केंद्रीय गृहमंत्री अमित शाह काली रतिहा 3 अक्टूबर के अपन दू दिवसीय प्रवास म छत्तीसगढ़ आही। प्रस्तावित कारीकरम के हिसाब ले श्री शाह 4 अक्टूबर के दंतेवाड़ा जाही। जिंहा ओमन मां दंतेश्वरी के पूजा-अर्चना के बाद स्वदेसी मेला म सामिल होही, उही दिन श्री शाह बस्तर दसहरा कारीकरम म मुख्य अतिथि होही। ए दउरान केंद्रीय गृहमंत्री ह मांझी, मुरिया अउ पुजारी मनले गोठबात घलो करही।
खबर के मुताबिक श्री शाह के बस्तर प्रवास ल लेके उपमुख्यमंत्री विजय
शर्मा ह काली जगदलपुर के सिरहासार भवन अउ लालबाग के कारीकरम स्थल के जायजा लीन अउ अधिकारी मनके बइठका लेके तियारी के समीक्षा करे रिहीन।
गांधी/शास्त्री-जयंती
देस आज राष्ट्रपिता महात्मा गांधी अउ पूर्व प्रधानमंत्री लालबहादुर शास्त्री के जयंती के मउका म उनला अपन भावभीनी श्रध्दांजलि अर्पित करत हवय। नई दिल्ली के राजघाट म महात्मा गांधी के समाधी म राष्ट्रपति द्रौपदी मुर्मु, उपराष्ट्रपति सी.पी.राधाकृष्णन, प्रधानमंत्री नरेंद्र मोदी, लोकसभा अध्यक्ष ओम बिरला, आवास अउ सहरी मामला के मंत्री मनोहर लाल ह पुष्पांजलि अर्पित करीन।
ऐति, राजधानी रईपुर समेत छत्तीसगढ़ म घलो आने-आने कारीकरम आयोजित करे जावत हे। राज्यपाल रमेन डेका ह राष्ट्रपिता महात्मा गांधी अउ पूर्व प्रधानमंत्री लालबहादुर शास्त्री के जयंती म राजभवन म श्रध्दासुमन अर्पित करीन। ए मउका म राज्यपाल ह स्वच्छ भारत अभियान के चलत राजभवन परिसर म साफ-सफाई कर स्वच्छता के संदेस दीन। एखर अलावा राज्यपाल टाउन हाल परिसर म घलो महात्मा गांधी के प्रतिमा उपर पुष्पांजलि अर्पित कर उनला श्रध्दांजलि दीन।
उहें, मुख्यमंत्री विष्णुदेव साय ह रईपुर के अपन निवास कार्यालय म महात्मा गांधी अउ लालबहादुर शास्त्री के जयंती म उंखर फोटू उपर फूल माला चढ़ाके उनला नमन करीन। मुख्यमंत्री ह राजधानी के आजाद चौक के महात्मा गांधी के प्रतिमा अउ शास्त्री चौक के लालबहादुर शास्त्री के मूर्ति उपर फूलमाला पहिराके उनला श्रध्दांजलि अर्पित करीन।
उहें, छत्तीसगढ़ विधानसभा परिसर म विधानसभा सचिव दिनेश शर्मा अउ सचिवालय के बड़का अधिकारी अउ करमचारी मन ह महात्मा गांधी अउ लालबहादुर शास्त्री ल श्रध्दांजलि दीन। ए मउका म महात्मा गांधी के प्रसिध्द भवन ‘‘वैष्णव जन तो तेने कहिए‘‘ अउ ‘‘रघुपति राघव राजा राम‘‘ के गायन पेस करे गीस।
आरएसएस-शताब्दी वर्ष समारोह
राष्ट्रीय स्वयंसेवक संघ-आर.एस.एस. के सर संघचालक डॉक्टर मोहन भागवत ह किहीन हे कि आत्मनिर्भर बने अउ वैश्विक एकता के पक्षधर होय के नाते हमन ल ए सुनिश्चित करना होही कि निर्भरता हमर विवस्ता नो हरय अउ हमन अपन मन ले कामबूता करे म सक्षम हवन। स्वदेसी अउ स्वावलंबन के कोनो विकल्प नइ हे। डॉक्टर भागवत ह अमेरिकी आयात सुल्क के बीच उपजे परिस्थिति म स्वदेसी ल अपनाय उपर जोर दीन। संघ प्रमुख ह आज बिहनिया नागपुर के रेसमबाग म आर.एस.एस. के सताब्दी वर्ष समारोह अउ विजयदशमी उत्सव कारीकरम ल संबोधित करत रिहीन। डॉक्टर भागवत ह किहीन कि पहलगाम हमला के बाद करे गे जवाबी कार्रवाई के बेरा के दउरान हमन देस के नेतृत्व के दृढ़ता, हमर सशस्त्र बल के वीरता अउ युध्द-तत्परता अउ समाज के के दृढ़ संकल्प अउ एकता के उत्साहजनक दृश्य देखिन।
इही बीच, प्रधानमंत्री नरेंद्र मोदी ह राष्ट्रीय स्वयंसेवक संघ डहार ले राष्ट्र के समर्पित सेवा के सौ बछर पूरा होय म ओखर सराहना करीन। सर संघचालक डॉक्टर मोहन भागवत के प्रेरक संबोधन के उल्लेख करत प्रधानमंत्री ह राष्ट्र निर्माण म संघ के सुग्घर भूमिका अउ भारत के सभ्यतागत मूल्य के पोषण के प्रति ओखर अटूट प्रतिबध्दता उपर प्रकाश डालिन।
श्रीरामलला दर्शन योजना
श्रीरामलला दर्शन योजना के चलत दुर्ग अउ बस्तर संभाग के 8 सौ 76 तीर्थयात्री मनके दल काली बिसेस ट्रेन ले अयोध्या जाय बर रवाना होइन। स्कूल शिक्षा मंत्री गजेन्द्र यादव दुर्ग अउ राजनांदगांव सांसद संतोष पांडेय ह राजनांदगांव रेलवे स्टेसन ले ए ट्रेन ल हरा झंडी दिखाके रवाना करीन।
आबकारी आयुक्त-बैठक
आबकारी आयुक्त सह सचिव आर. शंगीता ह बार अउ होटल एसोसिएसन के पदाधिकारी अउ संचालक मनके बइठका लेके ओमन ल हर हालत म रतिहा 12 बजे के भीतर बार ल बंद करे के निरदेस दीन हवय। ओमन 10 दिन के भीतर बार अउ होटल म काम करइया करमचारी मनके पुलिस वेरीफिकेसन कराय बर केहे हे। संगेसंग 21 बछर ले कम उमर वाले युवा लइका मन ल बार म नइ घुसन देवय के चेतावनी दीन हे। श्रीमती शंगीता ह ड्रग्स, कोकीन, एमडी जइसन मादक पदार्थ ल नइ बेचे के अउ एखर बेचे के जानकारी होय म पुलिस ल बताय के निरदेस दीन हवय। ओमन किहीन कि नियम अउ कानून के हिसाब ले बार अउ होटल के संचालन होना चाही।
सेवा पर्व
सेवा अउ सुशसान के मंत्र ले प्रेरित सरकार प्रधानमंत्री नरेंद्र मोदी के अगुवई म परिवर्तन अउ प्रगति लाय के जोरदरहा प्रयास करत हवय। आज, ए बिसेस श्रृंखला-‘सेवा पर्व‘ म हमन आपमन ल बताबो कि कइसे मोदी सरकार ह नक्सल मुक्त भारत के मार्ग प्रसस्त करीन हवय।
पाछू 11 बछर म नरेंद्र मोदी सरकार ह वामपंथी उग्रवाद के खिलाफ जीरो टॉलरेंस के नीति ल अपनाइन हवय। सरकार के 100 प्रतिसत योजना के क्रियान्वयन ले ए प्रभावित क्षेत्र मन ल पूरा तरीका ले विकसित करे के लक्ष्य राखे गीस।
बाल विवाह-उपलब्धि
केंद्र सरकार डहार ले सुरू करे गे बाल विवाह मुक्त भारत राष्ट्रीय अभियान के तहत छत्तीसगढ़ ह बड़का उपलब्धि पाय हे। राज्य के बालोद जिला पूरा देस के पहिली अइसन जिला बन गेहे, जेला बाल विवाह मुक्त घोसित कर दे गे हवय। बालोद जिला के जम्मो 436 ग्राम पंचायत अउ 9 ठिन नगरीय निकाय मन ल प्रमाण पत्र जारी करे दे गे हवय।
त उंहे, सूरजपुर जिला के 75 ठिन ग्राम पंचायत मन ल घलो बाल विवाह मुक्त ग्राम पंचायत घोसित करे गेहे। पाछू दू साल म ए पंचायत मन म घलो बाल विवाह के कोनो मामला दरज नइ होय हे।
मुख्यमंत्री विष्णुदेव साय ह किहीन कि राज्य सरकार ह बाल विवाह ल रोके के पहिली प्राथमिकता दे हवय। ओमन किहीन कि दू हजार अट्ठाइस-उनतीस तक बाल विवाह मुक्त घोसित करे जाही।
विजयादशमी
असत्य उपर सत्य के जीत के प्रतीक दसहरा परब आज छत्तीसगढ़ समेत जम्मो देस म पारंपरिक उल्लास अउ बड़ उछाह के संग मनाय जावत हे। ए मउका म रावण, मेघनाद अउ कुंभकर्ण के पुतला के दहन करे जाही। राजधानी रईपुर समेत प्रदेस के जम्मो जिला मन म दसहरा उत्सव के आयोजन करे जावत हे। राजधानी रईपुर के डब्ल्यू.आर.एस. कालोनी अउ रावणभाटा मैदान म बिसेस आयोजन करे जावत हे। रईपुर के डब्ल्यू.आर.एस. कालोनी म आयोजित दसहरा उत्सव म ए दारी मुख्यमंत्री विष्णुदेव साय सामिल होही।
दसहरा के मउका म आज रईपुर, दुरूग, राजनांदगांव, बिलासपुर, रायगढ़ समेत प्रदेस के आने-आने थाना, चौकी अउ सशस्त्रगार म राखे शस्त्र के साफ-सफाई कर विधि-विधान ले पूजापाठ करे गीस।
राज्यपाल रमेन डेका आज राजभवन म आयोजित शस्त्र पूजन अउ हवन म सामिल होइन। ए मउका म ओमन देस अउ प्रदेस के सुख-समृध्दि के कामना करीन। ओमन राजभवन परिसर म विधिवत शस्त्र पूजा करीन अउ राजभवन सचिवालय के अधिकारी अउ करमचारी मन ल विजयदशमी के अपन सुभकामना दीन।
किसान-फसल सलाह
धान के फसल ल रोग अउ कीट प्रकोप ले बचाय खातिर कृषि बिसेसज्ञ मन ह किसान मन ल सलाह दीन हे। कृषि विभाग के उप संचालक ह बतइन कि प्रदेस म असमय बरसा ले कीट प्रकोप अउ झुलसा रोग ह बाढ़गे हवय। एखर बचाव खातिर किसान ट्राईफ्लोक्सीस्ट्रोवीन, टेबुकोनाजोल के छिड़काव अउ अइसने, शीथ ब्लाइट रोग होय म हेक्साकोनाजोल के छिड़काव करे के बात किहीन।