छत्तीसगढ़ म आज एक सौ सत्तर माओवादी मन ह आत्मसमर्पण करे हे। केन्द्रीय गृहमंत्री ह अपन सोशल मीडिया प्लेटफॉर्म ‘‘एक्स‘‘ म ए जानकारी देवत बतईन कि काली घलो छत्तीसगढ़ म सत्ताईस माओवादी मन ह हाथियार डारे रिहीस। उहें, महाराष्ट्र म घलो इकसठ नक्सली हथियार छोड़के मुख्यधारा म लहुटे हे। केन्द्रीय गृहमंत्री ह बतईन कि पाछु दू दिन म कुल दू सौ अंठावन वामपंथी उग्रवादी मन ह हिंसा के रद्दा छोड़े हे। श्री शाह ह कहिन कि हिंसा छोड़के भारत के संविधान म अपन विश्वास पुर्नस्थापित करे बर ए माओवादी मनके फइसला के मैं सराहना करत हव। ओमन कहिन कि प्रधानमंत्री नरेन्द्र मोदी के अगुवई म सरकार के निरंतर कोसिस के ए परिणाम हे कि नक्सलवाद आखिरी सांस लेवत हे। श्री शाह ह किहीन कि नक्सली मनके विरूद्ध हमर नीति स्पष्ट हे। जउन आत्मसमर्पण करना चाहत हे, उंखर स्वागत हे, फेर जउन मन ह हथियार उठाय रइही, ओमन ल हमर सुरक्षा बल के कठोर कार्रवाई के सामान करे बर पड़ही। ओमन ह किहिन कि जम्मों नक्सली मन ले मोर अपील हे कि ओमन अपन हथियार त्याग देवय अउ मुख्यधारा म लहुट आय।
केन्द्रीय गृहमंत्री ह किहीन कि ए खुसी के बात आय हे कि ए बेरा आतंक के गढ़ रिहीस छत्तीसगढ़ के अबूझमाड़ अउ उत्तर बस्तर ल आज नक्सली हिंसा ले पूरा तरह मुक्त घोषित कर दे गेहे। अब छिटपुट नक्सली सिरिफ दक्षिण बस्तर म बाचे हे, जउन मन ल हमर सुरक्षा बल जल्दीच खतम कर दीहीं। ओमन ह किहीन कि जनवरी दू हजार चौबीस म छत्तीसगढ़ म भाजपा सरकार बने के बाद इक्कीस सौ नक्सली मन ह आत्मसमर्पण करे हे। एक हजार सात सौ पच्यासी मन ल गिरफ्तार करे गेहे अउ चार सौ ससत्तर मन ल न्यूट्रीलाइज करे गेहे। श्री शाह किहीन कि ए ह मार्च दू हजार छब्बीस ले पहिली नक्सलवाद ल जड़ ले खतम करे के हमर दृढ़ संकल्प हे।
प्रधानमंत्री जन आरोग्य योजना-पुरस्कार
प्रधानमंत्री जन आरोग्य योजना के तहत सुघ्घर काम करे के दिसा म करे गे कोसिस बर छत्तीसगढ़ ल ‘‘सर्वश्रेष्ठ प्रदर्शन करइया राज्य‘‘ घोषित करे गेहे। काली भोपाल म राखे गे एनएचए कॉन्क्लेव के दउरान राष्ट्रीय स्वास्थ्य प्राधिकरण के सीईओ सुनील कुमार बर्नवाल ह राज्य नोडल एजेंसी के मुख्य कार्यपालन अधिकारी डॉक्टर प्रियंका शुक्ला अउ प्रोजेक्ट डायरेक्टर धर्मेन्द्र गहवाई ल ए सम्मान दीन। ए उपलब्धि राज्य नोडल एजेंसी डहार ले स्वास्थ्य सेवा म पारदर्सिता, दक्षता अउ जवाबदेही ल सुदृढ़ करे बर करे गे पहल के परिणाम हरय।
स्वास्थ्य मंत्री श्याम बिहारी जायसवाल ह प्रदेस ल मिले ए पुरस्कार बर स्वास्थ्य विभाग के अधिकारी मन ल बधाई देवत किहीन हे कि प्रधानमंत्री जन आरोग्य योजना ल जम्मों जिला के समीक्षा बइठका के प्रमुख एजेंडा म सामिल करे गेहे।
जशपुर-एग्रीस्टैक परियोजना
जशपुर जिला के जम्मों तहसील म एग्रीस्टैक परियोजना के तहत डिजिटल क्रॉप सर्वे के काम पूरा कर ले गेहे। जिला के सात सौ चवालीस गांव के चार लाख ले जादा खसरा मन म डीसीएस के माध्यम ले अउ बाचे खसरा म मैन्युअल गिरदावरी करके फसल मनके ऑनलाइन प्रविष्टि करे गेहे। एखर ले मिले डाटा के उपयोग राज्य सरकार धान खरीदी समेत आने-आने कृषि योजना म करही।
राजस्व विभाग के वेबसाइट अउ भुईयां पोर्टल के माध्यम ले किसान अपन गांव के मैन्युअल गिरदावरी डाटा देख सकत हे। फेर कहू किसान ल डीसीएस या मैन्युअल गिरदावरी के डाटा म गलती दिखाई देवत हे, त ओमन संबंधित तहसीलदार के आगू लिखित आवेदन देके दावा-आपत्ति पेस कर सकत हे। मिले सिकायत मनके तुरते निराकरण करे जाही।
व्यापमं-परीक्षा कैलेंडर
छत्तीसगढ़ व्यावसायिक परीक्षा मंडल-व्यापमं ह अवइया बछर राखे आने-आने परीक्षा के कैलेंडर जारी कर देहे। एमा भर्ती अउ प्रवेश परीक्षा सामिल हवय। परीक्षा कैलेंडर म अप्रैल दू हजार छब्बीस ले दिसंबर दू हजार छब्बीस तक होवइया इकतीस ले जादा परीक्षा के संभावित तारीख घोषित करे गेहे। कैलेंडर के मुताबिक पीईटी, पीपीटी अउ पीवीपीटी के परीक्षा मई अउ जून महीना म होही। उहें, प्री-डीएलएड, प्री-बीएड अउ एमएससी नर्सिंग के प्रवेश परीक्षा चार, ग्यारह अउ चौदह जून के आयोजित करे जाही। एखर संगेसंग संचालनालय स्वास्थ्य सेवा के फार्मेसिस्ट ग्रेड-टू अउ तकनीकी शिक्षा पीईटी बर बारह अप्रैल अउ चौदह मई के परीक्षा होही। अइसने, पुलिस विभाग म सहायक उप निरीक्षक बर बारह जुलाई, जल संसाधन विभाग म अनुदेशक पद बर दू अगस्त अउ नगर सेना बर फायरमैन अउ स्टोरकीपर के भर्ती परीक्षा उन्नीस अउ पच्चीस अक्टूबर के होही।
प्रधानमंत्री प्रवास-तैयारी शुरू
प्रधानमंत्री नरेन्द्र मोदी के छत्तीसगढ़ प्रवास ल लेके अपर मुख्य सचिव मनोज पिंगुआ ह काली नवा रायपुर स्थित राज्योत्सव स्थल के जायजा लीन अउ तैयारी के समीक्षा करीन। श्री पिंगुआ ह बतईन कि प्रधानमंत्री श्री मोदी ह इकतीस अक्टूबर के रतिहा रायपुर पहुंचही। ओमन एक नवंबर के छत्तीसगढ़ रजत महोत्सव के सुभारंभ करही। एखर संगेसंग श्री मोदी ह शहीद वीरनारायण सिंह जनजातीय संग्रहालय, छत्तीसगढ़ विधानसभा के नवनिर्मित भवन अउ प्रजापिता ब्रम्हकुमारी ईश्वरीय विश्वविद्यालय के ट्रेनिंग सेंटर एकेडमी फॉर ए पीसफुल वर्ल्ड ‘‘शांति शिखर‘‘ के सुभारंभ करही। अपन प्रवास के दउरान प्रधानमंत्री ह सत्य सांई अस्पताल म ह्दय के ऑपरेसन करवइया लइका मन ले गोठबात घलो करही।
एम्स-विश्व मानसिक स्वास्थ्य सप्ताह
अखिल भारतीय आयुर्विज्ञान संस्थान-एम्स रायपुर डहार ले विश्व मानसिक स्वास्थ्य सप्ताह के आयोजन करे गीस। ए कार्यक्रम के उद्देश्य समाज के जम्मों वर्ग म भावनात्मक स्वास्थ्य, तनाव प्रबंधन अउ मानसिक स्वास्थ्य देखभाल के महत्व ल बढ़ावा देना रिहीस हे। ए बछर के बिसय ‘‘मानसिक स्वास्थ्य एक सार्वभौमिक मानव अधिकार‘‘ रिहीस। ए दउरान मनोरोग विभाग डहर ले एम्स परिसर म जागरूकता अउ आउटरीच कार्यक्रम के आयोजन करे गीस। विशेषज्ञ डॉक्टर मन ह तनाव प्रबंधन, माइंडफुलनेस, भावनात्मक संतुलन अउ स्वस्थ संवाद उपर गोठबात करीन। ए कार्यक्रम म नंदनवन स्थित वृद्धाश्रम के पचास बड़का नागरिक अउ स्कूली लइका मन ह भाग लीन।
विकसित भारत क्विज
केन्द्रीय युवा कार्यक्रम अउ खेल मंत्रालय ह विकसित भारत युवा नेता संवाद क्विज के आखिरी तारीख इकतीस अक्टूबर तक बढ़ा देहे। मंत्रालय ह बतईन हे कि माई भारत पोर्टल के माध्यम ले बीस लाख ले जादा युवा प्रतिभागी ए प्रश्नोत्तरी म भाग ले चुके हे। मंत्रालय ह यहू बतईन हे कि देस के युवा मनके सकारात्मक प्रतिक्रिया ल देखत तारीख ल बढ़ाय गेहे।
महिला फुटबॉल प्रतियोगिता
नारायणपुर के रामकृष्ण मिशन आश्रम म खेले जावत तीसवां सीनियर महिला राष्ट्रीय फुटबॉल चैंपियनशिप के खिताब मणिपुर की टीम ह जीत लेहे। फाइनल मुकाबला म मणिपुर ह पश्चिम बंगाल के टीम ल शून्य के मुकाबला एक गोल ले पराजित करीस। समापन कार्यक्रम म कलेक्टर प्रतिष्ठा ममगाई ह विजेता टीम मन ल पुरस्कार दीन। ए प्रतियोगिता म छत्तीसगढ़ समेत देशभर के दस राज्य के टीम मन ह भाग लीन।
अउ अब थोरकुन समाचार सार म –
– छत्तीसगढ़ विधानसभा के पूर्व उपाध्यक्ष अउ भाजपा के वरिष्ठ नेता बनवारीलाल अग्रवाल के आज निधन होगे हे। उंखर निधन म विधानसभा अध्यक्ष डॉक्टर रमन सिंह समेत भाजपा नेता मन ह दुख जताय हे।
– प्रदेस म शीघ्रलेखन (स्टेनोग्राफर) अउ मुद्रलेखन (टाईपिंग) कम्प्यूटर कौशल परीक्षा बर तीस अक्टूबर तक ऑनलाइन आवेदन करे जा सकथे।
अउ
– दुरूग जिला म कलेक्ट्रेट चउक के आगू पाछु रतिहा नगर निगम के गाड़ी के चपेट म आय ले दुपहिया गाड़ी म बइठे एक युवक-युवती के मउकाच म मउत होगे। उहें, एक झिन माईलोगिन गंभीर रूप ले घायल हे।