राज्य मंत्रिपरिषद-निर्णय
मुख्यमंत्री विष्णुदेव साय के अध्यक्षता म आज मंत्रालय म होय राज्य मंत्रिपरिषद के बइठका म कई ठन महत्वपूर्ण निर्णय ले गीस। बइठका म लेगे फइसला मनके जानकारी देवत हुए उपमुख्यमंत्री अरूण साव ह बतईन कि मंत्री परिषद ह स्कूल सिक्षा विभाग के भर्ती नियम ल सिथिल करत हुए स्पेशल एजुकेटर के पद म सीधी भर्ती चयन परीक्षा के स्थान म एक बार मेरिट के आधार म करे के अनुमोदन करे हे। एखर तहत वित्त विभाग ह राज्य म सौ स्पेशल एजुकेटर के भर्ती के अनुमति देहे।
बइठका म सासकीय सेवक मन ल अल्पावधि ऋण उपलब्ध कराय के संबंध म बैंक अउ वित्तीय संस्थान मन ले प्रस्ताव प्राप्त करे के घलो निर्णय ले गेहे। उहें, दिव्यांगजन मन ल राष्ट्रीय दिव्यांगजन वित्त अउ विकास निगम के चौबीस करोड़ पचास लाख रूपिया ले जादा के बकाया ऋण रासि एकमुश्त वापस करे जाय के निर्णय ले गेहे।
मंत्रिपरिषद ह मुख्य सचिव पद ले सेवानिवृत्त होवइया उन्नीस सौ नवासी बैच के भारतीय प्रशासनिक सेवा के अधिकारी अमिताभ जैन ल बिदाई दीन। उहें, नव-नियुक्त मुख्य सचिव विकासशील के स्वागत घलो करीन।
प्रधानमंत्री-भाजपा कार्यालय उद्घाटन
प्रधानमंत्री नरेन्द्र मोदी ह किहिन हे कि राष्ट्रीय जनतांत्रिक गठबंधन के सरकार ह देस म सुशासन के एक नवा मॉडल पेस करे हे। श्री मोदी ह भारतीय जनता पार्टी कार्यकर्ता मन ले नवा वस्तु अउ सेवा कर सुधार मनके लाभ आम नागरिक तक पहुंचाय के आग्रह करीन। प्रधानमंत्री ह काली दिल्ली म दीनदयाल उपाध्याय मार्ग म नवनिर्मित दिल्ली प्रदेस भाजपा कार्यालय के उद्घाटन करत हुए ए बात ल कहिन। श्री मोदी ह किहीन कि जेन राज्य मन म भाजपा विपक्ष म हे, उहां जीएसटी म कटौती के लाभ जनता तक पहुंचाय बर सरकार ल जवाबदेह बनाना चाही।
नगरीय निकाय-एमओयू
सहर ल स्वच्छ अउ सुंदर बनाय बर प्रदेस के चौदह नगरीय निकाय मनके बीच समझौता ज्ञापन उपर हस्ताक्षर करे गेहे। उपमुख्यमंत्री अरूण साव के मौजूदगी म नवा रायपुर म आयोजित कार्यक्रम म संबंधित नगरीय निकाय मनके महापौर, अध्यक्ष, आयुक्त अउ सीएमओ मन एमओयू म हस्ताक्षर करीन। ए कार्यक्रम म प्रदेस के सबो एक सौ बयानवे नगरीय निकाय वर्चुअल रूप ले जुड़ीन। ए अवसर म नगरीय प्रशासन विभाग डहार ले ‘स्वच्छ सहर जोड़ी संवाद‘ के आयोजन करे गीस। ‘स्वच्छ सहर जोड़ी‘ अभियान के तहत स्वच्छ भारत मिशन सहरी के अंतर्गत स्वच्छ सर्वेक्षण म उत्कृष्ट प्रदर्शन करइया सहर, अपन अनुभव उन सहर मन ले साझा करही, जिखर प्रदर्शन स्वच्छ सर्वेक्षण म अपेक्षा के अनुरूप नइ रिहीस। एखर बर मेन्टोर सहर अउ मेन्टी सहर मन डहार ले एमओयू उपर हस्ताक्षर करे के संगेसंग आगू के रोडमैप उपर चर्चा करे गीस।
कार्यक्रम म उपमुख्यमंत्री ह आडीएफ ट्रैकिंग पोर्टल, व्हाट्स-अप चैटबॉट अउ स्वच्छता लीग के हिन्दी टूलकिट लांच करीन।
भोरमदेव शक्कर कारखाना-सदस्यता
कबीरधाम जिला के भोरमदेव सहकारी शक्कर कारखाना म अब गैर-अंशधारी किसान मन ल घलो सदस्यता दे जाही। ए निर्णय ले सबो गन्ना किसान मन ल बराबरी के दर्जा मिलही अउ कारखाना के गन्ना आपूर्ति स्थिर अउ सुनिश्चित होही। भारतीय किसान संघ अउ दूसर संगठन मन डहार ले लंबा समय ले गैर-अंशधारी किसान मन ल सदस्य बनाय के मांग करे जात रिहीस। प्रबंध संचालक मंडल ह किसान मनके ए मांग ल मानत हुए निर्णय लेहे कि अब भविष्य म गन्ना आपूर्ति करइया गैर-अंशधारी किसान मन ल घलो कारखाना के सदस्यता दे जाही। किसान मन ए निर्णय के स्वागत करे हे अउ एला गन्ना उत्पादक मन बर नवा अध्याय बताय हे।
सेवा पर्व-विशेष कार्यक्रम
सुनइया मन ल बतादन कि सेवा पर्व के तहत पाछु ग्यारह बछर म रक्षा क्षेत्र म होय नवाचार मन उपर छत्तीसगढ़ राज्य सैनिक कल्याण बोर्ड के संचालक बिग्रेडियर विवेक शर्मा के लेगे विशेष भेंटवार्ता के प्रसारण करे जाही। ए कार्यक्रम के प्रसारण काली एक अक्टूबर के बिहनिया नौ बजे करे जाही। ए कार्यक्रम अपलिंक म उपलब्ध रइही अउ एला छत्तीसगढ़ स्थित आकाशवाणी के सबो केन्द्र रिले करही।
स्वस्थ नारी सशक्त परिवार अभियान
‘‘स्वस्थ नारी-सशक्त परिवार अभियान‘‘ के तहत बलौदाबाजार म स्वास्थ्य विभाग डहार ले स्वास्थ्य सिविर लगाय गीस। ए सिविर म करीब ग्यारह सौ लोगन मन अपन स्वास्थ्य के जांच करईन। ए सिविर के बिसेस बात ए रिहीस कि प्राथमिक स्वास्थ्य केन्द्र स्तर म पहिली बार अत्याधुनिक जांच सुविधा उपलब्ध कराय गीस, जेमा सोनोग्राफी, एक्सरे, फंडस कैमरा अउ फिजियोथेरेपी जइसे सेवा मन सामिल रिहीन।
उहें, ‘‘स्वस्थ नारी-सशक्त परिवार अभियान‘‘ के तहत मुंगेली म घलो स्वास्थ्य सिविर लगाय गीस। सिविर म जनजातीय क्षेत्र के इकचालीस गांव के महिला मनके स्वास्थ्य परीक्षण कर उनला परामर्स दे गीस। एखर संगेसंग सत्यासी झन गर्भवती महिला मनके जांच कर उनला संतुलित आहार अउ आयरन फोलिक एसिड के नियमित सेवन करे के संगेसंग मितानिन मनके संपर्क म रेहे के सलाह दे गीस।
सेवा पर्व
प्रधानमंत्री नरेन्द्र मोदी के नेतृत्व म सरकार, सेवा अउ सुशासन के मंत्र के आधार म परिवर्तन अउ प्रगति बर अथक प्रयास करत हे। सेवा पर्व म आज हम आप मन ल बताबो कि कइसे मोदी सरकार ह राष्ट्रीय शिक्षा नीति के माध्यम ले भारत बर एक आधुनिक, समावेशी अउ भविष्य बर तैयार सिक्षा प्रणाली के निर्माण करत हे।
बछर दू हजार बीस म मोदी सरकार ह राष्ट्रीय शिक्षा नीति पेस करीन, जउन ह चौंतीस बछर म पहिली अइसे नीति हरय, जेखर उद्देश्य भारत के सिक्षा प्रणाली म आमूल-चूल परिवर्तन लाना अउ इक्कीसवीं सदी के आवश्यकता के अनुरूप बनाना हरय। राष्ट्रीय शिक्षा नीति, एनईपी, स्कूली अउ उच्च सिक्षा म व्यावसायिक अउ व्यावहारिक कौशल ल सामिल करके कौशल विकास ल मुख्यधारा के सिक्षा के संग एकीकृत करे उपर जोर देथे। एमा मध्य अउ माध्यमिक विद्यालय मन म प्रारंभिक अवस्था म व्यावसायिक सिक्षा ले परीचित कराय के आह्वान घलो करे गेहे। ए नीति ह बहुभाषावाद ल बढ़ावा दे उपर जोर देथे।
छत्तीसगढ़-फिल्म टैक्स फ्री
राज्य सरकार ह छत्तीसगढ़ी फिल्म ‘‘बलिदानी राजा गुरू बालकदास‘‘ ल छत्तीसगढ़ म कर मुक्त करे के घोसना करे हे। काली रायपुर स्थित अंबुजा मॉल के सिनेमाघर म मुख्यमंत्री विष्णदेव साय ह ‘‘बलिदानी राजा गुरू बालकदास‘‘ फिल्म देखीन। ए अवसर म विधानसभा अध्यक्ष डॉक्टर रमन सिंह, कैबिनेट मंत्री गुरू खुशवंत साहेब सहित कई झिन जनप्रतिनिधि उपस्थित रिहीन। ए मउका म श्री साय ह कहिन कि ए फिल्म साहस अउ शौर्य के अनुपम गाथा हरय। ओमन किहीन कि ए फिल्म छत्तीसगढ़ के स्वतंत्रता संग्राम म भूमिका, राज्य के समृद्ध संस्कृति, सामाजिक सद्भाव, अंग्रेज मनके खिलाफ संघर्ष अउ जीवन के सहजता ल बड़ सुंदर ढंग ले प्रस्तुत करत हे।
महाअष्टमी
छत्तीसगढ़ सहित देसभर म आज दुर्गा अष्टमी श्रद्धा अउ धार्मिक उल्लास के संग मनाय जात हे। आज के दिन महागौरी के रूप म मां शक्ति के उपासना करे जाथे। राजधानी रायपुर सहित प्रदेस के अलग-अलग शक्तिपीठ अउ मंदिर मन म आज हवन-पूजन के बिसेस कार्यक्रम आयोजित करे जात हे। मंदिर अउ दुर्गा उत्सव समिति के संगेसंग उपवास रखइया श्रद्धालु मन कन्याभोज घलो करईन।
इही बीच, मुख्यमंत्री विष्णुदेव साय ह पाछु रतिहा रायपुर के अलग-अलग गरबा समारोह म सामिल होइन। ओमन देवी दर्सन कर प्रदेस के सुख, समृद्धि अउ खुशहाली के कामना करीन। ए अवसर पर श्री साय ह प्रदेसवासी मन ल शारदीय नवरात्र के सुभकामना देवत हुए किहीन कि नवरात्रि उत्साह, उमंग अउ सद्भावना बढ़ाय के परब हरय।
क्रीडा प्रतियोगिता समापन
रायपुर स्थित जे.आर. दानी शासकीय कन्या उत्कृष्ट हिन्दी माध्यमिक विद्यालय म आयोजित पच्चीसवीं राज्य स्तरीय शालेय क्रीडा प्रतियोगिता के आज समापन होइस। समापन समारोह म स्कूल शिक्षा मंत्री गजेन्द्र यादव ह उत्कृष्ट प्रदर्शन करइया खिलाड़ी मन ल पुरस्कृत करीन। ए अवसर म श्री यादव ह राज्य के स्कूल मन म नौ हजार स्मार्ट क्लास अउ बाईस हजार कम्प्यूटर लगाय के घोसना करीन। चार दिवसीय ए प्रतियोगिता म प्रदेस के अलग-अलग जोन ले आय खिलाड़ी मन हॉकी, फुटबॉल, बॉस्केटबॉल, सॉफ्ट टेनिस, रोलर स्केटिंग अउ साइकि्ंलग जइसे खेल मन म अपन प्रतिभा के प्रदर्सन करीन।