वस्तु अउ सेवा कर के नवा दर जीएसटी आज ले देसभर म लागू हो गेहे। अब सिरिफ पांच अउ अट्ठारा प्रतिसत के दू ठिन स्लैब रइही। प्रधानमंत्री ह किहीन कि कर के दर म कटौती ले रोज उपभोग करे के जिनिस सस्ता होही। प्रधानमंत्री ह किहीन कि एक देस एक कर के सपना साकार हो गेहे। प्रधानमंत्री ह वस्तु अउ सेवा कर के बदलाव ल अवइया पीढ़ी के सुधार बताय हे। एखर ले अर्थव्यवस्था ल मजबूती मिले के संगेसंग आम लोगन मन ल राहत मिलही। राष्ट्र के नांव संबोधन म काली संझा प्रधानमंत्री ह नवरात्रि के पहिली दिन ले लागू होय जीएसटी सुधार ल बचत उत्सव के नांव देहे।
जीएसटी दर-उपमुख्यमंत्री
छत्तीसगढ़ के उपमुख्यमंत्री अरूण साव ह किहीन हे कि प्रधानमंत्री नरेंद्र मोदी ह नवरात्रि के पावन परब म देस म जीएसटी बजट उत्सव सुरू करे हे। रईपुर म पत्रकार मनले गोठबात करत ओमन किहीन कि एखर ले देस के आम लोगन, माईलोगिन, छात्र अउ किसान मनके संगेसंग युवा मनके जिनगी म खुसहाली आही।
माओवादी-मुठभेड़
नारायणपुर जिला म आज सुरक्षा बल मनके संग होय मुठभेड़ दू झिन माआवोदी मारे गीस। हमर संवाददाता ले मिले जानबा के मुताबिक महाराष्ट्र, छत्तीसगढ़ सीमावर्ती क्षेत्र म माओवादी मनके होय के सूचना मिले के बाद सुरक्षाबल मन ल रवाना करे गीस। इही दउरान अबूझमाड़ वाले जघा म सुरक्षाबल के जवान मन उपर माओवादी मन ह गोलाबारी सुरू कर दीन। जवान मन कोति ले घलो जवाबी कार्रवाई करे गीस। घटना वाले जघा ले दू झिन माओवादी के शव बरामद करे गेहे। संगेसंग एके फोर्टिसेवन रायफल अउ बड़ मात्रा म बिस्फोटक के संगेसंग माओवादी जिनिस घलो बरामद करे गेहे।
मुख्यमंत्री विष्णुदेव साय ह सुरक्षाबल मन ल मिले सफलता उपर किहीन कि ए सिरिफ नक्सलवाद के खातमा के दिसा म एक ठिन निर्णायक पड़ाव हरय। एखर ले प्रदेस म सांति-सुरक्षा अउ विकास के काम म गति मिलही।
जवान अंतिम संस्कार
मणिपुर म उग्रवादी मन संग मुठभेड़ म सहीद होय बस्तर जिला के जवान रंजित सिंह कश्यप के आज उंखर गृहग्राम बालेंगा म राजकीय सम्मान के संग अंतिम संस्कार करे गीस। ए मउका म जनप्रतिनिधि अउ सुरक्षाबल मनके जवान के संगेसंग बड़ संख्या म गांव के लोगन मन सामिल होइन। एखर पहिली काली संझा रंजित कश्यप के पार्थिव सरीर ल रईपुर स्थित स्वामी विवेकानंद हवाई अड्डा लाय गीस। जिंहा ओमन ल जवान मन श्रध्दांजलि दीन।
जानबा के मुताबिक मणिपुर म उन्नीस सितंबर के असम रायफल्स के काफिला उपर उग्रवादी मन डहार ले करे गे हमला म बस्तर के जवान रंजित सिंह कश्यप के संगेसंग दू झिन जवान सहीद हो गे रिहीन।
‘‘स्वस्थ नारी, सशक्त परिवार अभियान‘‘
‘‘स्वस्थ नारी, सशक्त परिवार अभियान‘‘ के तहत प्रदेस म स्वास्थ्य सिविर के आयोजन करे गीस। ए सिविर के माध्यम ले करीबन चार लाख लोगन मन ह स्वास्थ्य सेवा के फायदा उठाइन, जेमा ले दू लाख अस्सी हजार माईलोगिन मन घलो सामिल हे। ए सिविर म उच्च रक्तचाप, सुगर, कैंसर अउ सिकलसेल जइसन गंभीर बीमारी के जांच के संगेसंग गर्भवती माईलोगिन मन के एएनसी जांच अउ लइका मनके टीकाकरण करे गीस। सिविर म स्वास्थ्यकर्मी अउ बिसेसज्ञ मन डहार ले संतुलित आहार, आयरन अउ फोलिक एसिड के खुराक अउ साफ-सफाई के बारे म सलाह दे गीस।
इही कड़ी म माओवाद प्रभावित नारायणपुर जिला के अबूझमाड़ वाले जघा म स्वास्थ्य दल मन ह इंद्रावती नदिया ल डोंगा म पार करके कोंडे गांव गीन अउ स्वास्थ्य सिविर लगइन। इंहा ओमन एक सौ बत्तीस मरीज मन के स्वास्थ्य जांच करीन।
मुख्यमंत्री-जगदलपुर
मुख्यमंत्री विष्णुदेव साय ह काली जगदलपुर म धुरवा समाज के संभाग स्तरीय नुआखाई मिलन समारोह अउ नवा बने सामाजिक भवन ‘‘ओलेख‘‘ के लोकार्पण कारीकरम म सामिल होइन। ए मउका म मुख्यमंत्री ह धुरवा समाज बर पांच जघा म डोम बनाय बर पचहत्तर लाख रूपिया देके घोसना करीन।
सेवा पर्व
सेवा अउ सुशासन के मंत्र ले प्रेरित होके प्रधानमंत्री नरेंद्र मोदी के अगुवई म सरकार ह बदलाव अउ काम म जोर लाय बर परयास करत हे। पाछू ग्यारा साल म पूरा संकलप के संग प्रधानमंत्री के अगुवई म सरकार ह देस म बदलाव के बीजा बोय हे। सत्रह नवंबर दू हजार बीस के दे गे अपन संबोधन म प्रधानमंत्री ह किहीन कि नागरिक केंद्रित सुधार के माध्यम ले जिनगी ल सरल बनाय गेहे अउ लोगन मनके दिल के करीब पहुंच गेहे। खासकर अइसन लोगन जउन मन ल अनदेखा कर दे जाथे।
इही सोच ल आगू बढ़ावत सरकार ह दू ठिन बड़का मिसन सुरू करे हे। प्रधानमंत्री आवास योजना सहरी अउ प्रधानमंत्री आवास योजना ग्रामीण एखर ले बढ़िया ढंग ले घर म गरीब ले गरीब मनखे मन रहि सकथे। स्मार्ट सिटी मिसन के रोसनी म सहर घलो नहावत हे। ए योजना के तहत डेढ़ लाख करोड़ रूपिया ले जादा के साढ़े सात हजार ले जादा परियोजना मन पूरा हो चुके हे। अमृत अउ अमृत दो सून्य के तहत लाखों साफ पानी अउ सीवरेज कनेक्सन, हजारों पुनर्जीवित परिक्षेत्र अउ बांधा मन के संगेसंग सहर अउ गांव मनके रद्दा म एलईडी बलफ ले उजाला होवत हे। जल-जीवन मिसन के माध्यम ले अब गांव मन म साफ पानी आवत हे। जल जीवन मिसन के लाभार्थी महासमुंद जिला के लाभार्थी उमा ध्रुव ह अपन अनुभव ल साझा करे हे। ओमन कहिथे कि गली अउ गांव के पार मन म सिमेंटीकरण हो गेहे अउ जम्मों कोति उजियारा दिखथे।
कोयला/पीएसी/नान मामला-गिरफ्तार
अवैध कोल लेवी वसूली घोटाला मामला म राज्य आर्थिक अपराध अन्वेषण ब्यूरो ह कतकोन जघा म छापा मारे के बाद जयचंद कोसले ल गिरफ्तार कर लेहे। एमन ल आज रईपुर के बिसेस अदालत म पेस करे गीस। ईओडब्ल्यू के मुताबिक जयचंद कोसले ह राज्य प्रशासनिक सेवा के निलंबित अधिकारी सौम्य चौरसिया के मुख्य सहयोगी रिहीस। जयचंद कोसले डहार ले अवैध कोल लेवी वसूली के पइसा के करीबन पचास करोड़ रूपिया के व्यवस्थापन करे गेहे।
उहें, सीजीपीएससी घोटाला मामला म सीबीआई डहार ले गिरफ्तार पांच झिन आरोपी मन ल आज रईपुर के बिसेस अदालत म पेस करे गीस।
अइसने, नागरिक आपूर्ति निगम घोटाला मामला म पूर्व आईएएस अधिकारी डॉक्टर आलोक शुक्ला ह आज ईडी के बिसेस अदालत म सरेंडर करे बर पहुंचिन। जिंहा सरेंडर मंजूर होय के बाद ईडी ह डॉक्टर शुक्ला ल गिरफ्तार कर लेहे।
बस्तर ओलंपिक-पंजीयन
बस्तर क्षेत्र के युवा मन ल खेल के मुख्यधारा ले जोड़े अउ उंखर प्रतिभा ल निखारे के उद्देस्य ले आयोजित बस्तर ओलंपिक बर खिलाड़ी मनके पंजीयन आज ले सुरू हो गेहे। पंजीयन के काम बीस अक्टूबर तक चलही। एखर बाद पच्चीस अक्टूबर ले पांच नवंबर तक विकासखंड स्तरीय, पांच ले पंद्रह नवंबर तक जिला स्तरीय अउ चौबीस ले तीस नवंबर तक संभाग स्तरीय प्रतियोगिता होही। एमा एथलेटिक्स, तीरंदाजी, बैडमिंटन, फुटबाल, हॉकी, वेटलिफ्टिंग, कराते, कबड्डी, खो-खो, वॉलीबॉल अउ रस्साकसी जइसन खेल होही।
ए आयोजन म माओवाद िंहंसा म दिव्यांग होय प्रतिभागी अउ आत्मसमर्पित माओवादी मन ल सोज्झे संभाग स्तर म भाग लेके मउका मिलही। राज्य सरकार ह जम्मो संभाग आयुक्त अउ जिला कलेक्टर मन ल पत्र जारी करके बस्तर ओलंपिक प्रतियोगिता म जादा ले जादा युवा मन ल भाग लेके बारे म निरदेस दे हवय।
शारदीय नवरात्र
मां शक्ति के अराधना के परब शारदीय नवरात्रि आज ले सुरू हो गेहे। नौ दिन तक जम्मों शक्तिपीठ अउ देवी मंदिर मन म मां सक्ति के आने-आने रूप मनके बिसेस पूजा-पाठ करे जाही। मंदिर मन म आज ले घट स्थापना के संगेसंग ज्योति कलस जलाय जात हे। उहें, चौक-चौराहा के पंडाल मन घलो मां दुर्गा के प्रतिमा विराजित करे जात हे। ए मउका म राज्यपाल रमेन डेका मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह ह प्रदेस के लोगन मन ल नवरात्रि परब के बधई अउ सुभकामना दे हवय।
अउ अब पेस हे मौसम के हाल…
प्रदेस म अवइया चौबीस घंटा के दउरान कतकोन जघा म हल्का ले मध्यम बरसा होय के संभावना हे। उहें, एक-दू जघा म गरज-चमक संग भारी बरसा होय या गाज गिरे के चेतावनी दे गेहे। मौसम विभाग के मुताबिक प्रदेस म भारी बरसा के दक्षिण छत्तीसगढ़ म हो सकथे।