महाराष्ट्र के गढ़चिरौली म नक्सली संगठन के शीर्ष नेता समेत इकसठ माओवादी मन ह आत्मसमर्पण करे हे। एमा एम. वेणुगोपाल उर्फ भूपति उर्फ सोनू दादा ह घलो सामिल हे। जउन माओवादी मन ह आत्मसमर्पण करे हे, ओमा सीपीआई माआवोदी के केन्द्रीय समिति के एक सदस्य के संगेसंग एखर डिवीजनल कमेटी के दस सदस्य ह घलो सामिल हे। आत्मसमर्पण करइया नक्सली नेता भूपति लंबा बेरा ले महाराष्ट्र-छत्तीसगढ़ सीमा म सक्रिय रिहीस। सूत्र मनके मुताबिक एखर उपर आने-आने राज्य म कुल दस करोड़ रूपिया के इनाम घोषित रिहीस। ए इकठस माओवादी मन ह करीब पचास ठिन हथियार के संग आत्मसमर्पण करे हे।
मुख्यमंत्री-मानक महोत्सव
विश्व मानक दिवस के मउका म आज रायपुर म मानक महोत्सव के कार्यक्रम होइस। ए कार्यक्रम म मुख्यमंत्री विष्णुदेव साय ह सामिल होइन अउ ओमन ह लोगन मन ले मानकीकृत सामान ल बढ़ावा दे अउ भारतीय मानक ब्यूरो-बीआईएस के प्रयास म सामिल होय बर किहीन हे। श्री साय ह किहीन कि गुणवत्ता अउ मानक ही आत्मनिर्भर भारत के पहिचान हरय। ओमन ह किहीन कि बीआईएस के सामान ल मानक चिन्ह देके उपभोक्ता मनके हित के रक्षा करे जात हे अउ एखर माध्यम ले मिलावट अउ नकली सामान के कारोबार ल रोके म मदद मिले हे। कार्यक्रम के चलत मुख्यमंत्री ह मानक के स्थापना म विशेष योगदान देवइया मानक क्लब, संस्था अउ मेंटर्स के सम्मान करीन। ए मउका म मुख्यमंत्री ह भारतीय मानक ब्यूरो अउ आने संस्थान कोति ले लगाय गे कतकोन स्टॉल के अवलोकन घलो करीन।
मुख्यमंत्री-सुशासन संवाद
मुख्यमंत्री विष्णुदेव साय के अध्यक्षता म काली मंत्रालय म ‘‘सुशासन संवाद‘‘ कार्यक्रम के आयोजन होइस, जेमा मुख्यमंत्री ह कलेक्टर मन ल निरदेस दीन हे कि जउन भी नवाचार करे जाही, ओमा लोगन मनके राय घलो ले जाय। श्री साय ह किहीन कि नवाचार अइसे हो, जउन कि दीर्घकालिक रूप ले व्यवहारिक हो, लोगन मनके सुविधा बढ़ाय अउ सासन के फ्लैगशिप योजना ल सहयोग देवय। मुख्यमंत्री ह लोक सेवा गारंटी अधिनियम ल महत्वपूर्ण बतात हुए निरदेस दीन हे कि सबो सेवा ल तय करे गे बेरा म लोगन तक पहुंचाय जाय। ओमन ह किहीन कि काम म देरी होय म जिम्मेदार अधिकारी मनके खिलाफ अधिनियम के तहत कार्रवाई करे जाय। ए बेरा म मुख्यमंत्री ह ई-ऑफिस प्रणाली अउ डिजिटल गवर्नेंस ल बढ़ावा दे म जोर दीन। कार्यक्रम म मुख्यमंत्री ह कतकोन जिला म होवत नवाचार म आधारित ‘‘कॉफी टेबल बुक‘‘ के विमोचन घलो करीन।
विजय शर्मा-धर्मांतरण/चंगाई सभा
उपमुख्यमंत्री विजय शर्मा ह किहीन हे कि धर्मांतरण के खिलाफ प्रदेस म जल्दी ही कानून लाय जाही। श्री शर्मा ह आज रायपुर म पत्रकार मन ले गोठ करत हुए कहिन कि चंगाई सभा बंद होना चाही। एखर ले लोगन मन भ्रमित होवत हे।
विश्व स्वास्थ्य संगठन-कफ सिरप
विश्व स्वास्थ्य संगठन ह भारत म बने तीन ठिन मिलावटी कफ सिरप के पहिचान करे हे, जेमा कोल्ड्रिफ कफ सिरप घलो सामिल हे। चेतावनी दे गेहे कि ए सिरप ह गंभीर अउ जानलेवा बीमारी के कारण बन सकत हे। संगठन ह दुनिया भर के अधिकारी मन ले आग्रह करे हे कि उंखर देस म एमा ले कोनों भी उत्पाद ह पाय जाथे, त ओमन ह एजेंसी ल सूचित करय। संगठन ह किहीन कि अइसे दवई ह पांच बछर ले कम उमर के लइका मन ल नइ देना चाही। वैश्विक स्वास्थ्य निकाय ह श्रीसन फार्मास्युटिकल्स के कोल्ड्रिफ, रेडनेक्स फार्मास्युटिकल्स के रेस्पि-फ्रेश टीआर अउ शेप फार्मा के रीलाइफ के विशिष्ट बैच के प्रभावित दवई के रूप म पहिचान करे हे।
जानबा के अनुसार एक हफ्ता पहिली ही मध्यप्रदेश म कोल्ड्रिफ कफ सिरप के सेवन ले कतकोन लइका मनके मउत होगे रिहीस, जेखर बाद केन्द्र सरकार ह सबो राज्य अउ केन्द्रसासित प्रदेस मन ल दिसा-निरदेस जारी करे रिहीन, जेमा लइका मन ल लेके जादा सावधानी बरते बर कहे गे रिहीस।
जल शक्ति मंत्रालय-इंटर्नशिप
केन्द्रीय जल शक्ति मंत्रालय ह आज एक ठिन जनसंचार इंटर्नशिप कार्यक्रम के घोषणा करे गेहे, जउन ह जनसंचार के क्षेत्र म स्नातक या स्नातकोत्तर के उपाधि लेवत पढ़ईया लइका या फेर कोनो आने मान्यता प्राप्त संस्थान म शोधार्थी के रूप म नामांकित छात्र मन बर होही। एखर बारे म मंत्रालय ह बतईन हे कि ए इंटर्नशिप के अवधि ह छह से नौ महीना के होही अउ एखर बर चुने गे उम्मीदवार मन ल पन्द्रह हजार रूपिया हर महीना के मानदेय दे जाही। एखर बर चौबीस नवंबर तक आवेदन करे जा सकत हे।
मुख्य सचिव-बैठक
मुख्य सचिव विकासशील ह आज मंत्रालय म सबो विभाग के भारसाधक सचिव मन ले उंखर विभाग के कतकोन योजना के चलत काम-बूता के जानकारी लीन। मुख्य सचिव ह अधिकारी मन ले प्रधानमंत्री गति शक्ति म सामिल विभाग के कार्यायोजना के बारे म घलो गोठ करीन। ओमन ह रद्दा, पीये के पानी, बिजली, स्वास्थ्य समेत आने-आने विभाग के काम ल योजनाबद्ध तरीका ले पूरा कराय के निरदेस दीन। संगेसंग निर्माण काम ल अच्छा तरीका ले तय करे गे बेरा म पूरा करे बर केहे हे। मुख्य सचिव ह कुछु दिन पहिली होय कलेक्टर कॉन्फ्रेंस म दे गे निरदेस के क्रियान्वयन करे जाय के घलो बात कहिन हे।
सौम्या चौरसिया-चालान
कोयला घोटाला, डीएमएफ अउ आय ले जादा संपत्ति के मामला म तत्कालीन उपसचिव सौम्या चौरसिया के खिलाफ आर्थिक अपराध अन्वेषण ब्यूरो-ईओडब्ल्यू ह आज रायपुर के विशेष अदालत म आठ हजार पन्ना के चालान ल पेश करीन। जेखर अनुसार सौम्या चौरसिया ह अपन परिवार अउ आने मनखे के नाम म लगभग पैंतालीस ठिन अचल संपत्ति म बेनामी निवेश करे हे। जांच म ए घलो पाय गेहे कि सौम्या चौरसिया ह पद म राहत हुए उनचास करोड़ उनहत्तर लाख रूपिया ले जादा के अवैध कमाई करे हे। सौम्या चौरसिया कोति ले अपन पूरा सेवा काल के चलत एक हजार आठ सौ बहत्तर प्रतिशत ले जादा के अवैध आय अर्जित करे गेहे।
जागरूकता शिविर
‘‘आप की पूंजी, आपका अधिकार‘‘ जन जागरूकता अभियान के चलत प्रदेस म इकतीस दिसंबर तक जिला स्तरीय जागरूकता अउ सहायता सिविर आयोजित करे जाही। ए सिविर के आयोजन हरेक जिला कार्यालय म जिला अधिकारी मनके नेतृत्व म होही। अभियान के पहिली चरण म सोलह अक्टूबर के रायपुर अउ बिलासपुर जिला म विशेष शिविर आयोजित करे जाही, जेमा लोगन मन ल बीमा दावा, शेयर, म्यूचअल फंड अउ पेंशन के पइसा ले बर डिजिटल हेल्पडेस्क अउ सहायता काउंटर उपलब्ध कराय जाही।
उद्भव कार्यक्रम-शुभारंभ
रायपुर के खम्हारडीह के शासकीय बालिका गृह म ‘‘उद्भव‘‘ नाव के एक ठिन कार्यक्रम सुरू करे गेहे, जेमा महिला अउ बाल विकास मंत्री लक्ष्मी राजवाड़े ह मुख्य अतिथि के रूप म सामिल होइन। कार्यक्रम के बेरा श्रीमती राजवाड़े ह बालिका गृह म कम्प्यूटर लैब के सुभारंभ करके लाइब्रेरी ल देखीन। ए बेरा म ओमन ह किहीन कि राज्य सरकार ह लइका मनके विकास अउ सुरक्षा बल सरलग काम करत हे। उद्भव कार्यक्रम ह इही दिसा म एक ठिन अच्छा कोसिस हरय, जउन कि हर लइका ल सुरक्षा अउ सम्मान के संग अच्छा जिनगी जीये के अवसर दीहीं।
स्पोर्ट्स-कल्चरल-लिटरेरी-समापन
रायपुर के हिदायतुल्लाह राष्ट्रीय विधि विश्वविद्यालय म चलत तीन दिन के ‘‘कोलॉसस‘‘ : स्पोर्ट्स-कल्चरल-लिटरेरी‘‘ कार्यक्रम ह खतम होगे हे। समापन समारोह म राष्ट्रीय हरित अधिकरण के अध्यक्ष अउ कोलकाता उच्च न्यायालय के पूर्व मुख्य न्यायाधीश न्यायमूर्ति प्रकाश श्रीवास्तव ह मुख्य अतिथि के रूप म सामिल होइन। ए बेरा म ओमन ह किहीन कि पढ़ईया लइका मनके असली उपलब्धि ह प्रमाण पत्र म नइ, बल्कि आत्मविश्वास, टीमवर्क अउ सीखे के प्रक्रिया म हवय। ए कार्यक्रम के विशिष्ट अतिथि राज्य के पुलिस महानिदेशक अरूण देव गौतम ह रिहीन। कार्यक्रम ल विश्वविद्यालय के कुलपति प्रोफेसर वी.सी. विवेकानंदन ह घलो संबोधित करीन।
बतादन कि तीन दिन तक चले ए कार्यक्रम म खेल, संस्कृति अउ साहित्य के कतकोन कार्यक्रम आयोजित करे गे रिहीस।