मुख्यमंत्री ह बतइन कि स्वास्थ्य सेवा के क्षेत्र म दू हजार चार सौ छैंसठ करोड़ रूपिया ले जादा के निवेस प्रस्तावित हे। जेखर ले लगभग छै हजार नवा रोजगार बनही। उहें, होटल अउ पर्यटन क्षेत्र म घलो छै सौ बावन करोड़ रूपिया ले जादा के निवेस प्रस्ताव मिले हे। कारीकरम न उद्योग मंत्र लखनलाल देवांगन ह घलो संबोधित करीन।
‘‘स्वस्थ्य नारी, सशक्त परिवार‘ अभियान
‘‘स्वस्थ्य नारी, सशक्त परिवार‘ अभियान के तहत आज प्रदेस म राज्य व्यापी महिला स्वास्थ्य सम्मेलन दिवस के आयोजन करे गीस। ए बेरा म स्वास्थ्य जांच सिविर, टीकाकरण सत्र, पोषण संवाद अउ जागरूकता कारीकरम आयोजित करे गीस। ए कारीकरम म कलेक्टर लीना कमलेश मंडावी घलो सामिल होइन।
स्वच्छता पखवाड़ा
स्वच्छता पखवाड़ा के तहत प्रदेस के सबो ग्राम पंचायत म काली पच्चीस सितंबर के बिसेस स्वच्छता कारीकरम चलाय जाही। छत्तीसगढ़ स्वच्छ भारत मिसन- गांव के संचालक डॉक्टर अश्वनी देवांगन ह बतइन कि गांव स्तर म होवइया ए कारीकरम म जनप्रतिनिधि गांव के लोगन मन के संग मिल के अपन -अपन गांव के साफ-सफाई करही।
स्वच्छता ही सेवा पखवाड़ा के तहत बलौदाबाजार जिला के बार नवापारा म स्वच्छता अउ वृक्षारोपण कारीकरम आयोजित करे गीस। एमा आने-आने गांव के जनप्रतिनिधि अउ गांव के लोगन मन मिलके परिसर के सफाई करीन अउ स्वच्छ वातावरण बनाय राखे के संकल्प लीन।
उहें, गौरेला-पेण्ड्रा-मरवाही जिला के ग्राम पंचायत खोडरी म सेवा पखवाड़ा के तहत लर्निंग लाइसेंस सिविर के आयोजन करे गीस। ए बेरा म आवेदक मन ल लर्निंग लाइसेंस जारी करे गीस अउ ओमन ल ट्रैफिक नियम ले जुड़े जानबा दे गीस।
माओवादी-आत्मसमर्पण
दंतेवाड़ा जिला म आज इक्कीस माईलोगन मन के संग इकहत्तर माओवादी मन ह सुरक्षा बल मन के आगू आत्मसमर्पण करीन। एमा ले तीस माओवादी मन उपर कुल चौसठ लाख रूपिया के इनाम घोसित रिहीस। पुलिस के अनुसार जिला म चलाय जावत लोन वर्राटू यानी घर वापस आय अभियान ले प्रभावित होके ए माओवादी मन ह आत्मसमर्पण करे हे। समर्पण करइया माओवादी उपर आने-आने घटना म सामिल होय के आरोप हे। आत्मसमर्पित माओवादी मन ल राज्य सरकार के पुर्नवास नीति के तहत पचास-पचास हजार रूपिया के प्रोत्साहन रासि के संग सरकार डहार ले दे जाने वाला आने सुविधा-जइसे कौसल विकास के प्रसिक्षण मुहैया कराय जाही।
युक्तियुक्तकरण के बाद घलो जेन शिक्षक मन अभी तक कार्यभार ग्रहण नइ करे हे, उंखर खिलाफ सिविल सेवा आचरण नियम के तहत अनुशासनात्मक कार्रवाई करे जाही। छत्तीसगढ़ उच्च न्यायालय डहार ले जेन मामला म राहत या स्थगन दे गेहे, ओला छोड़के स्कूल शिक्षा विभाग ह बांचे सबो शिक्षक मन ल दू दिन म कार्यभार ग्रहण करे के निरदेस देहे।
जानबा के मुताबिक स्कूल शिक्षा विभाग डहार ले प्रदेस म स्कूल अउ अतिशेष शिक्षक मन ल युक्तियुक्तकरण के प्रक्रिया ल पूरा कर ले गेहे।
केशकाल सिटी पोर्शन-रासि
केंद्रीय सड़क परिवहन अउ राजमार्ग मंत्री नितिन गडकरी ह बस्तर अंचल के राष्ट्रीय राजमार्ग क्रमांक-तीस म केशकाल सिटी पोर्शन के उन्नयन बर आठ करोड़ पचहत्तर लाख रूपिया के स्वीकृति देहे। एमा मुख्यमंत्री विष्णुदेव साय ह श्री गडकरी के आभार जतात किहीन कि एखर ले छत्तीसगढ़ के अंदर रहवासी क्षेत्र मन म रहवइया आदिवासी वर्ग ल मुख्यधारा ले जोड़े जा सकही। संगेसंग शिक्षा अउ स्वास्थ्य सेवा तक पहुंचना आसान होही। जेखर ले विकसित छत्तीसगढ़ के नींव मजबूत बनही।
मुख्यमंत्री-जीएसटी बचत उत्सव
वस्तु अउ सेवा कर-जीएसटी के दर म करे गे सुधार मन ल लेके प्रदेस म जीएसटी बचत उत्सव मनाय जावत हे। एखर तहत जनप्रतिनिधि, व्यापारी अउ उपभोक्ता मनके बीच जाके ओमन ल एखर जानबा देवत हे। इही कड़ी म मुख्यमंत्री विष्ण्ुदेव साय ह काली मंझनिया रईपुर स्थित जयस्तंभ चौक ले महात्मा गांधी रद्दा ले होवत गुरूनानक चौक तक आने-आने व्यापारी प्रतिष्ठान म जाके जीएसटी बचत उत्सव के जायजा लीन हे। ए दउरान मुख्यमंत्री ह दुकान मन म बचत उत्सव के स्टीकर लगइन अउ स्थानीय दुकानदारों अउ ग्राहक मनले चर्चा करीन। ओमन किहीन कि जीएसटी सुधार ले देस के आर्थिक गतिविधि म तेजी आही, जेखर ले स्थानीय रोजगार ल घलो बढ़ावा मिलही।
उहें, महिला अउ बालविकास मंत्री लक्ष्मी राजवाड़े ह सूरजपुर जिला के आने-आने दुकान मन म घुम के ग्राहक मनले गोठबात करीन। ए दउरान ओमन ह जीएसटी के दर म करे गे कमी ले आम लोगन मन ल मिलइया प्रत्यक्ष लाभ के जानकारी दीन। ओमन किहीन कि जीएसटी दर म कमी ले लोगन मनके रोजके जरूरी समान अब अउ सस्ता हो गेहे। ए पहल गरीब, मध्यम वर्ग अउ छोटे व्यापारी मन बर बड़का राहत साबित होही।
अइसने, रईपुर जिला के आरंग म होवइया जीएसटी बचत उत्सव कारीकरम म कैबिनेट मंत्री गुरू खुशवंत साहेब ह व्यापारी अउ लोगन मनले मुलाकात करीन। ए बेरा म ओमन ह किहीन कि जीएसटी म करे गे सुधार बचत के संग व्यापार ल नवा ऊर्जा अउ अर्थव्यवस्था ल मजबूती देने वाला हे।
मनरेगा दर्पण
मुख्यमंत्री विष्णुदेव साय ह धमतरी जिला के करेली बड़ी गांव म होवइया राज्य स्तरीय महतारी सदन लोकार्पण कारीकरम म ‘‘मनरेगा दर्पण-नागरिक सूचना पटल‘‘ के सुभारंभ करीन। ए बेरा म ओमन ह किहीन कि मनरेगा दर्पण ले आम लोगन मन ल मनरेगा के काम के जानकारी आसानी ले मिल सकही। ए पहल पारदर्सिता अउ जवाबदेही के दिसा म एक जरूरी कदम हे। क्यूआर कोड अउ जी.आई.एस. तकनीक म आधारित ए पहल गांव मन म डिजीटल सशक्तिकरण अउ सुशासन के दिसा म मिल के पत्थर साबित होही। ए प्रणाली ले अब गांव के हर मनखे जान सकही कि मनरेगा के तहत उंखर क्षेत्र म कौन से काम स्वीकृत होय हे, कतका पइसा खर्च होय हे अउ काम के हाल ही म स्थिति का हे।
शिक्षक-काउंसिलिंग प्रक्रिया
लोक शिक्षण संचालनालय ह व्याख्याता अउ व्याख्याता एल.बी. संवर्ग म बिसयवार पदोन्नति के आदेस जारी करे हे। पदोन्नत व्याख्याता मनके साला आवंटन के प्रक्रिया ओपन काउंसिलिंग के जरिया ले करे जाही। काउंसिलिंग के प्रक्रिया काली पच्चीस ले अट्ठाईस सितंबर तक रईपुर के शंकर नगर स्थित शिक्षा महाविद्यालय परिसर म होही। ए प्रक्रिया म एक हजार एक सौ छै पदोन्नत व्याख्याता अउ व्याख्याता एल.बी. सामिल होही। विभागीय अधिकारी मन ह बतइन कि काउंसिलिंग ले जुड़े सूची, खाली पद के सूची अउ समय-सारिणी विभागीय पोर्टल म उपलब्ध हे।
बस्तर दशहरा-जोगी बिठाई
पचहत्तर दिन तक चलइया विश्व प्रसिध्द बस्तर दशहरा के तहत काली मंझनिया ‘‘जोगी बिठाई‘‘ के रस्म ल करे गीस। जगदलपुर के सिरहासार भवन म होवइया कारीकरम म विधायक किरण सिंह देव, बस्तर दशहरा समिति के उपाध्यक्ष बलराम मांझी के संग चालकी, मेंबरिन, मांझी जनप्रतिनिधि अउ श्रध्दालु मन उपस्थित रिहीन। मान्यता हे कि ए रस्म बस्तर दशहरा ल बिना कोनो बाधा के सांति के संग पूरा कराय के उद्देस्य ले निभाय जाथे।
अउ अब पेस हे मौसम के हाल
मौसम विभाग के अनुसार उत्तर ओडिसा अउ उंखर ले लगे गांगेय पश्चिम बंगाल म एक कम दबाव के क्षेत्र बने हे। एखर प्रभाव ले प्रदेस म अवइया चौबीस घंटा के दउरान जादा बरसा होय के संभावना हे। मौसम विज्ञानी डॉक्टर गायत्री आकाशवाणी समाचार ल बतइन कि मध्य छत्तीसगढ़ म रईपुर, बिलासपुर अउ दुरूग संभाग के जिला के कुछेक जघा म भारी ले अतिभारी बरसा होय के चेतावनी दे गेहे।