मुख्यमंत्री विष्णुदेव साय ह आज मंत्रालय म कलेक्टर्स कॉन्फ्रेंस के तहत प्रदेस के जम्मो जिला कलेक्टर मनले चर्चा करीन। बइठका म सुशासन पारदर्सिता अउ जनहित के नवा मानक तय करे गीस। मुख्यमंत्री ह किहीन कि शासन के नीति अउ योजना के फायदा आखिरी छोर के लोगन मन तक समयबध्द अउ पारदर्सी तरीका ले पहुंचाना ही सुशासन के वास्तविक अर्थ हरय अउ ए दिसा म कोनो भी स्तर म ढिलाई स्वीकार नइ करे जाही।
मुख्यमंत्री ह प्रदेस म पंद्रह नवंबर ले सुरू होवइया धान खरीदी के तियारी जल्दी पूरा करे बर किहीन। अेमन किहीन कि धान खरीदी म कोनो भी प्रकार के अनियमितता पाय जाय म कलेक्टर सीधा जिम्मेदार होही। श्री साय ह किहीन कि प्रभारी सचिव जिला म धान खरीदी प्रक्रिया के सरलग निगरानी करय। संघरा संवेदनसील केंद्र म भी नजर रखय। ओमन किहीन कि अंतर्राज्यीय सीमावर्ती जिला म बिसेस सतर्कता बरते जाय ताकि बाहिर ले धान के अवैध अवई-जवई ल रोके जा सकय। मुख्यमंत्री ह किहीन कि बिसेस पिछड़ी जनजाति इलाका म बिसेस सिविर के माध्यम ले किसान मनके सत प्रतिसत पंजीयन सुनिश्चित करे जाय। प्रधानमंत्री किसान सम्मान निधि के समीक्षा करत मुख्यमंत्री ह किहीन कि जिला म निर्धारित समय-सीमा के भीतर जम्मो पात्र किसान मन ल ए योजना के फायदा मिलना चाही। ओमन कमीश्नर मनले किहीन कि बस्तर अउ सरगुजा संभाग म बिसेस रूप ले योजना के प्रगति के समीक्षा करे जाय।
मुख्यमंत्री ह ऊर्जा विभाग के समीक्षा करत किहीन कि प्रधानमंत्री सूर्यघर मुफ्त बिजली योजना के फायदा अधिकतम लोगन तक पहुंचय। स्वास्थ्य सेवा के समीक्षा म मुख्यमंत्री ह किहीन कि गुणवत्तापूर्ण चिकित्सा राज्य सरकार के सर्वोच्च प्राथमिकता हरय। मुख्यमंत्री ह निरदेस दीन कि जम्मो अस्पताल म सत प्रतिसत प्रसव सुनिश्चित होवय। मुख्यमंत्री ह बस्तर संभाग म मलेरिया उन्मूलन उपर बिसेस जोर दीन। ओमन किहीन कि हॉटस्पॉट क्षेत्र के पहिचान करके बिसेस अभियान चलाय जाय, ताकि छत्तीसगढ़ ल मलेरिया मुक्त राज्य बनाय के लक्ष्य पूरा करे जा सकय। ओमन प्रधानमंत्री वय वंदना योजना के अंतर्गत जम्मो पात्र वृध्दजन के पंजीयन अउ कार्ड निर्माण कार्य ल प्राथमिकता ले पूरा करे के निरदेस दीन।
शिक्षा विभाग के समीक्षा के दउरान मुख्यमंत्री ह किहीन कि ड्रॉपआउट सून्य करे अउ सकल नामांकन अनुपात ल सत प्रतिसत करे के लक्ष्य कोनो भी हाल म पूरा होना चाही। मुख्यमंत्री ह बीजापुर जिला के सराहना करत किहीन कि उंहा स्थानीय युवा मनके मदद ले गोंडी भासा म शिक्षण ले लइका मनके उपस्थिति बाढ़े हे अउ ड्रॉपआउट कम होय हे। ओमन जम्मो जिला ल अइसे नवाचार अपनाय के सलाह दीन। मुख्यमंत्री ह निरदेस दीन कि इकतीस दिसंबर तक जम्मो विद्यार्थी मनके आधार-बेस्ड आपार आईडी बनाके रजिस्ट्रेसन पूरा करे जाय। इही आधार म विद्यार्थी मन ल गणवेस, किताब अउ छात्रवृत्ति उपलब्ध कराय जाही। बइठका म मुख्यमंत्री ह किहीन कि राज्य म मुख्यमंत्री शिक्षा, गुणवत्ता अभियान चलाय जाही। एमा स्कूल मनके सामाजिक अंकेक्षण करके ग्रेडिंग होही।
बइठका म मुख्यमंत्री ह पीएम जन-मन योजना के क्रियान्वयन के घलो समीक्षा करीन। ओमन किहीन कि जम्मो कलेक्टर पांच बिसेस पिछड़ी जनजाति के ग्रामविकास अउ ओमन के जीवन स्तर ल सुधारे के काम तेजी ले पूरा करय। श्री साय ह पीएम जन-मन योजना के काम ले इकतीस मार्च तक हर हाल म पूरा करे के निरदेस कलेक्टर मन ल दीन।
बइठका म मुख्यमंत्री ह कलेक्टर ल प्रधानमंत्री आवास योजना वन प्वांइट ओ के शेष बांचे मकान ल इकतीस दिसंबर तक पूरा करे के निरदेस दीन। ओमन किहीन कि जउन आवास पूरा हो चुके हे, ओला अवइया दू महिना म हितग्राही मन ल सौंपे जाय।
उहें, मुख्यमंत्री ह धरती आबा जनजातीय ग्राम उत्कर्ष अभियान अउ आदि कर्मयोगी अभियान के घलो समीक्षा करीन। ओमन किहीन कि आदि कर्मयोगी अभियान म छत्तीसगढ़ ह राष्ट्रीय स्तर म अच्छा काम करत पहिली स्थान पाय हे।
शिक्षा मंत्रालय-यूपीआई
केंद्रीय शिक्षा मंत्रालय राज्य अउ केंद्रशासित प्रदेस के स्कूल मन ले प्रवेस अउ परीक्षा सुल्क एकत्र करे बर यूपीआई अपनाय बर कहे हे। एखर उद्देस्य प्रशासनिक प्रक्रिया के आधुनिकीकरण करना हे। राज्य, केंद्रशासित प्रदेस अउ एनसीईआरटी, सीबीएसई, केवीएस अउ एनवीएस जइसे स्वायत्त संस्था मन ल स्कूली शिक्षा अउ साक्षरता विभाग ह स्कूल म वित्तीय लेनदेन ल सुव्यवस्थित करे बर यूपीआई अपनाय उपर बल देहे। ए कदम विधायी, नीतिगत अउ संस्थागत सुधार के माध्यम ले ‘जीवन अउ स्कूली शिक्षा म आसानी‘ ल बढ़ावा देके व्यापक परयास के हिस्सा हे।
शिवराज सिंह चौहान-जीएसटी
केंद्रीय कृषि मंत्री शिवराज सिंह चौहान ह किहीन कि अवइया पीढ़ी के जीएसटी सुधार के संग सरकार ह कृषि उपकरण उपर जीएसटी दर ले कम करके किसान मन ल राहत दीन हे। ओमन किहीन कि प्रधानमंत्री नरेंद्र मोदी ह हमेसा किसान मनके हित ल सर्वोच्च प्राथमिकता देहे।
अरूण साव-समीक्षा बैठक
उपमुख्यमंत्री अरूण साव ह देवारी तिहार के पहिली जम्मो नगरीय निकाय मन म कर्मचारी मन ल वेतन के भुगतान सुनिश्चित करे के निरदेस दीन हे। श्री साव ह आज नवा रईपुर म नगरीय प्रशासन विभाग के वरिष्ठ अधिकारी मनके बइठका लेके विभागीय कार्य के समीक्षा करीन। ओमन मंत्रालय संचालनालय अउ सूडा के टीम ल बेहतर समन्वय के संग काम करत लेटलतीफी ले बांचे बर किहीन। श्री साव ह किहीन कि जम्मो कार्य समय-सीमा म गुणवत्ता के संग पूरा करे जाय। ओमन गोधाम योजना के क्रियान्वयन बर कार्य योजना ल अंतिम रूप दे के निरदेस दीन। बइठका म नालंदा परिसर, अटल परिसर अउ बजट म सामिल दूसर योजना मनके प्रगति के घलो समीक्षा करे गीस।
कर्मचारी फेडरेशन-महंगाई भत्ता
छत्तीसगढ़ प्रदेस कर्मचारी अधिकारी फेडरेसन ह राज्य सरकार ले केंद्र के समान तीन प्रतिसत महंगाई भत्ता देके मांग करीन हे। फेडरेसन के पदाधिकारी मनके कहना हे कि कर्मचारी मन उपर बाढ़त महंगाई के सीधा असर पड़त हे। फेडरेसन ह किहीस कि यदि राज्य सरकार जुलाई दू हजार पच्चीस ले लंबित तीन प्रतिसत महंगाई भत्ता स्वीकृत करथे, त प्रदेस के लाखो कर्मचारी अउ पेंसनर मन ल राहत मिलही।
बतादन कि एखर पहिली केंद्र सरकार ह अपन कर्मचारी अउ पेंसनर मन ल जुलाई दू हजार पच्चीस ले तीन प्रतिसत अतिरिक्त महंगाई भत्ता देके घोसना करे हे। एखरे संघरा केंद्रीय कर्मचारी मनके महंगाई भत्ता अंठावन प्रतिसत हो गेहे।
रेलवे-स्वच्छता अभियान
स्वच्छ रेल-स्वच्छ भारत अभियान के तहत काली रईपुर रेल मंडल म स्वच्छ नीर थीम उपर स्वच्छता अभियान चलाय गीस। ए मउका म मंडल के जम्मो प्रमुख रेलवे स्टेसन, कार्यालय, कालोनी अउ अस्पताल मन म पेयजल के गुणत्ता अउ व्यवस्था के निरीक्षण करे गीस। बतादन कि रेलवे डहार ले एक ले पंद्रह अक्टूबर तक स्वच्छता अभियान चलाय जात हे।
किसान-फसल सलाह
धान के फसल ल रोग अउ कीट प्रकोप ले बचाय खातिर कृषि बिसेसज्ञ मन ह किसान मन ल सलाह दीन हे। कृषि विभाग के उप संचालक ह बतइन कि प्रदेस म असमय बरसा ले कीट प्रकोप अउ झुलसा रोग ह बाढ़गे हवय। एखर बचाव खातिर किसान ट्राईफ्लोक्सीस्ट्रोवीन, टेबुकोनाजोल, ट्राईसाइक्लाजोल अउ हेक्साकोनाजोल के छिड़काव करय। अइसने, शीथ ब्लाइट रोग होय म घलो हेक्साकोनाजोल के परयोग करे जा सकत हे। एखर अलावा किसान, तना छेदक कीट के निगरानी बर फेरोमोन ट्रैप के उपयोग करय अउ भूरा फुदका कीट के प्रकोप के स्थिति म पाइमेट्रोजीन अउ डिनोटेफेरोन के छिड़काव असर कारक रइही।