अइसने, जिला स्तर म घलो छत्तीसगढ़ के प्रदर्सन बने रेहे हे। कैटेगरी-‘ए‘ म बालोद ल पहिली स्थान, राजनांदगांव ल दूसर स्थान अउ रईपुर ल तीसर स्थान मिले हे। ए तीनों जिला ल पुरस्कार के रूप म दू-दू करोड़ रूपिया के रासि दे जाही। उहें, केटेगरी दू म महासमुंद, बलौदाबाजार अउ गरियाबंद ल एक-एक करोड़ रूपिया ले सम्मानित करे जाही। केटेगरी तीन म बिलासपुर, रायगढ़, बलरामपुर, धमतरी, सूरजपुर अउ दुरूग ल उंखर बने काम बर पचीस-पचीस लाख रूपिया के इनाम दे जाही।
मुख्यमंत्री विष्णुदेव साय अउ उपमुख्यमंत्री तथा नगरी प्रशासन मंत्री अरूण साव ह ए सफलता बर प्रदेसवासी मन ल बधई दीन हे।
बीएसएनएल-फोर जी सेवाएं
भारत संचार निगम लिमिटेड बीएसएनएल अपर रजत जयंती वर्ष म उपभोक्ता मन बर एक ठन बड़े सौगात ले के आवत हे। इही कड़ी म देसभर म काली ले स्वदेसी सी-डॉट कोर के संग टीसीएस तेजस एकीकरण म आधारित फोर जी सेवा सुरू होही। ए सेवा के उद्घाटन प्रधानमंत्री नरेंद्र मोदी ह करही। एमा सैंतीस हजार करोड़ रूपिया के लागत ले स्वदेसी तकनीक के माध्यम ले बने संतानवे हजार पांच सौ ले जादा फोर जी टावर लगाय गेहे, जेमा दू हजार सात सौ छै टावर छत्तीसगढ़ म लगाय गेहे, जेखर उद्घाटन होय ले गंवई क्षेत्र के मोबाइल नेटवर्क मजबूत होही।
स्वच्छता ही सेवा
स्वच्छता ही सेवा अभियान के तहत आज प्रदेस के आने-आने जिला म श्रमदान कारीकरम के आयोजन करे गीस। इही कड़ी म उपमुख्यमंत्री अरूण साव ह मुंगेली जिला के नगर पालिका लोरमी म स्वच्छता दीदी अउ नगरवासी मनके संग सामूहिक श्रमदान करीन।
उहें, नगर पालिक निगम चिरमिरी डहार ले बिसेस स्वच्छता अभियान के आयोजन करे गीस। कारीकरम म स्वास्थ्य मंत्री श्यामबिहारी जायसवाल ह सामिल होइन। ए मउका म राजीव गांधी पार्क, मालवीय नगर अउ पंडित दीनदयाल उपाध्याय चौक पोंडी म सफाई अभियार अउ श्रमदान कारीकरम कराय गीस। संगेसंग स्वच्छता मित्र मन अपन सामूहिक प्रयास ले तीर-तखार के क्षेत्र के साफ-सफाई करीन।
सेवा पखवाड़ा
सेवा पखवाड़ा के तहत दिव्यांगजन ल शासन के आने-आने कल्याणकारी योजना के फायदा देवाय बर समाज कल्याण विभाग डहार ले अंबिकापुर म जिला स्तरीय दिव्यांगजन सिविर के आयोजन करे गीस। सिविर म संस्कृति मंत्री राजेश अग्रवाल ह दिव्यांगजन ले भेंट करके ओमन ल जरूरी समान जइसे ट्राइसिकल, व्हील चेयर, श्रवण यंत्र अउ सेंसर छड़ी बांटिन। ओमन ह दिव्यांगजन ले गोठबात करके उंखर जरूरत के बारे म पूछिन अउ निपटारा बर विभाग के अधिकारी मन ल निरदेस दीन।
पोषण-जागरूकता कार्यक्रम
केंद्रीय संचार ब्यूरो क्षेत्रीय कार्यालय कांकेर डहार ले कोंडागांव जिला के आखिरी छोर म बसे घोड़ागांव म आज पोषण माह के अंतर्गत बिसेस लोक संपर्क कारीकरम के आयोजन करे गीस, जेखर उद्देस्य सरकार के योजना के जानकारी ग्रामीण लोगन तक पहुंचाना अउ ओमन ल पोषण के बारे म जागरूक करना रिहीस।
स्कूल शिक्षा विभाग-अवकाश
स्कूल शिक्षा विभाग ह वर्तमान शैक्षणिक सत्र बर विद्यालय अउ महाविद्यालय म अवकास के घोसना कर देहे। जारी आदेस के अनुसार शासकीय, अनुदान प्राप्त अउ गैर अनुदान प्राप्त शाला के संग डी.एड., बी.एड. अउ एम.एड. कालेज म आने-आने तिहार अउ मौसम के अनुसार अवकास तय करे गेहे।
दशहरा अवकास उनतीस सितंबर ले चार अक्टूबर तक रइही, जउन ह कुल छै दिन के होही। दिवाली अवकास बीस अक्टूबर ले पचीस अक्टूबर तक रइही जउन ह छै दिन के होही।
अइसने, सीतकालीन अवकास बाईस दिसंबर ले सत्ताईस दिसंबर तक रइही। एमा घलो लइका मन ल छै दिन के छुट्टी मिलही। ग्रीष्माकालीन अवकास एक मई ले पंद्रह जून दू हजार छब्बीस तक रइही जउन ह कुल छियालिस के दिन होही। एखर अनुसार लइका मन ल पूरा सैक्षणिक सत्र म कुल चौंसठ दिन के छुट्टी मिलही।
मुख्यमंत्री-सेमीकंडक्टर इन्फ्रास्ट्रक्चर
मुख्यमंत्री विष्णुदेव साय ह आज रईपुर म ‘‘ मेक-इन-सिलिकॉनः राष्ट्रीय सिंपोजियम ऑन एनेबलिंग इंडिजिनस सेमीकंडक्टर इन्फ्रास्ट्रक्चर‘‘ के पोस्टर अउ आधिकारित वेबसाइट के सुरूआत करीन।
ट्रिपल आईटी-नया रईपुर के निदेसक प्रोफेसर ओमप्रकाश व्यास ह मुख्यमंत्री ल जानकारी दीन कि ए राष्ट्रीय संगोष्ठी सात अउ आठ नवंबर के ट्रिपट आईटी-नया रईपुर म होही, जेमा देसभर के बिसेसज्ञ, उद्योग जगत के प्रतिनिधि, शिक्षाविद अउ नीति निर्माता मन सामिल होही। ए संगोष्ठी के उद्देस्य भारत के घरेलू सेमीकंडक्टर व्यवस्था ल मजबूत बनाय बर ठोस रननीति बनाना हे।
जीएसटी-उपमुख्यमंत्री
वस्तु अउ सेवा कर-जीएसटी के दर म करे गे सुधार ल लेके ए बखत प्रदेस म राज्य सरकार डहार ले जीएसटी बचत उत्सव मनाय जावत हे। इही कड़ी म उपमुख्यमंत्री अरूण साव ह आज मुंगेली जिला के लोरमी नगर पालिका के दुकानदार अउ खरीददार मनले संवाद करीन। ए मउका म उपमुख्यमंत्री ह किहीन कि जीएसटी सुधार ले देस के आर्थिक गतिविधि म तेजी आही, जेखर ले स्थानीय रोजगार ल घलो बढ़ावा मिलही।
ईडी-छापा
प्रवर्तन निदेशालय ईडी के टीम ह आज बिहनिया रईपुर अउ बिलासपुर म कतकोन कारोबारी समूह के ठिकाना उपर छापामार कार्रवाई करीस। ए कार्रवाई कस्टम मीलिंग, मनी लॉन्ड्रिंग अउ कोयला कारोबार म होवत गड़बड़ी ले जुड़े बताय जावत हे। ईडी के टीम ह रईपुर के जवाहर मार्केट के रहेजा ग्रुप के संचालक संजय रहेजा के घर अउ दफ्तर म छापा मारिन।
उहें, बिलासपुर गांव मीनाक्षी ट्रेडर्स अउ सुल्तानिया परिवार के क्रांति नगर के आवास अउ कारोबारी ठिकाना म छापेमारी करीन। टीम बिहनियच ले दूनो सहर म आने-आने ठिकाना म अभी घलो मौजूद हे अउ जांच करत हे।
रायपुर-माओवादी दंपत्ति गिरफ्तार
पुलिस अउ नक्सल विरोधी दस्ता के टीम ह रईपुर के चंगोराभाठा के एक घर ले माओवादी संगठन ले जुड़े एक दंपत्ति ल गिरफ्तार करे हे। पुलिस के अनुसार ए दूनो पति-पत्नी फर्जी आईडी बनाके राहत रिहीन। दूनो आरोपी के पहिचान जग्गू अउ कमला के रूप म होय हे। ए दूनो माओवादी रईपुर के मेकाहारा अस्पताल म इलाज कराय बर पहुंचे रिहीन। जांच के दउरान उंखर आईडी फर्जी निकलिस। एखर बाद ए दूनों ल गिरफ्तार करके पूछताछ करे गीस, जेमा ओमन ह माओवादी संगठन म सामिल रहय के बाद स्वीकार करीन। नक्सल विरोधी दस्ता के टीम ह आरोपी मनले पूछताछ करत हे।
उच्च न्यायालय-रजत जयंती
छत्तीसगढ़ उच्च न्यायालय के पचीस बछर पूरा होय म काली बिलासपुर म रजत जयंती कारीकरम के आयोजन करे जाही। एखर उद्घाटन राज्यपाल रमेन डेका ह करही। उहें, मुख्य अतिथि के रूप म केंद्रीय कानून मंत्री अर्जुनराम मेघवाल अउ मुख्यमंत्री विष्णुदेव साय सामिल होही। संगेसंग सुप्रीम कोर्ट के न्यायाधीश सूर्यकांत, जे.के. माहेश्वरी अउ प्रशांत कुमार मिश्रा बिसेस रूप ले मौजूद रइही। कारीकरम के अध्यक्षता उच्च न्यायालय के मुख्य न्यायाधीश रमेश सिन्हा करही।
बातों-बातों में
प्रादेशिक समाचार एकांश आकाशवाणी रायपुर के समसामयिक बिसय म आधारित कारीकरम ‘‘बातों-बातों में‘‘ म ए बखत सेवा परब के तहत प्रसारित करे जात बिसेस कारीकरम के श्रृंखला म सांसद संतोष पांडेय ले लेगे बिसेस भेंटवार्ता के प्रसारण करे जाही। ए कारीकरम के प्रसारण काली सत्ताईस सितंबर के एफएम चैनल म बिहनिया नौ बजे ले अउ प्रायमरी चैनल म बिहनिया साढ़े दस बजे ले करे जाही। एला छत्तीसगढ स्थित आकाशवाणी के जम्मों केंद्र रिले करही।