प्रधानमंत्री नरेंद्र मोदी ह युवा मन बर बांसठ हजार करोड़ रूपिया ले जादा के लागत वाले अलग-अलग पहल मनके सुभारंभ करीन। ए युवा केंद्रित पहल, देस म शिक्षा, कौसल अउ उद्यमिता ल बढ़ावा दिही। आज नई दिल्ली के विज्ञान भवन म आयोजित कौसल दीक्षांत समारोह म प्रधानमंत्री ह औद्योगिक प्रसिक्षण संस्थान-आई.टी.आई. के माध्यम ले प्रधानमंत्री कौशल अउ रोजगार परिवर्तन-पीएम- सेतु के सुभारंभ करीन।
प्रधानमंत्री ह किहीन हे कि भारत ज्ञान अउ कौशल के देस हरय अउ बौध्दिक सक्ति देस के सबले बडे़ सक्ति आय। ओमन किहीन कि आई.टी.आई. न केवल औद्योगिक शिक्षा के प्रमुख संस्थान आय बल्कि आत्मनिर्भर भारत के कार्यसाला घलो हरय।
अमित शाह-छत्तीसगढ़ प्रवास
केंद्रीय गृहमंत्री अमित शाह ह अवइया बछर इकतीस मार्च तक देस ल नक्सल समस्या ले मुक्त करे के केंद्र सरकार के संकल्प ल दोहरावत हुए नक्सली मन ले अपील करे हे कि ओमन हथियार छोड़ के समाज के मुख्यधारा म सामिल हो जाय। आज छत्तीसगढ़ के जगदलपुर म बस्तर-दशहरा लोकोत्सव कारीकरम ल संबोधित करत हुए श्री शाह ह किहीन कि जउन नक्सली हथियारबंद संघर्ष जारी रखही, उनला सुरक्षाबल ह कड़ा जवाब दिही। केंद्रीय गृहमंत्री ह किहीन कि नक्सलवाद के समस्या के सेति बस्तर अब तक विकास ले वंचित रहे हे। फेर आगामी इकतीस मार्च के बाद नक्सली मन बस्तर के विकास ल नही रोक सकय।
केंंद्रीय गृहमंत्री श्री शाह ह आज जगदलपुर के अपन प्रवास के दउरान मां दंतेश्वरी मंदिर म देवी मां के पूजा अर्चना करीन। संगेसंग बस्तर-दशहरा के तहत आयोजित रस्म मुरिया दरबार म घलो सामिल होइन। ए कारीकरम म बस्तर संभाग के रहइया आने-आने जनजातीय समुदाय के मुखिया मन उपस्थित रिहीन। ए मउका म जनजातीय समुदाय के ए प्रतिनिधि मन अपन समस्या ल घलो साझा करीन। केंद्रीय गृहमंत्री ह किहीन कि मुरिया दरबार लोकतांत्रिक मूल्य मनके प्रतीक जनजातीय समुदाय के आस्था के मिसाल हरय। ओमन किहीन कि जनसंवाद के ए ऐतिहासिक परंपरा एक वैश्विक धरोहर आय। श्री शाह किहीन कि पचहत्तर दिन तक चलइया बस्तर-दशहरा के हर रस्म अउ विधान जनजातीय समुदाय के अलग-अलग जाति मन ल एक सूत्र म पिरोथे।
केंद्रीय गृहमंत्री ह सबो लोगन मन ले स्वदेसी उत्पाद ल बिसाय के अपील करीन। ओमन किहीन कि यदि एक सौ चालीस करोड़ देसवासी ए संकल्प ल आत्मसात करही, त भारत ल दुनिया के सर्वाच्च आर्थिक सक्ति बने ले कोई नही रोक सकय।
केंद्रीय गृहमंत्री ह आज जगदलपुर म आयोजित बस्तर-दशहरा लोकोत्सव अउ स्वदेसी मेला कारीकरम के मउका म मुख्यमंत्री ग्रामीण बस सेवा योजना के सुभारंभ करीन। ए योजना के तहत छत्तीसगढ़ के बस्तर अउ सरगुजा संभाग के चौतीस ठन मार्ग म बस चलाय जाही। एखर ले बस्तर अउ सरगुजा संभाग के दूरदराज अउ अंदरूनी इलाका म बसे ढाई सौ गांव म रहइया लोगन मन ल बस के सुविधा पहुंचही।
केंद्रीय गृहमंत्री ह कारीकरम के दउरान छत्तीसगढ़ शासन के महतारी वंदन योजना के बीसवां किस्त के रूप म सत्तर लाख महिला मनके खाता म छै सौ करोड़ रूपिया ले जादा के रासि अंतरित करीन।
ए मउका म मुख्यमंत्री विष्णुदेव साय, उपमुख्यमंत्री विजय शर्मा, कृषि मंत्री रामविचार नेताम, वन मंत्री केदार कश्यप, पर्यटन मंत्री राजेश अग्रवाल, महिला अ बालविकास मंत्री लक्ष्मी राजवाड़े, प्रदेस भाजपा अध्यक्ष अउ विधायक किरण सिंह देव, बस्तर सांसद महेश कश्यप समेत आने-आने जनप्रतिनिधि अउ वरिष्ठ अधिकारी मन उपस्थित रिहीन।
शिवराज चौहान-कृषि विवि
केंद्रीय कृषि मंत्री शिवराज सिंह चौहान ह केंद्रीय कृषि विश्वविद्यालय मन म स्नातक के बीस प्रतिसत सीट ल अखिल भारतीय प्रतियोगी परीक्षा के माध्यम ले भरे के घोसना करे हे। भारतीय कृषि अनुसंधान परिषद एक राष्ट्र, एक कृषि, एक टीम के भावना के अनुरूप ए परीक्षा ल आयोजित करही। ए पहल ले कक्षा बाहरवीं म जीव विज्ञान, रसायन विज्ञान, भौतिकी, गणित या कृषि पढ़इया छात्र आईसीएआर राष्ट्रीय प्रवेस परीक्षा-सीयूईटी के माध्यम ले प्रवेस प्राप्त कर सकही। कृषि मंत्री ह किहीन कि ए निर्णय ले देसभर के छात्र मन बर प्रवेस प्रक्रिया सरल अउ एक समान हो जही।
नगरीय निकाय-खुदाई कार्य
राज्य सरकार ह प्रदेस के सबो नगरीय निकाय ल खुदाई काम के जानकारी ‘‘सी-बड‘‘ मोबाइल ऐप म अनिवार्य रूप ले अपलोड करे के निरदेस देहे। ए संबंध म नगरीय प्रशासन अउ विकास विभाग ह सबो नगर निगम के आयुक्त, नगर पालिका अउ नगर पंचायत मनके मुख्य नगर पालिका अधिकारी मन ल परिपत्र जारी करे हे। संगेसंग विभाग ह नगरीय निकाय मन म पदस्थ सबो अभियंता मन ल निकाय मन म चलत सबो निर्माण कार्य के खुदाई के जानकारी मोबाइल ऐप म जल्द ले जल्द अपलोड करे बर केहे हे।
स्वास्थ्य मंत्रालय-सलाह
केंद्रीय स्वास्थ्य मंत्रालय ह सलाह दे हे कि दू साल ले कम उमर के लइका मन ल खांसी अउ सर्दी के दवा कोल्ड्रिफ सिरप ल झन देवय। मंत्रालय ह ए संबंध म सबो राज्य अउ केंद्रशासित प्रदेस मनके स्वास्थ्य सेवा निदेशक मन ल एक ठन पत्र लिखे हे। परामर्स म केहे गे हे कि आमतौर म पांच साल ले कम उमर के लइका मन बर ए दवा मन के सलाह नइ दे जाय। एखर ले जादा उमर के लइका मन बर घलो खांसी अउ सर्दी के दवा के इस्तेमाल सावधानी पूर्वक डॉक्टर के सलाह अउ कड़ा निगरानी के बाद ही करे जाना चाही।
‘‘स्वस्थ नारी सशक्त परिवार‘‘ अभियान
केंद्रीय स्वास्थ्य अउ परिवार कल्याण मंत्री जगत प्रकाश नड्डा ह किहीन कि ‘‘स्वस्थ नारी सशक्त परिवार‘‘ अभियान ह साढ़े छै करोड़ महिला मन के जांच करके ऐतिहासिक उपलब्धि हासिल करे हे। सोसल मीडिया पोस्ट म श्री नड्डा ह किहीन हे कि ए उपलब्धि महिला मन के स्वास्थ्य ल सशक्त परिवार अउ समृध्द समुदाय के केंद्र म रखे के राष्ट्र के सामूहिक संकल्प ल दरसा थे।
आईईडी विस्फोट-माओवादी घायल
बीजापुर जिला म मद्देड़ थाना क्षेत्र के बंदेपारा के जंगल म माओवादी मन डहार ले लगाय गे आईईडी बिस्फोट ले एक झन महिला माओवादी घायल हो गेहे। बिस्फोट के बाद घायल महिला के दूसर साथी मन उंखर हथियार ल लेके मउका ले भाग निकलीन। घटना के जानकारी स्थानीय ग्रामीण मन ह पुलिस ल दीन। सूचना मिलते ही मउका म पुलिस के टीम ह पहुंचके ग्रामीण मनके मदद ले घायल महिला माओवादी ल जंगल ले बाहिर निकालीन अउ प्राथमिक उपचार बर जिला अस्पताल पहुंचइन।
मुख्यमंत्री-करम पूजा परब
मुख्यमंत्री विष्णुदेव साय ह काली संझा राजधानी स्थित अखिल भारतीय वनवासी आश्रम परिसर म उरांव आदिवासी विकास संघ रायपुर डहार ले आयोजित करम पूजा परब महोत्सव म सामिल होइन। ए मउका म श्री साय ह किहीन कि करम परब आदिवासी संस्कृति अउ पूर्वज मनके अमूल्य धरोहर हरय। ए संस्कृति अउ परंपरा ल जीवंत बनाय रखना न केवल हमर जिम्मेदारी आय बल्कि नैतिक कर्तव्य घलो हरय।
जिले की चिट्ठी
आकाशवाणी रईपुर के प्रादेशिक समाचार एकांश, डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ स्थित आकाशवाणी के जम्मों केंद्र एके संगरा रिले करही। ए बखत के अंक म ‘‘बलौदाबाजार-भाटापारा‘‘ जिला के गतिविधि के बारे म जानकारी दे जाही।
सराफा व्यापारी-लूट
रायपुर सदर बाजार इलाका म स्थित शिवाजी ज्वेलर्स के एक झन सराफा व्यापारी के हाथ-पांव बांध के अज्ञात आरोपी मन ह छियालिस किलो चांदी के गहना लूट लीन। एखर कीमत करीब डेढ़ करोड़ रूपिया बताय गेहे।
घटना के जानकारी मिलते ही पुलिस मउका म पहुंचिन अउ इलाका म नाकाबंदी कर आरोपी मनके तलास सुरू कर दे हे।