केंद्रीय गृहमंत्री अमित शाह ह आज रतिहा दू दिन के प्रवास म छत्तीसगढ़ आवत हे। प्रस्तावित कारीकरम के मुताबिक श्री शाह ह काली चार अक्टूबर के दंतेवाड़ा जाही, जिंहा ओमन मां दंतेश्वरी के पूजा-पाठ के बाद स्वदेसी मेला म सामिल होही। इही दिन श्री शाह ह बस्तर-दसहरा कारीकरम म मुख्य अतिथि होही। ए दउरान ओमन मांझी, मुरिया अउ पुजारी मनले गोठबात करही। एखर संगेसंग गृहमंत्री ह बस्तर म माओवाद विरोधी अभियान के समीक्षा घलो करही।
मुख्यमंत्री-राज्य स्थापना दिवस
मुख्यमंत्री विष्णुदेव साय ह आज रईपुर म पत्रकार मनले गोठबात करत बतइन कि एक नवंबर के राज्य स्थापना दिवस के मउका म प्रधानमंत्री नरेंद्र मोदी ह छत्तीसगढ़ आही। ए मउका म प्रधानमंत्री ह राज्य स्थापना दिवस के कारीकरम मन म भाग लिही। मुख्यमंत्री ह बतइन कि पंद्रह नवंबर के जनजातीय गौरव दिवस के मउका म राष्ट्रपति द्रौपदी मुर्मु ल आमंत्रित करे जाही।
मुख्यमंत्री ह गोठबात के दउरान किहीन कि राज्य सरकार के पुर्नवास नीति ले प्रभावित होके माओवादी मन ह आत्मसमर्पण करत हे। जानबा के मुताबिक बीजापुर जिला म काली तेईस झिन माईलोगिन के संगेसंग एक सौ तीन झिन माओवादी मन ह आत्मसमर्पण करीन।
कर हस्तांतरण-राशि
केंद्र सरकार ह छत्तीसगढ़ बर कर हस्तांतरण के तहत तीन हजार चार सौ बैंसठ करोड़ रूपिया के रासि मंजूर करे हे। एखर बर मुख्यमंत्री ह प्रधानमंत्री नरेंद्र मोदी अउ केंद्रीय वित्त मंत्री निर्मला सीतारमन ल आभार जताय हे। ओमन किहीन कि ए पइसा ह राज्य के वित्तीय संसाधन ल अउ मजबूत करही। मुख्यमंत्री ह किहीन कि केंद्र अउ राज्य सरकार ह छत्तीसगढ़ ल प्रगति अउ समृध्दि के नवा ऊंचाई म ले जाय बर संकलप लेहे।
उपमुख्यमंत्री-नई बैंक शाखा
उपमुख्यमंत्री विजय शर्मा ह आज सुकमा जिला के किस्टाराम म छत्तीसगढ़ राज्य ग्रामीण बैंक के नवा शाखा के लोकार्पण करीन। ए शाखा के खुल जाय ले आठ ग्राम पंचायत मनके बयालीस गांव अउ दस हजार ले जादा लोगन मन ल फायदा मिलही। ए दउरान ओमन शाखा के निरीक्षण करके जरूरी निरदेस दीन, किहीन कि अब ग्रामीण मन ल डिजिटल बैंकिंग, लेन-देन अउ सरकारी योजना के पइसा मिले म कोनो प्रकार के परेसानी नइ होवय। कारीकरम के दउरान उपमुख्यमंत्री ह कोंटा ले गोलापल्ली होवत किस्टाराम तक रद्दा बनाय अउ किस्टाराम म मिनी स्टेडियम के संगेसंग मंगलागुड़ा म पुलिया बनाय के घोसना करीन। कारीकरम म बस्तर सांसद महेश कश्यप घलो आय रिहीन।
माओवादी-मुठभेड़
बीजापुर जिला म आज सुरक्षाबल मनके संग होय मुठभेड़ म एक झिन माओवादी मारे गीस। ए माओवादी उपर पांच लाख रूपिया के इनाम घोसित रिहीस। जिला के पुलिस अधीक्षक जितेन्द्र यादव ह बतइन कि गंगालूर थाना क्षेत्र स्थित गमपुर-पुरंगेल के जंगल म माओवादी मन के होय के सूचना मिले के बाद डीआरजी अउ एसटीएफ के टीम ह तलासी अभियान चलाइन। ए दउरान सुरक्षाबल अउ माओवादी मनके बीच मुठभेड़ होइस। मुठभेड़ के बाद घटना वाले जघा ले माओवादी के शव के संगेसंग एक ठिन बीजीएल लान्चर, एक ठिन सिंगल शॉट बंदूक के संगेसंग बिस्फोटक जिनिस अउ नक्सली समान घलो बरामद करे गीस। मारे गे माओवादी के पहिचान आयतु पोड़ियाम, एसीएम गंगालूर एरिया कमेटी के रूप म होय हे।
अंतर्राष्ट्रीय वृध्दजन दिवस
अंतर्राष्ट्रीय वृध्दजन दिवस के मउका म युवा कारीकरम अउ खेल मंत्रालय के अगुवई म रईपुर के कतकोन वृध्दाश्रम मन म तीन दिन के स्वयं सेवी सहभागिता कारीकरम राखे गीस। ए कारीकरम म माई भारत अउ एनएसएस के स्वंय सेवक मन सामिल होइन। ए दउरान स्वयं सेवक मन ह साठ ले जादा सियनहा लोगन मनके संग गोठबात करीन।
माई भारत के उपनिदेशक अर्पिता तिवारी ह बतइन कि ए कारीकरम के उद्देस्य युवा मन ल एक होके सेवा करे के मउका देना हवय। एखर ले ए युवा मन ह वृध्दाश्रम म रहवइया वरिष्ठ नागरिक मनले जुड़ सकय।
विजयादशमी-संपन्न
उहें, मुख्यमंत्री ह किहीन कि दसहरा के परब अधर्म उपर धर्म के, असत्य उपर सत्य के अउ बुराई उपर अच्छाई के जीत के संदेस देथे।
मुख्यमंत्री ह काली रईपुर सहर के रावणभाटा अउ शंकर नगर अउ दसहरा उत्सव म घलो सामिल होइन।
ओपन चेस प्रतियोगिता
जशपुर जिला म ग्यारा ले तेरह अक्टूबर तक राज्य स्तरीय ओपन शतरंज प्रतियोगिता के आयोजन करे जाही। ए प्रतियोगिता म बालक अउ बालिका मन बर अंडर-नाईन, अंडर-इलेवन, अंडर-थर्टीन के संगेसंग अंडर-फिफ्टीन वर्ग म प्रतियोगिता के आयोजन होही, जेमा प्रदेस के जम्मो लोगन मन प्रवेस ले सकथे। प्रवेस के आखिरी तारीख छै अक्टूबर राखे गेहे। पुरस्कार के रूप म दू लाख इंक्यावन हजार रूपिया के नगद रासि अउ ट्रॉफी बिजेता प्रतिभागी मन ल दे जाही। ए प्रतियोगिता छत्तीसगढ़ राज्य शतरंज संघ के दिसा-निरदेस के पालन करत कराय जात हे।
भारतीय श्रोता सम्मेलन
आकाशवाणी रेडियो श्रोता संस्था डहार ले काली चार अक्टूबर के रईपुर के वृंदावन सभागार म अखिल भारतीय श्रोता सम्मेलन के आयोजन करे जाही। रईपुर दक्षिण क्षेत्र के विधायक सुनील सोनी ह कारीकरम के मुख्य अतिथि होही। त उहें, आकाशवाणी रईपुर के कारीकरम प्रमुख अउ सहायक केंद्र निदेशक पंकज मेश्राम के संगेसंग आने अधिकारी मन सामिल होही। संस्था के अध्यक्ष छेदूलाल यादव ह बतइन कि कारीकरम म छत्तीसगढ़ के लोक कलाकार सुनील सोनी ल सम्मानित करे जाही।
अउ अब पेस हे मौसम के हाल…
प्रदेस म काली कतकोन जघा म हल्का ले मध्यम बरसा होय या गरज-चमक के संग बूंदाबांदी पड़े के संभावना हे। मौसम विभाग ह एक-दू जघा म भारी बरसा होय के चेतावनी देहे। मौसम विभाग के मुताबिक ओडिसा के उपर एक ठिन अवदाब बने हे। ए अवदाब आगू बाढ़त उत्तर छत्तीसगढ़ पहुंचे के बाद कमजोर होके एक ठिन निम्नदाब के क्षेत्र म बदल जाही, जेखर असर ले उत्तर छत्तीसगढ़ म भारी बरसा होय के संभावना हे। उहें, चार अक्टूबर के बाद प्रदेस म बरसा म थोरकुन कमी आ जाही।
उहें, पाछू दू दिन ले होवत बरसा के सेति धमतरी जिला के परमुख बांधा गंगरेल, मुरूमसिल्ली, न्यू रूद्री बैराज अउ सोंढूर बांधा म जादा पानी आवत हे कार्यपालन अभियंता ह बतइन कि गंगरेल बांधा ले काली रतिहा ले सत्ताईस हजार क्यूसेक पानी छोड़े गीस। उहें, समाचार लिखे जाय तक गंगरेल बांधा ले चौदह हजार क्यूसेक अउ सोंढूर जलासय ले छै हजार क्यूसेक पानी छोड़े जात हे। कलेक्टर ह जिला के लोगन मन ले अपील करे हे कि ओमन बाढ़े नदिया-नरवा के तीर झन जावय।
अउ अब थोरकुन समाचार सार म –
– आकाशवाणी रईपुर के स्थापना दिवस के मउका म सूचना अउ प्रसारण मंत्रालय के अधीन हिन्दी सलाहकार समिति के सदस्य अशोक बजाज ह जम्मो रेडियो श्रोता अउ आकाशवाणी परिवार ल बधई देहे।
– कोरबा जिला के बालको एल्यूमिनियम कारखाना म आज एक ठिन राख फिल्टर संयंत्र हुरहा गिर गे। ए घटना म कोनो प्रकार के जनहानि नइ होय हे। ए संयंत्र ल करीबन बीस साल जुन्ना बताय जात हे।
– रईपुर पुलिस ह थाना तिल्दा नेवरा क्षेत्र म महिला वर्ल्ड कप म खेले जात न्यूजीलैंड अउ आस्ट्रेलिया मैच के दउरान ऑनलाइन सट्टा उपर कार्रवाई करत एक ठिन बिजली दुकान के संचालक ल गिरफ्तार करे हे।