स्वच्छता ही सेवा पखवाड़ा के तहत प्रदेस के अब्बड़ अकन जिला म आने-आने कारीकरम आयोजित करे जावत हे। इही कड़ी म मुंगेली जिला के कृषि विज्ञान केंद्र चमारी म आने-आने आयोजन करे गीस। एमा शासकीय कार्यालय, शैक्षणिक संस्थान अउ सार्वजनिक जघा म अधिकारी-कर्मचारी मन, विद्यार्थी अउ आम लोगन मन सफई के सपथ लीन।
उहें, सक्ती जिला म नसामुक्त भारत अभियान बर मिनी मैराथन रैली के आयोजन करे गीस। ए मउका म कलेक्टर अमृत विकास तोपनो ह अधिकारी-करमचारी, विद्यार्थी अउ आम लोगन मन ल नसामुक्त भारत बर सपथ देवाइन।
इही जिला, के हरदी गांव म रक्तदान अउ स्वास्थ्य सिविर के आयोजन करे गीस। कारीकरम म स्वास्थ्य मंत्री श्याम बिहारी जायसवाल ह सामिल होइन। ओमन सिविर के जायजा लीन अउ लोगन ल मुफ्त दवई अउ चश्मा घलो बांटिन।
ऐति, स्वच्छता ही सेवा अभियान के तहत कोरिया जिला मुख्यालय बैकुंठपुर म नमो दौड़ के आयोजन करे गीस। ए दउड़ घड़ी चउक ले सुरू होके आने-आने रद्दा ले होवत हुए मिनी स्टेडियम म पूरा होइस। ए दउड़ म स्कूल अउ कालेज के पढ़इया मन, भारत स्काउड गाइड, एनसीसी, एनएसएस अउ स्थानीय जनप्रतिनिधि संग आम मनखे मन घलो सामिल होइन।
उहें, गौरेला-पेण्ड्रा-मरवाही जिला के गौरेला म स्वच्छता रैली निकाले गीस। ए मउका म कलेक्टर लीना कमलेश मंडावी ह अधिकारी-कर्मचारी मन ल सफई के सपथ दिलाइन।
स्वस्थ नारी सशक्त परिवार/पोषण माह
स्वस्थ नारी सशक्त परिवार अभियान के तहत कुछेक दिन म प्रदेस भर म आने-आने कारीकरम करे जावत हे। इही कड़ी म कोरिया जिला के स्कूल-कालेज अउ छात्रावास म विद्यार्थी मन ल मासिक धर्म, सफई, एनीमिया के रोकथाम अउ रोग ले स्वस्थ जीवन के महत्व उपर जागरूक करे गीस।
ओति, कोंडागांव जिला म ए अभियान के तहत चलत हुए आने-आने स्वास्थ्य सिविर म लोगन के स्वास्थ्य जांच करे जावत हे। ए दउरान जिला भर म स्वास्थ्य सेवा उपलब्ध कराय के उद्देस्य ले एनीमिया जांच, पोषण परामर्स, महतारी अउ लइका के स्वास्थ्य देखभाल, स्वच्छता जागरूकता अउ मानसिक स्वास्थ्य ले जुड़े सत्र आयोजित करे जावत हे। ए अभियान दू अक्टूबर तक चलही।
एखरे जइसन, नारायणपुर जिला के धनोरा के सीओबी परिसर म भारत तिब्बत सीमा पुलिस बल याने आईटीबीपी कोति ले स्वस्थ नारी सशक्त परिवार के तहत मुफ्त चिकित्सा सिविर आयोजित करे गीस। एमा माईलोगिन मन ल सफई, संतुलित आहार अउ मौसमी बीमारी मन ले बचाव के जानकारी दे गीस। संगेसंग नसामुक्त भारत अभियान के महत्व ल घलो गांव के लोगन ल बताय गीस।
ओति, बेमेतरा जिला म राष्ट्रीय पोषण माह के तहत परियोजना स्तरीय बालमेला के आयोजन करे गीस। ए मउका म आंगनबाड़ी कार्यकर्ता अउ परिवेक्षक मन ल ईसीसीई काम ले अवगत कराय गीस। मेला म प्रदर्सनी ले लइका मनके जम्मों विकास अउ रचनात्मक कामबूता उपर जरूरी जानकारी दे गीस।
सेवा पर्व-आयुष्मान भारत
सेवा अउ सुशासन, यानी जनसेवा अउ सुशासन के मंत्र उपर चलत हुए प्रधानमंत्री नरेंद्र मोदी के अगुवई म सरकार ह प्रगति लाय बर अथक परयास करत हे। आज ए बिसेस श्रृंखला सेवा पर्व म हमन आप मन बर लावत हन कि कइसे मोदी सरकार ह सार्वभौमिक स्वास्थ्य कवरेज ल मजबूत करीन हे अउ गुणवत्तापूर्ण स्वास्थ्य सेवा म सुधार करीन हे।
मणिपुर-उग्रवादी हमला
मणिपुर म काली संझा असम रायफल्स के दल उपर उग्रवादी मन कोति ले करे गे हमला म दू जवान सहीद होगे। उहें, तीन झिन आने जवान मन घायल होगे। मिले जानकारी अनुसार ए हमला म छत्तीसगढ़ के बस्तर जिला के बालेंगा गांव के एक जवान रंजीत सिंह कश्यप ह घलो सहीद होय हे। रंजीत पाछू महिना छुट्टी म गांव आय रिहीन अउ पाछू ईतवार के अपन कैंप म लहुटे रिहीन। उंखर तीन झिन नोनी लइका हे।
मुख्यमंत्री विष्णुदेव साय ह ए उग्रवादी हमला के निंदा करे हे। ओमन सहीद जवान मन ल श्रध्दांजलि देवत हुए किहीन हे कि एमन के त्याग देस ल रक्षा अउ एकता के रद्दा म आगू बढ़े बर प्रेरित करही।
माओवादी समर्पण-फैसला
प्रतिबंधित संगठन सीपीआई-माओवादी ह हथियार डारे अउ मुख्यधारा म सामिल होय के फइसला करे हे। सीपीआई-माओवादी के पोलित ब्यूरो सदस्य वेणुगोपाल राव ह बतइस हे कि बदलत दुनिया अउ देस के परिस्थिति के संगेसंग प्रधानमंत्री, गृहमंत्री अउ बड़का पुलिस अधिकारी मनके सरलग अपील ल देखत हुए संगठन ह हथियार डारे अउ मुख्यधारा ले जुड़े के निरनय लेहे। ओमन किहीन हे कि सीपीआई माओवादी संगठन ह केंद्रिय गृहमंत्री या उंखर कोति ले चुने गे मनखे या प्रतिनिधिमंडल ले गोठबात करे बर तियार हे।
इही बीच, छत्तीसगढ़ के गृहमंत्री विजय शर्मा ह किहीन हे कि अगर माओवादी संगठन ह सांतिवार्ता अउ पुर्नवास चाहथे त, फेर बिना कोनो सर्त के हथियार डारे अउ देस के संविधान उपर आस्था जताय। श्री शर्मा ह आज भिलई म मीडिया संग गोठबात करत हुए किहीन कि माओवादी संगठन ह बस्तर के विकास के रद्दा म ओमन कोति ले लगाय गे, आईईडी समेत बम असन समान ल हटावय अउ देस के संविधान ल मानत हुए लोकतांत्रिक प्रक्रिया म अपन भागीदारी निभाय।
एनएचएम हड़ताल-समाप्त
राष्ट्रीय स्वास्थ्य मिशन यानी एनएचएम करमचारी संघ ह पाछू बत्तीस दिन ले चलत अपन हड़ताल ल वापस ले लेहे। करमचारी संघ के प्रतिनिधि मंडल ह काली रईपुर म मुख्यमंत्री विष्णुदेव साय ले भेंट करीन। प्रतिनिधि मंडल ह मांग पूरा होय म मुख्यमंत्री के आभार जतइन अउ हड़ताल वापस ले जाय के निरनय के जानकारी दीन।
रेलवे नवरात्र-ठहराव
रेलवे ह डोंगरगढ़ के मां बम्लेश्वरी मंदिर म नवरात्र तिहार के दउरान भक्त मन के सुविधा बर कुछेक रेलगाड़ी ल डोंगरगढ़ अउ रईपुर तक अस्थायी रूप ले बढ़ाय के निर्णय लेहे। उहें, दुरिहा वाले कुछेक एक्सप्रेस ट्रेन ल घलो डोंगरगढ़ म बाईस सितंबर ले एक अक्टूबर तक अस्थायी रूके के बेवस्था करे गेहे। रेलवे अनुसार गोदिया-दुरूग-गोंदिया मेमू पैसेंजर ल रईपुर तक अउ रईपुर-डोंगरगढ़-रईपुर मेमू पैसेंजर ल गांदिया तक बढ़ाय गेहे। एखर अलावा डांगरगढ़-दुरूग-डोंगरगढ़ मेमू स्पेसल ट्रेन घलो चलाय जाही।
उहें, अमृत भारत एक्सप्रेस ट्रेन ल ओडिसा के ब्रम्हपुर ले गुजरात के उधना के बीच सुरू करे जाही। ए ट्रेन ओडिसा ले गुजरात तक सीधा लंबा दूरी के कनेक्टिविटी देही अउ पूर्वी मध्य अउ पश्चिम भारत के अब्बड़ अकन बड़का जिला अउ सहर ल जोड़ही। ए ट्रेन के रद्दा म दक्षिण-पूर्व मध्य रेलवे के रईपुर अउ गोंदिया स्टेसन सामिल हे।
इही बीच, दक्षिण-पूर्व मध्य रेलवे चक्रधरपुर अउ खड़गपुर मंडल म आदिवासी कुड़मी समाज कोति ले आने-आने स्टेसन अउ लेवल क्रांसिंग गेट म आंदोलन करे जाय के कारण अब्बड़ अकन रेलगाड़ी के अवई-जवई प्रभावित होय हे। एमन म लोकमान्य तिलत टर्मिनस, दुरूग-आरा, नेताजी सुभाषचंद्र बोस इतवारी-टाटानगर, चेरापल्ली-पटना, वास्कोडिगामा-जसीडीह अउ पुणे-हावड़ा एक्सप्रेस ट्रेन सामिल हवय।
अउ अब थोरकुन समाचार सार म –
– छत्तीसगढ़ व्यावसायिक व्यापम कोति ले राखे गे लेगे प्रयोगशाला तकनीशियन भर्ती परीक्षा दू हजार तेईस के चयन सूची जारी कर दे गेहे। चयनित अभ्यर्थी मनके दस्तावेज सत्यापन बाईस ले पच्चीस सितंबर तक नवा रईपुर म करे जाही।
– राजधानी रईपुर के एंटीक्राई अउ साइबर यूनिट के टीम ह काली गंजथाना क्षेत्र के एक होटल म तीन माईलोगिन समेत पांच मनख्े ले पंद्रह किलो ले जादा गांजा बरामद करे हे।
अउ
– जनसंपर्क विभाग के सहायक संचालन रीनू ठाकुर के काली मुंबई म निधन होगे। उंखर निधन उपर मुख्यमंत्री विष्णुदेव साय ह दुख जतइन हे।