खाद्य अउ नागरिक आपूर्ति विभाग के अनुसार चालू खरीफ विपणन बछर म समर्थन मूल्य म धान बेचे बर किसान मनके एग्रीस्टैक पोर्टल म पंजीयन कराना जरूरी होही। खाद्य सचिव रीना बाबा साहेब कंगाले ह कहिन हे कि किसान मन इकतीस अक्टूबर तक एग्रीस्टैक पोर्टल म पंजीयन करा सकत हे। ओमन ह बतईन कि ए पोर्टल ले संबंधित जानकारी या फेर सहायता बर टोल फ्री नंबर – एक आठ शून्य शून्य – दू तीन तीन – एक शून्य तीन शून्य म संपर्क कर सकत हे। बतादन कि एग्रीस्टैक पोर्टल ह केन्द्र सरकार डहार ले विकसित करे गे एक ठिन यूनिफाइड एग्रीकल्चर डेटाबेस हरय, जेमा किसान मनके भूमि अउ आधार लिंक्ड पंजीयन कराय जाथे।
जीएसटी-बैठक
वित्त मंत्री ओ.पी. चौधरी के अध्यक्षता म नवा रायपुर म राज्य कर जीएसटी विभाग के बइठका होइस। ए बइठका म विभागीय काम के प्रगति, राजस्व संग्रह, कर चोरी ल रोके अउ प्रशासनिक सुधार ल लेके गोठ होइस। ए बेरा म वित्तमंत्री ह कहिन कि जीएसटी टू प्वाइंट ओ के चलत टैक्स दर म करे गे कमी के लाभ ल आम मनखे तक पहुंचना चाही। ओमन ह कहिन कि कर चोरी ल रोके बर संगठित अउ ठोस प्रयास जरूरी हे। श्री चौधरी ह महाराष्ट्र अउ गुजरात म लागू सफल कर प्रबंधन प्रणाली के अध्ययन करके ओला छत्तीसगढ़ म लागू करे के जरूरत उपर घलो जोर दीन।
राज्योत्सव
छत्तीसगढ़ राज्य स्थापना के पच्चीसवां रजत जयंती बछर के मउका म एक ले पांच नवंबर तक नवा रईपुर म राज्योत्सव के आयोजन करे जाही। उहें, जिला स्तर म तीन दिन के राज्योत्सव होही। मुख्यमंत्री विष्णुदेव साय ह मीडिया ले गोठबात करत हुए बतइन कि राज्योत्सव के सुभारंभ प्रधानमंत्री नरेंद्र मोदी ह करही। ओमन ह बतइन कि प्रधानमंत्री ह नवा विधानसभा भवन अउ ट्राइबल म्यूजियम के घलो लोकार्पण करइया हे।
माओवादी-आत्मसमर्पण
नारायणपुर जिला म आज सात झिन माईलोगिन समेत सोलह झिन माओवादी मन ह पुलिस अधीक्षक के आगू आत्मसमर्पण करे हे। एमा ले दस झिन माओवादी मन उपर कुल मिलाके सत्तर लाख रूपिया के इनाम घोसित रिहीस। आत्मसमर्पण करइया माओवादी मन ल राज्य सरकार के पुनर्वास नीति के चलत पचास-पचास हजार रूपिया के चेक दे गीस। संगेसंग ओमन ल नक्सल उन्मूलन नीति के चलत मिलइया सबो जरूरी सुविधा घलो दे जाही।
प्लांट हादसा-मौत
सक्ती जिला के डभरा स्थित उच्चपिंडा म संचालित एक ठिन निजी पावर प्लांट म लिफ्ट गिरे ले तीन झिन मजदूर के मउत होगे। जबकि सात झिन आने मजदूर मन ह गंभीर रूप ले घायल होगे हे, जेमन ल इलाज बर रायगढ़ अस्पताल भेजे गेहे। जिला के अतिरिक्त पुलिस अधीक्षक हरीश यादव ह बतईन कि बॉयलर मशीन ल बनाय बर दस झिन मजदूर मन लिफ्ट म चढ़के जात रिहीन। फेर तभे तकनीकी खराबी के सेती ए लिफ्ट ह नीचे गिर गे, जेखर ले दू झिन मजदूर मनके मउका म ही मउत होगे रिहीस। त उहें, एक झिन आने मजदूर ह इलाज के बेरा म दम तोड़ दीस। ए घटना के बाद तनाव ल देखत हुए मउका म पुलिस बल ल तैनात करे गेहे।
लखनी साहू-राष्ट्रीय पुरस्कार
कोरबा जिला के लखनी साहू ल राष्ट्रपति द्रौपदी मुर्मु ह ‘‘माई भारत एनएसएस राष्ट्रीय पुरस्कार‘‘ ले सम्मानित करे हे। लखनी साहू ह विश्वेश्वरैया इंजीनियरिंग कॉलेज के राष्ट्रीय सेवा योजना-एनएसएस के स्वयंसेविका हरय।
ए उपलब्धि म मुख्यमंत्री विष्णुदेव साय ह लखनी साहू ल बधाई दीन।
स्कूल-सामाजिक अंकेक्षण
स्कूल शिक्षा विभाग कोति ले मुख्यमंत्री शिक्षा गुणवत्ता अभियान के चलत छह ले आठ अक्टूबर तक राज्य के अंठावन हजार स्कूल के सामाजिक अंकेक्षण करे जात हे। स्कूल शिक्षा मंत्री गजेन्द्र यादव ह सबो जिला अउ विकासखंड शिक्षा अधिकारी ले किहीन हे कि सामाजिक अंकेक्षण ह लइका मनके शिक्षा के वास्तविक स्थिति ल जाने अउ ओला सुधारे के मउका हे। ओमन ह कहिन कि हरेक अधिकारी अउ सिक्षक मन ल ए सुनिश्चित करना चाही कि अंकेक्षण के निष्कर्ष के आधार म तुरते सकारात्मक कदम उठाय जाय। ए अभियान के उद्देश्य स्कूल म राष्ट्रीय शिक्षा नीति के घटक के क्रियान्वयन करके लइका मनके सीखे के क्षमता म सुधार लाना हे।
मुख्यमंत्री-अंतरिक्ष वैज्ञानिक प्रतिनिधिमंडल
मुख्यमंत्री विष्णुदेव साय ह आज रायपुर के उंखर निवास कार्यालय म इसरो अहमदाबाद केन्द्र के निदेशक डॉक्टर एन.एम. देसाई के नेतृत्व म अंतरिक्ष वैज्ञानिक मनके एक प्रतिनिधिमंडल ह भेंट करीन। ए बेरा म मुख्यमंत्री अउ वैज्ञानिक मनके बीच इसरो म छत्तीसगढ़ के भागीदारी बढ़ाय, राज्य के जवान लइका मन ल नवा अवसर सृजित करे, शासन के कामकाज म पारदर्सिता अउ दक्षता लाय बर इसरो के तकनीक के उपयोग अउ स्कूल-कालेज के पढ़ईया लइका मन बर इसरो कोति ले चलत गतिविधि उपर गोठ घलो होइस। मुख्यमंत्री ह किहीन कि भारत ह अंतरिक्ष विज्ञान के क्षेत्र म जो ऊंचाई प्राप्त करे हे, ओ ह हरेक भारतीय मन बर गर्व के बिसय हे।
अरूण साव-अटल परिसर
उपमुख्यमंत्री अरूण साव ह जांजगीर-चांपा जिला के चार नगरीय निकाय म तीन करोड़ रूपिया जादा के लागत ले नवा बने अटल परिसर के लोकार्पण करीन। ओमन ह नवागढ़ म दू करोड़ उनचास लाख रूपिया के लागत ले बनत एसटीपी के भूमिपूजन घलो करीन। ए बेरा म श्री साव ह पामगढ़ नगर पंचायत म भवन निर्माण अउ कतकोन विकास काम बर एक-एक करोड़ रूपिया देके घोसना घलो करीन हे। ओमन ह राहौद नगर पंचायत बर दू करोड़, खरौद नगर पंचायत बर तीन करोड़ अउ नवागढ़ नगर पंचायत बर ढाई करोड़ रूपिया देके बात कहे हे।
एनटीए-पंजीकरण प्रक्रिया
राष्ट्रीय परीक्षण एजेंसी-एनटीए ह विश्वविद्यालय अनुदान आयोग राष्ट्रीय पात्रता परीक्षा-यूजीसी नेट दिसंबर दू हजार पच्चीस बर पंजीकरण के प्रक्रिया ल सुरू कर देहे। इच्छुक उम्मीदवार मन ह आधिकारिक वेबसाइट म जाके लिंक के माध्यम ले ए परीक्षा बर अपन आवेदन कर सकत हे। पात्र उम्मीदवार मन ल जूनियर रिसर्च फेलोशिप प्रदान करे अउ सहायक प्रोफेसर के रूप म नियुक्त करे के संग पच्यासी ठिन विषय म पीएचडी म दाखिला ले बर परीक्षा के आयोजन होही।
जल जीवन मिशन
जल जीवन मिशन के चलत पंचानवे प्रतिशत काम ल पूरा करके रायपुर जिला ह राज्य म दूसर स्थान पाय हे। ए जिला म मिशन के अंतर्गत सामिल चार सौ सतहत्तर म ले दू सौ सैंतालीस ठिन गांव म जल आपूर्ति सुरू करे जा चुके हे। लोक स्वास्थ्य यांत्रिकी खंड, रायपुर के कार्यपालन अभियंता अनिल कुमार बच्चन ह बतईन कि मार्च दू हजार छब्बीस तक रायपुर जिला के बाकी बचे एक सौ छब्बीस गांव म घलो सबो काम ल पूरा करके पानी के आपूर्ति सुरू करे जाही। ओमन ह बतईन कि जिला म तीन सौ तिरानवे ठिन पानी के टंकी बनाय जाही, जेमा ले तीन सौ सतहत्तर के काम पूरा हो चुके हे। बाकी बचे सोलह ठिन पानी के टंकी ल बनाय के काम चलत हे।
प्रशिक्षण कार्यक्रम
रईपुर के राजीव गांधी राष्ट्रीय भू-जल प्रसिक्षण अउ अनुसंधान संस्थान म पशुपालन अउ डेयरी विभाग कोति ले ई-लाइवस्टाक इंटीग्रेटेड सैंपल सर्वे एप्लीकेसन म दू दिन के बिसेस प्रसिक्षण कारीकरम करे गीस। ए कारीकरम के उद्घाटन कृषि मंत्री रामविचार नेताम ह करीन। ए बेरा म श्री नेताम ह किहीन कि सटीक अउ विश्वस्नीय पशुधन आंकड़ा ह राज्य अउ केंद्र सरकार के नीति निर्माण प्रक्रिया म निर्णायक भूमिका निभाथे। ओमन ह वैज्ञानिक आधार म आंकड़ा के संकलन अउ उंखर प्रभावी उपयोग उपर जोर दीन।
अउ अब थोरकुन समाचार सार म –
– मुख्यमंत्री विष्णुदेव साय आज रईपुर म जनजातीय गौरव दिवस कार्यसाला म सामिल होइन। ए बेरा म श्री साय ह जनजातीय गौरव दिवस के मउका म होवइया कारीकरम के तियारी ल लेके गोठ घलो करीन।
– अग्निवीर थल सेना भर्ती बर लिखित परीक्षा ल पास करइया अभ्यर्थी मन बर कोंडागांव जिला प्रशासन कोति ले पंद्रह अक्टूबर ले निसुल्क शारीरिक दक्षता प्रसिक्षण अउ जरूरी मार्गदर्सन दे जाही। इच्छुक अभ्यर्थी मन जादा जानकारी बर रोजगार कार्यालय के मोबाइल नंबर-नौ पांच आठ चार सून्य दू सून्य दू सात नौ म संपर्क कर सकत हे।