उपमुख्यमंत्री ह बतइन कि ए बछर धान खरीदी म ‘‘तुंहर हाथ मोबाइल ऐप‘‘ के जरिया ले ऑनलाइन टोकन के बेवस्था करे गे हवय। एखर तहत किसान मन अपन सुविधा के मुताबिक धान बेचे बर टोकन ले सकही। ओमन बतइन कि वास्तविक किसान मन ले धान खरीदी करे बर बायोमैट्रिक पध्दति अपनाय जाही।
श्री साव ह किहीन कि प्रदेस म धान खरीदी के सुघ्घर मॉनिटरिंग बेवस्था बर पहिली बार इंटिग्रेटेड कमांड एंड कंट्रोल सेंंटर, मार्कफेड कार्यालय म स्थापित करे जाय के निरनय ले गे हवय। आने जिला मन म घलो कंट्रोल रूम बनाय जाही। उहें, प्रशासनिक अधिकारी मन ल धान खरीदी केंद्र मन म प्रभारी बनाय जाय के निरनय ले गे हवय, जेखर नियुक्ति कलेक्टर डहार ले करे जाही।
उपमुख्यमंत्री ह बतइन कि प्रदेस म दू हजार सात सौ उनचालीस खरीदी केंद्र मनके जरिया ले धान खरीदी करे जाय बर समिति मन म बारदाना समेत जरूरी बेवस्था करे जाय के निरदेस दे गे हवय। श्री साव ह किहीन कि प्रदेस के केंद्रीय पूल म 73 लाख मीट्रिक टन चावल जमा करे के लक्ष्य दे गे हवय।
प्रधानमंत्री उज्ज्वला योजना-कनेक्शन
केंद्र सरकार डहार ले ‘‘प्रधानमंत्री उज्ज्वला योजना‘‘ के चलत देसभर म 25 लाख नवा एल.पी.जी. कनेक्सन के मंजूरी करे गे हवय। एखर तहत छत्तीसगढ़ म ‘‘सुशासन तिहार‘‘ अउ ‘‘नियद नेल्लानार योजना‘‘ के 1 लाख उनसठ हजार पात्र हितग्राही मन ल उज्ज्वला योजना के लाभ मिलही।
एखर बर मुख्यमंत्री विष्णुदेव साय ह प्रधानमंत्री नरेंद्र मोदी अउ केंद्रीय पेट्रोलियम मंत्री हरदीप सिंह पुरी के आभार जतइन हे। मुख्यमंत्री ह किहीन कि राज्य सरकार हरेक पात्र हितग्राही तक ए योजना के फायदा पहुंचाना चाहथे। ओमन किहीन कि केंद्र सरकार के ए निरनय ले छत्तीसगढ़ के गांव अउ वनांचल क्षेत्र म रहइया माईलोगिन मन अब प्रदूषण ले मुक्त जीवन जी सकहीं।
गौरतलब हवय कि छत्तीसगढ़ म अभी के बेरा म तकरीबन 38 लाख माईलोगन मन प्रधानमंत्री उज्जवला योजना के फायदा लेवत हवय।
प्रधानमंत्री-धन धान्य योजना
प्रधानमंत्री नरेंद्र मोदी काली 11 अक्टूबर के नई दिल्ली म प्रधानमंत्री धन-धान्य योजना अउ दलहन आत्मनिर्भरता मिसन के सुभारंभ करही। कृषि मंत्रालय ह बतइन कि प्रधानमंत्री धन-धान्य योजना के चलत देसभर के कम उत्पादकता वाला सौ ठिन जिला मन म बड़का कृषि विकास करे जाही। योजना म किसान मन के आय म उल्लेखनीय वृध्दि करना अउ हरेक खेत बर सिंचाई सुविधा सुनिश्चित करना, फसल विविधीकरण ल बढ़ावा देना अउ ऋण अउ भंडारण अवसंरचना तक आसान पहुंच देना हवय।
कारीकरम के दउरान प्रधानमंत्री कृषि क्षेत्र म सुघ्घर योगदान देवइया किसान, किसान उत्पादक संगठन, सहकारी समिति अउ नवप्रवर्तक मन ल सम्मानित करही। ए मउका म ओमन कृषि अवसंरचना कोष, पशुपालन, मछली पालन अउ खाद्य प्रसंस्करण क्षेत्र ले जुड़े 1 हजार 1 सौ ले जादा परियोजना के उद्घाटन अउ सिलन्यास घलो करहीं।
मोहला-मानपुर-सम्मान
नीति आयोग डहार ले आयोजित ‘‘नीति फॉर स्टेट्स-यूज़ केस चैलेंज‘‘ म मोहला-मानपुर-अंबागढ़ चौकी जिला ल स्वास्थ्य अउ पोषण बिसय के चलत कुपोषण प्रबंधन श्रेणी म तीसरइया स्थान मिलिस। नीति आयोग के सीईओ बी.वी.आर. सुब्रमण्यम ह मसूरी के लाल बहादुर शास्त्री राष्ट्रीय प्रशासन अकादमी म आयोजित समारोह म जिला कलेक्टर तुलिका प्रजापति ल ए सम्मान दे गीस। ए सम्मान जिला के नवाचारी पहल ‘‘सैम-मैम इन चिल्ड्रन‘‘ ल दे गे हवय, जेखर जरिया ले गंभीर अउ मध्यम कुपोषित लइका मनके पहिचान, उपचार अउ निगरानी बर सामुदायिक आधारित सशक्त माडल विकसित करे गे हवय।
मुख्यमंत्री विष्णुदेव साय अउ महिला बाल विकास मंत्री लक्ष्मी राजवाड़े ह ए उपलब्धि बर अधिकारी मन ल अपन बधई दीन।
भारत मोबाइल-कांग्रेस
नई दिल्ली म आयोजित भारत मोबाइल कांग्रेस म वित्त मंत्री ओ.पी.चौधरी सामिल होइन। छत्तीसगढ़ के प्रतिनिधित्व करत ओमन राज्य के डिजीटल अउ दूर संचार के क्षेत्र म करे गे विकास बर प्रस्तुतीकरण दीन। श्री चौधरी ह अपन संबोधन म प्रदेस म मोबाइल नेटवर्क विस्तार के आवश्यकता, सूचना प्रौद्योगिकीय क्षेत्र म निवेस के मउका, साइबर सुरक्षा, डेटा सेंटर, विकास अउ नवा तकनीक के प्रोत्साहन उपर जोर दीन। ओमन केंद्रीय संचार मंत्री ज्योतिरादित्य सिंधिया के आगू छत्तीसगढ़ म मोबाइल के टावर अउ हाई-स्पीड इंटरनेट विस्तार खातिर ठोस तर्क पेस करीन। संगेसंग आने-आने राज्य मन ल छत्तीसगढ़ म भूकंप के जोखिम कम होय के सेति डेटा सेंटर अउ डिजास्टर रिकवरी साइट स्थापित करे बर नेवता दीन। श्री चौधरी ह बतइन कि छत्तीसगढ़ म वामपंथी उग्रवाद प्रभावित क्षेत्र मन म प्राथमिकता के संग दूरसंचार के विस्तार करे जावत हे।
सरगुजा ओलंपिक
उपमुख्यमंत्री अरूण साव ह किहीन हे कि बस्तर ओलंपिक के सफलता के बाद राज्य सरकार ह अब सरगुजा ओलंपिक कराय के फइसला लीन हवय। श्री साव ह किहीन कि एखर ले छत्तीसगढ़ के खेल प्रतिभा मन ल बढ़ावा मिलही। ओमन किहीन कि एखर ले छत्तीसगढ़ के खिलाड़ी मन ल राष्ट्रीय अउ अंतर्राष्ट्रीय स्तर म अवसर अउ पहिचान बनाय के मउका मिलही।
राष्ट्रीय राजमार्ग-एक सौ तीस-डी-निर्माण
बस्तर अंचल ल महाराष्ट्र ले जोड़ने वाला राष्ट्रीय राजमार्ग- 130-डी के कुतुल ले नीलांगुर तक 21 किलोमीटर हिस्सा के बनाय खातिर टेंडर प्रक्रिया राज्य सरकार डहार ले पूरा करे ले गे हवय। ए राष्ट्रीय राजमार्ग के लंबाई तकरीबन 195 किलोमीटर हवय, जेन ह कोंडागांव ले सुरू हो के नारायणपुर, कुतुल होवत नीलांगुर महाराष्ट्र तक जाथे। ए रद्दा के विकास होय ले बस्तर क्षेत्र सीधा राष्ट्रीय राजमार्ग नेटवर्क ले जुड़ जाही अउ बेपार, पर्यटन अउ सुरक्षा ल बड़ मजबूती मिलही।
उपमुख्यमंत्री अरूण साव ह किहीन कि राज्य सरकार ह ए परियोजना ल तेजी देवय खातिर सरलग परयास करे हवय। ए सड़क न सिरिफ छत्तीसगढ़ अउ महाराष्ट्र ल जोड़ही बल्कि, बस्तर अंचल के सामाजिक अउ आर्थिक विकास म घलो बड़का भूमिका निभाही।
बातों बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ म ए दारी हाल ही म मनाय गे राष्ट्रीय डाक सप्ताह अउ डाक विभाग के आने-आने सेवा मन उपर छत्तीसगढ़ डाक परिमंडल के निदेशक दिनेश कुमार मिस्त्री ले लेगे भेंटवार्ता के प्रसारण करे जाही। ए कारीकरम के प्रसारण काली 11 अक्टूबर के एफ.एम. अउ प्रायमरी चैनल म बिहनिया 9 बजे ले करे जाही। एला छत्तीसगढ़ स्थित आकाशवाणी के जम्मों केंद्र एके संघरा रिले करही।
अउ अब थोरकुन समाचार सार म –
– बीजापुर जिला के पिड़िया इलाक म माओवादी मन डहार ले लगाय गे आई.ई.डी. के चपेट म आय ले एक झिन गांव के रहइया ह घायल होगिस हवय।
– कबीरधाम जिला के स्वामी करपात्री स्टेडियम म आज ले 25वां राज्य स्तरीय शालेय क्रीड़ा प्रतियोगिता सुरू हो गे हवय।
– एंटी करप्शन ब्यूरो-ए.सी.बी. के टीम ह बिलासपुर के आदिम जाति कल्याण विभाग म पदस्थ एक झिन बाबू ल 10 हजार रूपिया के रिस्वत लेवत रंगेहाथ गिरफ्तार करीन हवय।