार मनाय जाथे।
देवारी के मउका म ए बेरा छत्तीसगढ़ के आने-आने शहर अउ गांव मन म लोगन मन लक्ष्मी पूजा के तियारी करत हवय। घर अउ अंगना ल दीया बार के रोसन करे गे हवय। घर के बाहिर सुघ्घर रंगोली घलो बनाय गे हवय, अउ लइका मन ह आतिसबाजी घलो सुरू कर दीन हे।
देवारी के मउका म आज बिहनिया ले लोगन मन खरीददारी करत रिहीन। बाजार म ग्राहक मनके भीड़ देखे ल मिलत हे। लोगन मन मिठाई, पटाखा अउ कपड़ा के संगेसंग मौसमी फल के घलो खरीदी करत हवय। उहें, पूजा बर देवी लक्ष्मी के आकर्षक मूर्ति अउ अपन घर ल सजाय के जिनिस घलो खरीदत हवय। समृध्दि के प्रतीक माने जाय वाला धान के बाली ले बने झालर, याने फाता के मांग घलो रिहीस। ज्योति परब देवारी म लोगन मन ह सोना-चांदी के संगेसंग बर्तन के घलो जम के खरीददारी करत हवय।
राष्ट्रपति द्रौपदी मुर्मू, उप राष्ट्रपति सी.पी. राधाकृष्णन अउ प्रधानमंत्री नरेन्द्र मोदी के संगेसंग छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह देसवासी मन ल देवारी के मउका म अपन बधाई अउ सुभकामना दीन हे।

प्रधानमंत्री-नौसेनाकर्मी दीपावली

प्रधानमंत्री नरेंद्र मोदी ह आज गोवा अउ कारवार तट म आई.एन.एस. विक्रांत म नौसेना के जवान मन संग देवारी तिहार मनाइन। ए मउका म ओमन किहीन कि तीनों सेना के बीच सुघ्घर समन्वय ले आपरेसन सिंदूर के दउरान पाकिस्तान ल घुटना टेके बर मजबूर कर दे रिहीन।
प्रधानमंत्री ह किहीन कि भारत के पहला स्वदेसी विमान वाहक पोत       आई.एन.एस. विक्रांत के सशस्त्र बल के क्षमता ल बताथे। ओमन किहीन कि    आई.एन.एस. विक्रांत सिरिफ एक युध्दपोत नइ हरय, बल्कि एहा इक्कीसवीं सदी के भारत के प्रतिभा, दृढ़संकल्प अउ वैश्विक प्रभाव के प्रमाण हरय। ओमन किहीन कि आई.एन.एस. विक्रांत आत्मनिर्भर भारत अउ मेड इन इंडिया के बड़का प्रतीय हवय।

प्रधानमंत्री-स्वदेशी उत्पाद अपील

प्रधानमंत्री नरेंद्र मोदी ह लोगन मन ले स्वदेसी उत्पाद ल खरीद के तिहार मनाय के आह्वान करीन हवय। श्री मोदी ह लोगन मन ले तिहार म खरीदे गे स्वदेसी उत्पाद ल सोसल मीडिया म साझा करे के बात घलो किहीन, ताकि दूसर लोगन मन घलो स्वदेसी जिनिस खरीदे बर प्रेरित होवय। माई जी.ओ.वी. इंडिया म करे गे एक ठिन पोस्ट के जवाब म श्री मोदी ह लोगन मनले किहीन कि भारत म बने उत्पाद ल खरीदय अउ गर्व ले कहय कि ए जम्मो जिनिस स्वदेसी हवय। प्रधानमंत्री के ए अपील स्थानीय उद्योग अउ उंहा काम करइया मन ल बढ़ावा दे खातिर जारी करे गे राष्ट्रव्यापी अभियान के बीच आइस, जउन ह आत्मनिर्भरता अउ आर्थिक सशक्तिकरण के संदेस देथे। ए पहल के समर्थन म माई जी.ओ.वी. इंडिया ह ‘‘दीपावली मनाएं और स्वदेशी को सशक्त बनाएं‘‘ शीर्षक ले एक ठिन अभियान के सुरूआत करीन हवय, जेमा मनखे मन ले ए तिहार के मउका म सिरिफ स्वदेसी उत्पाद खरीदे के संकल्प ले बर आह्वान करे गे हवय।

नेत्र चिकित्सक-सलाह

इही बीच, आंखी रोग डॉक्टर मन ह देवारी तिहार म पटाखा जलाय के बेरा आंखी के सुरक्षा खातिर बिसेस सावधानी बरते के सलाह दीन हवय। डॉक्टर मन ह खुला मैदान या फेर खुला जघा म पटाखा जलाय बर किहीन हे। पटाखा जलाय के बेरा संग म साफ पानी ल ढकके जरूरी रखय। एखर अलावा रोड उपर अउ अवई-जवई वाला जघा मन म पटाखा झन फोड़य। आतिशबाजी करे के बेरा सादा चश्मा पहिरे संगेसंग पटाखा जलाय बर लंबा डंडी के इस्तेमाल करय। उहें, डॉक्टर मन ह पटाखा जलाय के बेरा लइका मन उपर खास धियान देवय के बात घलो किहीन हे।

जीएसटी सुधार

केंद्र सरकार डहार ले जी.एस.टी. म करे गे सुधार ले छत्तीसगढ़ के लोगन मन ल घलो फायदा पहुंचत हवय। मुंगेली जिला के किसनहा शिव प्रसाद के कहना हे कि ओला नवा ट्रैक्टर के खरीदी म 50 ले 60 हजार रूपिया तक के छूट मिले हवय, जेखर ले ओहा बड़ खुस हवय।
उहें, दुरूग जिला के सुपर्णा डे ह बतइन कि जी.एस.टी. म करे गे सुधार के सेति ओला रोजमर्रा के जिनिस सस्ता दाम म मिलत हवय। ओमन किहीन कि केंद्र सरकार डहार ले तिहार के बीच ले गे ए फइसला काफी फायदेमंद साबित होवत हे।

मुख्यमंत्री-करमा महोत्सव

मुख्यमंत्री विष्णुदेव साय काली जशपुर जिला के कंडोरा गांव म अखिल भारतीय रौतिया समाज विकास परिषद डहार ले आयोजित करे गे ‘‘सोहरई करमा महोत्सव‘‘ म सामिल होइन। ए मउका म ओमन कुनकुरी म 20 लाख रूपिया के लागत ले बने रौतिया समाज के सामुदायिक भवन के लोकार्पण घलो करीन। संगेसंग ग्राम पंचायत कंडोरा म 50 लाख रूपिया के लागत ले बनने वाला रौतिया भवन बनाय खातिर भूमि पूजन करीन। ए मउका म मुख्यमंत्री ह कंडोरा गांव म करमा अखरा बनाय सेति 50 लाख रूपिया अउ रईपुर म रौतिया भवन पहुंचे के रद्दा बर 25 लाख रूपिया देवय के घोसना करीन। ओमन रौतिया समाज के वीर सहीद बख्तर साय अउ मुण्डल सिंह के फोटू उपर फूलमाला चढ़ाके ओमन ल नमन करीन।

कोरिया-वोकल फॉर लोकल

‘वोकल फॉर लोकल‘ अभियान ल साकार करत कोरिया जिला के स्व-सहायता समूह मनके माईलोगिन डहार ले देवारी परब के मउका म तियार करे गे उत्पाद न सिरिफ घर ल रोसन करत हे, बल्कि उंखर आर्थिक स्थिति ल घलो मजबूत बनावत हवय। बैकुंठपुर विकासखंड म ‘उन्नति महिला संकुल संगठन‘ अउ ‘देसभक्ति महिला संकुल संगठन ले जुड़े माईलोगिन मन ह आने-आने रंग ले सजे सुघ्घर मिट्टी के दीया, डिजाइनर दीया, सजावटी झूमर, ‘शुभ-लाभ‘ स्टीकर अउ कतकोन घरेलू सजावट के जिनिस तियार करीन हवय। ए सजावटी उत्पाद ल बेचे खातिर बैकुंठपुर के बाजार म ओमन बिसेस स्टाल घलो लगाय हवय।
मुख्यमंत्री विष्णुदेव साय ह लोगन मन ले देवारी तिहार के मउका म उंहा के रहइया मन डहार ले बनाय गे जिनिस के खरीदी कर ‘वोकल फॉर लोकल‘ अभियान ल मजबूती प्रदान करे के अपील करीन हवय।

जीपीएम-पशु/पक्षी प्रदर्शनी

गौरेला पेंड्रा मरवाही जिला के ग्राम सेमरा म 23 अउ 24 अक्टूबर के जिला स्तरीय पशु-पक्षी प्रदर्सनी अउ प्रतियोगिता के आयोजन करे जाही। पशु चिकित्सा विभाग ह सबो किसान अउ पशु पालक मन ले प्रतियोगिता म सामिल होय के अपील करीन हे। जानबा के मुताबिक 23 अक्टूबर के प्रदर्सनी के उद्घाटन के मउका म किसान मन के संग गोठबात करे जाही। उहें, 24 अक्टूबर के पशु-पक्षी प्रदर्सनी अउ प्रतियोगिता के आयोजन करे जाही।

बटरफ्लाई और मोथ सर्वे

प्रकृति अउ जैव विविधता संरक्षण ल बढ़ावा दे सेति बटरफ्लाई अउ मोथ सर्वे के आयोजन 6 ले 8 नवंबर तक बारनवापारा वन्यजीव अभ्यारण्य म करे जाही। बलौदाबाजार के वन मण्डल अधिकारी धम्मशील गणवीर ह बतइन कि 3 दिन के ए सर्वेक्षण के उद्देस्य तितली अउ पतंगा मनके प्रजाति के पहचान, उंखर प्राकृतिक आवास के अध्ययन अउ आम मनखे मन म जैव विविधता संरक्षण के भावना ल बढ़ावा देना हरय।