प्रधानमंत्री-स्वस्थ नारी सशक्त परिवार
प्रधानमंत्री नरेन्द्र मोदी ह आज मध्यप्रदेश के धार म ‘‘स्वस्थ नारी-सशक्त परिवार अभियान‘‘ अउ आठवां ‘‘राष्ट्रीय पोषण माह‘‘ अभियान के सुरूआत करीन। कार्यक्रम म प्रधानमंत्री ह मातृ वंदना योजना के तहत पन्द्रह लाख ले जादा माईलोगिन मन ल धनराशि घलो भेजीन। ओमन माईलोगिन मन ले स्वास्थ्य सिविर म जाके अपन जांच कराय के आग्रह करीन।
श्री मोदी ह किहीन कि तिहार के दउरान बिसाय जाने वाला हर जिनीस भारतेच म बने होना चाही। प्रधानमंत्री ह व्यापारी मन ले अपील करीन हे कि ओमन ह जउन कुछ भी बेचय ओ ह भारत के होना चाही।
अन्नपूर्णा देवी-स्वस्थ नारी सशक्त परिवार
उहें, केन्द्रीय महिला अउ बाल विकास मंत्री अन्नपूर्णा देवी ह आज रईपुर के इंदिरा गांधी कृषि विश्वविद्यालय म राखे गे कार्यक्रम म ‘‘स्वस्थ नारी-सशक्त परिवार अभियान‘‘ के सुरूआत करीन। ए मउका म मुख्यमंत्री विष्णुदेव, उपमुख्यमंत्री अरूण साव, महिला अउ बाल विकास मंत्री लक्ष्मी राजवाड़े अउ श्रममंत्री लखनलाल देवांगन संघरा दूसर जनप्रतिनिधि मन मौजूद रिहीन। कार्यक्रम म सबो झन प्रधानमंत्री नरेन्द्र मोदी के संबोधन ल सुनीन अउ आने-आने विभाग डहार ले लगाय गे स्टॉल के अवलोकन करीन।
एखर बाद केन्द्रीय मंत्री अन्नपूर्णा देवी निमोरा के आंगनबाड़ी केन्द्र पहुंचीन अउ पोषण माह के औपचारिक सुरूआत करीन। ओमन ह महिला स्व-सहायता समूह के सदस्य मन ले चर्चा करीन। केन्द्रीय मंत्री ह आंगनबाड़ी केन्द्र के लइका मन ले घलो गोठबात करीन अउ महिला अउ बाल विकास विभाग डहार ले लगाय गे स्टॉल के निरीक्षण करीन।
एखर पहिली, केन्द्रीय मंत्री अन्नपूर्णा देवी ह मुख्यमंत्री विष्णुदेव साय ले रईपुर के उंखर निवास म भेंट करीन। ए दउरान मुख्यमंत्री ह केन्द्रीय मंत्री ल छत्तीसगढ़ म महिला सशक्तिकरण अउ लइका मनके पोषण अउ सिक्षा ले जुड़े करे जावत प्रयास के जानकारी दीन।
सेवा पर्व
प्रधानमंत्री नरेन्द्र मोदी के जीवन के सुरूआत बहुत साधारण तरीका से होइस, जिहां ले दुनिया के सबले प्रभावशाली राजनीतिक मनखे बने के सफर साधारण नइ रिहीस। भारत के प्रधानमंत्री के रूप म उंखर नेतृत्व ल हर डहार ले तारीफ मिले हे। संगेसंग उंखर काम ले लोगन म विश्वास जगे हे।
प्रधानमंत्री ह लगभग ए निश्चित कर दे हवय कि हर भारतीय के सिर उपर छत राहय, नल म जल राहय, स्वीच म बिजली होवय, घर म सौचालय होय, गैस के चुल्हा होय, बैंक म खात राहय अउ खाता म पइसा राहय, इंटरनेट कनेक्शन हो, मोबाइल फोन हो, खाय बर भोजन राहय, लइका मन बर सिक्षा राहय, घर तक सड़क जावय अउ स्वास्थ्य के बीमा राहय।
सेवा पर्व-विशेष कार्यक्रम
केन्द्रीय सूचना अउ प्रसारण मंत्री अश्विनी वैष्णव ह आज नई दिल्ली म डीडी नेशनल अउ डीडी न्यूज बर ‘‘सेवा पर्व‘‘ म कार्यक्रम के एक ठिन विशेष श्रृंखला के सुरूआत करीन। प्रधानमंत्री नरेन्द्र मोदी के जन्मदिन के मउका म आज ले सेवा पर्व मनाय जावत हे। ए पर्व दू अक्टूबर तक चलही। ए मउका म श्री वैष्णव ह किहीन कि भारत ह दुनियाभर म एक ठन नवा पहिचान बनाय हे। ओमन किहीन कि श्री मोदी ह अपन जीवन के आरंभ ले ही राष्ट्र निर्माण के काम करीन। ए मउका म सूचना अउ प्रसारण सचिव संजय जाजू ह किहीन कि ए विशेष मउका हे जब लोगन राष्ट्र के परिवर्तनकारी यात्रा ल स्वीकार करत हे।
मुख्यमंत्री-स्वच्छता ही सेवा
मुख्यमंत्री विष्णुदेव साय ह आज प्रधानमंत्री नरेन्द्र मोदी के जन्मदिन के मउका म रईपुर म ‘‘स्वच्छता ही सेवा पखवाड़ा‘‘ के सुरूआत करीन। ए मउका म ओमन ह रईपुर नगर निगम अउ दूसर नगरीय निकाय के स्वच्छता बर समर्पित डोर टू डोर कचरा कलेक्शन गाड़ी मन ल हरा झंडा दिखाके रवाना करीन। कार्यक्रम म मुख्यमंत्री ह स्वयं झाडू लगाके परिसर के सफाई करीन अउ स्वच्छता के संदेस लोगन तक पहुंचईन। मुख्यमंत्री ह लोगन मन ले ए अभियान ले जुड़े के आह्वान करीन अउ किहीन कि स्वच्छता बर जागरूकता अउ स्वप्रेरणा ले जुड़ाव समाज म सकारात्मक बदलाव लाही।
मुख्यमंत्री-लोक कल्याण उत्सव
मुख्यमंत्री विष्णुदेव साय आज रईपुर म नगरीय प्रशासन विभाग डहार ले राखे गे स्वच्छता, आवास अउ लोक कल्याण उत्सव म सामिल होइन। कार्यक्रम म श्री साय ह ‘‘स्वच्छता ही सेवा अउ अंगीकार‘‘ अभियान के संग प्रधानमंत्री स्वनिधि योजना ‘‘टू प्वाइंट ओ‘‘ अउ राज्य स्तरीय लोक कल्याण मेला के सुरूआत करीन। ए मउका म मुख्यमंत्री ह आने-आने नगरीय निकाय म प्रधानमंत्री आवास योजना-शहरी के ग्यारह हजार लाभार्थी मन ल गृह प्रवेश घलो करईन। ओमन ह राज्य स्तरीय स्वच्छता सुपर लीग के टूल-किट के घलो विमोचन करीन। संगेसंग रईपुर नगर निगम के दिवंगत कर्मी मनके परिवार ल अनुकंपा नियुक्ति पत्र घलो सौंपीन।
विश्वकर्मा जयंती
संसार के पहिली वास्तुकार अउ सृजन निर्माण के देवता भगवान विश्वकर्मा के आज जयंती हे। ए मउका म प्रदेसभर म आने-आने कार्यक्रम करे गीस। मुख्यमंत्री विष्णुदेव साय ह आज रायपुर म श्रम विभाग डहार ले राखे गे मुख्य कार्यक्रम म सामिल होइन। ए मउका ओमन प्रदेस के श्रमिक मनके खाता म पैंसठ करोड़ रूपिया ले जादा के रासि डीबीटी के माध्यम ले भेजीन।
माओवादी आत्मसमर्पण/ग्रामीण हत्या
नारायणपुर जिला म आज बारह झिन माओवादी मन ह आत्मसमर्पण करीन हे, जेमा ले नौ झिन माओवादी मन उपर कुल अट्ठारह लाख रूपिया के इनाम रिहीस। जिला के पुलिस अधीक्षक रॉबिन्सन गुड़िया ह बतईन कि आत्मसमर्पित माओवादी मन ल राज्य सरकार के पुनर्वास नीति म पचास-पचास हजार रूपिया के चेक दे गीस। उहें, सुकमा जिला म सुरक्षा बल ह चार झिन माओवादी मन ल गिरफ्तार करे हे। इंखर मन तीर ले टिफिन बम अउ दूसर विस्फोटक सामग्री बरामद करे गेहे। ए सबो झन माओवादी मन ह फुलबगड़ी थाना क्षेत्र म बहुत बेरा ले सक्रिय रिहीन। ऐति, बीजापुर जिला के जांगला थाना क्षेत्र म माओवादी मन ह एक झन ग्रामीण के धारदार हथियार ले हत्या कर देहे। पुलिस ह मामला के जांच सुरू कर देहे।
सेवा पर्व-जीएसटी विशेष कार्यक्रम
सेवा पर्व के तहत प्रादेशिक समाचार एकांश आकाशवाणी, रायपुर डहार ले तैयार करे गे एक ठन विशेष कार्यक्रम के प्रसारण काली बिहनिया नौ बजके पन्द्रह मिनट ले करे जाही। ए कार्यक्रम म साहित्य अकादमी के अध्यक्ष शशांक शर्मा ले ‘‘विकास अउ विरासत‘‘ बिसय म लेगे भेंटवार्ता प्रसारित करे जाही।
उहें, केन्द्र सरकार डहार ले जीएसटी म करे गे सुधार उपर विशेष कार्यक्रम के प्रसारण काली संझा छह बजके पांच मिनट म करे जाही। एला छत्तीसगढ़ के आकाशवाणी के सबो केन्द्र मन ह रिले करही।
जीएसटी-प्रेसवार्ता
भारतीय जनता पार्टी के राष्ट्रीय प्रवक्ता के.के. शर्मा ह जीएसटी के दर म करे गे सुधार ल आम जनता अउ व्यापारी वर्ग बर फायदा वाले बतईन हे। काली दुरूग म पत्रकार मन ले गोठबात करत श्री शर्मा ह किहीन कि जीएसटी म सुधार के फायदा छोटे व्यापारी अउ दुकानदार मन ल घलो मिलही। ओमन किहीन कि वर्तमान कर व्यवस्था ले बाजार म खरीदी बड़ही अउ करोड़ों युवा मन ल रोजगार मिलही।
अउ अब थोरकुन समाचार सार म –
– राज्य के सासकीय औद्योगिक प्रशिक्षण संस्थान-आईटीआई म प्रवेस बर सातवां अउ आठवां चरण के काउंसलिंग के समय-सारिणी जारी कर दे गेहे। इच्छुक अभ्यर्थी इक्कीस सितंबर तक ऑनलाइन आवेदन कर सकत हे।
अउ
– जांजगीर-चांपा जिला के करही गांव म पाछु पन्द्रह सितंबर के सराब पीये ले होय दू झिन मनखे के मउत के मामला म पुलिस ह सराब
म जहर मिलाय के आरोप म दू झिन आरोपी ल गिरफ्तार करे हे।