प्रधानमंत्री नरेन्द्र मोदी सनिच्चर ग्यारह अक्टूबर के नई दिल्ली म प्रधानमंत्री धन धान्य कृषि योजना अउ दलहन क्षेत्र म आत्मनिर्भरता मिशन के सुभारंभ करही। नई दिल्ली म आज पत्रकार मन ले गोठबात करत केन्द्रीय कृषि अउ किसान कल्याण मंत्री शिवराज सिंह चौहान ह किहीन कि देस गहूं अउ चाउर उत्पादन म आत्मनिर्भर हवय। अब दलहन उत्पादन म घलो आत्मनिर्भर बनही। ओमन किहीन कि देस म दलहन के खेती के उत्पादन बढ़ाय जाही। श्री चौहान ह किहीन कि प्रधानमंत्री धन धान्य कृषि योजना के उद्देश्य उत्पादन बढ़ाना, फसल विविधिकरण ल बढ़ावा देना, सिंचई अउ भंडारण म सुधार करना हे।
मुख्यमंत्री-जल संरक्षण कार्यशाला
मुख्यमंत्री विष्णुदेव साय आज रईपुर म सुजलाम भारत-जल संरक्षण अउ जल संवर्धन कार्यशाला म संघरीन। ओमन बतईन कि राज्य सरकार भूजल स्तर बढ़ाय, बरसा के पानी ल सहेजे, जल स्त्रोत म सुधार करे के काम करत हे। ओमन किहीन कि सरकार जल संरक्षण ल सिरिफ एक कार्यक्रम नइ भलूक जल आंदोलन के रूप म आगू बढ़ात हे। कार्यशाला म जल संरक्षण के प्रतीक जल कलश म रायगढ़ के केलो नदी के जल भरके प्रदेस के जम्मों नदी के संरक्षण अउ संवर्धन के संकल्प ले गीस।
मुख्यमंत्री-नियुक्ति पत्र
मुख्यमंत्री विष्णुदेव साय ह काली रईपुर म राखे गे एक कार्यक्रम म उच्च शिक्षा विभाग के प्रयोगशाला तकनीशियन के पद म चुने गे दू सौ तैंतीस उम्मीदवार मन ल नियुक्ति पत्र दीन। ए मउका म मुख्यमंत्री ह किहीन कि साफगोई अउ विश्वसनीय भर्ती ले प्रदेस के युवा मनके भविष्य सुरक्षित होय हे। ओमन बतईन कि पाछु बीस महीना म आने-आने विभाग म दस हजार ले जादा सरकारी नौकरी दे गेहे।
मुख्यमंत्री-वैद्य सम्मेलन
मुख्यमंत्री विष्णुदेव साय काली रईपुर म छत्तीसगढ़ आदिवासी स्थानीय स्वास्थ्य परंपरा अउ औषधि पादप बोर्ड कोति ले राखे गे राज्य स्तरीय परंपरागत वैद्य सम्मेलन म संघरीन। कार्यक्रम म बोलत मुख्यमंत्री ह किहीन कि राज्य सरकार सबो पंजीयन होय वैघ मन ल प्रसिक्षण देके ओमन ल पंजीयन प्रमाण पत्र दीहीं। ओमन यहू किहीन कि वैद्य परंपरा हमर देस के जुन्ना अउ समृद्ध चिकित्सा पद्धति हवय। भारत म करीबन साठ ले सत्तर हजार वैद्य हवय, जेमा ले करीबन पन्द्रह सौ छत्तीसगढ़ म सक्रिय हे। कार्यक्रम म मुख्यमंत्री ह पच्चीस झिन वैद्य मन ल दवई पीसे के मसीन दीन। उहें, छत्तीसगढ़ राज्य जैव विविधता बोर्ड कोति ले प्रकासित डॉक्टर देवयानी शर्मा के पुस्तक के विमोचन करीन। ए बेरा म मुख्यमंत्री ह औषधि पौधा के प्रदर्शनी ल देखीन।
कार्यक्रम ल कृषि मंत्री रामविचार नेताम अउ छत्तीसगढ़ आदिवासी स्थानीय स्वास्थ्य परंपरा अउ औषधि पादप बोर्ड के अध्यक्ष विकास मरकाम ह घलो संबोधित करीन।
अरूण साव-सक्ती
उपमुख्यमंत्री अरूण साव ह सक्ती जिला म अटल परिसर के लोकार्पण करे के संगेसंग अड़तालीस करोड़ रूपिया ले जादा के लागत के आने-आने विकास काम के लोकार्पण अउ भूमिपूजन करीन। कार्यक्रम म प्रधानमंत्री आवास योजना के हितग्राही मन ल नवा घर के चाबी सौंपे के संगेसंग राष्ट्रीय ग्रामीण आजीविका मिशन अउ प्रधानमंत्री स्वनिधि योजना के हितग्राही मन ल चेक दे गीस। उहें, स्वच्छता दीदी अउ स्वच्छता मित्र मनके सम्मान करे गीस।
कार्यक्रम म बोलत श्री साव ह किहीन कि रद्दा पुनर्निमाण के काम प्रदेस म जल्दी सुरू करे जाही। ओमन बतईन कि जिला म पच्यासी करोड़ रूपिया के लागत ले जल आवर्धन योजना के काम अंतिम चरण म हे।
अतिरिक्त सचिव-कांकेर
केन्द्रीय सामाजिक न्याय अउ अधिकारिता मंत्रालय के अतिरिक्त सचिव कैरेलिन खोंगवार देशमुख आज आकांक्षी जिला कांकेर पहुंचीन। ए दउरान ओमन मावा मोदोल कोचिंग संस्थान अउ सेंट्रल लाइब्रेरी ल देखीन। एखर बाद ओमन गांव कोदाभाट के शासकीय श्रवण बाधितार्थ विशेष विद्यालय पहुंचीन, जिहां ओमन निःशक्त अउ मूक-बधिर लइका मन ले गोठबात करीन।
राज्य ओपन स्कूल-परीक्षा
छत्तीसगढ़ राज्य ओपन स्कूल ह हायर सेकेंडरी अउ हाईस्कूल मुख्य परीक्षा के समय-सारिणी घोषित कर देहे। हायर सेकेंडरी के परीक्षा सत्रह नवंबर ले सुरू होके एक दिसंबर तक चलही। उहें, हाईस्कूल के परीक्षा सत्रह नवंबर ले सुरू होके अट्ठाईस नवंबर तक चलही। विद्यार्थी परीक्षा ले जुड़े जानकारी बर राज्य ओपन स्कूल के वेबसाइट देख सकत हे।
विश्व डाक दिवस
छत्तीसगढ़ डाक परिमंडल कोति ले आज विश्व डाक दिवस मनाय गीस। ए मउका म छत्तीसगढ़ के सबो डाक घर मन म आने-आने कार्यक्रम राखे गीस। संगेसंग ‘‘पोस्ट फॉर पीपुल लोकल सर्विस ग्लोबल रीच‘‘ के तहत रैली निकाले गीस अउ एक पेड़ मां के नाम अभियान म पौधा लगाय गीस। उहें, संभाग मन म पोस्टाथन के आयोजन करे गीस।
रायपुर म पत्रकार मन ले गोठबात करत छत्तीसगढ़ डाक परिमंडल म निदेशक डाक सेवा दिनेश कुमार मिस्त्री ह किहीन कि राष्ट्रीय डाक सप्ताह म आज विश्व डाक दिवस मनाय जात हे। ओमन यहू किहीन कि डाक विभाग कोति ले कतकोन किस्म के सेवा दे जात हे।
कांग्रेस पत्रकारवार्ता
प्रदेश कांग्रेस कोति ले जिला कांग्रेस कमेटी के नवा अध्यक्ष बर संगठन सृजन छत्तीसगढ़ अभियान प्रदेसभर म चलाय जात हे। ए अभियान म अखिल भारतीय कांग्रेस कमेटी के सचिव अउ रायपुर जिला संगठन सृजन अभियान के प्रभारी ह आज रायपुर के कांग्रेस भवन म पार्टी नेता अउ कार्यकर्ता मन ले रायपुर शहर कांग्रेस कमेटी के नवा अध्यक्ष के चयन के संबंध म गोठबात करीन। ओमन बतईन कि ए महीना के आखिरी तक शहर जिला कांग्रेस कमेटी अउ ग्रामीण जिला कांग्रेस कमेटी रायपुर के नवा अध्यक्ष के चयन कर ले जाही।
हाईकोर्ट-पुलिस हिरासत मौत
पाछु उनतीस मार्च के धमतरी जिला के अर्जुनी थाना म पुलिस हिरासत म होय एक मनखे के मउत के मामला म छत्तीसगढ़ उच्च न्यायालय ह मृतक के पत्नी ल तीन लाख अउ माता-पिता ल एक-एक लाख रूपिया मुआवजा देके आदेश देहे। मुख्य न्यायाधीश रमेश सिन्हा अउ न्यायाधीश बीडी गुरू के डिवीजन बेंच म ए मामला के सुनवाई होइस। हाईकोर्ट ह सुप्रीम कोर्ट के फैसला के हवाला देवत किहीन कि पुलिस हिरासत म मउत के मामला म मुआवजा देना सार्वजनिक कानून के तहत जरूरी हवय। कोर्ट ह गृह विभाग के सचिव ल निरदेस दीन हे कि मृतक के परिवार वाले मन ल आठ हफ्ता के भीतरी मुआवजा रासि दे जाय।
बस्तर राइजिंग
बस्तर के सांस्कृतिक, पर्यावरणीय अउ उद्यमशीलता ल राष्ट्रीय स्तर म पहचान देवाय बर बस्तर संभाग म काली आठ अक्टूबर ले ‘‘बस्तर राइजिंग‘‘ के आयोजन करे जात हे। अभियान के पहिली दिन हिमाचल प्रदेश ले आय नवाचारी दल के केशकाल विकासखंड के टाटामारी पहुंचीन। दल के सदस्य मन ह पुरातात्विक महत्ता के जघा गोबरहीन के जुन्ना शिवलिंग ल देखीन अउ छठवीं सताब्दी के गढ़धनोरा के इतिहास के संबंध म जानीन। एखर बाद उंखर टीम होनहेड़ जलप्रताप गीन। बस्तर राइजिंग अभियान म बस्तर के कहानी, नवाचार, अउ सांस्कृतिक विरासत ल देखाय जाही।
श्रीरामलला दर्शन योजना
श्रीरामलला दर्शन योजना म रायपुर संभाग के आठ सौ पचास तीर्थयात्री अयोध्या धाम बर रवाना होइन। सांसद बृजमोहन अउ विधायक सुनील सोनी ह रायपुर रेलवे स्टेसन ले विशेष ट्रेन ल हरियर झंडी देखईन। ए यात्रा के दउरान तीर्थयात्री कासी जाके भगवान विश्वनाथ के दर्सन करही। ए योजना म अब तक तैंतीस हजार ले जादा श्रद्धालु मन ल अयोध्या धाम अउ काशी विश्वनाथ के यात्रा कराय गेहे।
गोवा-पर्पल फेस्ट
बलौदाबाजार के मनोविकास केन्द्र के पांच झिन छात्र मनके चयन गोवा म होवइया पर्पल फेस्ट बर होय हे। ए फेस्ट नौ ले बारह अक्टूबर तक गोवा म होवत हे। चुने गे विद्यार्थी जिला के अगुवई करत पन्द्रह मिनट के योग प्रस्तुत करही, जउन दिव्यांगजन मनके क्षमता अउ उंखर भावना ल बताही। ए आयोजन म भाग लेके पहिली लइका मन ह आज जिला कलेक्टर दीपक सोनी ले भेंट करीन। कलेक्टर ह छात्र मन ल फेस्ट म चुने जाय म जिला के बड़े उपलब्धि बतावत सबो झन सुभकामना दीन।
कोरबा-हाथी विचरण
कोरबा जिला के करतला वनमंडल के रामपुर गांव अउ ओखर तीर-तखार के जंगल म पाछु पन्द्रह दिन ले करीबन पचास हाथी के दल किंजरत हे। पाछु रतिहा एक जंगली हाथी ह रामपुर निवासी एक मनखे ल मार डरीस। ए घटना ले लोगन डर्राय हवय। उहें, वन विभाग ह लोगन ले जंगल कोति नइ जाय बर चेताय हे।