मन की बात
प्रधानमंत्री नरेंद्र मोदी ह लोगन मन ले अवइया तिहार के मौसम म ‘‘वोकल फॉर लोकल‘‘ ल याद राखत एला स्वदेसी उत्पाद के संग मनाय के अपील करीन हवय। आकाशवाणी ले ‘‘मन की बात‘‘ कारीकरम के 126वां कड़ी म आज सुनइया मन संग अपन बिचार साझा करत ओमन किहीन कि अवइया दिन म अब्बड़ अकन तिहार हवय अउ अपन भारतीय उत्पाद ल खरीदे ले परिवार म खुसी बाढ़ जाही। श्री मोदी ह किहीन कि स्वदेस म तियार उत्पाद ल खरीदे ले कारीगर मनके परिश्रम के सम्मान होही अउ युवा उद्यमी मनके सपना ल पंख घलो लग जाही।
श्री मोदी ह किहीन कि तिहार के मौसम के दउरान सिरिफ घर ही नही, बल्कि सड़क, पड़ोस, बाजार अउ गांव के साफ-सफाई उपर घलो धियान दे जाना चाही। ओमन सहीद भगत सिंह अउ गायिका लता मंगेश्कर के जयंती म ओमन के सुरता करत अपन श्रध्दांजलि दीन। प्रधानमंत्री ह ‘‘मन की बात‘‘ कारीकरम म छठ पूजा के जिक्र करत किहीन कि अब छठ पूजा एक वैश्विक उत्सव म बदलत हवय। ओमन किहीन कि सरकार ए महापरब ल यूनेस्को के सांस्कृतिक धरोहर सूची म सामिल करे के प्रयास करत हवय। अवइया दू अक्टूबर के गांधी जयंती के संबंध म श्री मोदी ह किहीन कि महात्मा गांधी ह हमेसा स्वदेसी ल अपनाय उपर जोर दीन, जेमा खादी सबले प्रमुख रिहीस।
प्रधानमंत्री ह विजयादशमी के अवइया परब उपर घलो बात करत किहीन कि ए दरी के दशहरा काफी महत्वपूर्ण हवय। ओमन किहीन कि 100 बछर पहिली जब राष्ट्रीय स्वयं सेवक संघ के स्थापना होय रिहीस, ओ बेरा देस सदियों ले गुलामी के जंजीर म बंधे रिहीस अउ देसवासी मन हीन भावना ले ग्रसित रिहीन।
श्री मोदी ह देसवासी मन ल अवइया तिहार अउ खासकर देवारी तिहार के अपन सुभकामना दीन।
प्रधानमंत्री के मन की बात कारीकरम ल छत्तीसगढ़ म घलो सुने गीस। मुख्यमंत्री विष्णुदेव साय ह रईपुर म विधायक पुरंदर मिश्रा, सी.जी.एम.एस.सी. के अध्यक्ष दीपक म्हस्के अउ छत्तीसगढ़ राज्य अल्पसंख्यक आयोग के अध्यक्ष अमरजीत छाबड़ा संग मन की बात कारीकरम ल सुनिन। ए मउका म श्री साय ह किहीन कि ए कारीकरम करोड़ो देसवासी ल जोड़े अउ ओमन ल प्रेरित करे, नवाचार के अउ सुघ्घर काम ल आगू लाय के सशक्त जरिया हवय।
मुख्यमंत्री ह किहीन कि ए बेरा देसभर म ‘जी.एस.टी. बचत उत्सव‘ मनाय जावत हे। जी.एस.टी. दर म कटौती ले लोगन मन के रोजके जरूरत के जिनिस ले लेके गाड़ी, कृषि उपकरण अउ मसीन के खरीदी म राहत मिलत हवय।
ननि-आदर्श सुविधा केंद्र
केंद्रीय आवास अउ सहरी कार्य मंत्रालय ह राज्य के जम्मो नगरीय निकाय म आदर्श सुविधा केंद्र खोले खातिर 50 करोड़ रूपिया के मंजूरी करीन हे। पहिली चरण म 14 नगर निगम अउ 55 नगर पालिका म आदर्श सुविधा केंद्र सुरू करे जाही। ए सुविधा केंद्र लोगन मनले आने-आने किसम के प्रमाण पत्र अउ लाइसेंस पाय के अउ सिकायत निवारण, पंजीयन जइसन सेवा मन बर एकीकृत केंद्र के तरह काम करही।
मुख्यमंत्री विष्णुदेव साय अउ उपमुख्यमंत्री अरूण साव ह नगरीय निकाय मन म आदर्श सुविधा केंद्र खोले जाय के राज्य सरकार के प्रस्ताव उपर मंजूरी दे खातिर केंद्र सरकार के प्रति आभार जतइन। ओमन किहीन कि प्रदेस के जम्मो लोगन मन ल सुघ्घर सुविधा मिलय, ए ह राज्य सरकार के लक्ष्य हवय। आदर्स सुविधा केंद्र ए दिसा म एक ठिन जरूरी कदम हवय, जउन नगरीय प्रशासन ल अउ जादा प्रभावी बनाही।
गौरतलब हवय कि आदर्स सुविधा केंद्र के जरिया ले नगरीय निकाय म लोगन मन ल जरूरी दस्तावेज अउ सुविधा देवाय जाही। संगेसंग प्रदेस म संचालित आने नागरिक सुविधा पोर्टल जइसे निदान-एक एक सून्य सून्य, मोर संगवारी, संपत्ति कर अउ नगरीय प्रशासन ले जुड़े आने सेवा अउ सुविधा मन ल घलो आदर्स सुविधा केंद्र के संग जोड़े जाही।
स्वच्छता ही सेवा पखवाड़ा
राज्य स्थापना के रजत जयंती वर्ष अउ स्वच्छता ही सेवा पखवाड़ा के मउका म सारंगढ़-बिलाईगढ़ जिला म श्रमिक स्वास्थ्य जांच अउ श्रम कार्ड पंजीयन सिविर के आयोजन करे गीस। ए कारीकरम म राजस्व मंत्री टंकराम वर्मा मुख्य अतिथि के रूप म सामिल होइन। सिविर म तकरीबन 8 सौ श्रमिक मनके स्वास्थ्य जांच करे गीस। उहें, श्रम विभाग के आने-आने योजना के चलत हितग्राही मन ल आर्थिक सहायता प्रदान करे गीस।
ओति, कोंडागांव म स्वच्छता ही सेवा पखवाड़ा के चलत लोक निर्माण विभाग डहार ले ‘स्वच्छता रन‘ के आयोजन करे गीस। कारीकरम म मुख्य अतिथि के रूप म नगर पालिका परिषद के अध्यक्ष गणपति पटेल सामिल होइन। ए दउड़ म युवा प्रतिभागी सामिल होइन अउ स्वच्छता के संदेस दीन।
सेवा पर्व
सेवा अउ सुशासन यानी जनसेवा अउ सुशासन के मंत्र ले प्रेरित होके प्रधानमंत्री नरेंद्र मोदी के अगुवई म सरकार परिवर्तन अउ प्रगति लाय बर अथक प्रयास करत हे। आज ए बिसेस श्रृंखला-‘सेवा पर्व‘ म हमन आपमन बर लाय हवन कि कइसन मोदी सरकार ह प्रधानमंत्री किसान सम्मान निधि के जरिया ले देस के किसान मन ल मजबूत बनाय हे।
माओवादी-मुठभेड़
कांकेर जिला म तिरियारपानी गांव म आज सुरक्षा बल के संग होय मुठभेड़ म एक झिन माईलोगिन समेत तीन झिन माओवादी मन मारे गीन हवय, जेखर शव ल बरामद कर ले गे हवय। ए माओवादी मन उपर 14 लाख रूपिया के इनाम घोसित रिहीस। सुरक्षा बल ह घटना स्थल ले एक ठिन एस.एल.आर., एक ठिन थ्री नॉट थ्री रायफल, बारह बोर के बंदूक अउ आने माओवादी जिनिस ल बरामद करीन हवय।
जिला के पुलिस अधीक्षक आई. कल्याण एलिसेला ह बतइन कि सुरक्षा बल मन ल छिंदखड़क अउ तिरियारपानी गांव म 7 ले 8 माओवादी मनके मौजूद रहय के सूचना मिले रिहीस। एखर बाद डिस्ट्रिक्ट रिजर्व गार्ड के टीम तलासी अभियान म निकलिस। आज बिहनिया जब ए जवान मन तिरियारपानी गांव के जंगल पहुंचिन, त पहिली ले घात लगाके बइठे माओवादी मन ह सुरक्षा बल उपर फायरिंग सुरू कर दीन। एखर बाद जवान मन डहार ले करे गे जवाबी कार्रवाई म तीन झन माओवादी मारे गीस। ए मुठभेड़ म सीतानदी नगरीय एरिया कमेटी के सचिव सरवन मडकम उर्फ विश्वनाथ घलो मारे गीस, जेखर उपर 8 लाख रूपिया के इनाम घोसित रिहीस।
ओति, नारायणपुर जिला म सुरक्षा बल मन ह पांच-पांच किलो के पांच ठिन आई.ई.डी. बरामद करीन हवय। सुरक्षा बल ह ए सबो बिस्फोटक ल कोहकामेटा थाना क्षेत्र के कोडलियार गांव के तीर ले बरामद करीन हवय।
जीएसटी बचत उत्सव
जी.एस.टी. बचत उत्सव के चलत ए बेरा प्रदेस के मंत्री, सांसद, विधायक, जनप्रतिनिधि, व्यापारी अउ आम नागरिक मनके बीच जाके ओमन ल जी.एस.टी. के दर म करे गे सुधार के बारे म जानकारी देवत हवंय। इही कड़ी म काली पर्यटन अउ संस्कृति मंत्री राजेश अग्रवाल ह सूरजपुर जिला के बिश्रामपुर के दुकान मनके दउरा कर उपभोक्ता अउ बेपारी मनले गोठबात करीन। ओमन किहीन कि जी.एस.टी. सुधार ह देस के कर प्रणाली ल सरल अउ पारदर्सी बनाय हवय।
जल जीवन मिशन
जशपुर जिला के राजपुर गांव हर घर जल श्रेणी में शामिल हो गे हवय। पहाड़ी कोरवा जनजाति बहुल ए गांव म जल जीवन मिशन के चलत दू ठिन पानी टंकी ले सबो उनहत्तर ठिन गांव के परिवार मन ल घरेलू नल कनेक्सन के जरिया पिये के साफ पानी पहुंचाय जावत हे। ए गांव के आबादी दू सौ 47 हवय, जिंहा बिसेस पिछड़ा जनजाति पहाड़ी कोरवा मन जादा रहिथे।
‘‘सेंट्रल इंडिया कनेक्ट मार्केट प्लेस‘‘
विश्व पर्यटन दिवस के मउका म आज रईपुर म ‘‘सेंट्रल इंडिया कनेक्ट मार्केट प्लेस‘‘ के आयोजन करे गीस। छत्तीसगढ़ टूरिज्म बोर्ड अउ छत्तीसगढ़ टै्रवल ट्रेड एसोसिएसन के मिलेजुल प्रयास म ए कारीकरम के उद्घाटन पर्यटन अउ संस्कृति मंत्री राजेश अग्रवाल ह करीन। बोर्ड के नवा वेबसाइट के लोकार्पण करीन।