मुख्यमंत्री विष्णुदेव साय ह अपन नई दिल्ली प्रवास के दउरान आज राष्ट्रपति द्रौपदी मुर्मू ले सौजन्य भेंट करीन। मुख्यमंत्री ह राष्ट्रपति ल बतइन कि बछर दू हजार पच्चीस छत्तीसगढ़ राज्य के गठन के रजत जयंती वर्ष के रूप म मनाय जावत हे। ओमन राष्ट्रपति ल छत्तीसगढ़ आय के नेवता दीन। संगेसंग श्री साय ह रजत जयंती वर्ष के बिसेस मउका म राज्य सरकार डहार करे जावत विकास कार्य, जनकल्याण अउ सांस्कृतिक गौरव ले जुड़े कारीकरम के जानकारी दीन। राष्ट्रपति ह राज्य के विकास अउ जनकल्याण बर करे जात परयास के तारीफ करत छत्तीसगढ़ के सरलग प्रगति के कामना करीन।
उहें, मुख्यमंत्री ह आज नई दिल्ली म उपराष्ट्रपति सी.पी.राधाकृष्णन ले घलो भेंट करीन। ए दउरान मुख्यमंत्री ह उपराष्ट्रपति ल छत्तीसगढ़ के गठन के रजत जयंती बछर के मउका म पांच नवंबर के नया रईपुर म आयोजित राज्योत्सव के समापन समारोह म सामिल होय के निमंत्रण दीन। उपराष्ट्रपति ह एखर बर अपन सहमति दे दे हवय।
मुख्यमंत्री-रक्षा मंत्री मुलाकात
मुख्यमंत्री विष्णुदेव साय ह आज नई दिल्ली म केंद्रीय रक्षा मंत्री राजनाथ सिंह ले उंखर निवास म भेंट करीन। ए मउका म केंद्रीय आवासन अउ सहरी कार्य राज्य मंत्री तोखन साहू अउ मुख्यमंत्री के प्रमुख सचिव सुबोध कुमार सिंह घलो मौजूद रिहीन। ए दउरान मुख्यमंत्री ह रक्षा मंत्री ले बिलासपुर एयरपोर्ट के विस्तार के बारे म चर्चा करीन। एखरे संग मुख्यमंत्री ह इंहा रक्षा क्षेत्र ले जुड़े विकास काम ल घलो सुरू करे के आग्रह करीन।
मुख्यमंत्री ह छत्तीसगढ़ म विसेस सेना भर्ती रैली के आयोजन करे जाय के घलो अनुरोध करीन, जेखर ले ए राज्य के युवा मन ल देस सेवा के मउका मिल सकय। बइठका म मुख्यमंत्री ह सुझाव दीन कि रक्षा मंत्रालय जब नवा नौसेनिक जहाज ल लांच करही त, ओमा ले कुछेक नांव छत्तीसगढ़ के नदी अउ क्षेत्र मनके नाव म रखे जाय, जइसे कि इंद्रावती, महानदी या बस्तर मुख्यमंत्री ह रक्षा मंत्री ल राज्य सरकार के नवा औद्योगिक नीति के तहत रक्षा अउ इलेक्ट्रानिक्स निर्माण ल बढ़ावा दे जाय के योजना के बारे म घलो जानकारी दीन।
बिहार विधानसभा चुनाव
बिहार म विधानसभा चुनाव के तारीख के घोसना कर दे गेहे। मुख्य निर्वाचन आयुक्त ज्ञानेश कुमार ह नई दिल्ली म एक ठन प्रेस कॉन्फ्रेंस म बतइन कि बिहार विधानसभा के दू सौ तिरालीस सीट बर दू चरण म छै अउ ग्यारा नवंबर के मतदान करे जाही। वोट के गिनती चौदह नवंबर के होही। पहिली चरण म छै नवंबर के एक सौ इक्कीस सीट बर वोट डारे जाही अउ दूसर चरण म ग्यारा नवंबर के एक सौ बाईस सीट बर मतदान होही। चुनाव कारीकरम के घोसना के संगेच बिहार म आदर्स आचार संहिता लागू होगे हवय।
राज्यपाल-सरगुजा
राज्यपाल रमेन डेका ह आज सरगुजा जिला के प्रवास के दउरान आकांक्षी विकासखंड लखनपुर म अधिकारी मनके बइठका लेके विकास काम, शासकीय योजना मनके अउ जनकल्याणकारी कारीकरम के जानकारी लीन। ओमन ह पिछड़ा जनजाति पहाड़ी कोरवा क्षेत्र म स्वास्थ्य सिविर लगाय के अउ महत्वपूर्ण योजना के लाभ आखिरी मनखे तक पहुंचाय के निरदेस दीन। संगेसंग ओमन ह जल अउ पर्यावरण संरक्षण, पशुपालन, पर्यटन विकास, स्थानीय स्वरोजगार ल बढ़ावा दे उपर जोर दीन।
स्वास्थ्य विभाग-सदी खांसी दवा
केंद्रीय स्वास्थ्य मंत्रालय डहार ले लइका मन ल सर्दी-खांसी-जुकाम बर कोनो भी दवई या सिरप नइ दे जाय के बारे म निरदेस जारी होय के बाद छत्तीसगढ़ के स्वास्थ्य विभाग ह सबो जिला के स्वास्थ्य अधिकारी मन ल जरूरी निरदेस जारी करीन हे। एमा स्वास्थ्य मंत्रालय डहार ले जारी निरदेस के पालन कड़ाई ले करे जाय बर केहे गेहे। स्वास्थ्य विभाग ह सहायक औषधि नियंत्रक अउ निरीक्षक मन ल चिट्ठी भेज के सबो दवई बिक्री संस्थान अउ निजी फॉर्मेसी मनके तत्काल निरीक्षण करे बर निरदेस दीन हे।
बिसेसज्ञ मनके मानना हे कि लइका मनके खांसी जुकाम जइसन बीमारी ह अपने आप ठिक हो जथे, एखर बर दवई लेना जरूरी नइ राहय।
बस्तर रेडियो सेट
नक्सल प्रभावित बस्तर संभाग म, केंद्रीय रिजर्व पुलिस बल ह हालेच म ग्रामीण मन ल दस हजार ले जादा रेडियो सेट बांटिन हे। सीआरपीएफ के कमांडेंट अउ जनसंपर्क प्रभारी हरमिंदर सिंह बतइन कि ए रेडियो सेट बस्तर संभाग के सबो सात जिला म दे गे हवय।
बस्तर संभाग म पाछू कुछेक महिना म माओवादी हिंसा म बहुत कमी आय हे। सुरक्षाबल ह भीतर के इलाका म कैंप लगाय हे। केंद्रीय सशस्त्र पुलिस बल बस्तर क्षेत्र म माओवादी मन ले लोहा लेके संगेसंग स्थानीय ग्रामीण मनके भरोसा जीते म घलो जुटे हे। घना जंगल अउ कठिन परिस्थिति वाले बस्तर संभाग म रेडियो ह संचार के एक ठन बड़े माध्यम हे।
माओवादी-आत्मसमर्पण
गरियाबंद जिला म आज तीन झन इनामी माओवादी मन ह आत्मसमर्पण करीन हे, जेमा दू झन माईलोगिन मन घलो सामिल हे। एमा ले एक झन माओवादी ह हथियार के साथ सरेंडर करे हे। ए सबो झन गरियाबंद-धमतरी-नुआपाड़ा डिवीजन म सक्रिय रिहीन। इंखर मन उपर एक-एक लाख रूपिया के इनाम रिहीस। पुलिस अधीक्षक निखिल राखेचा ह बतइन कि ए सबो झन सरकार के पुनर्वास अउ समर्पण नीति ले प्रभावित होके आत्मसमर्पण करीन हे। एमन ह कतकोन घटना म सामिल रिहीन।
ओति, दंतेवाड़ा जिला म आज सुरक्षाबल ह प्रतिबंधित माओवादी संगठन के तीन झन आरोपी मन ल गिरफ्तार करीन हे। मिले जानकारी के अनुसार मालेवाही थाना क्षेत्र सातधार पुलिया के तीर संदिग्ध लोगन के होय के सूचना मिले म पुलिस अउ सीआरपीएफ के टीम ल मउका बर रवाना करे गे रिहीस। इही दउरान घेराबंदी करके सुरक्षाबल ह तीन झन संदिग्ध मन ल हिरासत म ले लीस। पूछताछ म ओमन ह प्रतिबंधित माओवादी संगठन-सी.पी.आई.एम. म सक्रिय सदस्य के रूप म काम करना अउ ए इलाका म हाल म होय आईईडी विस्फोट के घटना म सामिल होना स्वीकार करीन हे। ए हादसा म सीआरपीएफ के दू झन जवान मन घायल होय रिहीन। मउका ले एक किलो के प्रेसर आईईडी अउ दूसर समान घलो बरामद करे गेहे। आईईडी ल मउकच म निष्क्रिय कर दे गीस।
दुर्घटना
कबीरधाम जिला के चिल्फी घाटी म काली एक ठन मोटर अउ टरक के टकराय ले तीन झन महिला शिक्षक संघरा कुल पांच लोगन के मउत होगे। उहें, पांच झन दूसर मन घायल हो गेहे। घायल मन ल जिला अस्पताल म दाखिल कराय गे हवय। ए सबो झन पश्चिम बंगाल के रहइया रिहीन अउ कान्हा राष्ट्रीय उद्यान घूमे के बाद बिलासपुर जावत रिहीन। इही दउरान अकालघरिया गांव तीर उंखर गाड़ी के ट्रक ले टक्कर होगे। ए गाड़ी म दस झन बइठे रिहीन।
मुख्यमंत्री विष्णुदेव साय ह ए घटना म शोक व्यक्त करीन अउ दिवंगत आत्मा के सांति अउ घायल मनके जल्दी ठीक होय के कामना करीन हे। उहें, धमतरी जिला के भटगांव क्षेत्र म तेज रफ्तार कार के टक्कर ले एक झन मनखे के मउत होगे अउ पांच झन गंभीर रूप ले घायल होगे हवय।
शालेय क्रीडा प्रतियोगिता
रायगढ़ म ए बखत पच्चीसवां राज्स स्तरीय शालेय क्रीड़ा प्रतियोगिता करे जावत हे। एमा वॉलीबॉल, सॉफ्टबॉल, खो-खो अउ क्रिकेट के मुकाबला होवत हे, जेमा रईपुर, बिलासपुर, दुरूग, बस्तर अउ सरगुजा संभाग के करीब छै सौ बत्तीस खिलाड़ी भाग लेवत हे। प्रतियोगिता के उद्घाटन काली राज्यसभा सांसद देवेन्द्र प्रताप सिंह ह करीन। ए प्रतियोगिता आठ अक्टूबर तक चलही।