राजिम ले रायपुर बर आज ले नवा मेमू ट्रेन सेवा के सुरूआत होगे हे। मुख्यमंत्री विष्णुदेव साय ह राजिम ले रायपुर बर ट्रेन ल हरियर झंडी दिखाके रवाना करीन। उद्घाटन मउका म मुख्यमंत्री ह रायपुर-अभनपुर मेमू रेल सेवा के विस्तार राजिम तक करे के घलो सुभारंभ करीन।
कार्यक्रम ल संबोधित करत श्री साय ह कहिन कि ए नवा रेल सेवा ले राजिम समेत गरियाबंद अउ देवभोग क्षेत्र के लोगन मन ल रायपुर तक सस्ता यात्रा करे बर मिलही। विद्यार्थी, नौकरीपेशा वर्ग अउ व्यापारी वर्ग समेत जम्मों बर ए ट्रेन उपयोगी सिद्ध होही। मुख्यमंत्री ह किहीन कि अभी म छत्तीसगढ़ म रेलवे के करीब पैंतालीस हजार करोड़ रूपिया के परियोजना चलत हे।
समय सारिणी के मुताबिक राजिम-अभनपुर-रायपुर मेमू पैसेंजर ट्रेन काली उन्नीस सितंबर ले हरेक दिन राजिम अउ रायपुर ले संचालित होही। ए ट्रेन म छह सामान्य श्रेणी के डब्बा अउ दू पावरकार समेत कुल आठ कोच होही।
आदि सेवा पखवाड़ा
मुख्यमंत्री विष्णुदेव साय ह रायपुर के सड्डू स्थित प्रयास आवासीय विद्यालय म आदि सेवा पखवाड़ा के सुभारंभ करीन। ए मउका म ओमन कहिन कि आदि कर्मयोगी अभियान जनजातीय गांव के जमीनी बदलाव के दिसा म ऐतिहासिक भूमिका निभाही। मुख्यमंत्री ह कहिन कि ए अभियान म बछर दू हजार तीस तक प्रदेस के जम्मों जनजातीय गांव के ट्राइबल विजन डाक्यूमेंट तैयार करे जाही, जउन ह दीर्घकालीन विकास के रोडमैप बनही। उहें, दू अक्टूबर के आयोजित ग्राम सभा म एखर अनुमोदन करे जाही।
मुख्यमंत्री-श्रमिक सम्मेलन
मुख्यमंत्री विष्णुदेव साय ह विश्वकर्मा जयंती के मउका म रईपुर के इंडोर स्टेडियम म राखे गे श्रमिक महासम्मेलन म सामिल होइन। ए मउका म ओमन दीदी ई-रिक्शा योजना म मिलइया मदद रासि ल एक लाख रूपिया ले बढ़ाके डेढ़ लाख रूपिया करे के घोसना करीन। संगेसंग मुख्यमंत्री ह निर्माण श्रमिक सहायता योजना म श्रमिक मन ल घर बनाय बर देवइया सहायता रासि ल घलो एक लाख रूपिया ले बढ़ाके डेढ़ लाख रूपिया करे के बात कहिन। ओमन किहीन कि पंजीकृत श्रमिक मनके निःशुल्क स्वास्थ्य जांच अउ इलाज के पूरा खरचा अब श्रम विभाग डहार ले करे जाही।
निर्वाचन आयोग-ईव्हीएम मतपत्र
निर्वाचन आयोग ह ईवीएम मतपत्र ल जादा साफ-सुथरा अउ पढ़े लायक बनाय बर मतपत्र के डिजाइन अउ प्रिटिंग के मौजूदा दिसा-निरदेस म संशोधन करे हे। अब ईवीएम मतपत्र म उम्मीदवार के रंगीन फोटू प्रिंट करे जाही अउ फोटो के तीन-चौथाई हिस्सा म उम्मीदवार के चेहरा रइही, जेखर ले स्पष्ट रूप ले देखे जा सकही। एकरूपता लाने बर जम्मों उम्मीदवार मनके नाम अउ नोटा एके समान फोंट म छापे जाही। ए ईवीएम मतपत्र के उपयोग बिहार विधानसभा चुनाव ले सुरू करे जाही।
एनएचएम स्वास्थ्यकर्मी-कार्रवाई
राष्ट्रीय स्वास्थ्य मिशन-एनएचएम स्वास्थ्यकर्मी मनके पाछु बत्तीस दिन ले चलत हड़ताल ल देखत स्वास्थ्य सचिव अमित कटारिया ह हड़ताली कर्मचारीमन ल काम म लहुटे बर केहे हे। ओमन जम्मांं जिला के मुख्य चिकित्सा अउ स्वास्थ्य अधिकारी मन ल निरदेस देहे कि जउन एनएचएम कर्मचारी हड़ताल खत्म करके काम म नइ लहुटही, त ओमन ल व्यक्तिगत कानूनी आदेस जारी करके बर्खास्त करे जाही। एखर संगेसंग जम्मों जिला मन म खाली होय पद के सूची तैयार करे अउ भर्ती प्रक्रिया सुरू करे के निरदेस दे गेहे।
उहें, प्रदेसभर के हड़ताली एनएचएम कर्मचारी मन ह आज रायपुर म जेल भरो आंदोलन करीन। राष्ट्रीय स्वास्थ्य मिशन संघ के प्रदेस अध्यक्ष अमित मिरी अउ रायपुर जिला अध्यक्ष अशोक उइके ह आकाशवाणी समाचार ल बतईन कि जेल भरो आंदोलन म आठ हजार ले जादा स्वास्थ्य कर्मी सामिल होइस। ए दउरान पुलिस ह कई ठिन जिला के कर्मचारी मन ल हिरासत म लीस, जउन मन बाद म छोड़ दे गीस। ए कर्मचारी मन अपन दस सूत्रीय मांग ल लेके हड़ताल म हवय।
इही बीच, स्वास्थ्य विभाग ह बलौदाबाजार म एक सौ साठ अउ कोरबा म इक्कीस एनएचएम स्वास्थ्य कर्मी मन ल बर्खास्त कर देहे। उहें, सूरजपुर जिला म मुख्य चिकित्सा अउ स्वास्थ्य अधिकारी ह पांच सौ चौरानवे कर्मचारी मनके सेवा समाप्त कर देहे।
ईडी-कार्रवाई
करीबन एक सौ चालीस करोड़ रूपिया के कस्टम मिलिंग घोटाला के सिलसिला म आज प्रवर्तन निदेशालय-ईडी के टीम ह छत्तीसगढ़ के दस जगह म छापामार करे के कार्रवाई करीन हे। मिले खबर के मुताबिक ईडी की टीम ह राज्य के पूर्व आईएएस अधिकारी आलोक शुक्ला के भिलाई स्थित दू ठिन ठिकाना म दबिस दीन। सूत्र के मुताबिक छापामार कार्रवाई के दउरान ईडी ह कई महत्वपूर्ण दस्तावेज जब्त करे हे।
माओवादी मुठभेड़
सुकमा जिला म आज सुरक्षा बल मनके संग होय मुठभेड़ म पांच लाख रूपिया के एक इनामी महिला माओवादी मारे गेहे। ए माओवादी के सव बरामद कर ले गेहे, जेखर पहिचान मलांगीर एरिया कमेटी के सदस्य बूस्की नुप्पो के रूप म होय हे।
जिला के पुलिस अधीक्षक किरण चव्हाण ह बतईन कि माओवादी मनके मौजूदगी के खबर मिले के बाद सुरक्षा बल के जवान मन तलासी अभियान म निकलीस। इही दउरान गादीरास अउ फूलबगड़ी के जंगल म माओवादी मन ह सुरक्षा बल मन उपर गोलीबारी सुरू कर दीन। जवाबी कार्रवाई म एक माओवादी मारे गीस। इलाका म सुरक्षा बल मन डहार ले तलाशी अभियान चलाय जावत हे।
उहें, बीजापुर जिला म काली होय मुठभेड़ म मारे गे दूनों माओवादी के पहचान कर ले गेहे। ए दूनों माओवादी उपर सात लाख रूपिया के इनाम घोसित रिहीस। ए माओवादी पेद्दाकोरमा गांव के तीन ग्रामाण, मनकेली गांव के एक ग्रामीण अउ तोड़का गांव शिक्षादूत के हत्या के घटना म सामिल रिहीस।
मानवाधिकार आयोग-रायपुर जिला अस्पताल
राष्ट्रीय मानवाधिकार आयोग ह अंतिम संस्कार बर स्थान निर्धारित नइ करे जाय के सेती छत्तीसगढ़ के रायपुर जिला अस्पताल के सवगृह म कई ठिन लावारिस सव राखे के सेती मीडिया रिपोर्ट म स्वतः संज्ञान लेहे हे। इहां अंतिम संस्कार एक गैर-सरकारी संगठन डहार ले करे जाथे। बताय गेहे कि पाछु हफ्ता ले तीन अज्ञात सव मन ल पोस्टमार्टम बर भेजे नइ गेहे। आयोग ह अपन टिप्पणी म केहे हे कि ए मानवाधिकार के गंभीर उल्लंघन के मामला हरय। आयोग ह ए मामला म मुख्य सचिव ल नोटिस जारी करके दू हफ्ता के भीतर पूरा रिपोर्ट मांगे हे।
खबर के मुताबिक ए बारे म मीडिया म पाछु नौ सितंबर के एक रिपोर्ट प्रकासित होय रिहीस।
बिलासपुर-स्वच्छ वार्ड चैलेंज प्रतियोगिता
केन्द्रीय आवास अउ सहरी विकास राज्यमंत्री तोखन साहू ह बिलासपुर म स्वच्छ वार्ड चैलेंज प्रतियोगिता सुरू करे के घोसना करे हे। एखर तहत हर महीना जम्मों वार्ड के सर्वें करे जाही। स्वच्छता के पैमाना म खरा उतरइया वार्ड के विकास काम बर पुरस्कार के रूप म दस लाख रूपिया के उपरहा मंजूरी दे जाही।
उहें, बिलासपुर नगर निगम डहार ले वाट्सऐप आधारित चैटबॉट सेवा सुरू करे जावत हे। बिलासपुर प्रदेस के पहिली नगर निगम बने बर जावत हे, जिहां लोगन अब स्मार्ट चैटबॉट के माध्यम ले जादा ले जादा सेवा के लाभ घर बइठे ले सकही। ए सेवा के माध्यम ले लोगन मन ल प्रॉपर्टी टैक्स के जानकारी अउ भुगतान, बिल्डिंग परमिशन, सिकायत पंजीकरण, जन्म-मृत्यु प्रमाण पत्र जइसन सुविधा मिल सकही। ए चैटबॉट के उपयोग करे बर निगम ह एक बिसेस वाट्सऐप नंबर जारी करही।
आकाशवाणी-स्वच्छता शपथ
सेवा पखवाड़ा म आज नई दिल्ली के आकाशवाणी परिसर म स्वच्छता सपथ के आयोजन करे गीस। आकाशवाणी के महानिदेशक राजीव कुमार जैन ह अधिकारी अउ कर्मचारी मन ल स्वच्छता के सपथ दिलईन। ओमन सपथ लेवइया सदस्य मन ले स्वच्छता बर हर बछर कम ले कम सौ घंटा समर्पित करे के आग्रह करीन। सपथ म ए बात उपर जोर दे गीस कि न तो खुदे कचरा फैलाय अउ न ही दूसर मन ल कचरा फैलावन देवयं। संगेसंग जादा ले जादा लोगन मन ल घलो स्वच्छता के सपथ ले बर प्रेरित करयं। प्रधानमंत्री नरेन्द्र मोदी के जन्मदिन के मउका म सत्रह सितंबर ले सुरू होय सेवा पखवाड़ा दू अक्टूबर के गांधी जयंती तक चलही।
जीएसटी-स्वास्थ्य बीमा
वस्तु अउ सेवा कर-जीएसटी के दर म करे गे सुधार म नारायणपुर के बड़का बीमा सलाहकार राजेश सोनसर्वे ह स्वागत करे हे। ओमन किहीन कि बाईस सितंबर ले स्वास्थ्य बीमा म जीएसटी के दर सून्य हो जही, जेखर ले आम लोगन मन ल स्वास्थ्य बीमा के क्षेत्र म फायदा होही।