राष्ट्रपति द्रौपदी मुर्मु ह धरती आबा म सुघ्घर प्रदर्सन करइया कोरिया जिला ल सम्मानित करे हे। जनजाति कार्यमंत्रालय डहार ले नई दिल्ली के विज्ञान भवन म राखे गे कारीकरम ‘‘राष्ट्रीय कॉन्क्लेव ऑन आदि कर्मयोगी अभियान‘‘ म राष्ट्रपति ह कोरिया जिला के कलेक्टर चंदन त्रिपाठी ल ए सम्मान दीन। ए मउका म केंद्रीय जनजाति कार्यमंत्री जुएल ओराम अउ राज्य मंत्री दुर्गादास उइके घलो मौजूद रिहीन। कारीकरम म प्रमुख सचिव सोनमणि बोरा ल घलो राज्य स्तर म सुघ्घर प्रदर्सन करे खातिर राष्ट्रपति ले सम्मान मिलिस।
‘‘धरती आबा जनजाति ग्राम उत्कर्ष अभियान‘‘ के चलत कोरिया जिला के एक सौ चौव्वन ठिन जनजाति वाले गांव, बैकुंठपुर ब्लाक के एक सौ अड़तीस अउ सोनहत ब्लाक के सोलह ठिन गवई म करीबन अड़तीस हजार जनजातीय परिवार मन ल शासन के कई ठिन योजना मनके लाभ देवाय गीस। सिविर अउ डोर-टू-डोर अभियान के माध्यम ले हितग्राही मन ल आयुष्मान कार्ड, पीएम जनधन योजना, पीएम किसान सम्मान, पीएम उज्जवला, राशन कार्ड, किसान क्रेडिट कार्ड अउ पीएम आवास योजना अउ आने योजना मनले जोड़े गीस।
मुख्यमंत्री विष्णुदेव साय ह ए उपलब्धि उपर खुसीयारी देखावत किहीन कि ए सम्मान ह हमर ओ कर्मयोगी मनके चिन्हारी हे, जउन मन जनजाति सशक्तिकरण ल भुंईया म साकार करीन हे। राज्य सरकार के उद्देस्य हरय कि बस्तर ले सरगुजा तक हरेक जनजाति परिवार ले विकास के मुख्यधारा ले जोड़े जाय अउ ओमन ल हर स्तर म मजबूत करे जाय।
उज्जवला योजना-नये कनेक्शन
केंद्र सरकार प्रधानमंत्री उज्जवला योजना के चलत पच्चीस लाख नवा गैस कनेक्सन देबर प्रक्रिया सुरू कर देहे। छत्तीसगढ़ म दू लाख तेईस हजार नवा घरेलू एलपीजी कनेक्सन दे जाही। ए बारे म खाद्य नागरिक आपूर्ति अउ उपभोक्ता संरक्षण विभाग ह दिसा-निरदेस जारी करे हे, जेखर मुताबिक सबो जिला मन म जिला कलेक्टर के पगरइती म जिला उज्जवला समिति बनाय जाही। ए समिति डहार ले जिला मन म प्रधानमंत्री उज्जवला योजना के क्रियान्वयन अउ मिले आवेदन मनके टाइम भीतरी निराकरण बर रेगुलर मानिटरिंग करे जाही। ए योजना के चलत पात्र परिवार मनले नवा गैस कनेक्सन बर अवइया सात दिन म आवेदन प्राप्त ले जाही। ए प्राप्त आवेदन पत्र मन ल जिला के गैस एजेंसी मन डहार ले परीक्षण अउ सत्यापन कराके पंद्रह दिन भीतरी नवा गैस कनेक्सन जारी करे के कार्रवाई करे जाही।
नियद नेल्लानार योजना के चलत बीजापुर, सुकमा, नारायणपुर, कांकेर अउ दंतेवाड़ा जिला म हितग्राही मन ल चिन्हा पारके ओमन ल प्राथमिकता दे जाही। पात्र हितग्राही मन ल योजना के लाभ देवाय बर नेटवर्क कनेक्टिविटी वाले क्षेत्र मनके चुनई करके बिसेस सिविर राखे जाही।
राष्ट्रीय सम्मेलन
राजधानी रईपुर म अट्ठाईस नवंबर ले तीस नवंबर तक तीन दिन वाले डीजीपी अउ आईजीपी के राष्ट्रीय सम्मेलन राखे जाही। ए सम्मेलन म देस के सबो राज्य के गृह सचिव पुलिस महानिदेसक-डीजीपी अउ पुलिस महानिरीक्षक-आईजीपी मन सामिल होही। ए सम्मेलन ह आईआईएम नवा रईपुर म होही।
राष्ट्रीय स्तर के ए सम्मेलन के तियारी के समीक्षा बर मुख्य सचिव विकास सील ह मंत्रालय म उच्च स्तरीय बइठका लीन, जेमा ओमन अधिकारी मन ल सम्मेलन के सबो तियारी ल बेरा म पूरा करे के निरदेस दीन।
नरक-चौदस
आज नरक चौदस हरय। एला रूपचौदस घलो केहे जाथे। परंपरा मुताबिक नरक चौदस के दिन घरोघर अंगना बाहिर म चउक पुर के चौदह ठिन माटी के दिया जलाय जाथे। रौशनी के ए तिहार म दुकान अउ घर-दुवारी ल बिजली के झालर ले सुघ्घर सजावट करे जात हे।
उहें, काली सुरहुति याने दीया बारे के परब दीपावाली मनाय जाही। सुरहुति ल लेके लोगन मन म भारी उछाह हे। राजधानी रईपुर समेत प्रदेस के सबो सहर अउ कस्बा के बाजार मन म जोरदरहा चहल-पहल अउ रौनक देखे जात हे।
मुख्यमंत्री विष्णुदेव साय ह प्रदेस के रहवइया मन ल सुरहुति तिहार के सुभकामना दीन हे।
जीएसटी-सुधार
केंद्रीय वित्त मंत्री निर्मला सीतारमन ह किहीन हे कि जीएसटी सुधार के कार्यान्वयन लोगन मन ल जादा फायदा पहुंचाय बर केंद्र सरकार अउ जीएसटी परिषद बीच सहयोग ल दर्साथे। ओमन यहू किहीन कि रेट म कमी, प्रक्रिया ल सरल बनाना, स्लैब के संख्या ल चार ले घटाके दू करना अउ वर्गीकरण संबंधी मुद्दा के समाधान समय ले पहिलीच पूरा कर ले गेहे।
सुरक्षा कैम्प-स्थापित
बीजापुर जिला के गांव कांडलापर्ती म नवा सुरक्षा अउ जनसुविधा कैम्प के स्थापना करे गेहे। ‘‘नियद नेल्ला नार‘‘ येजना के चलत ग्रामीण मनके मूलभूत सहुलियत अउ सुरक्षा देवाय खातिर एखर स्थापना करे गेहे। ए कैम्प ह भोपाल पट्टनम ले फरसेगढ़, सेण्ड्रा अउ गढ़चिरौली ल जोड़े म एक ठिन बड़का भूमिका निभाही संगे अवइया बेरा म नेशनल पार्क जघा के गंवई मन ल सड़क अउ आने सहूलियत ले जोड़े म मददगार बनही। उहें, एक कैम्प ले माओवादी नमके अंतर्राज्यीय गतिविधि मन ल कंट्रोल करे जा सकही।
इंहा, ए बतादन कि बछर दू हजार चौबीस ले अब तक बीजापुर जिला म कुल उन्नीस ठिन सुरक्षा कैम्प स्थापित करे गेहे।
सरदार वल्लभभाई पटेल जयंती-कार्यक्रम
देस म राष्ट्रीय एकता ल अउ मजबूत करे बर सरदार वल्लभभाई पटेल के जयंती के मउका म दू महिना तक कई ठिन कारीकरम राखे जाही। ए जानकारी केंद्रीय ऊर्जा मंत्री मनोहर लाल ह करनाल म एक ठिन प्रेसवार्ता बेरा दीन। ओमन बतइन कि इकतीस अक्टूबर के राष्ट्रीय एकता दिवस मनाय जाही। एखर बाद इकतीस दिसंबर तक राष्ट्रीय एकता ले जुड़े कई ठिन कारीकरम राखे जाही। जेमा सेमीनार प्रदर्सनी अउ साहित्य वितरण सामिल हे। ओमन बतइन कि ए कारीकरम बर माय भारत पोर्टल म जवान लइका मनके पंजीकरण घलो होवत हे।
सरस मेला
रईपुर के साइंस कॉलेज मैदान म आठ ले अट्ठारह अक्टूबर तक सरस मेला राखे गे रिहीस। ए मेला म देसभर के सत्रह ठिन राज्य मनके स्व-सहायता समूह के माईलोगिन मन भाग लीन। एखर संगे छत्तीसगढ़ के सबो जिला मन ले आय स्व-सहायता समूह डहार ले तियार करे गे हस्तसिल्प हैण्डलूम कपड़ा, जैविक उत्पाद, पारंपरिक पकवान, घर म बउरे के जिनिस समेत आने प्रोडक्ट मनके दू सौ ले जादा स्टाल के माध्यम ले प्रदर्सनी लगाके जिनिस बेचे गीस।
पंचायत अउ ग्रामीण विकास विभाग के चलत राष्ट्रीय ग्रामीण आजीविका मिसन डहार ले ए आयोजन म गवई जघा के माईलोगिन मनके उद्यमिता ल एक ठिन मंच देके काम करे गीस।
अउ अब थोरकुन समाचार सार म –
– जांजगीर-चांपा पुलिस ह निवेश याने पइसा लगाय के नांव म छै करोड़ रूपिया के ठगी मामला म दू झिन आरोपी मन ल गिरफ्तार करे हे।
– इही जिला के करमंदी गांव म नरवा म बूड़े ले एक झिन जवान लइका के मउत होगे, फेर शिवरीनारायण पुलिस ह मामला के जांच करत हे।
– इही, बीच जांजगीर-चांपा जिलाच के सदर बाजार क्षेत्र म झालर लगात बेरा करंट लगे ले एक झिन मनखे के मउत होगे।
– गौरेला-पेण्ड्रा-मरवाही जिला के गांव सेमरा म तेईस अउ चौबीस अक्टूबर के जिला स्तरीय पशु-पक्षी प्रदर्सनी अउ प्रतियोगिता राखे जाही।