केन्द्रीय आर्थिक मामला के मंत्रिमंडलीय समिति ह चौबीस हजार छह सौ चौंतीस करोड़ रूपिया के चार ठन रेल परियोजना ल मंजूरी दे हवय। एमा गोंदिया-डोंगरगढ़ म चौथा, भुसावल-वर्धा म तीसरा अउ चौथा, वडोदरा-रतलाम म तीसरा अउ चौथा अउ इटारसी-भोपाल-बीना म चौथा रेललाइन सामिल हे। ए चार ठन मल्टीट्रैकिंग परियोजना ह छत्तीसगढ़ संघरा महाराष्ट्र, मध्यप्रदेश अउ गुजरात के अट्ठारह ठन जिला ल कवर करही। ए परियोजना ले भारतीय रेलवे के नेटवर्क करीबन आठ सौ चौरानवे किलोमीटर तक बढ़ जही।
सूचना अउ प्रसारण मंत्री अश्वनी वैष्णव ह आज नई दिल्ली म कैबिनेट के बइठका के बाद मीडिया ल ए जानकारी दीन। ओमन बतईन कि एक हजार छह सौ उन्नीस किलोमीटर लंबाई वाले ए परियोजना के लगभग तीन हजार छह सौ तैंतीस गांव ल फायदा मिलही।
श्री वैष्णव ह बतईन कि अंठानवे किलोमीटर लंबा गोंदिया-डोंगरगढ़ चौथा लाइन दू हजार दू सौ तेईस करोड़ रूपिया के लागत ले पांच बछर म पूरा होही।
राज्यपाल-स्पेस एजुकेशन लैब
राज्यपाल रमेन डेका ह आज कोरिया जिला के बैंकुंठपुर के शासकीय आदर्श कन्या उच्चतर माध्यमिक विद्यालय म सरगुजा संभाग के पहिली स्पेस एजुकेशन लैब के सुभारंभ करीन। ए आधुनिक लैब भारतीय अंतरिक्ष यात्री ग्रुप कैप्टन शुभांशु शुक्ला के नाम म समर्पित करे गेहे। जिला खनिज न्यास निधि-डीएमएफ के सहयोग ले बने ए प्रयोगसाला ह विद्यार्थी मन म अंतरिक्ष, भौतिकी, भूगोल अउ प्रौद्योगिकी बर रूचि बढ़ाय म मील के पत्थर बनही।
ए मउका म राज्यपाल ह कहिन कि ए लैब न सिरिफ अंतरिक्ष विज्ञान फेर दूसर विज्ञान विषय म घलो विद्यार्थी मन बर उपयोगी साबित होही। ओमन ह प्रयोगसाला बर ड्रोन, स्मार्ट बोर्ड अउ प्रोजेक्टर देवाय के सहमति दीन। कार्यक्रम के दउरान राज्यपाल ह विद्यार्थी मन ले लैब के तकनीकी पक्ष के जानकारी लीन।
अपन कोरिया प्रवास के दउरान राज्यपाल ह कृषि विज्ञान केन्द्र अउ जिला प्रशासन के संयुक्त प्रयास ले तैयार करे गे ‘पीनट बटर-हनी फ्लेवर्ड‘‘ उत्पाद के सुभारंभ करीन।
स्पेशल एजुकेटर-भर्ती आवेदन
प्रदेस म स्कूल सिक्षा विभाग डहार ले स्पेशल एजुकेटर के रिक्त पद म सीधा भर्ती बर आज ले आवेदन के प्रक्रिया सुरू होगे हे। अभ्यर्थी मन अपन आवेदन राज्य के सबो जिला सिक्षा अधिकारी कार्यालय म जमा कर सकत हे। आवेदन सिरिफ पंजीकृत डाक या व्यक्तिगत रूप ले ही स्वीकार करे जाही। आवेदन जमा करे के आखिरी तारीख तेरह अक्टूबर तय करे गेहे।
निर्वाचन आयोग-नोटिस
निर्वाचन आयोग ह छत्तीसगढ़ी समाज पार्टी ल पाछु तीन वित्तीय बछर के लेखा-जोखा तय करे गे समय-सीमा प्रस्तुत करे म कारण बताओ नोटिस जारी करे हे। ए मामला के सुनवाई नौ अक्टूबर के रायपुर के मुख्य निर्वाचन पदाधिकारी कार्यालय म होही। सुनवाई म पार्टी के अध्यक्ष, महासचिव या प्रमुख पदाधिकारी के उपस्थित होना जरूरी होही। निर्वाचन पदाधिकारी ह स्पष्ट करे हे कि यदि कहूं निर्धारित तिथि तक पार्टी डहार ले कोनो जवाब नइ मिलही, त ए माने जाही कि पार्टी ल ए बारे म कुछुच नइ कहना हे अउ आयोग बिना कोई दूसर संदर्भ के आदेस पारित करही।
हाईकोर्ट-जनहित याचिका
छत्तीसगढ़ उच्च न्यायालय के मुख्य न्यायाधीश रमेश सिन्हा अउ न्यायाधीश बी.डी. गुरू के खंडपीठ म आज बिलासपुर म हवाई सुविधा बढ़ाय ले जुड़े दू ठन जनहित याचिका उपर सुनवाई होइस। सुनवाई के दउरान रक्षा मंत्रालय डहार ले मौजूद अप सॉलिसिटर जनरल रमाकांत मिश्रा ह बतईन कि रक्षा मंत्रालय ह अब इकहत्तर करोड़ रूपिया के बदला चालीस करोड़ रूपिया करे जाय के मांग ल स्वीकार कर लेहे। ए कीमत जमीन अधिग्रहण म खर्च करे गे रासि अउ बछर दू हजार चौदह ले अभी तक के ब्याज के आधार म तय करे गेहे। अब राज्य सरकार डहार ले चालीस करोड़ रूपिया जमा करे म दू सौ नब्बे एकड़ जमीन एयरपोर्ट विस्तार बर मिल जही। उच्च न्यायालय ह नाइट लैंडिंग लाइसेंस अउ जमीन हस्तांतरण संघरा दूसर विषय म राज्य के मुख्य सचिव अउ अलायंस एयर ल नवा सपथ पत्र दाखिल करे बर निरदेस देहे। ए मामला के अगला सुनवाई अब तक सात नवंबर के होही।
उद्योग मंत्री-जर्मनी
जर्मनी म आयोजित विश्व के सबले बड़े खाद्य प्रदर्शनी म छत्तीसगढ़ के उद्योग मंत्री लखनलाल देवांगन सामिल होइन। ए दउरान श्री देवांगन ह कतकोन बइठका म छत्तीसगढ़ के अगुवई करीन। बइठका म श्री देवांगन ह छत्तीसगढ़ के नवा औद्योगिक विकास नीति के जानकारी दीन। संगेसंग राज्य सरकार डहार ले औद्योगिक पार्क, विशेष रूप ले खाद्य पार्क म निवेस करे बर दे जावत प्रोत्साहन योजना के बारे म बतईन।
बस्तर राइजिंग
बस्तर संभाग के सबो सात जिला म काली आठ अक्टूबर ले ‘‘बस्तर राइजिंग‘‘ अभियान सुरू होही। जनसपंर्क विभाग के मदद ले ए अभियान दू हफ्ता तक चलाय जाही, जेखर उद्देश्य बस्तर के सांस्कृतिक, पर्यावरणीय अउ उद्यमशील क्षमता ल राष्ट्रीय स्तर म प्रदर्शित करना हे। अभियान के दउरान विशेषज्ञ, युवा, शिल्पकार अउ स्थानीय समुदाय के बीच गोठबात, कार्यशाला अउ सांस्कृतिक कार्यक्रम आयोजित करे जाही।
‘‘बस्तर राइजिंग‘‘ के समूह केशकाल, नारायणपुर, कोंडागांव, सुकमा, दंतेवाड़ा, बीजापुर, चित्रकोट, बारसूर, अउ जगदलपुर के भ्रमण करही। ए दउरान बस्तर के कला, हस्तशिल्प, कृषि, पर्यटन, खेल अउ शिक्षा ले जुड़े संभावना उपर ध्यान देवाय जाही। ए अभियान के समापन रायपुर म ‘‘हार्मेनी फेस्ट‘‘ के रूप म होही, जेमा बस्तर के प्रेरक कहानी, नवाचार अउ सांस्कृतिक विरासत प्रदर्शित करे जाही।
आईएनएस आन्द्रोत-भारतीय नौसेना
आईएनएस आन्द्रोत ल भारतीय नौसेना म सामिल कर ले गेहे। एला बनाय बर विशेष ग्रिड स्टील के आपूर्ति स्टील अथॉरिटी ऑफ इंडिया लिमिटेड-सेल के भिलाई, बोकारो अउ राउरकेला इस्पात संयंत्र ले करे गे हवय। एला सेल के बड़े उपलब्धि के रूप म देखे जावत हे। आईएनएस आन्द्रोत, पनडुब्बी रोधी युद्धक जलपोत श्रृंखला के दूसर युद्धपोत हे। ए श्रृंखला के पहिली जलपोत आईएनएस अर्नाला रिहीस। आईएनएस आन्द्रोत ल कलकत्ता के एक ठिन कंपनी ह बनाय हे। एला बनाय म अस्सी प्रतिशत ले जादा स्वदेशी सामान के उपयोग करे गेहे।
राज्य ओपन स्कूल-परिणाम
छत्तीसगढ़ राज्य ओपन स्कूल डहार ले आयोजित हाईस्कूल अउ हायर सेकेंडरी परीक्षा के परिणाम घोषित कर दे गेहे। हाईस्कूल परीक्षा म तीस दशमलव शून्य-दो प्रतिशत अउ हायर सेकेंडरी परीक्षा म छियालीस दशमलव दू-आठ प्रतिशत विद्यार्थी मन पास होय हे। विद्यार्थी मन अपन परीक्षा परिणाम ल छत्तीसगढ़ राज्य ओपन स्कूल के आधिकारिक वेबसाइट म देख सकत हे।
बस्तर दशहरा-समापन
मावली माता के डोली अउ मां दंतेश्वरी के छत्र के विदाई के संग पचहत्तर दिन तक चलइया विश्व प्रसिद्ध बस्तर दशहरा के आज समापन होगीस। आखिरी दिन माईजी के डोली विदाई ले पहिली मां दंतेश्वरी मंदिर म विधि-विधान ले पूजापाठ करे के बाद माईजी के डोली ल सिंह ड्योढ़ी म सजा के लाय गीस। इहां पुलिस डहार ले हर्ष फायर करके माईजी ल सलामी दे गीस। एखर बाद गाजा-बाजा के संग माईजी के डोली ल कंधा म रखके पूर्व राजपरिवार के सदस्य कमलचंद भंजदेव अउ दूसर लोगन मन डोली ल जिया डेरा तक पहुंचईन। जिया डेरा म पूजापाठ के बाद माईजी के डोली अउ छत्र ल शक्तिपीठ दंतेवाड़ा बर रवाना करे गीस।
वर्ल्ड पैरा एथलेटिक्स चैंपियनशिप
नई दिल्ली म आयोजित वर्ल्ड पैरा एथलेटिक्स चैंपियनशिप म भारतीय दल ह अभी तक के सबले बढ़िया प्रदर्शन करत बाईस ठन पदक ल अपन नाव म कर लेहे। एमा छह स्वर्ण, नौ रजत अउ सात ठन कांस्य पदक सामिल हे।
मुख्यमंत्री विष्णुदेव साय ह भारतीय पैरा-एथलीट्स के प्रदर्सन म बधाई देवत किहीन कि ए उपलब्धि पूरा राष्ट्र बर प्रेरणा देवत हे। ओमन किहीन कि हमर पैरा एथलीट मन साबित कर देहे कि जब संकल्प अडिग अउ निरंतर मेनहत हो तब कोनों भी लक्ष्य ल हासिल करे जा सकत हे।
अउ अब थोरकुन समाचार सार म –
– कस्टम मिलिंग घोटाला मामला म आर्थिक अपराध अन्वेषण ब्यूरो-ईओडब्ल्यू ह अनिल टुटेजा अउ अनवर ढेबर के खिलाफ पन्द्रह सौ पन्ना के चालान रायपुर के विशेष न्यायालय म पेस करीन हे।
– कोरबा जिला म उरगा ले कुसमुंडा तक बने करीब तेरह किलोमीटर लंबा नवा विद्युतीकृत ब्रॉडग्रेज रेललाइन के रेल अधिकारी मन ह परीक्षण करीन।