ए मउका म प्रधानमंत्री ह जनसभा ल संबोधित करत किहीन कि दू हजार सत्रह म वस्तु अउ सेवा कर-जीएसटी लागू होय के बाद कर के बोझ काफी कम हो गे हवय। जेखर ले मनखे मन उपर वित्तीय दबाव कम होय हे।
प्रधानमंत्री के समारोह के सीधा प्रसारण नालंदा व्याख्यान कक्ष आई.आई.टी. भिलाई परिसर म करे गीस। ए मउका म राज्य के तकनीकी शिक्षा मंत्री गुरू खुशवंत साहेब अउ अहिवारा के विधायक डोमन लाल कोर्सेवाड़ा मौजूद रिहीन।
केंद्र सरकार ह इही बछर आई.आई.टी. भिलाई के फेस-टू परियोजना के निर्माण खातिर दू हजार दू सौ संतावन करोड़ रूपिया के मंजूरी करे रिहीस।
उच्च न्यायालय-रजत जयंती
छत्तीसगढ़ उच्च न्यायालय के 25 बछर पूरा होय म आज बिलासपुर म रजत जयंती समारोह के आयोजन करे गीस। समारोह म राज्यपाल रमेन डेका, मुख्यमंत्री विष्णुदेव साय अउ केंद्रीय राज्य मंत्री तोखन साहू सामिल होइन। ए मउका म राज्यपाल ह किहीन कि न्याय सिरिफ सार्म्थ्यवान लोगन मन बर उपलब्ध न हो बल्कि ग्रामीण, गरीबहा अउ आम लोगन मन बर घलो सर्वसुलभ न्याय उपलब्ध होवय, तभे लोकतांत्रिक बेवस्था म न्यायपालिका के भूमिका सार्थक बनही।
समारोह ल संबोधित करत मुख्यमंत्री विष्णुदेव साय ह किहीन कि अधोसंरचना अउ संसाधन के उपलब्धता सुनिश्चित करे बर राज्य सरकार कटिबध्द हवय।
सर्वोच्च न्यायालय के न्यायाधीश जे.के. महेश्वरी ह किहीन कि आम लोगन मनके बिस्वास प्राप्त करना न्यायपालिका के उद्देस्यस होना चाही। समारोह ल केंद्रीय राज्य मंत्री तोखन साहू घलो संबोधित करीन।
ओलंपिक-एसोसिएशन-बैठक
मुख्यमंत्री विष्णुदेव साय काली रईपुर म आयोजित छत्तीसगढ़ ओलंपिक एसोसिएसन वार्षिक आमसभा के बइठका म सामिल होइन। ए मउका म श्री साय ह छत्तीसगढ़ डहार ले ओलंपिक म भाग लेवइया प्रतिभागी मन ल 21 लाख रूपिया के प्रोत्साहन रासि देके घोसना करीन। ओमन किहीन कि छत्तीसगढ़ म खेल प्रतिभा के कोनो कमी नइ हवय। ए प्रतिभा मन ल पहिचान दिलाय अउ निखारे बर राज्य सरकार प्रयासरत हवय। ओमन किहीन कि खेल अलंकरण समारोह जउन बंद हो गे रिहीस, ओला फेर सुरू करे जाही।
स्वस्थ्य नारी-सशक्त परिवार
‘स्वस्थ नारी-सशक्त परिवार‘ अभियान के तहत प्रदेस म मातृत्व सुरक्षा ल लेके बिसेस सवास्थ्य सत्र के आयोजन करे जावत हे। पाछू दू दिन म प्रदेस के 8 सौ 43 सरकारी स्वास्थ्य संस्थान मन म आायोजित स्वास्थ्य सत्र म 40 हजार ले जादा गर्भवती माईलोगिन मन ह हिस्सा लीन। ए दउरान ओमन बर निसुल्क स्वास्थ्य जांच, परामर्स अउ उपचार के सुविधा के इंतेजाम करे गीस।
उहें, दंतेवाड़ा जिला के जम्मो विकासखंड बर सामुदायिक स्वास्थ्य केंद्र मन म पाछू तीन दिन तक निसुल्क स्वास्थ्य सिविर के आयोजन करे गीस। ए सिविर म गर्भवती माईलोगिन मन के निसुल्क स्वास्थ्य परीक्षण करे गीस। जिला म अब तक 1 हजार 1 सौ ससत्तर गर्भवती माता मनके पंजीयन कर स्वास्थ्य संबंधी जांच करे गीस।
मन की बात
प्रधानमंत्री नरेंद्र मोदी काली बिहनिया ग्यारा बजे आकाशवाणी म ‘मन की बात‘ कारीकरम म देस-विदेस के लोगन मन संग अपन बिचार साझा करही। एहा मासिक रेडियो कारीकरम के 126वां कड़ी होही। ए कारीकरम आकाशवाणी अउ दूरदर्शन के जम्मो नेटवर्क, आकाशवाणी समाचार वेबसाइट अउ न्यूजऑनएआईआर मोबाइल ऐप म प्रसारित करे जाही। एखर सीधा प्रसारण आकाशवाणी समाचार, डीडी न्यूज, प्रधानमंत्री कार्यलय अउ सूचना अउ प्रसारण मंत्रालय के यूट्यूब चैनल मन म घलो करे जाही। आकाशवाणी हिंदी प्रसारण के तुरते बाद क्षेत्रीय भाखा म घलो ए कारीकरम के प्रसारण करही।
जीएसटी-बचत उत्सव
मुख्यमंत्री विष्णुदेव साय काली जी.एस.टी. बचत उत्सव के चलत राजधानी रईपुर के देवपुरी के ट्रैक्टर सोरूम म पहुंचिन, जिंहा ओमन किसान ले गोठबात करत जी.एस.टी. कटौती करे उपर उंखर मनके राय जानिन अउ खरीदी म होय बचत के जानकारी लीन। ए मउका म श्री साय ह किहीन कि केंद्र सरकार डहार ले लागू जी.एस.टी. म करे गे सुधार ले आम जनता, किसान अउ उपभोक्ता मन ल राहत मिले हवय। कृषि यंत्र के कीमत म कमी आय ले किसान मन ल एखर सीधा फायदा मिलत हवय। ओमन किहीन कि जी.एस.टी. बचत उत्सव ले उपभोक्ता मनके जेब के बोझ कम होय हे।
ओति, खैरागढ़-छुईखदान-गंडई जिला के पिपरिया के जिला भाजपा कार्यालय म काली जी.एस.टी. सुधार ल लेके कार्यसाला अउ संगोष्ठी के आयोजन करे गीस। कार्यसाला ल संबोधित करत शिक्षा मंत्री गजेन्द्र यादव ह किहीन कि जी.एस.टी. कटौती आम जनता बर राहत देवइया हरय। ओमन छुईखदान बुनकर सोसायटी डहार ले बनाय गे कपड़ा मनके सराहना करीन अउ उंहा के कपड़ा मन ल अपनाय के अपील करीन।
धान खरीदी-सत्यापन
राज्य सरकार ह ए बछर धान खरीदी ले पहिली फसल प्रविष्टि के सुध्दता सुनिश्चित करे बर त्रिस्तरीय सत्यापन प्रक्रिया लागू करीस हवय। इही कड़ी म काली बलरामपुर-रामानुजगंज जिला मुख्यालय म डिजीटल फसल प्रसिक्षण कारीकरम के आयोजन करे गीस। कारीकरम म बताय गीस कि एग्रीस्टेक पोर्टल अउ भुईयां सॉफ्टवेयर म दर्ज प्रविष्टि के 5 प्रतिसत रैंडम सत्यापन मोबाइल पीवी ऐप के जरिया करे जाही। ए काम तीन चरण म होही।
दुर्घटना
राजनांदगांव जिला के डोंगरगढ़ क्षेत्र म आज बिहनिया एक ठिन जिनिस लेगत गाड़ी के टक्कर ले बाईक सवार दू झिन मनखे मनके मउत होगे। मिले जानबा के मुताबिक मोटर सायकल सवार युवक मन डोंगरगढ़ ले भिलाई लहुटत रिहीन, इही दउरान मुंदगाव के तीर एक ठिन तेज रफ्तार गाड़ी ह टक्कर मार दीस। ए हादसा म दूनो झिन युवक मनके मउकच म मउत होगिस।
हाईकोर्ट-बीएड डिग्रीधारी
छत्तीसगढ़ उच्च न्यायालय ह बर्खास्त बी.एड. योग्यताधारी सहायक शिक्षक मन ल राहत देवत समायोजन के खिलाफ दायर याचिका ल खारिज कर दीन। राज्य सरकार ह ए शिक्षक मन ल सहायक शिक्षक विज्ञान प्रयोगसाला के पद म समयोजित करे के निरनय लीस हवय। मामला के सुनवाई करत न्यायमूर्ति रवीन्द्र कुमार अग्रवाल के सिंगल बेंच ह किहीन कि राज्य सरकार के फइसला गैर कानूनी या मनमाना नइ हे। गौरतलब हवय कि राज्य मंत्रिमंडल ह समायोजन ल लेके इही बछर अप्रैल म निरनय ले रिहीस, जेला चुनौती दे गे रिहीस।
प्लांट-हादसा
राजधानी रईपुर के सिलतरा के एक ठिन फैक्ट्री म काली होय हादसा म 6 झिन मजदूर मनके मउत होगिस। मुख्यमंत्री विष्णुदेव साय ह मजदूर मनके निधन उपर दुख जतइन। ओमन किहीन कि ए हादसा अब्बड़ दुखद अउ तकलीफ देवइया हवय। ओमन मृतक मनके परिवार खातिर दुख जतइन। मुख्यमंत्री ह जिला प्रशासन ल घायल मनखे मनके इलाज के सुघ्घर बेवस्था करे के निरदेस दीन हवय।