केंद्रीय मंत्रिमंडल ह केंद्र सरकार के करमचारी मन बर महंगाई भत्ता अउ पेंसन भोगी मन बर महंगाई राहत म तीन प्रतिसत के बढ़ोत्तरी ल मंजूरी दे देहे। सूचना अउ प्रसारण मंत्री अश्वनी वैष्णव ह नई दिल्ली म कैबिनेट बइठका के बाद बतइन कि एखर ले केंद्र सरकार के करीबन उनचास लाख बीस हजार करमचारी अउ अड़सठ लाख सत्तर हजार पेंसन भोगी मन ल फायदा होही। ए बढो़त्तरी एसो के एक जुलाई ले प्रभावी होही।
त उंहें, केंद्रीय मंत्रिमंडल के आर्थिक मामला के समिति ह देसभर म पांच हजार आठ सौ बैंसठ करोड़ रूपिया ले जादा के खर्चा ले संतावन ठिन नवा केंद्रीय विद्यालय खोले के मंजूरी दे देहे। श्री वैष्णव ह बतइन कि, जउन जिला म कोनो केंद्रीय विद्यालय नइ हे, उंहा बीस ठिन केंद्रीय विद्यालय खोले जाही। आकांक्षी जिला म चौदह ठिन वामपंथी उग्रवाद प्रभावित जिला मन म चार अउ पूर्वोत्तर के संगेसंग पहाड़ी क्षेत्र मन म पांच केंद्रीय विद्यालय खोले के प्रस्ताव हे।
उंहे, केंद्रीय मंत्रिमंडल ह दू हजार छब्बीस-सत्ताइस बर जम्मो जरूरी रबीफसल के न्यूनतम समर्थन मूल्य म बढ़ोत्तरी ल घलो मंजूरी दे देहे। श्री वैष्णव ह किहीन कि सरकार ह किसान मन ल उंखर उपज के बने कीमत देबर रबी फसल मनके न्यूनतम सर्मथन मूल्य म बढ़ोत्तरी करे हे। सबले जादा बढ़ोत्तरी कुसुम फसल बर छै सौ रूपिया प्रतिकुंटल अउ मसूर बर तीन सौ रूपिया प्रति कुंटल के बढ़ोत्तरी करे गेहे।
वृध्दजन दिवस
आज अंतर्राष्ट्रीय वृध़्दजन दिवस हरय। ए मउका म राजधानी रइपुर के संगेसंग प्रदेस म कतकोन कारीकरम करे जात हे। मुख्यमंत्री विष्णुदेव साय ह रइपुर म राखे गे राज्य स्तरीय कारीकरम म सामिल होइन। ओमन समारोह ल संबोधित करत किहीन कि सियनहा मनके देखभाल, सरकार अउ समाज दूनो के जिम्मेवारी हरय। ए मउका म ओमन वृध्दजन मन ल साल अउ श्रीफल देके सम्मानित करीन। संगेसंग ओमन सियनहा मनके बिसेस देखभाल बर राज्य म सियानगुड़ी, प्रदेस के चार ठिन बड़का सहर रईपुर, बिलासपुर, कोरबा अउ दुरूग म पीपीपी मॉडल उपर बढ़िया सुविधा वाले वृध्दाश्रम बनाय अउ दिव्यांगजन मनके सहायक उपकरण मनके मरम्मत बर राजधानी रइपुर म सर्विस सेंटर बनाय के घोसना करीन। ए दउरान मुख्यमंत्री ह नसामुक्त भारत अभियान के तहत पच्चीस ठिन नसामुक्ति रथ ल हरा झंडी दिखाके रवाना करीन।
मुख्यमंत्री-समीक्षा बैठक
अवइया एक दिसंबर ले मंत्रालय म अधिकारी मन बर बायोमेट्रिक अटेंडेस लागू करे जाही। मुख्यमंत्री ह आज मंत्रालय म सचिव अउ विभागाध्यक्ष मनके बइठका के दउरान ए निरदेस दीन।
केंद्रीय गृहमंत्री-छत्तीसगढ़
केंद्रीय गृहमंत्री अमित शाह के अवइया चार अक्टूबर के बस्तर दउरा प्रस्तावित हे। ए बारे म उपमुख्यमंत्री विजय शर्मा ह आज जगदलपुर के सिरहासार भवन अउ लालबाग स्थित कारीकरम स्थल के जायजा लीन अउ अधिकारी मन के बइठका लेके तियारी के समीक्षा करीन। ओमन अधिकारी मन ल जम्मो जरूरी तियारी अउ बेवस्था ल बेरा के पहिली पूरा करे के निरदेस देहे।
नवा रईपुर म देस के पहिली एकदम नवा ढंग ले बने स्मार्ट पंजीयन कार्यालय सुरू हो गेहे। एखर उद्घाटन काली उपमुख्यमंत्री अरूण साव ह करीन। ए मउका म रईपुर के वीणा देवांगन ह सेल डीड करइन अउ डिजीटल भुगतान करीन। ओखर रजिस्ट्री ल उपमुख्यमंत्री विजय शर्मा के उपस्थिति म कैसलेस भुगतान कराके प्रदर्सित करे गीस। ए मउका म उपमुख्यमंत्री अरूण साव ह किहीन कि ए पहल न सिरिफ छत्तीसगढ़ भलुक पूरा देस म लोगन मनके सुविधा के एक ठिन नवा मॉडल हरय। वित्त मंत्री ओपी चौधरी ह घलो लोगन मनके सेवा ल पहिली प्राथमिकता बतइन।
जानबा के मुताबिक ए कार्यालय पीपीपी मॉडल उपर तियार करे गेहे। अब मकान-दुकान या जमीन के रजिस्ट्री कराय बर भीड़-भाड़ वाले सरकारी आफिस म जाय के बजाय लोगन मन बारह ले पंद्रह मिनट म अपन रजिस्ट्री करा सकही।
नवरात्र-दशहरा
शारदेय नवरात्रि के आखिरी दिन आज प्रदेस म महानवमी मनाय जात हे। आज सिध्दीदात्री रूप म मां दुर्गा के पूजापाठ करे जात हे। राजधानी रईपुर म जधा-जघा कन्याभोज अउ भंडारा चलत हे। काली ले जंवारा विसर्जन के संग पूजा पंडाल म विराजे देवी प्रतिमा मनके विसर्जन घलो सुरू हो जही।
उहें, विजयादसमी माने दसहरा के परब काली मनाय जाही। ए मउका म राजधानी म कतकोन जघा म रावण, कुंभकरण अउ मेघनाथ के पुतला के दहन करे जाही। कतकोन जघा म रावण दहन के संगेसंग रामलीला के मंचन घलो करे जाही। राजधानी रईपुर के डब्ल्यूआरएस कालोनी म दसहरा उत्सव ल लेके बिसेस तियारी करे जात हे। ए बार एक सौ एक फीट के रावण अउ इक्यासी-इक्यासी फीट के कुंभकरण अउ मेघनाथ के पुतला बनाय गेहे। उहें, रईपुर के रावणभाठा मैदान म घलो दसहरा उत्सव के कारीकरम चलही।
राज्यपाल रमेन डेका, मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह ह दसहरा परब के मउका म प्रदेस के लोगन मन ल बधई अउ सुभकामना दे हवय।
बस्तर-दशहरा
ऐति, पचहत्तर दिन तक चलइया विश्व प्रसिध्द बस्तर-दशहरा परब के तहत आज जोगी उठाई अउ मावली परघाव के रसम अदा करे जात हे। एमा नवरात्र के पहिली दिन ले सिरासार भवन म मां दंतेश्वरी के पूजापाठ म बइठे युवक ल विधि-विधान के संग पूजापाठ के बाद उठाय जाही। एला जोगी उठाई केहे जाथे। एखर बाद मावली परघाव होही। एमा सक्तिपीठ दंतेवाड़ा ले बस्तर-दशहरा म सामिल होय बर आय मावली माता अउ मां दंतेश्वरी के डोली अउ छत्र ल विधि विधान के संग परघाय जाही। एखर पहिली काली रतिहा निशा जात्रा के रसम अदा करे गीस।
ऐति, ईस्ट-कोस्ट रेलवे ह बस्तर-दसहरा के दउरान यात्री मनके सुविधा बर जगदलपुर अउ दंतेवाड़ा के बीच आज ले छै ठिन जन साधारण स्पेसल रेलगाड़ी चलाय के घोसना करे हे। ए ट्रेन चार अक्टूबर तक चलही।
डाकसेवा-बदलाव
डाक विभाग ह अपन घरेलू सेवा म बड़का बदलाव करे हे। अब सिरिफ स्पीड पोस्ट म ही रजिस्ट्री सुविधा रइही। राजनांदगांव संभाग के डाक अधीक्षक डॉक्टर सौरभ श्रीवास्तव ह बतइन कि अब रजिर्स्टड लेटर, पार्सल जइसन श्रेणी म रजिस्ट्री के सुविधा बंद कर दे गेहे। ओमन बतइन कि कोनो ग्राहक स्पीड पोस्ट के रजिस्ट्रीय कराना चाहथे, त ओमन ल पांच रूपिया के उपराहा सुल्क देबर पड़ही। ओमन बतइन कि आज ले डाक विभाग ह ओटीपी आधारित वितरण सेवा घलो सुरू करे हे।
टूरिज्म पर्यटन
गौरेला-पेण्ड्रा-मरवाही जिला ल विश्व पर्यटन दिवस के मउका म राज्य स्तरीय सर्व श्रेष्ठ ईको-टूरिज्म साइट के बड़का सम्मान ले सम्मानित करे गीस। जिला के पर्यटन स्थल राजमेरगढ़, ठाड़पथरा, लक्ष्मणधारा, झोझा जलप्रपात अउ माई के मड़वा ल चलाय म पर्यावरण संतुलन के बिसेस धियान राखे गेहे।
बस्तर निवेशक प्रमाण पत्र
छत्तीसगढ़ रजत महोत्सव के तहत उद्योग विभाग डहार ले काली जगदलपुर म जिला निवेस प्रोत्साहन समिति के बइठका होइस, जेमा निवेसक मन ल औद्योगिक विकास नीति अउ ईज-ऑफ डूइंग बिजनेस के अंतर्गत चलाय जात वन क्लिक पोर्टल के पूरा जानबा दे गीस। बइठका म कलेक्टर हरीस एस. ह किहीन कि जिला म औद्योगिक क्षेत्र के विकास बर निजी भूमि उपर घलो औद्योगिक पार्क बनाय जा सकथे।
ईडी-पूछताछ
प्रवर्तन निदेसालय ईडी ह आबकारी घोटाला के मामला म तीस झिन अधिकारी मन ल पूछताछ बर बलाय हे। एमा एक झिन अतिरिक्त कमीसनर, पांच उपायुक्त, चौदह झिन सहायक आयुक्त, सात जिला आबकारी अधिकारी अउ तीन आने अधिकारी सामिल हे, जेमा ले सात झिन अधिकारी मन ह रिटायर हो चुके हे। जानबा के मुताबिक ए जम्मो अधिकारी मन ल पाछू महिना सुप्रीम कोर्ट ले राहत दे गे रिहीस।
अउ अब पेस हे मौसम के हाल…
मौसम विभाग ह काली प्रदेस के एक-दू जघा म भारी बरसा होय के संगेसंग गाज गिरे के चेतावनी देहे। मौसम विभाग के मुताबिक एक ठिन निम्नदाब के क्षेत्र पश्चिम मध्य बंगाल के खाड़ी के उपर स्थित हे। एखर परभाव ले प्रदेस म बदली बारिस के स्थिति बने हे। प्रदेस म काली कतकोन जघा म हल्का ले मध्यम बरसा होय या गरज-चमक के संग बूंदाबांदी पड़े के संभावना हे। बरसा के मुख्य क्षेत्र दक्षिण छत्तीसगढ़ रइही।