महिला मनके स्वास्थ्य अउ सशक्तिकरण ल ध्यान म राखत केन्द्र सरकार डहार ले काली ले देसभर म ‘‘स्वस्थ नारी सशक्त परिवार अभियान अउ सेवा पखवाड़ा‘‘ सुरू करे जाही। दू अक्टूबर तक चलइया ए अभियान महिला अउ बाल विकास मंत्रालय डहार ले मनाय जाने वाला ‘‘पोषण माह‘‘ के साथ चलाय जाही।
छत्तीसगढ़ म केन्द्रीय महिला अउ बाल विकास मंत्री अन्नपूर्णा देवी रायपुर स्थित इंदिरा गांधी कृषि महाविद्यालय म ए अभियान सुभारंभ करही। एखर अलावा केन्द्रीय मंत्री रायपुर नगर निगम क्षेत्र के आंगनबाड़ी केन्द्र मठपुरैना अउ कांदुल के निरीक्षण घलो करही।
बतादन कि ए अभियान के अंतर्गत महिला मन बर स्वास्थ्य जांच सिविर आयोजित करके उच्च रक्तचाप, मधुमेह, मूख कैंसर, स्तन कैंसर, गर्भाशय ग्रीवा कैंसर, एनीमिया, टीबी अउ सिकल सेल रोग के जांच करे जाही। संगेसंग स्त्री रोग विशेषज्ञ, नेत्र, ईएनटी, त्वचा, मानसिक स्वास्थ्य अउ दंत विशेषज्ञ जइसे सेवा घलो दे जाही। एखर अलावा गर्भवती महिला मनके प्रसवपूर्व जांच, परामर्श अउ लइका मनके टीकाकरण करे जाही।
स्वच्छता ही सेवा अभियान
काली प्रधानमंत्री नरेन्द्र मोदी के जनमदिन हरय। श्री मोदी के जनमदिन ल सेवा पखवाड़ा के रूप म मनाय जाही, जउन ह महात्मा गांधी के जयंती दू अक्टूबर तक चलही। मुख्यमंत्री विष्णुदेव साय ह बतईन कि सेवा पखवाड़ा के दउरान स्वच्छता, स्वास्थ्य समेत आने-आने सासकीय विभाग डहार ले कई ठिन कार्यक्रम राखे जाही।
उहें, प्रदेस म काली सत्रह सितंबर ल स्वच्छोत्सव के रूप म घलो मनाय जाही। ए संबंध म उपमुख्यमंत्री अरूण साव ह प्रदेस के जम्मों नगर निगम के महापौर अउ नगर पालिक निगम के संघरा नगर पंचायत के अध्यक्ष मन ल पत्र लिखीन हे। पत्र म ओमन जम्मों नगरीय निकाय म स्वच्छता ही सेवा अभियान के प्रभावी क्रियान्वयन के घलो अनुरोध करीन हे।
मुख्यमंत्री-कार्यक्रम
मुख्यमंत्री विष्णुदेव साय काली राजधानी रायपुर म स्वच्छता आवास अउ लोक कल्याण उत्सव के उद्घाटन करही। कार्यक्रम म श्री साय नगरीय प्रशासन अउ विकास विभाग के आने-आने योजना के हितग्राही मन ल लाभान्वित घलो करही। कार्यक्रम के अध्यक्षता उपमुख्यमंत्री अरूण साव करही।
नगरीय प्रशासन अउ विकास विभाग के सचिव डॉक्टर बसवराजू एस. ह बतईन कि कार्यक्रम म स्वच्छता ही सेवा अभियान के तहत राज्य स्तरीय प्रमोचन, अंगीकार अभियान के तहत प्रधानमंत्री आवास योजना-शहरी आवास दिवस अउ प्रधानमंत्री स्वनिधि योजना के संघरा ही लोक कल्याण मेला के राज्य स्तरीय सुभारंभ करे जाही।
सेवा पर्व-विशेष स्टोरी
प्रधानमंत्री नरेन्द्र मोदी के अगुवई म सेवा अउ सुशासन मंत्र ले अभिप्रेरित सरकार प्रगति अउ परिवर्तन बर सरलग काम करत हे। विशेष श्रृंखला सेवा पर्व म आज नवीकरणीय अउ स्वच्छ ऊर्जा क्षेत्र म सकारात्मक बदलाव बर नरेन्द्र मोदी सरकार के कार्य मनके उल्लेख करे जात हे।
छत्तीसगढ़ के आकांक्षी जिला कोरबा म प्रधानमंत्री सूर्य घर योजना उपभोक्ता मन बर फायदा साबित होवत हे। बड़का संख्या म लोगन मन ए योजना के फायदा लेहे बर आगू आवत हे। प्रधानमंत्री सूर्य घर योजना के उद्देश्य आग लोगन मन ल सौर ऊर्जा ले जोड़ना अउ बिजली खरचा म कमी लाना हरय। ए योजना के तहत घर के छत म एक किलोवॉट ले लेके दस किलोवॉट तक के क्षमता के सोलर पैनल लगाय जात हे, जेखर ले उपभोक्ता मन ल बिजली बिल ले बड़का राहत मिलत हे।
विश्वकर्मा जयंती
काली विश्वकर्मा जयंती हरय। ए मउका म राजधानी रायपुर समेत प्रदेसभर म आने-आने कार्यक्रम आयोजित करे जाही। मुख्यमंत्री विष्णुदेव साय राजधानी रायपुर म श्रम विभाग कोति ले राखे गे मुख्य कार्यक्रम म प्रदेस के श्रमिक मन ल पैंसठ करोड़ सोलह लाख रूपिया ले जादा के रासि डीबीडी के माध्यम ले अंतरित करही।
मुख्यमंत्री विष्णुदेव साय अउ श्रम मंत्री लखनलाल देवांगन ह विश्वकर्मा जयंती के मउका म प्रदेस के श्रमवीर मन ल बधाई अउ सुभकामना दीन हे।
शहीद आश्रित-अनुग्रह राशि
राज्य सरकार ह युद्ध अउ सैनिक कार्यवाही म सहीद सैनिक मनके पत्नी या उंखर आश्रित मन ल दे जाने वाला अनुग्रह रासि ल बीस लाख रूपिया ले बढ़ाके पचास लाख रूपिया कर देहे। संग्रह युद्ध अउ सैनिक कार्यवाही म आने-आने वीरता अलंकरण प्राप्त जवान मन ल दे जाने वाला रासि म घलो बढ़ोतरी करे गेहे। मुख्यमंत्री विष्णुदेव साय के अध्यक्षता म काली मंत्रालय म सैनिक कल्याण विभाग के छठवां राज्य सैनिक समिति के बइठका म ए निर्णय ले गीस। बइठका म बताय गीस कि अब परमवीर चक्र प्राप्त वीर जवान मन ल चालीस लाख रूपिया के जघा एक करोड़ रूपिया के अनुग्रह रासि दे जाही।
ए मउका म मुख्यमंत्री ह कहिन कि सैनिक देस के सुरक्षा बर अपन जीवन न्यौछावर करथे। राज्य सरकार भूतपूर्व सैनिक अउ उंखर परिवार के कल्याण बर प्रतिबद्ध हरय। बइठका म सहीद मनके वीर नारी, भूतपूर्व सैनिक, विधवा अउ उंखर आश्रित मन बर राज्य सरकार डहार ले संचालित कई ठिन कल्याणकारी योजना मन उपर घलो चर्चा करे गीस।
आयुष्मान भारत-राशि स्वीकृत
केन्द्र सरकार ह आयुष्मान भारत योजना के तहत ए साल छत्तीसगढ़ बर एक सौ तीस करोड़ रूपिया के अतिरिक्त राशि जारी करीन हे। अइसने प्रधानमंत्री जन आरोग्य योजना बर राज्य सरकार ल अब तक पांच सौ पांच करोड़ रूपिया के रासि मिल चुके हे। ए रासि ले राज्य के निजी अस्पताल के दावा मनके सरलग भुगतान करे जात हे।
स्वास्थ्य मंत्री श्याम बिहारी जायसवाल ह बतईन कि राज्य म आयुष्मान भारत प्रधानमंत्री जन आरोग्य योजना के तहत पंजीकृत निजी अस्पताल मन कोति ले आयुष्मान कार्डधारक मरीज मनके उपचार लगातर करे जात हे। वर्तमान म प्रतिदिन सोलह सौ ले सत्रह सौ दावा प्रस्तुत करे जात हे, जेखर रासि चार करोड़ रूपिया ले जादा हरय।
महतारी सम्मेलन
छत्तीसगढ़ के पच्चीस साल पूरा होय के उपलक्ष्य म रजत महोत्सव मनाय जात हे। इही कड़ी म काली कोरबा म महिला अउ बाल विकास विभाग डहार ले महतारी सम्मेलन के आयोजन करे गीस। कार्यक्रम म आबकारी मंत्री लखन लाल देवांगन सामिल होइन। ए मउका म ओमन किहीन कि राज्य सरकार महिला ससक्तिकरण अउ बाल विकास ल सर्वोच्च प्राथमिकता देवत हे। राज्य सरकार के संकल्प हरय कि नोनी मन ल सिक्षा, सुरक्षा अउ सम्मान मिलय अउ महिला मन आत्मनिर्भर बनके समाज के रीढ़ बनय। ओमन यहू किहीन कि केन्द्र सरकार कोति ले संचालित गरीब कल्याण योजना के फायदा जादा ले जादा लोगन मन तक पहुंचय।
एशिया कप-बास्केटबॉल
मलेशिया म आयोजित अंडर-सिक्सटीन महिला एशिया कप बास्केबॉल म भारतीय टीम सेमीफाइनल म पहुंच गेहे। टीम ह अपन तीसरा मैच ल समोआ ल चौव्वन के मुकाबला इकहत्तर अंक के अंतर ले हराके सेमीफाइनल म प्रवेस करे हे। भारत ह अब तक खेले गे जम्मों मैच म जीत हासिल करे हे। सेमीफाइनल के मुकाबला अट्ठारह सितंबर के होही। भारतीय टीम म छत्तीसगढ़ के महासमुंद जिला के दिव्या रंगारी घलो सामिल हे।
स्पेशल ट्रेन
रेलवे ह छठ परब के मउका म बिलासपुर-हडपसर-बिलासपुर के बीच छठ पूजा स्पेशल गाड़ी एक फेरा बर चलाय के निर्णय लेहे। ए गाड़ी बिलासपुर ले बाईस अक्टूबर के चलही। उहें, हडपसर ले तेईस अक्टूबर के बिलासपुर बर रवाना होही।
अइसने, नवरात्रि मेला के दउरान श्रद्धालु मनके सुविधा बर मैहर म कई ठिन गाड़ी के ठहराव के सुविधा दे गेहे।
विधानसभा-समीक्षा बैठक
छत्तीसगढ़ के नवा विधानसभा भवन के लोकार्पण अउ प्रधानमंत्री नरेन्द्र मोदी के प्रवास ल लेके आज रायपुर स्थित विधानसभा भवन के मुख्य समिति कक्ष म विधानसभा अध्यक्ष डॉक्टर रमन सिंह के अध्यक्षता म उच्च स्तरीय समीक्षा बइठका होइस। ए बइठका म मुख्यमंत्री विष्णुदेव साय अउ उपमुख्यमंत्री अरूण साव अउ विजय शर्मा समेत दूसर मंत्री सामिल होइन।
बइठका म मुख्यमंत्री अउ विधानसभा अध्यक्ष ह प्रधानमंत्री के रायपुर आगमन के तियारी ल लेके विस्तार ले समीक्षा करीन। विधानसभा अध्यक्ष ह किहीन कि नवा विधानसभा भवन छत्तीसगढ़ के पहिचान बनही। ओमन जम्मांं विभाग के अधिकारी मन ल नवा विधानसभा भवन ल इही महीना के आखिरी तक हर हाल म पूरा करे के निरदेस दीन।