केंद्रीय राज्य मंत्री डॉक्टर राजभूषण चौधरी अउ मुख्यमंत्री विष्णुदेव साय आज रईपुर म राखे गे मछुवारा जागरूकता सम्मेलन म सामिल होइन। ए मउका म समारो म बोलत केंद्रीय राज्य मंत्री श्री चौधरी ह किहीन कि निषाद समाज के इतिहास अउ परंपरा बारे म नवा पीढ़ी ल बताना अउ सिखाना जरूरी हे।
ए मउका म मुख्यमंत्री ह जवान लइका मन ल नसा पानी ले दूर रहे अपील करीन। समारोह ल उपमुख्यमंत्री विजय शर्मा घलो संबोधित करीन।
माइनिंग कॉन्क्लेव
मुख्यमंत्री विष्णुदेव साय ह आज नवा रईपुर म राखे गे छत्तीसगढ़ माइनिंग कॉन्क्लेव समारोह म सामिल होइन। ए दउरान मुख्यमंत्री के उपस्थिति म आईएसएम धनबाद अउ छत्तीसगढ़ भौमिकी अउ खनन संचालनालय के संगेच कोल इंडिया अउ छत्तीसगढ़ खनिज विकास निगम के बीच समझौता ज्ञापन उपर दस्तखत करे गीस। संगेसंग पांच ठिन माइनिंग ब्लॉक बर एनआईटी जारी करे गीस। उहें, नौ ठिन खदान बर प्रिफर्ड बिडर आदेस दे दीस। ए मउका म मुख्यमंत्री खनिज ऑनलाइन टू प्वाइंट ओ, डीएमएफ पोर्टल अउ रेत खदान मनके ऑनलाइन नीलामी बर रिवर्स ऑक्सन पोर्टल के सुभारंभ करीन।
समारोह म बोलत मुख्यमंत्री ह किहीन कि राज्य सरकार ह पारदर्सी खनन नीति, ई-नीलामी, डिजिटल निगरानी अउ पर्यावरण ल धियान म राखत रणनीति के संगे विकास खातिर नवा दिसा देहे।
मुख्यमंत्री ह किहीन कि छत्तीसगढ़ ह देस के पहलइया राज्य हरय, जउन ह लिथियम ब्लाक के नीलामी करे हे। अब तक साठ ठिन खनिज ब्लाक मनके नीलामी पूरा हो चुके हे। उहें, पांच ठिन नवा ब्लाक मन बर टेंडर आज निकाले गेहे। मुख्यमंत्री ह यहू किहीन कि नवा रेत नीति ले पारदर्सिता बाढ़े हे अउ अब जल्दीच दू सौ ले जादा रेत खदान मनके ई-नीलामी करे जाही। कारीकरम म मुख्यमंत्री ह पर्यावरण प्रबंधन, प्रदूषण नियंत्रण अउ सुरक्षा मानक मनके पालन करइया तिरालिस ठिन खदान मन ल स्टार आवार्ड ले सम्मानित करे हे।
एसईसीएल-स्टोर यूनिट शुभारंभ
कोरबा स्थित साउथ ईस्टर्न कोलफील्ड्स लिमिटेड एसईसीएल म देस के पहिली माईलोगिन ले चलइया सेंट्रल स्टोर यूनिट के सुभारंभ करे गीस। ए यूनिट के उद्घाटन एसईसीएल के अध्यक्ष सह प्रबंध निदेशक हरीश दुहन ह करीन। भारत सरकार के स्पेसल कैंपेन फाईव प्वाइंट ओ के तहत सुरू करे गीस। ए अगुवई के उद्देस्य कोल इंडिया के तकनीकी जघा मन म माईलोगन मनके भागीदारी बर उछाह बढ़ाना हे। नवा सेंट्रल स्टोर यूनिट ल आठ झिन माईलोगिन अधिकारी अउ कर्मचारी मनके एक ठिन टीम डहार ले चलाय जाही, जेखर अगुवई इलेक्ट्रिकल अउ मेकेनिकल विभाग के सिनियर मैनेजर अउ धनबाग के भारतीय प्रौद्योगिकीय संस्थान आईआईटी के पूर्व पढ़इया नोनी सपना एक्का ह करही। कारीकरम दउरान उत्कृष्ट महिला कर्मी मन ल सम्मानित घलो करे जाही।
स्पेशल एजुकेटर-भर्ती
स्कूल शिक्षा विभाग ह स्पेसल एजुकेटर के रिक्त पद म सोज्झे भर्ती बर सात अक्टूबर ले तेरह अक्टूबर तक आवेदन मंगाय हे। ए बारे म पढ़ई-लिखई वाले योग्यता चुनई प्रक्रिया, आवेदन पत्र के प्रारूप ए सबके जानकारी विभागीय वेबसाइट म देखे जा सकत हे। उम्मीदवार मन ल आवेदन पत्र सबो जिला शिक्षा अधिकारी-डीईओ कार्यालय जघा म जमा करना होही। आवेदन जमा करे के आखिरी तारीख तेरह अक्टूबर हवय। आवेदन सिरिफ पंजीकृत डाक या खुदे जमा करे म मंजूर करे जाही।
ठगी गिरफ्तार
रईपुर पुलिस ह आपरेसन साइबर शील्ड के चलत साइबर ठगी के बड़का रैकेट के पर्दाफाश करीन हे। पुलिस ह साइबर क्राइम पोर्टल म दर्ज म्यूल बैंक अकाउंट के जांच के बाद ओडिसा, गुजरात, बिलासपुर अउ रईपुर ले चार झिन आरोपी ल गिरफ्तार करे हे, जेखर मन तीर ले पचास ठिन मोबाइल, दस ठिन डेस्कटाप, सीम कार्ड अउ आने जिनिस बरामद करे गेहे। जांच म पाय गेहे कि साठ ठिन म्यूल बैंक अकाउंट के जरिया देसभर के पांच सौ ले जादा लोगन मन संग करोड़ो रूपिया के ठगी होय हे। रईपुर के डीडी नगर अउ आजाद चौक थाना म एचडीएफसी अउ साउथ इंडियन बैंक के छियानवे ठिन म्यूल अकाउंट के खिलाफ अपराध दर्ज करे गेहे।
मधुमक्खी हमला-मौत
राजनांदगांव जिला के बजरंगपुर-नवागांव म मधुमक्खी के हमला म एक झिन माईलोगिन समेत दू झन मनखे के मउत होगे। उहें, एक झिन जवान लइका समेत पांच झिन माईलोगिन घायल होय हे, जेमन ल इलाज खातिर जिला चिकित्सालय अउ मेडिकल कालेज म भर्ती कराय गेहे। मिले जानकारी मुताबिक ए सबो झिन खेत म बूता करत रिहीन, तभे हुरहा मधुमक्खी मन ओखर मन उपर हमला कर दीस। ए हमला ले सात झिन मनखे घायल हो गे जिंहा इलाज बेरा दू झिन के मउत होगे।
छत्तीसगढ़-टनल निर्माण
नेशनल हाईवे अथॉरिटी ऑफ इंडिया डहार ले छत्तीसगढ़ के पहिली राष्ट्रीय राजमार्ग सुरंग बनाय के काम करीबन पूरा हो गेहे। दू किलोमीटर ले जादा लंबा ए टनल रईपुर-विशाखापट्टनम राजमार्ग म बारह महिना म तियार करे गेहे। ए टनल बनाय के काम एनएचएआई के अभनपुर परियोजना कार्यान्वयन इकाई डहार ले करे जावत हे। ए ट्विन ट्यूब टनल जब पूरा तरह तियार हो जाही, त रईपुर ले विशाखापट्टनम तक के अवई-जवई म बेरा कम लागही। एखर ले व्यापार अउ उद्योग बाढ़ही। उहें, छत्तीसगढ़, ओडिसा अउ आंध्र प्रदेस बीच संपर्क अउ मजबूत होही।
मुख्यमंत्री विष्णुदेव साय ह ए उपलब्धि उपर खुसीयारी जतात किहीन कि ए टनल ह समृध्द अउ सशक्त छत्तीसगढ़ सोज एक ठिन ऐतिहासिक कदम हरय। मुख्यमंत्री ह यहू किहीन कि सड़क अउ परिवहन अधोसंरचना के विकास ह प्रदेस के प्रगति के रीढ़ हवय। ए टनल ले छत्तीसगढ़ म पर्यटन अउ सामाजिक-आर्थिक जुड़ाव बर नवा मउका घलो खुलही। मुख्यमंत्री ह एखर बर केंद्रीय सड़क अउ परिवहन मंत्री नितिन गडकरी अउ भारतीय राष्ट्रीय राजमार्ग प्राधिकरण के टीम बर अपन आभार जतइन।
बस्तर दशहरा
पचहत्तर दिन तक चलइया विश्व प्रसिध्द बस्तर-दशहरा अब अपन आखिरी पड़ाव म हे। बस्तर दशहरा म आज कुटुम्भजात्रा विधान संपन्न होइस। एखर तहत गवई के सबो देवी-देवता मन ल पूजा अर्चना बाद बिदाई दे गीस। सात अक्टूबर मंगलवार के मावली माता के डोली बिदाई के संगे बस्तर दशहरा के समापन हो जही।
राष्ट्रीय डाक सप्ताह-कार्यक्रम
भारतीय डाक विभाग डहार ले काली छै अक्टूबर ले दस अक्टूबर तक राष्ट्रीय डाक सप्ताह मनाय जाही। सप्ताह के सुरूआत टेक्नालाजी दिवस ले होही अउ एखर समापन ग्राहिक दिवस ले करे जाही। ए बछर के थीम हरय- हैस टैग पोस्ट फॉर पिपल स्थानीय सेवा वैश्विक पहुंच हे। सप्ताह के दउरान छत्तीसगढ़ डाक परिमंडल के सबो संभाग मन म रोजिना बिसयवार कारीकरम होही। उहें, छै अक्टूबर के पहलइया दिन टेक्नालाजी दिवस के मउका म डाक सेवा म उपयोग वाले तकनीक उपर क्विज प्रतियोगिता होही।
अवैध निर्माण कार्रवाई
नवा रईपुर अटल नगर विकास प्राधिकरण क्षेत्र म अवैध विकास अउ निर्माण काम के खिलाफ रईपुर जिला प्रशासन ह सख्त कार्रवाई करे हे। गांव टेमरी अउ डूमरतराई थोक मार्केट ले लगे जघा म बिना परमिसन के करे जावत भूमि विकास अउ सड़क निर्माण ल संघरा टीम ह हटाइस हे। सिकायत के जांच बाद संबंधित भू-स्वामी अउ एखर विकास करइया अउ बनइया ल कारण बताओ नोटिस दे गे रिहीस। तय बेरा म वैध अनुमति संबंधी दस्तावेज नइ देखाय के सेति कलेक्टर के निरदेस म अवैध निर्माण ल हटाय के कार्रवाई करे गीस। अधिकारी मन स्पष्ट करीन कि अवइया बेरा म अइसन मामला बर कड़ा कार्रवाई करे जाही।