सुकमा जिला म आज सत्ताईस झिन माओवादी मन ह आत्मसमर्पण करे हे। एमा दस झिन महिला माओवादी मन घलो सामिल हे। आत्मसमर्पण करइया सोलह झिन माओवादी मन उपर पचास लाख रूपिया के इनाम घोषित रिहीस।
उहें, कोंडागांव जिला म घलो पांच लाख रूपिया के एक झिन इनामी महिला माओवादी गीता उर्फ कमली सलाम ह आत्मसमर्पण करे हे।
आत्मसमर्पण करइया ए सबो माओवादी मन ल राज्य सरकार के नवा पुनर्वास नीति के चलत पचास-पचास हजार रूपिया के प्रोत्साहन रासि दे जाही।
इही बीच, खबर मिले हे कि कांकेर जिला के कामतेड़ा बीएसएफ कैम्प म घलो पचास माओवादी मन ह आत्मसमर्पण करे हे।
यूनिटी मार्च-पत्रकारवार्ता
लौह पुरूष सरदार वल्लभभाई पटेल के जयंती म होवइया कार्यक्रम ‘‘सरदार एट द रेट एक सौ पचास यूनिटी मार्च‘‘ ल लेके उपमुख्यमंत्री अरूण साव ह आज रायपुर म पत्रकार मन ले गोठ करीन। ए बेरा म श्री साव ह आयोजन के बारे म बतईन अउ युवा मन ले एमा भाग ले बर किहीन हे। ओमन ह बतईन कि ए यूनिटी मार्च ह दू चरण म होही। पहिली चरण म इकतीस अक्टूबर ले पच्चीस नवंबर तक सबो जिला म तीन दिन तक आठ ले दस किलोमीटर तक के पदयात्रा निकाले जाही। एखर ले पहिली स्कूल अउ कालेज म निबंध प्रतियोगिता, वाद-विवाद, सरदार पटेल के जीवन म संगोष्ठी अउ नुक्कड़ नाटक जइसे गतिविधि होही। ए पदयात्रा के नेतृत्व राज्य कैबिनेट मंत्री, सांसद मनके संग माई भारत अउ एनएसएस अधिकारी मन करही। श्री साव ह बतईन कि ए अभियान ह छह दिसंबर तक चलही। इच्छुक युवा मन ह ए राष्ट्रव्यापी अभियान म भाग ले बर माई भारत पोर्टल म अपन पंजीकरण कर सकत हे।
छत्तीसगढ़ झांकी-चयन
इकतीस अक्टूबर के राष्ट्रीय एकता दिवस म गुजरात के एकता नगर के स्टैच्यू ऑफ यूनिटी म होवइया एकता परेड म छत्तीसगढ़ के झांकी के चयन करे गेहे। ए झांकी ह बस्तर के बदलत पहिचान अउ विकास यात्रा म केन्द्रित होही। ए झांकी के माध्यम ले बस्तर म होवत बदलाव के संगेसंग संघर्ष ले विकास कोति अउ डर ले विश्वास कोति जाय के संदेस दे जाही। ए जानकारी ल केन्द्रीय गृह मंत्रालय कोति ले जारी करे गे सूची म दे गेहे, जेमा छत्तीसगढ़ के संगेसंग जम्मू-कश्मीर, महाराष्ट्र, गुजरात, मणिपुर, उत्तराखंड, पुडुचेरी, अंडमान-निकोबार द्विप समूह, एनडीआरएफ अउ एनएसजी के झांकी मन ह घलो सामिल होही। एकता परेड म प्रधानमंत्री नरेन्द्र मोदी अउ केन्द्रीय गृह मंत्री अमित शाह ह घलो ए कार्यक्रम म रइही अउ ए सबो झांकी ल देखही।
ए उपलब्धि म मुख्यमंत्री विष्णुदेव साय ह राज्य के जनसंपर्क विभाग के टीम ल बधाई दीन हे। ओमन ह कहिन कि हे कि ए चयन ह छत्तीसगढ़ के सांस्कृतिक विविधता, लोक परंपरा अउ एकता के भाव के राष्ट्रीय स्तर म पहिचान हे। श्री साय ह किहीन कि ए झांकी ह न सिरिफ बस्तर के सांस्कृतिक आत्मा ल देखाही, बल्कि छत्तीसगढ़ के विकास, एकता अउ लोक गौरव के झलक ल घलो पेस करही।
बस्तर-वन विज्ञान केन्द्र
बस्तर वनमंडल के आसना म राज्य के पहिली वन विज्ञान केन्द्र के स्थापना करे जाही। भारत सरकार के राष्ट्रीय कैम्पा मिशन कोति ले एखर स्वीकृति मिल गेहे। वन विज्ञान केन्द्र के संचालन, प्रशिक्षण अउ पाठ्यक्रम के निर्धारण बर जगदलपुर के मुख्य वन संरक्षक के अध्यक्षता म प्रदेस स्तरीय सलाहकार समिति के गठन करे गेहे। ए समिति म आठ विषय-विशेषज्ञ मन ल घलो सामिल करे गेहे।
जानबा के अनुसार राष्ट्रीय कैम्पा के तेईसवां क्रियान्वयन समिति के बैठक म सुरूआती रूप म छत्तीसगढ़ समेत झारखंड, ओड़िशा, महाराष्ट्र, उत्तराखंड अउ मध्यप्रदेश म एक-एक वन विज्ञान केन्द्र सुरू करे के फइसला ले गेहे।
नर्सिंग महाविद्यालय-प्रवेश तिथि
प्रदेश के नर्सिंग महाविद्यालय म प्रवेश बर ऑनलाइन आवेदन करे के आखिरी तारीख ल बढ़ाके सत्रह अक्टूबर कर दे गेहे। काउंसलिंग समिति के अध्यक्ष ह एखर बारे म सूचना देहे। एसो काउंसलिंग ले बीएससी नर्सिंग, एमएससी नर्सिंग, पोस्ट बेसिक बीएससी नर्सिंग अउ पोस्ट बेसिक डिप्लोमा इन साईकियाट्रिक नर्सिंग पाठ्यक्रम म प्रवेश दे जाही। काउंसलिंग, आवंटन अउ प्रवेश संबंधी सबो जानकारी चिकित्सा शिक्षा संचालनालय के वेबसाइट म देखे जा सकत हे।
तंबाकू मुक्त युवा अभियान
केन्द्र सरकार कोति ले नौ अक्टूबर ले ‘‘तंबाकू मुक्त युवा अभियान थ्री प्वाइंट ओ‘‘ के सुभारंभ करे गेहे। ए अभियान के उद्देश्य लइका अउ युवा मन ल तंबाकू अउ नशा के लत हे दूर रखना, ओमन ल स्वस्थ जीवन बर प्रेरित करना अउ जउन मन ह तंबाकू छोड़ना चाहत हे, ओखर मनके मदद करना हवय।
स्कूल शिक्षा, उच्च शिक्षा अउ लोक स्वास्थ्य अउ परिवार कल्याण विभाग कोति ले छत्तीसगढ़ के सबो जिला म ‘‘तंबाकू और नशा मुक्त स्कूल-कॉलेज अभियान‘‘ चलाय के निरदेस जारी करे गेहे। ए अभियान के चलत हरेक जिला ल ए सुनिश्चित करना हे कि उंखर अधिकार क्षेत्र के सबो शिक्षण संस्थान तंबाकू मुक्त शैक्षणिक संस्थान के मानक ल अपनावय। एखर बर स्कूल अउ कालेज म जागरूकता अभियान, छात्र परामर्श सत्र, एनएसएस-एनसीसी स्वयंसेवक के प्रशिक्षण अउ तंबाकू के दुष्पप्रभाव ले लेके प्रतियोगिता करे जाही।
बस्तर ओलंपिक-पंजीयन
उपमुख्यमंत्री अउ खेल मंत्री अरूण साव ह नवा रायपुर म वीडियो कॉन्फ्रेसिंग ले बस्तर ओलंपिक के तैयारी के समीक्षा करीन। ए बइठका म विभागीय अधिकारी अउ बस्तर संभाग के सबो जिला के खेल अधिकारी मन सामिल होइन। ए बेरा म श्री साव ह बस्तर ओलंपिक के विकासखंड स्तरीय आयोजन म विशेष ध्यान देके निरदेस दीन। ओमन ह खेल मैदान के उपलब्धता, ओखर मैपिंग, भोजन, यातायात, आवास, प्राथमिक चिकित्सा, निर्णायक अउ रेफरी के व्यवस्था बर तैयारी करे बर कहिन हे। बस्तर ओलंपिक बर अभू तक दू लाख बहत्तर हजार खिलाड़ी मन ह पंजीयन कराय हे, जेखर आखिरी तारीख बीस अक्टूबर हवय। एखर चलत विकासखंड स्तरीय प्रतियोगिता पच्चीस अक्टूबर ले सुरू हो जही, जउन कि पांच नवंबर तक चलही।
गोवर्धन पूजा-अवकाश
राज्य शासन ह गोवर्धन पूजा परब बर इक्कीस अक्टूबर के राज्य म सार्वजनिक अवकाश के घोषणा करे हे। ए छुट्टी ह राज्य के सबो सासकीय कार्यालय अउ बैंक म रइही। एखर बारे म सामान्य प्रशासन विभाग कोति ले अधिसूचना जारी कर दे गेहे।
सारनाथ एक्सप्रेस-रद्द
रेलवे ह सारनाथ एक्सप्रेस ल एक दिसंबर ले पन्द्रह फरवरी के बीच कतकोन तारीख म कुल छियासठ दिन रद्द करे के घोसना करे गेहे। जानबा के अनुसार जाड़ के चलत कोहरा के आसंका ल देखत हुए ए फइसला ले गेहे। दुरूग ले छपरा तक चलइया सारनाथ एक्सप्रेस ट्रेन के रद्द होय ले प्रयागराज, बनारस अउ छपरा जाय वाले लोगन मन ल परेसानी होही।
चैतन्य बघेल-रिमांड
शराब घोटाला मामला म पूर्व मुख्यमंत्री भूपेश बघेल के बेटा चैतन्य बघेल के रिमांड अवधि ल चौदह दिन बर बढ़ा दे गेहे। अब ओ ह उनतीस अक्टूबर तक जेल म ही रइही। रिमांड अवधि खतम होय के बाद आज ओला वीडियो कॉन्फ्रेंसिंग ले एंटी करप्शन ब्यूरो-एसीबी अउ आर्थिक अपराध अन्वेषण ब्यूरो-ईओडब्ल्यू के विशेष अदालत म पेस करे गीस।
हाईकोर्ट-मवेशी
छत्तीसगढ़ उच्च न्यायालय म आज सड़क म आवारा मवेसी मनके सेती होवत दुर्घटना म लेके दायर याचिका उपर सुनवाई होइस। ए मामला म कोर्ट ह मुख्य सचिव ल नोटिस जारी करके पूछे हे कि अब तक जारी निरदेस के कतका पालन करे गेहे। ए मामला के अवइया सुनवाई नवंबर महीना म होही।
अब अब पेस हे मौसम के हाल…
दक्षिण-पश्चिम मानसून के वापसी के संगेसंग प्रदेस म हल्का जाड़ सुरू होवत हे। मौसम विज्ञानी डॉक्टर गायत्री ह आकाशवाणी समाचार ल बतईन कि अवइया चौबीस घंटा के दउरान मानसून के छत्तीसगढ़ ले विदाई हो जही। मौसम विभाग के अनुसार अवइया चार-पांच दिन तक प्रदेस म मौसम शुष्क रइही।