उहें, मुख्यमंत्री ह सड़क दुर्घटना के बाढ़त मामला उपर रोक लगाय बर अधिकारी मन ल सुरक्षा नियम के कड़ाई ले पालन होना निश्चित कराय बर किहीन। ओमन ह सबो जिला म दुर्घटना वाले ब्लैक स्पॉट ल पहिचान के उंहा जल्दी ले जल्दी सुधार करे बर किहीन।
एखर अलावा मुख्यमंत्री ह कॉन्फ्रेंस के दउरान वनमंडल अधिकारी मनले बात करत ‘‘वनो से आजीविका‘‘ के तहत तेंदूपत्ता संग्राहक मन ल संग्रहण रासि के भुगतान सात ले पंद्रह दिन के भीतर करे जाय बर निरदेस दीन। श्री साय ह लघु वनोपज के स्टार्टअप ल बढ़ावा देबर अउ हर्बल उत्पाद ल बाजार देवाय के प्रयास करे बर जोर दीन।
मुख्यमंत्री ह निरदेस दीन कि सड़क म अव्यवस्था फैलाय, चाकूबाजी अउ हत्या जइसन जघन्य अपराध म जीरोटॉलरेंस के नीति अपनाय जाय। गौ-तस्करी अउ धर्मान्तरण जइसन संवेदनसील मामला उपर निगरानी राखे जाय अउ देषी मनके खिलाफ कठोर कार्रवाई करे जाय, जउन जिला मन म अपराध नियंत्रण म सुधार करे गेहे उंखर अनुभव ल दूसर जिला मन म घलो माडल के रूप म लागू करे जाय। मुख्यमंत्री ह किहीन कि नसा अपराध के जड़ हे अउ एला खतम करना ही कानून बेवस्था के पहिली सर्त हे। श्री साय ह एनकॉर्ड के तहत राज्य व्यापी अभियान चलाय के, सीमावर्ती जिला मन म तस्करी उपर रोक लगाय के अउ एनडीपीएस एक्ट म समय सीमा म कार्रवाई करे के निरदेस दीन, संगेसंग ओमन किहीन कि युवा मन ल नसा के दुष्परिणाम समझाय बर जन-जागरूकता अभियान चलाय जाय।
बइठका के दउरान मुख्यमंत्री ह अधिकारी मन ल जादा कीमत म बिकने वाला बांस के प्रजाति के उपज ल बढ़ावा देके निरदेस दीन। ओमन ह किहीन कि बांस अउ ओखर ले बने सामान ह बिसेस पिछड़ा जनजाति के कमई के मुख्य साधन हे, जेला देखत बांस वन आधारित आजीविका ल बढ़ावा दे जाय। मुख्यमंत्री ह प्रदेस के अट्ठाईस ठन बांस प्रसंस्करण केंद्र मन ल सक्रिय करे के, बांस शिल्पकार मन ल बाजार ले संपर्क स्थापित करे म मदद करे के अउ जनजाति परिवार मन ल बांस के समान बनाय के प्रसिक्षण दे जाय के निरदेस दीन।
आरपीएफ-भर्ती
केंद्रीय रेल मंत्री अश्विनी वैष्णव ह घोसना करे हे कि कर्मचारी चयन आयोग डहार ले रेलवे सुरक्षाबल आरपीएफ म वार्षिक रूप ले भर्ती करे जाही। ओमन ह आरपीएफ ल आधुनिक प्रौद्योगिकीय ले जोड़े बर कतकोन काम के सुरूआत करीन। रेलवे सुरक्षाबल के इकचालीसवां स्थापना दिवस के मउका म गुजरात के वलसाड म श्री वैष्णव ह किहीन कि आरपीएफ कर्मी मन ल जल्दीच वीएचएफसेट देवाय जाही अउ एखर संचालन क्षमता ल मजबूत बनाय बर ओमन ल डिजीटल अउ ड्रोन प्रसिक्षण घलो दे जाही।
उहें, केंद्रीय मंत्री ह यहू जानकारी दीन कि अवइया देवारी अउ छठ पूजा के बखत बारह हजार बिसेस रेलगाड़ी चलाय जाही।
कर्मचारी नामांकन अभियान
केंद्र सरकार ह कर्मचारी मनके सामाजिक सुरक्षा कवरेज ल बढ़ाय बर कर्मचारी नामांकन अभियान सुरू करे हे। ए अभियान के उद्देस्य नियोक्ता मन ल खुद ले होके पात्र कर्मचारी मनके घोसना अउ नामांकन बर प्रोत्साहित करना हे। श्रम अउ रोजगार मंत्रालय ह केहे हे कि ए योजना ए बछर एक नवंबर ले अवइया बछर तीस अप्रैल तक लागू रइही। मंत्रालय ह केहे हे कि नियोक्ता मन ह ओ सबो कर्मचारी मनके नामांकन कर सकत हे, जउन मन ह एक जुलाई दू हजार सत्रह अउ इकतीस अक्टूबर दू हजार पच्चीस के बीच प्रतिष्ठान म आय हे। मंत्रालय ह केहे हे कि ए अभियान नियोक्ता मन बर न्यूनतम वित्तीय बोझ के संग उंखर पिछला रिकार्ड ल नियमित करे म घलो बड़े भूमिका निभाही।
विकसित भारत बिल्डाथॉन
केंद्रीय शिक्षा मंत्री धर्मेन्द्र प्रधान ह केहे हे कि भारत उत्पादन संचालित अर्थव्यवस्था के रद्दा ले ही विकसित राष्ट्र बन सकत हे। विकसित भारत बिल्डाथॉन-दू हजार पच्चीस के उद्घाटन करत श्री प्रधान ह किहीन कि इक्कीसवीं सदी ज्ञान उपर आधारित सदी हे अउ भारत ज्ञान आधारित विश्व अउ अर्थव्यवस्था के अगुवई करइया हे।
ए कारीकरम म चर्चा बर देसभर ले चुने गे विद्यार्थी मन संग वीडियो कॉन्फ्रेंसिंग के माध्यम ले केंद्रीय शिक्षक विभाग डहार ले आज वर्चुअल संवाद करे गीस। एखर बाद महासमुंद जिला के शासकीय हायर सेकेंडरी स्कूल बेलसोंडा के दू झन छात्रा मेघना चंद्राकर अउ अहिल्या साहू ल घलो चुने गे रिहीस। ए नोनी मन डहार ले कारीकरम म प्रस्तुत प्रोजेक्ट एआई सेंसर कैमरा अउ लेबर स्मार्ट बैंड उपर आधारित हे, जउन ह श्रमिक मनके कार्यस्थल म सुरक्षा, निगरानी अउ सुविधा बढ़ाय म उपयोगी साबित होही। ए प्रोजेक्ट आत्मनिर्भर भारत, स्वदेसी नवाचार, लोकल फॉर वोकल अउ समृध्द भारत के थीम उपर आधारित हे।
जवान-घायल
बीजापुर जिला के भोपालपटनम थान क्षेत्र म माओवादी मन डहार ले लगाय गे प्रेसर आईईडी म बिस्फोट होय ले एक झन जवान घायल हो गेहे। मिले जानकारी के अनुसार सुरक्षाबल के टीम ह गस्त म निकले रिहीन। इही दउरान ए बिस्फोट होइस। घायल जवान के इलाज हायर सेंटर म चलत हे, जिंहा ओखर हालत ल खतरा ले बाहिर बताय गे हवय।
पेसा कानून-बैठक
कोंडागांव जिला म पेसा कानून के बारे म काम-काज के बारे म ग्राम नेवता म बइठका करे गीस, जेमा मौजूद पंचायती राज मंत्रालय भारत सरकार के संचालक रमित मौर्य ह ग्रामीण अउ ग्रामसभा सदस्य मन के संग चर्चा करत ग्राम स्तर म पेसा कानून ल लागू करे बर सामूहिक प्रयास के जरूरत के बात किहीन। ओमन ह ग्राम पंचायत विकास योजना अउ आदिकर्मयोगी अभियान म तियार करे गे योजना के घलो समीक्षा करीन। ए मउका म उंखर मन संग मंत्रालय के पेसा सलाहकार प्रखर जैन घलो मौजूद रिहीन।
शालेय खेल प्रतियोगिता
पच्चीसवां राज्य स्तरीय खेल प्रतियोगिता के आयोजन कोरबा म करे जावत हे। श्रम मंत्री लखनलाल देवांगन ह सीएसईबी फुटबाल ग्राउंड म काली ए प्रतियोगिता के सुरूआत करीन।
ए राज्य स्तरीय खेल प्रतियोगिता म प्रदेस के पांच ठन संभाग-बस्तर, दुरूग, रईपुर, सरगुजा अउ बिलासपुर के खिलाड़ी मन भाग लेवत हे। पंद्रह अक्टूबर तक चलइया ए आयोजन म क्रिकेट, तैराकी, हॉकी, व्हॉलीबाल अउ वाटर पोलो के मैच होही।
अउ अब पेस हे मौसम के हाल…
प्रदेस म दक्षिण-पश्चिम मानसून के विदाई कांकेर तक हो गे हवय। मौसम विभाग के अनुसार राज्य के दक्षिणी भाग म बंगाल के खाड़ी ले नमी आय के सेती एक-दू जघा म हल्का बरसा होय के या गरज-चमक के संग छींटा पड़े के संभावना हे। ए दउरान प्रदेस के न्यूनतम तापमान म हल्का गिरावट दर्ज करे जा सकत हे, फेर जादा परिवर्तन होय के संभावना नइ हे।
इही बीच, छत्तीसगढ़ म ए बखत मानसून के दउरान अभी तक एक हजार दू सौ ग्यारा मिलीमीटर औसत बरसा रिकार्ड करे जा चुके हे। राजस्व अउ आपदा प्रबंधन विभाग के आंकड़ा के अनुसार प्रदेस म अभी तक बस्तर जिला म सबले जादा एक हजार छै सौ तैंतीस मिलीमीटर बरसा रिकार्ड करे गेहे। उहें, बेमेतरा जिला म सबले कमती पांच सौ चौव्वन मिलीमीटर बरसा दर्ज होय हे।