केंद्र सरकार ह ए बेरा के वित्तीय बछर बर प्रधानमंत्री जनजाति आदिवासी न्याय महाअभियान पीएम-जनमन के तहत छत्तीसगढ़ बर दू सौ उनसठ करोड़ रूपिया के मंजूरी देहे। ग्रामीण विकास मंत्रालय डहार ले जारी ए आदेस राज्य के दूरदराज वाले जघा अउ सेवा मन ले छूटे क्षेत्र मन म आखिरी छोर तक संपर्क सुविधा ल बढ़िया बनाना अउ सड़क नेटवर्क ल मजबूत करे के दिसा म एक ठिन बड़का कदम हरय। ए मंजूरी के संग छत्तीसगढ़ ल ग्रामीण संपर्क योजना बर पीएम-जनमन के तहत केंद्रीय सहायता ह पांच सौ करोड़ रूपिया ले जादा हो गेहे। मंत्रालय ह किहीन हे कि ए मंजूरी के मिले ले प्रदेस के आदिवासी अंचल म संपर्क बने ढंग ले हो सकही अउ आर्थिक रूप ले कमजोर लोगन मन ल फायदा मिलही।
‘स्वस्थ नारी, सशक्त परिवार अभियान‘
केंद्रीय स्वास्थ्य अउ परिवार कल्याण मंत्री जगत प्रकाश नड्डा ह बतइन हे कि ‘स्वस्थ नारी, सशक्त परिवार अभियान‘ के तहत देसभर म अब तक नौ लाख ले जादा स्वास्थ्य सिविर लगाय गे हे। नई दिल्ली म राखे गे स्वास्थ्य सम्मेलन म ओमन बतइन कि नरेंद्र मोदी सरकार के कार्यकाल म देस म स्वास्थ्य सेवा मनके स्तर बने हो गेहे। ऐति, ए अभियान के तहत रईपुर के अखिल भारतीय आयुर्विज्ञान संस्थान एम्स अस्पताल डहार ले कोटा म माईलोगिन मन म सिकलसेल रोग ले बांचे बर जागरूकता अउ जांच सिविर राखे गीस।
ए सिविर म गर्भवती माईलोगिन अउ सामुदायिक स्वास्थ्य कार्यकर्ता मन सामिल होइन। ए दउरान सैंतालीस ठिन रक्त नमूना ल सकेल के सिकलसेल के जांच करे गीस। संगेसंग हिमोग्लोबीन अउ ग्लूकोस परीक्षण बर खून के नमूना भेजे गीस।
जीएसटी बचत उत्सव
वस्तु अउ सेवाकर जीएसटी के दर म करे गे सुधार ल लेके ए बेरा छत्तीसगढ़ म राज्य सरकार डहार ले जीएसटी बचत उत्सव मनाय जात हे। इही कड़ी म मुंगेली के विधायक पुन्नूलाल मोहले ह सेतगंगा म दुकान मन म घूम के जीएसटी म कमी आय ले मिलइया फायदा उपर दुकानदार अउ ग्राहक मन ले गोठबात करीन। ए मउका म ओमन किहीन कि प्रधानमंत्री डहार ले करीबन तीन सौ ले जादा जिनिस मन उपर जीएसटी कम करके निम्न अउ मध्यम वर्ग के परिवार मन ल बिसेस राहत देहे।
उपमुख्यमंत्री-पुल शिलान्यास
उपमुख्यमंत्री अरूण साव ह आज रईपुर म तीन ठिन नवा ओवर ब्रिज के सिलान्यास करीन। ए तीनो ओवरब्रिज लोक निर्माण विभाग डहार ले रिंग रोड क्रमांक दू म बनाय जाही। ए तीनो ओवरब्रिज ल बनाय बर करीबन एक सौ सत्रह करोड़ रूपिया के लागत आही। ए मउका म श्री साव ह किहीन कि ए तीनो ओवरब्रिज के बने ले राजधानी म बाढ़त जनसंख्या अउ यातायात के दबाल ल कम करे म मदद मिलही।
पीएससी मामला
छत्तीसगढ़ पीएससी घोटाला म सीबीआई ह पहिली पूरक चालान अदालत म पेस कर देहे। करीबन दू हजार पन्ना के ए आरोप पत्र म पीएससी के पूर्व अध्यक्ष टामन सिंह सोनवानी ल घोटाला के सरगना बताय गेहे। आरोप पत्र के मुताबिक घोटाला म अब तक गिरफ्तार करे गे, जम्मो आरोपी मन के खिलाफ पुक्ता सबूत मिले हे। एखर खुलासा आरोप पत्र म बिस्तार ले करे गेहे।
सेवा पर्व
सेवा अउ सुशासन माने जनसेवा अउ सुशासन के मंत्र ले प्रेरित होके, प्रधानमंत्री नरेंद्र मोदी के अगुवई म सरकार ह परिवर्तन अउ प्रगति लाय बर सरलग परयास करत हे। पाछू दसक म भारत के रेलवे सुधार म क्रांति ल देहे अउ देस के जीवन रेखा ल प्रगति के केंद्र म बदल देहे। मोदी सरकार ह भारतीय रेलवे ल यात्री मन बर जादा आरामदायक, सुरक्षित अउ विश्व स्तरीय यात्रा देवाय म आगू आय हे। कश्मीर ले कन्याकुमारी तक, भारतीय रेलवे ह कनेक्टिविटी के सूत्र बुनत हे। हालेच म कश्मीर घाटी म उधमपुर-श्रीनगर बारामूला रेल लाइन के सुभारंभ करत प्रधानमंत्री ह किहीन कि अमृत भारत स्टेसन योजना के तहत देसभर के तेरह सौ ले जादा स्टेसन मन के पुर्नविकास करे जात हे। भिलाई के तीन ठिन स्टेसन के संगेसंग प्रदेस के बत्तीस रेलवे स्टेसन घलो एमा सामिल हे। आगू के योजना ल धियान म राखत दू हजार तीस तक एक ठिन भविष्य के लिए तैयार रेलवे प्रणाली बनाय बर राष्ट्रीय रेल योजना तियार करे गेहे।
छात्रा-सहायता
राज्य सरकार ह प्रदेस म बाहरवीं परीक्षा पास करे के बाद कालेज म प्रवेस लेवइया जम्मो छात्रा मन ल हर साल तीस हजार रूपिया के वित्तीय सहायता दिही। ए बारे म उपमुख्यमंत्री अरूण साव ह बतइन कि ए योजना के मुख्य उद्देस्य छात्रा मन बर शिक्षा के अवसर बढ़ाय के संग ही ओमन ल उच्च शिक्षा बर प्रोत्साहित करना हे। ओमन किहीन कि राज्य सरकार के ए सोच हे कि प्रदेस के छात्रा मन आर्थिक तंगी के सेति उच्च शिक्षा ले वंचित झन होय।
माओवादी विस्फोट-बरामद
नारायणपुर जिला म सुरक्षा बल मन ह माओवादी मन डहार ले लुकाके राखे गे बिस्फोटक नक्सल, नक्सल साहित्य अउ रोजे के काम म अवइया जिनिस मन ल बरामद करे हे। हमर संवाददाता ले मिलेज जानबा के मुताबिक कोहकामेटा थाना क्षेत्र के गांव कोडलियार मिचिंगपारा के तीर माओवादी मन ह सुरक्षा बल मन ल नकसान पहुंचाय के उद्देस्य ले ए डंप ल लुकाय रिहीन।
प्रसारण मंत्रालय समिति गठित
केंद्र सरकार ह सूचना अउ प्रसारण मंत्रालय के हिंदी सलाकार समिति के पुर्नगठन करे हे। ए समिति के अध्यक्ष सूचना प्रसारण मंत्री अश्वनी वैष्णव अउ उपाध्यक्ष राज्यमंत्री डॉक्टर एल मुरूगन होही। पैंतालीस सदस्यीय ए समिति म छत्तीसगढ़ के अशोक बजाज ल राजभाषा विभाग म गृहमंत्रालय डहार ले नामित सदस्य बनाय गेहे। ए समिति के उद्देस्य हिंदी के बारे म जारी निरदेस के पालन करना अउ सूचना प्रसारण मंत्रालय म हिन्दी के परयोग ल बढ़ावा देना हे।
साबइर- जागरूकता
साइबर अपराध ल रोके अउ आम लोगन मन ल जागरूक करे बर बीजापुर जिला म जागरूकता अभियान चलाय जात हे। अभियान के तहत कोतवाली थाना क्षेत्र के व्यापारी संघ के सदस्य अउ आम लोगन मन ल जागरूक करे गीस। कारीकरम ल संबोधित करत पुलिस अधीक्षक डॉ. जितेन्द्र कुमार यादव ह किहीन कि ऑनलाइन ठगी ले बांचे बर जागरूकता ही सबले प्रभावी उपाय हरय। ओमन कोनो भी संदिग्ध काल लिंक या ऑफर उपर बिस्वास नइ करे के सलाह दे हवय।
बस्तर-दशहरा
पचहत्तर दिन तक चलइया विश्व प्रसिध्द बस्तर दसहरा परब के तहत आज सरगीपाल गांव म बेलपूजा विधि-विधान के संग करे गीस। बस्तर राजपरिवार के सदस्य कमलचंद भंजदेव ह ए पूजा विधान म सामिल होइन। ए रसम के बाद बेल के पेड़ ले दू ठिन फर तोड़ के ओला जगदलपुर स्थित मां दंतेश्वरी मंदिर म सम्मान के संग राखे गीस। दशहरा परब के तहत आज देर संझा फूल रथ के छटवां अउ आखिरी परिक्रमा होही।
भारतीय श्रोता सम्मेलन
आकांक्षा रेडियो श्रोता संस्था डहार ले अवइया चार अक्टूबर के रईपुर के वृंदावन सभागार म अखिल भारतीय श्रोता सम्मेलन के आयोजन करे जाही। रईपुर दक्षिण क्षेत्र के विधायक सुनील सोनी ह कारीकरम के मुख्य अतिथि होही। त उहें, आकाशवाणी रईपुर के सहायक केंद्र निदेशक पंकज मेश्राम, उद्घोषक दीपक हटवार, सेवानिवृत्त कारीकरम अधिकारी समीर शुक्ल, के. परेश राव, संजय पांडेय, श्याम वर्मा, अनिल सालोमन अउ यादराम पटेल बिसेस अतिथि होही। संस्था के अध्यक्ष छेदूलाल यादव ह बतइन कि कारीकरम म छत्तीसगढ़ के लोक कलाकार सुनील सोनी ल सम्मानित करे जाही।
अउ अब थोरकुन समाचार सार म –
– मुख्यमंत्री विष्णुदेव साय के अगुवई म काली राज्य मंत्री परिषद के बइठका नवा रईपुर स्थित मंत्रालय म राखे गेहे।
– रईपुर के कृषि महाविद्यालय म हिंदी पखवाड़ा के मउका म काली ‘‘विकसित भारत के निर्माण में हिंदी की भूमिका‘‘ बिसय उपर एक दिन के संगोष्ठी के आयोजन करे जाही।
– राजनांदगांव जिला म एंबुलेंस ले सराब तस्करी के मामला आगू आय हे। पुलिस ह आरोपी राहूल साहू ल गिरफ्तार कर लेहे। एखर तीर ले महतारी एक्सप्रेस एंबुलेंस म लुकाके राखे गे अवैध सराब के सोलह ठिन पेटी बरामद करे गेहे।
– गरियाबंद पुलिस ह चार झिन हीरा तस्कर ल गिरफ्तार करे हे। एखर तीर ले छै नग हीरा बरामद करे गेहे।