बारिश-01
प्रदेस म पाछु तीन दिन ले सरलग होवत बरसा ले आम लोगन मन परेसान होगे हे। कतकोन नदियां-नरवा पूरा आ गे हे। त उहें, अब्बड़ अकन गांव के सड़क संपर्क घलो जिला मुख्यालय ले टूट गेहे।
बेमेतरा जिला के सूरी नदी म रद्दा के उपर पानी आय ले दुरूग-बेमेतरा रद्दा बंद होगे हे। जिला के सीमा ले लगे कतकोन छोटे-बड़े नंदियां मन म बाढ़ आ गेहे।
त ओति राजनांदगांव जिला म बरसा ले इहां के नंदियां-नरवा म घलो रद्दा ले उपर पानी चलत हे। खैरागढ़-दुरूग रद्दा बंद होगे हे। जिला के सबले बड़का मोंगरा बैराज म पानी के आवक बाढ़े ले दस ठिन गेट ल खोल दे गेहे।
उहें, दुरूग जिला म घलो सरलग बरसा ले नंदियां के तीर लगे गांव मन म बाढ़ आ गेहे। शिवनाथ, आमनेर अउ खारून नंदियां के तीर बसे गांव मन म हाईअलर्ट जारी करके जम्मों स्कूल अउ सरकारी भवन मन म राहत सिविर बनाय गेहे। महमरा एनीकट ले करीबन नौ फीट उपर पानी बोहावत हे। धमधा-बोरी म बने पुलिया ले उपर पानी चले के सेती सात ठिन गांव के सड़क संपर्क टूट गेहे।
ऐति, कबीरधाम जिला म सरलग बरसा के सेती जबलपुर-रायपुर राष्ट्रीय राजमार्ग म अवई-जवई रूक गेहे। जिला के क्षीरपानी अउ सरोना बांधा म जादा पानी भरे के सेती ए बांधा के गेट ल खोल दे गेहे।
असइने, गरियाबंद जिला म स्थित पैरी अउ सौंढूर नंदियां म घलो जोरदरहा पानी बाढ़े हे। करीबन बारह ठिन गांव के जिला मुख्यालय ले सड़क संपर्क टूट गेहे। सिकासेर बांध म क्षमता ले जादा पानी होय के सेती बांध के सोलह ठिन गेट ल खोल दे गेहे। गरियाबंद-छुरा रद्दा म घलो अवई-जवई बंद होगे हे।
त ऐति, राजिम के त्रिवेणी संगम म आय बाढ़ ले कतकोन गांव प्रभावित होय हे। कुलेश्वर महादेव मंदिर के चबूतरा तक पानी पहुंच गेहे।
बारिश-02
ओति, कोरबा जिला के रामपुर विधानसभा क्षेत्र के कुदमुरा-श्यांग रद्दा म स्थित मांड नंदियां म बाढ़ आय ले कतकोन गांव परभावित होय हे।
त उहें, रायगढ़ जिला खरसिया के तीर स्थित एडु पुल के उपर ले पानी चले के सेती अवई-जवई परभावित होय हे। संगेसंग रायगढ़, सारंगढ़ अउ रायगढ़-सरिया रद्दा म घलो अवई-जवई बंद होगे हे।
ऐति, बिलासपुर जिला म सरलग होवत बरसा ले लीलागर नंदियां म बाढ़ आ गेहे। कई ठिन गांव टापू बन गेहे। ए जिला के कोरबा, रईपुर मंुगेली अउ शिवरीनारायण ले सड़क संपर्क टूट गेहे। त उहें, विकासखंड मुख्यालय मस्तूरी म जनपद पंचायत के संगेसंग कतकोन आफिस मन म पानी घुस गेहे, जेखर सेती कामकाज नइ हो पात हे।
त जांजगीर-चांपा जिला म बरसा के सेती जिला के बनारी स्थित कांजी नाला अउ चांपा के जोखना नरवा म पुलिया के उपर ले पानी चलत हे। उहें, शिवरीनारायण अउ चंद्रपुर म महानदी खतरा के निसान ले पूरा चलत हे। सबरी सेतु के उपर पानी आय के बाद बिलासपुर, बलौदाबाजार अउ रायगढ़ रद्दा बंद होगे हे। संगेसंग घुण्डी नरवा म पुल के उपर ले छह फीट पानी चलत हे, जेखर सेती राष्ट्रीय राजमार्ग उनचास म करीबन दस किलोमीटर लंबा जाम लग गेहे।
त ऐति, धमतरी जिला के चारों बांध गंगरेल, दुधावा, सोंढूर अउ माॅडम सिल्ली म पानी के आवक सरलग बाढ़त हे।
ओति, सरगुजा जिला म अंबिकापुर ले बतौली के बीच मंगरी म बनाय गे डायवर्सन पुलिया के बोहाय ले अवई-जवई परभावित होय हे।
उहें, रईपुर जिला म घलो बरसा ले नंदियां-नरवां रद्दा ले उपर चलत हे। कतकोन गांव म पानी घुस गेहे। राजधानी रईपुर के पुलिस लाईन के अब्बड़ अकन घर म तीन ले पांच फीट पानी भर गेहे।
ऐति, मौसम विभाग ह अवइया चैबीस घंटा के दउरान प्रदेस के एक-दू जघा म भारी बरसा के संगेसंग गाज गिरे के चेतावनी देहे।
विधानसभा-प्रश्नकाल/ध्यानाकर्षण
राज्य विधानसभा के मानसून सत्र के आज आखिरी दिन हरय। चार दिन तक चले ए सत्र के दउरान काली चालू वित्तीय बछर के पहिली अनुपूरक बजट पारित करे गीस। उहें, आज सरकार डहार ले पेस करे गे आने-आने संसोधन विधेयक उपर गोठबात के बाद पारित कराय के कार्यवाही सदन में चलत हे।
आज प्रश्नकाल के दउरान कृषि मंत्री रविन्द्र चैबे ह नेता प्रतिपक्ष धरमलाल कौशिक के एक ठिन प्रश्न के उत्तर म बतईन कि बीज निगम डहार ले किसान मन ल बांटे गे धान के सवर्णा किसम अउ आने धान के बीजा सही नइ पाय के सिकईत सरकार ल नइ मिले हे।
उहें, एक ठिन आने प्रश्न के उत्तर म कृषि मंत्री ह बतईन कि प्रधानमंत्री किसान सम्मान निधि के तहत छत्तीसगढ़ ले करीबन बत्तीस लाख किसान पंजीकृत हवय। एमा ले सिरिफ दू लाख चालीस हजार किसान मन ल ए योजना के तहत पांचवां अउ आखिरी किश्त मिले हे।
आज एक ठिन ध्यानाकर्षण सूचना के माध्यम ले नेता प्रतिपक्ष धरमलाल कौशिक अउ तीन झिन आने भाजपा सदस्य मन ह धमतरी जिला के जोरातराई रेती खदान के तीर रेती माफिया डहार ले कथित रूप ले एक झिन जिला पंचायत सदस्य के संग मारपीट के घटना के मामला उठाईन।
जवाब म गृह मंत्री ह बतईन कि पुलिस ह मारपीट करइया ग्यारह झिन आरोपी मन ल गिरफ्तार करे हे।
विधानसभा-नया भवन
छत्तीसगढ़ के नवा विधानसभा भवन के काली भूमिपूजन होही। ए नवा भवन नया रायपुर के अटल नगर म बनाय जाही। ए मउका म विधानसभा अध्यक्ष, मुख्यमंत्री, नेता प्रतिपक्ष, अउ संसदीय कार्य मंत्री के संगेसंग पक्ष अउ विपक्ष के कतकोन विधायक सामिल होही।
कारीकरम म कांग्रेस अध्यक्ष सोनिया गांधी अउ राहुल गांधी ह वीडियो कान्फ्रेंसिंग के माध्यम ले सामिल होही।
ऐति, आज विधानसभा परिसर म विधानसभा के सोध पत्रिका – विधायन अउ विधानसभा उपर केन्द्रित वृत्त चित्र के विमोचन करे गीस।
कोरोना मरीज
प्रदेस म कोरोना संक्रमित मरीज के संख्या सरलग बाढ़त हे। राजनांदगांव के महापौर हेमा देशमुख अउ उंखर बेटा के कोरोना जांच रिपोर्ट पाॅजिटिव आय हे।
उहें, दुरूग जिला म आज एके परिवार के सात झिन सदस्य के संगेसंग पच्चीस झिन नवा कोरोना संक्रमित मरीज के पुष्टि होय हे। संगेसंग उतई थाना ले एक झिन सी.आई.एस.एफ. के जवान घलो संक्रमित पाय गेहे।
ओति, बस्तर जिला म आज बाईस झिन नवा कोरोना पाॅजिटिव मरीज मिले हे।
ऐति, महासमुंद जिला के अपर कलेक्टर के संगेसंग दू झिन लोगन के कोरोना जांच रिर्पार्ट पाॅजिटिव आय हे। जिला म कोरोना के बाढ़त संक्रमण ल देखत चेम्बर आॅफ काॅमर्स ह जरूरी सेवा ल छोड़के आज ले तीन दिन के संपूर्ण लाॅकडाउन के घोषणा करे हे।
त उहें, बिलासपुर जिला म पाछु अड़तालीस घंटा के दउरान कोरोना संक्रमण ले तीन झिन लोगन के मउत होगे।
कोरोना-जानकारी
राज्य सरकार ह प्रदेस के जम्मों प्राईवेट लैब अउ अस्पताल मन ल उहां अवइया कोरोना के संभावित मरीज अउ कोरोना संक्रमित मरीज मनके के जानकारी राज्य सर्विलेंस इकाई अउ जिला के मुख्य चिकित्सा स्वास्थ्य अधिकारी या आईडीएसपी के साखा ल देना जरूरी हे। ए बारे म स्वास्थ्य विभाग ह आदेस जारी कर देहे।
मवेशी-मौत
महासमुंद जिला के गांव लभराखुर्द म अस्थायी रूप ले बनाय गे एक ठिन गौठान म पन्द्रह ठिन मवेसी के मउत होगे हे। उहें, सात ठिन आने मवेसी के हालत गंभीर बताय जात हे। पशु विभाग के वरिष्ठ अधिकारी अउ पुश चिकित्सक ह मउका म पहुंच के जांच करत हे।
हमर संवाददाता ले मिले जानबा के मुताबिक गांव लभराखुर्द म तार के घेरा बनाके एक ठिन अस्थायी गौठान बनाय गेहे, जिहां करीबन सौ मवेसी मन ल राखे गे रिहीस। पाछु रतिहा एमा ले पन्द्रह ठिन मवेसी के मउत होगे। सुरूवाती रिपोर्ट म बताय गेहे कि ए मवेसी मनके मउत भूख अउ जाड़ ले होय हे। ए मामला म जनपद पंचायत के सीईओ ह गांव के सरपंच अउ सचिव ल नोटिस जारी करके जवाब मांगे हे।
निजीकरण-विरोध
ट्रेड यूनियन के संयुक्त मंच ह नगरनार म बनत इस्पात संयंत्र ल प्राईवेट के हाथ म देके विरोध करत केन्द्र सरकार ल एला रोके के मांग करे हे।
इंटक, एटक, सीटू के संगेसंग आने श्रमिक अउ करमचारी संगठन मन ह एक ठिन संयुक्त विज्ञप्ति जारी करके केहे हे कि आदिवासी मनके भूईंया म बने नगरनार स्टील प्लांट ल केन्द्र सरकार डहार ले एन.एम.डी.सी. के बजाय निजी हाथ म सौंपे के कोनों भी परयास के विरोध करे जाही।
मनरेगा-भुगतान
प्रदेस म महात्मा गांधी राष्ट्रीय ग्रामीण रोजगार गारंटी योजना-मनरेगा के काम म लगे श्रमिक मनके मजूरी भुगतान बर संतानवे प्रतिसत फंड ट्रांसफर आॅर्डर-एफटीओ बेरा म जारी होवत हे। ए मामला म महासमुंद जिला ह सबले आगू हे। इहां अब तक निन्यानवे दशमलव तीन नौ प्रतिशत फंड तय बेरा म जारी करे गेहे।
पंचायत अउ ग्रामीण विकास मंत्री ह मजदूरी भुगतान स्थिति के सरलग माॅनिटरिंग करत हे।
नीति आयोग-सराहना
नीति आयोग ह छत्तीसगढ़ के माओवाद प्रभावित आदिवासी बहुल आकांक्षी जिला – नारायणपुर म चलत ‘‘पढ़ई तुंहर दुआर‘‘ योजना के प्रसंसा करे हे। ए योजना के तहत जिला म सामुदायिक भवन अउ घर के बरामदा म कोरोना संक्रमण ले बचाव के दिसा-निरदेस के पालन करत लइका मन ल पढ़ाय जात हे। नीति आयोग ह कोरोना काल म ‘‘पढ़ई तुंहर दुआर‘‘ योजना म लइका मन ल पढ़ाय के प्रसंसा करत ट्वीट करे हे।
असइने, नीति आयोग ह कोरोना संक्रमण ले बचाव बर बस्तर म युवा वाॅलिटिंयर्स मन डहार ले करे गे कामकाज के प्रसंसा करे हे।