प्रधानमंत्री नरेंद्र मोदी ह आज नई दिल्ली म खेती अउ एखर ले जुड़े क्षेत्र बर बयालीस हजार करोड़ रूपिया ले जादा के अब्बड़ अकन परियोजना के लोकार्पण अउ सिलान्यास करीन। श्री मोदी ह पैंतालीस हजार करोड़ रूपिया ले जादा के लागत वाले कृषि क्षेत्र के दू प्रमुख पहल पीएम धन-धान्य कृषि योजना अउ दलहन म आत्मनिर्भरता मिशन के सुभारंभ करीन। प्रधानमंत्री ह किहीन कि देस के आत्मनिर्भरता अउ किसान मन के कल्याण बर ए दू नवा योजना सुरू करे गेहे।
श्री मोदी ह किहीन कि पीएम धन-धान्य कृषि योजना म गाय-गरू मन उपर घलो बिसेस धियान दे जावत हे अउ दलहन म आत्मनिर्भरता मिशन ह अवइया पीढ़ी ल आत्मनिर्भर बनाय के योजना हे।
प्रधानमंत्री धन-धान्य कृषि योजना अउ दलहन आत्मनिर्भरता मिशन म छत्तीसगढ़ के दंतेवाड़ा, कोरबा अउ जशपुर जिला ल घलो जोड़ गेहे। ए मिशन के सुभारंभ म रईपुर के इंदिरागांधी कृषि विश्वविद्यालय म कारीकरम आयोजित करे गीस, जेमा मुख्यमंत्री विष्णुदेव साय ह घलो सामिल होइन। कारीकरम म गोठियात हुए मुख्यमंत्री ए जरूरी मिशन म छत्तीसगढ़ के तीन ठन जिला ल सामिल करे बर प्रदेसवासी मन कोति ले प्रधानमंत्री के आभार जतइन।
मुख्यमंत्री-छात्रवृत्ति
राज्य के शैक्षणिक संस्थान, आश्रम-छात्रावास अउ तकनीकी के संगेसंग प्रोफेसनल पाठ्यक्रम म पढ़ई करइया अनुसूचित जाति, जनजाति, अन्य पिछड़ा वर्ग, अल्प संख्यक वर्ग अउ आर्थिक रूप ले कमजोर वर्ग के विद्यार्थी मन ल शिष्यवृत्ति अउ छात्रवृत्ति के भुगतान अब सीधा ओमन के बैंक खाता म ऑनलाइन करे जावत हे। मुख्यमंत्री विष्णुदेव साय ह काली मंत्रालय, महानदी भवन म राखे गे कारीकरम म ए वर्ग के एक लाख अंठानवे हजार विद्यार्थी मनके बैंक खाता म चौरासी करोड़ रूपिया ले जादा के शिष्यवृत्ति अउ छात्रवृत्ति ऑनलाइन भेजिस।
ए मउका म प्रमुख सचिव सोनमणि बोरा ह बतइन कि प्री-मैट्रिक, पोस्ट मैट्रिक शिष्यवृत्ति अउ छात्रवृत्ति के भुगतान बर नवा बेवस्था म जून, सितंबर अक्टूबर अउ दिसंबर महिना म विद्यार्थी मन ल ऑनलाइन भुगतान करे जाही।
जीएसटी बचत उत्सव
मुख्यमंत्री विष्णुदेव साय ह किहीन हे कि प्रधानमंत्री नरेंद्र मोदी कोति ले घोसित जीएसटी बचत उत्सव के छत्तीसगढ़ समेत पूरा देस ल फायदा मिलत हे। ओमन किहीन हे कि ए ऐतिहासिक जीएसटी रिफॉर्म ले खेती के उपकरण के दाम म बहुते कमी आय हे, जेखर फायदा किसनहा मन ल होवत हे।
कोंडागांव-राष्ट्रीय पुरस्कार
नीति आयोग कोति ले राखे गे ‘‘नीति फॉर स्टेट्स‘‘-‘यूज केस चैलेंज अवॉर्ड्स‘ म कोंडागांव जिला ह ‘स्वास्थ्य और पोषण‘ श्रेणी म देसभर म पहलइया स्थान पाय हे। ए पुरस्कार मसूरी म राखे गे समारोह म नीति आयोग के सीईओ बी.वी.आर. सुब्रमण्यम अउ लाल बहादुर शास्त्री राष्ट्रीय प्रशासन एकादमी के डायरेक्टर श्रीराम तरणीकांति कोति ले कोंडागांव कलेक्टर नुपूर राशि पन्ना ल दे गीस। ए पुरस्कार जिला कोति ले गर्भवती माईलोगिन मन म एनीमिया के कमी लाय के पहल बर दे गीस, जेमा डेटा आधारित विश्लेषण, नवीन हस्तक्षेप, सतत निगरानी अउ सामुदायिक भागीदारी के माध्यम ले सुघ्घर सुधार सामिल हे।
कलेक्टर/एसपी-कॉन्फ्रेंस
मुख्यमंत्री विष्णुदेव साय ह प्रशासन म कसावट लाय अउ शासन के जन कल्याणकारी योजना के सुघ्घर क्रियान्वयन बर बारह अउ तेरह अक्टूबर के मंत्रालय महानदी भवन म कलेक्टर-पुलिस अधीक्षक कॉन्फ्रेंस लिही। ए दू दिनी कॉन्फ्रेंस म मुख्यमंत्री ह जिला कलेक्टर, संभागीय आयुक्त अउ पुलिस अधीक्षक मनसे राज्य अउ केंद्र सरकार के आने-आने जन कल्याणकारी योजना अउ कारीकरम के जिलावार प्रगति के पूछ परख करही। उहें, पुलिस अधीक्षक अउ पुलिस महानिरीक्षक के संग जिला म कानून बेवस्था समेत आने-आने मुद्दा के समीक्षा घलो करही। ए कॉन्फ्रेंस म वनामंडलाधिकारी मन घलो जुरही।
जवान घायल
बीजापुर जिला म माओवादी मन कोति ले लगाय गे आईईडी के चपेट म आय ले एक झन जवान ह घायल हो गेहे। मिले जानकारी अनुसार कांकेर के एफओबी पुजारी कैम्प ले सुरक्षाबल के टीम ह सर्चिंग अभियान बर निकले रिहीस। इही बीच, प्रेसर आईईडी फुटे ले कोबरा बटालियन के एक जवान घायल होगे। ओला अस्पताल म भर्ती कराय गेहे, जिंहा ओखर हालत खतरा ले बाहिर हे।
ऐति, गरियाबंद पुलिस ह शोभा के रक्षापत्थर इलाका ले बड़ संख्या म बिस्फोटक, दवई अउ आने माओवादी समान बरामद करे हे। बिस्फोटक ल माओवादी मन ह जमीन अंदर लुका के रखे रिहीस।
ईपीएफओ-आदेश
कर्मचारी भविष्य निधि संगठन ह कर्मचारी पेंसन योजना के अंतर्गत पेंसनर मन बर एक बड़का निरनय लेहे। अब पेंसनर ह बछर के कोनो भी महिना म अपन डिजिटल जीवन प्रमाण पत्र प्रस्तुत कर सकही। ए प्रमाण पत्र एक बछर तक वैध रइही। जीवन प्रमाणपत्र ल सिरिफ नवंबर महिना म जमा कराय के जुन्ना बेवस्था ल खतम कर दे गेहे। ए सुविधा ल सरल बनाय बर ईपीएफओ के क्षेत्रीय कार्यालय रईपुर कोति ले बिसेस जन जागरूकता अउ सहायता अभियान सुरू करे गेहे। अब पेंसनर ह खुद के या कोनो आने मनखे के मोबाइल म ऐप ले डिजिटल जीवन प्रमाण पत्र जमा कर सकत हे।
उहें, कर्मचारी भविष्यनिधि संगठन के एक ठन आने आदेस के अनुसार ईपीएफओ के अंतर्गत अवइया सबो संस्था ल अपन परिसर के बाहिर अउ वेबसाइट के संगेसंग मोबाइल एप्लीकेसन म अपन जरूरी जानकरी घलो दिखाना पड़ही।
निलंबित कर्मचारी-पदस्थापना
स्कूल शिक्षा विभाग के अंतर्गत निलंबित करमचारी मनके बहाल होय म अब ओमन के पदस्थापना शिक्षक विहीन अउ एकल शिक्षकीय विद्यालय मन म करे जाही। लोक शिक्षण संचालनालय ह राज्य के सबो संभागीय संयुक्त संचालक अउ जिला शिक्षा अधिकारी मन ल ए बारे म निरदेस जारी करे हे। एमा केहे गेहे कि निलंबित करमचारी मनके बहाली होय म अब ओमन के पदस्थापना शिक्षक विहीन या एकल शिक्षकीय विद्यालय मन म प्राथमिकता के आधार म करे जाय, जेखर ले स्कूल म पढ़ई-लिखई सुचारू रूप ले होय अउ पढ़इया लइका मनके पढ़ई घलो प्रभावित नइ होय। सुनइया मन ल बतादन अब तक निलंबन ले बहाल करे गे करमचारी मन के पदस्थापना जिला अउ संभाग के आने-आने विद्यालय मन म करे जावत रिहीस।
बटरफ्लाई और मोथ सर्वे
प्रकृति अउ जैव विविधता संरक्षण ल बढ़ावा देबर बटरफ्लाई अउ मोथ सर्वे छै ले आठ नवंबर तक बारनवापारा वन्यजीव अभ्यारण्य म करे जाही। तीन दिनी ए सर्वे के उद्देस्य तितली अउ पतंगा मनके प्रजाति के पहिचान, ओमन के प्राकृतिक आवास के अध्ययन अउ आम नागरिक म जैव विविधता ल संजोय के भावना ल बढ़ावा देना हे।
बलौदाबाजार के वनमण्डलाधिकारी धम्मसील गणवीर ह बतइन कि ए कारीकरम के आयोजन पर्यावरण जागरूकता अउ प्रकृति संरक्षण गतिविधि म करे जावत हे। एमा विद्यार्थी, सोधार्थी अउ प्रकृति प्रेमी मन भाग ले सकत हे। पंजीयन सुल्क ह सामान्य प्रतिभागी मन बर पच्चीस सौ रूपिया अउ विद्यार्थी मन बर दू हजार रूपिया हे। एमा सिरिफ चालीस प्रतिभागी मन ल सामिल होय के मउका मिलही। पंजीयन के आखिरी तारीख बीस अक्टूबर हे।
बाघिन-मौत
नवा रईपुर के जंगल सफारी ले इलाज बर गुजरात भेजे गे बीमार बाघिन बिजली के मउत हो गेहे। पाछू सात अक्टूबर के ओला ट्रेन ले गुजरात के जाम नगर म वनतारा वाइल्डलाइफ रेस्क्यू एंड केयर सेंटर भेजे गे रिहीस, जिंहा इलाज के बीच ओहा दम तोड़ दीस।
ओपन शतरंज प्रतियोगिता
जशपुर म आज ले राज्य स्तरीय ओपन शतरंज प्रतियोगिता सुरू हो गेहे। एखर सुभारंभ विधायक रायमुनी भगत ह करीन। छत्तीसगढ़ राज्य शतरंज एसोसिएशन के मदद ले आयोजित ए तीन दिनी प्रतियोगिता के पहिली दिन दू सौ चार खिलाड़ी मन ह भाग लीन। स्विस लीग पध्दति ले आयोजित प्रतियोगिता म आठ राउंड के खेल सबो खिलाड़ी मन ल खेलना होही। पूरा आठ राउंड के प्रदर्सन के बाद खिलाड़ी मन के रैंकिंग तय करे जाही।